Pagkinabuhi Yana Uyon ha Katuyoan han Dios

“[Hi Kristo] namatay tungod ha ngatanan, basi nga an mga buhi diri na magkabubuhi tungod ha ira la ngahaw.”—2 KORINTO 5:15.

1. Isaysay an eksperyensya han usa nga misyonero ha iya teritoryo.

 “AN AMON awto an siyahan nga sarakyan hin sibilyan nga nakasulod ha hirayo nga baryo ha Aprika katapos han girra sibil,” siring han misyonero nga hi Aaron. a “Nawad-an kami hin komunikasyon ha gutiay nga kongregasyon didto, ngan kinahanglan panginanoon namon an mga panginahanglan han kabugtoan. Dugang pa ha pagkaon, bado, ngan literatura ha Biblia, gindara namon an video nga Jehovah’s Witnesses—The Organization Behind the Name. b Damu hinduro nga interesado an nagkita hito ha ‘sinehan’ han baryo—usa ka daku nga payag nga may-ada VCR ngan TV—salit makaduha namon ito igpasalida. Damu an nagtikang pag-aram ha Biblia sugad nga resulta han kada pagpasalida hito. Matin-aw, waray gud makawang an amon mga pangalimbasog.”

2. (a) Kay ano nga an mga Kristiano nagdidesisyon nga gamiton an ira kinabuhi ha pag-alagad ha Dios? (b) Ano nga mga pakiana an aton paghihisgotan yana?

² Kay ano nga ginbuhat ni Aaron ngan han iya mga kaupod iton makuri nga buruhaton? Tungod kay mapasalamaton hira ha halad lukat ni Jesu-Kristo, ira igindedikar an ira kinabuhi ha Dios ngan karuyag nira nga gamiton ito uyon ha katuyoan han Dios. Pariho ha ira, an ngatanan nga dedikado nga Kristiano nagdesisyon nga diri na ‘magkinabuhi tungod ha ira la ngahaw’ kondi buhaton an ngatanan nga ira mahihimo para ha “maopay nga sumat.” (2 Korinto 5:15; 1 Korinto 9:23) Maaram hira nga kon matapos na ini nga sistema, mawawaray kapulsanan an ngatanan nga kwarta ngan kabantogan ha kalibotan. Salit karuyag nira gamiton an ira kinabuhi ngan kusog uyon ha katuyoan han Dios. (Eklesiastes 12:1) Paonan-o naton mahihimo ini? Diin naton hiaagian an ginkikinahanglan nga kaisog ngan kusog ha pagbuhat hito? Ngan ano nga mga pribilehiyo han pag-alagad an abrido ha aton?

Paghimo hin Mainuswagon Ngan Praktikal nga mga Paagi

3. Ano nga masayon nga mga buruhaton an nahiuupod ha pagbuhat han kaburut-on han Dios?

³ Para ha tinuod nga mga Kristiano, bug-os-kinabuhi nga pangalimbasog an pagbuhat han kaburut-on han Dios. Kasagaran nga nagtitikang ito ha masayon nga mga buruhaton sugad han adlaw-adlaw nga pagbasa han Biblia, pagpalista ha Teokratiko nga Eskwelahan ha Ministeryo, pakigbahin ha pagsangyaw, ngan pag-uswag ngadto ha pagpabawtismo. Samtang nag-uuswag kita, nahinunumdoman naton an ginsiring ni apostol Pablo: “Magmaabtik ka hini nga mga bagay, buhata gud ini nga mga bagay, basi nga an imo kauswagan mahipahayag ha ngatanan.” (1 Timoteo 4:15) An sugad nga pag-uswag diri paghimaya ha kalugaringon kondi pagpakita han aton determinasyon nga may-pagsakripisyo nga buhaton an kaburut-on han Dios. Ipinapakita han aton pagbuhat hito nga nagpapagiya kita ha Dios ha ngatanan nga buruhaton ha kinabuhi, ngan ginigiyahan kita niya hin mas maopay gud kay ha aton mahihimo.—Salmo 32:8.

4. Paonan-o naton malalamposan an kabaraka nga waray basihan?

⁴ Kondi, an pag-alang o duro nga kabaraka ha kalugaringon mahimo makaulang ha aton pag-uswag ha pag-alagad ha Dios. (Eklesiastes 11:4) Salit, antes kita magin malipayon gud ha pag-alagad ha Dios ngan ha pagbulig ha iba, bangin kinahanglan malamposan anay naton an aton kabaraka. Pananglitan, hi Erik nagplano pagbulig ha kongregasyon nga iba an yinaknan. Kondi nabaraka hiya: ‘Kakarawaton ba ako didto?  Maruruyagan ko ba an kabugtoan? Maruruyag ba hira ha akon?’ Hiya nagsiring: “Ha kataposan nasantop ko nga kinahanglan mas mabaraka ako ha kabugtoan kay ha akon kalugaringon. Nagdesisyon ako nga diri na mabaraka ngan magsentro la hin atensyon ha anoman nga maibubulig ko ha iba. Nag-ampo ako para han bulig ngan iginpadayon an akon plano. Yana, malipayon gud ako ha akon pag-alagad didto.” (Roma 4:20) Oo, kon mas nagsasakripisyo kita ha pag-alagad ha Dios ngan pagbulig ha iba, magigin mas malipayon ngan kontento kita.

5. Kay ano nga ginkikinahanglan an maopay nga pagplano ha aton pagkinabuhi uyon ha katuyoan han Dios? Iilustrar.

⁵ Basi malampuson nga magkinabuhi uyon ha katuyoan han Dios, kinahanglan planuhon liwat naton hin maopay an aton mga buruhaton. Maopay nga likyan naton an pagpinangutang nga mahimo mag-uripon ha aton dinhi hini nga sistema ngan makaiban han aton kagawasan ha pagbuhat han buruhaton han Dios. An Biblia nagpapahinumdom ha aton: “An parautang usa nga surugoon han urutangan.” (Proberbios 22:7) An pagsarig kan Jehova ngan pag-una han espirituwal nga mga butang mabulig ha aton ha pagsentro ha importante nga mga buruhaton. Pananglitan, hi Guoming ngan an iya duha nga bugto nga babaye naukoy upod han ira iroy ha lugar nga mahal an pagpalit o pagplete hin balay ngan makuri an pagkaada permanente nga trabaho. Pinaagi han maopay nga paggamit han kwarta ngan pagburubligay ha gastos, nagkakaada hira han ira panginahanglan bisan ha panahon nga an iba ha ira waray trabaho. “Usahay, an iba ha amon waray pakabuhi,” siring ni Guoming. “Pero, nakakapadayon pa gihapon kami ha pagpayunir ngan pagmangno ha amon nanay. Mapasalamaton kami nga diri karuyag ni Nanay nga umundang kami ha pagpayunir basi la maihatag ha iya an kahimyang ha kinabuhi.”—2 Korinto 12:14; Hebreo 13:5.

6. Ano nga ehemplo an nagpapakita kon paonan-o naton maipapahiuyon an aton kinabuhi ha katuyoan han Dios?

⁶ Kon okupado ka gud ha sekular nga mga tinguha—ha pinansyal o iba pa—an pag-una han katuyoan han Dios mahimo magkinahanglan hin dagku nga pagbag-o. Kasagaran nga diri masayon buhaton an sugad nga mga pagbag-o, ngan diri ka sadang maghunahuna nga pakyas ka na kon magsayop ka ha siyahan mo nga mga pangalimbasog. Tagda hi Koichi, nga nagkaproblema ha paghatag hin sobra nga panahon ha kaliawan. Nag-aram hiya han Biblia han tinedyer pa hiya, kondi ha damu ka tuig, haros naubos an iya panahon ha mga video game. Usa ka adlaw hi Koichi nagsiring ha iya kalugaringon: ‘Ano ba ini nga akon ginbubuhat? Sobra 30 anyos na ako, ngan waray ako ginbubuhat nga mapulsanon ha akon kinabuhi!’ Nag-aram utro hiya han Biblia ngan ginkarawat an bulig han kongregasyon. Bisan kon hinay-hinay la an iya pagbag-o, nagpadayon gud hiya. Ha bulig han duro nga pag-inampo ngan han mahigugmaon nga pagdasig han iba, ha urhi nalamposan niya an iya problema. (Lukas 11:9) Hi Koichi usa na nga malipayon nga ministeryal yana.

Mahibaro nga Magin Timbang

7. Kay ano nga kinahanglan magin timbang kita ha pagbuhat han buruhaton han Dios?

⁷ An pagkinabuhi uyon ha katuyoan han Dios takos han aton bug-os-kalag nga pangalimbasog. Diri gud kita sadang mag-alang o mahubya ha pagbuhat hito. (Hebreo 6:11, 12) Kondi, diri karuyag ni Jehova nga makapoy kita hinduro—ha aton lawas, hunahuna, o emosyon. An mapainubsanon nga pagkilala nga diri naton mahihimo an buruhaton han Dios ha aton kalugaringon nga kusog naghihimaya ha iya ngan nagpapakita liwat nga timbang kita. (1 Pedro 4:11) Hi Jehova nagsasaad nga ihahatag niya ha aton an kinahanglanon nga kusog ha pagbuhat han iya kaburut-on, kondi kinahanglan diri naton piriton an aton kalugaringon nga buhaton an diri naton maaakos ha pangalimbasog nga buhaton an diri niya iginpapabuhat ha aton. (2 Korinto 4:7) Basi makapadayon ha pag-alagad ha Dios nga diri nakakapoy, kinahanglan gamiton naton hin maaramon an aton kusog.

8. Ano an nahitabo han an usa nga batan-on nga Kristiano nangalimbasog nga buhaton an gimaopayi para kan Jehova ngan ha iya trabaho, ngan ano nga pagbag-o an iya ginhimo?

⁸ Pananglitan, ha sulod hin duha ka tuig hi Ji Hye, nga naukoy ha Este nga Asia, may-ada makuri hinduro nga trabaho samtang nagpapayunir hiya. “Pinangalimbasogan ko nga buhaton an gimaopayi para kan Jehova ngan ha akon trabaho,” siring niya, “kondi lima ka oras la an akon katurog  ha gab-i. Ha urhi, kapoy na an akon hunahuna salit diri na ako nakakag-aram han espirituwal nga mga butang, ngan haros waray na ako kalipay hito.” Basi makag-alagad kan Jehova ha iya ‘bug-os nga kasingkasing, kalag, hunahuna, ngan kusog,’ namiling hi Ji Hye hin trabaho nga diri ura-ura kakapoy. (Markos 12:30) “Bisan kon ginpipirit ako han akon pamilya nga kumita hin damu nga kwarta, nangalimbasog ako nga unahon an katuyoan han Dios,” siring niya. “Igo pa gihapon an akon sweldo para ha mga kinahanglanon, sugad han angayan nga mga bado. Ngan maopay an akon pag-abat yana nga mas hilawig na an akon katurog! Malipayon ako ha ministeryo, ngan mas marig-on yana an akon espirituwalidad. Tungod ito kay waray na ako panahon para ha nakakadani ngan nakakaulang nga mga butang ha kalibotan.”—Eklesiastes 4:6; Mateo 6:24, 28-30.

9. Paonan-o an aton mga pangalimbasog mahimo makaapekto ha mga tawo ha kanataran?

⁹ Diri ngatanan makakag-alagad ha Dios sugad nga bug-os-panahon nga ebanghelisador. Kon lagas ka na, maluya an panlawas, o may iba nga kaulangan, hinumdumi nga pinabibilhan gud ni Jehova an imo pagkamatinumanon ngan an bisan ano nga bug-os-kasingkasing nga pag-alagad nga imo mahihimo. (Lukas 21:2, 3) Salit, diri naton sadang minuson an epekto ha iba han aton mga pangalimbasog, bisan kon limitado la ito. Pananglitan, sidngon naton nga binisita kita ha pipira nga balay ngan baga hin waray interesado ha aton mensahe. Pagbaya naton, bangin maiha-iha nga pag-iristoryahan han mga tagbalay an aton pagbisita, bisan kon waray nakiistorya ha aton! Diri naton ginlalaoman nga an ngatanan nga namamati ha maopay nga sumat magios uyon hito, kondi magios an iba. (Mateo 13:19-23) An iba bangin gumios ha urhi kon magbag-o an mga kahimtang ha kalibotan o ha ira kinabuhi. Ha anoman nga kahimtang, pinaagi han pagbuhat han aton mahihimo ha ministeryo ha publiko, ginbubuhat naton an buruhaton han Dios. Kita “mga kabulig han Dios ha pagbuhat.”—1 Korinto 3:9.

10. Ano nga mga pribilehiyo an abrido ha ngatanan ha kongregasyon?

¹⁰ Dugang pa, kita ngatanan makakabulig ha aton mga kapamilya ngan ha espirituwal nga kabugtoan. (Galasia 6:10) An aton susbaranan mahimo magkaada hilarom ngan nagpapadayon nga epekto ha iba. (Eklesiastes 11:1, 6) Kon maduruto nga ginbubuhat han mga tigurang ngan mga ministeryal an ira buruhaton, nakakabulig hira ha espirituwal nga kahimsog ngan karig-on han kongregasyon, ngan nag-uuswag an Kristiano nga buruhaton. Ginpapasarig kita nga kon damu an aton ginbubuhat ha buruhaton han Ginoo, an  aton pangalimbasog ‘diri mawawaray kapulsanan.’—1 Korinto 15:58.

Himoa nga Karera an Pagkinabuhi Uyon ha Katuyoan han Dios

11. Gawas pa ha pagbuhat upod han aton kongregasyon, mahimo kita magkaada hin ano nga mga higayon?

¹¹ Sugad nga mga Kristiano, malipayon kita ha kinabuhi, ngan karuyag naton himayaon an Dios ha ngatanan nga aton ginbubuhat. (1 Korinto 10:31) Kon matinumanon nga iginsasangyaw naton an maopay nga sumat han Ginhadian ngan gintututdoan an iba nga sundon an ngatanan nga iginsugo ni Jesus, makakabiling kita hin damu nga makapatagbaw nga paagi ha pag-alagad ha Dios. (Mateo 24:14; 28:19, 20) Gawas pa han pagbuhat upod han lokal nga kongregasyon, bangin may-ada kita mga higayon ha pagbulig ha lugar nga mas daku an panginahanglan, ha iba man nga teritoryo, yinaknan, o nasud. An kwalipikado nga mga tigurang ngan mga ministeryal nga solo pa mahimo imbitaron nga mag-eskwela ha Ministerial Training School, ngan katapos hito, bumulig ha mga kongregasyon nga nanginginahanglan hin hamtong nga mga Kristiano, ha aton nasud o ha iba man. An mga mag-asawa nga aada ha bug-os-panahon nga ministeryo bangin kwalipikado umiskwela ha Gilead ngan magin misyonero ha langyaw nga teritoryo. Ngan nagpapadayon an panginahanglan hin mga boluntaryo para ha magkalain-lain nga trabaho ha Bethel ngan ha pagtukod ngan pagmintinar hin mga katirokan ngan mga sanga nga opisina.

12, 13. (a) Paonan-o ka makakadesisyon kon ano nga pribilehiyo han pag-alagad an imo pangangalimbasogan? (b) Iilustrar kon paonan-o an eksperyensya ha usa nga toka mahimo magin mapulsanon ha iba nga toka.

¹² Ano nga pribilehiyo han pag-alagad an sadang mo pangalimbasogan? Sugad nga dedikado nga surugoon ni Jehova, sarig pirme ha iya ngan ha iya organisasyon para han giya. An iya “maopay nga espiritu” mabulig ha imo ha paghimo hin husto nga desisyon. (Nehemia 9:20) Agsob nga an usa nga toka nagbabansay ha aton para hin iba nga toka, ngan an eksperyensya ngan mga kaabtik nga nahibabaroan naton ha usa nga pribilehiyo han pag-alagad bangin mapulsanon ha iba nga toka ha urhi.

¹³ Pananglitan, hi Dennis ngan an iya asawa nga hi Jenny regular nga nagtatrabaho ha mga proyekto nga pagtukod hin Kingdom Hall. Katapos han bagyo nga Katrina nga nakadaot ha sur nga bahin han Estados Unidos, nagboluntaryo hira pagbulig ha mga nanginginahanglan. Hi Dennis nagsumat: “Nalipay gud kami nga an mga kaabtik nga hinbaroan namon ha pagtukod hin mga Kingdom Hall nakakabulig ha aton kabugtoan. Makapabantad gud an apresasyon hadton nabuligan namon. Limitado la an kalamposan ha pag-ayad han kadam-an han iba nga grupo ha  pagbulig. An mga Saksi ni Jehova nakaayad o nakagtukod-utro na hin sobra 5,300 nga balay ngan damu nga Kingdom Hall. Nakikita ini han mga tawo ngan yana mas interesado na hira ha mensahe mahitungod han Ginhadian.”

14. Ano an imo bubuhaton kon ginhihingyap mo an bug-os-panahon nga ministeryo?

¹⁴ Mahimo ka ba magkinabuhi uyon ha katuyoan han Dios pinaagi han pagpili han bug-os-panahon nga ministeryo sugad nga imo karera? Kon amo, sigurado nga makarawat ka hin damu nga bendisyon. Kon diri mo ito mahihimo tungod han imo kahimtang yana, bangin puydi ka maghimo hin mga pagbag-o. Pag-ampo sugad han ginbuhat ni Nehemia han naghingyap gud hiya hin importante nga toka: ‘O Jehova, nangangamaya ako ha imo, pauswaga an imo surugoon.’ (Nehemia 1:11) Katapos, buhata an uyon ha imo igin-ampo nga nasarig ha ‘Parapamati han pag-ampo.’ (Salmo 65:2) Basi bendisyonan ni Jehova an imo mga pangalimbasog ha pag-alagad ha iya hin dugang pa, kinahanglan buhaton mo anay ito. Kon nakagdesisyon ka na ha pagtikang ha bug-os-panahon nga ministeryo, ayaw na ito bag-oha. Samtang nalabay an panahon, madudugangan an imo eksperyensya, ngan magigin mas malipayon ka.

Makapatagbaw Gud nga Kinabuhi

15. (a) Paonan-o kita magpapahimulos ha pakiistorya ha mag-iha na nga surugoon han Dios ngan pagbasa mahitungod han ira istorya ha kinabuhi? (b) Pag-unabi hin istorya ha kinabuhi nga nakaparig-on gud ha imo.

¹⁵ Ano nga mga resulta an malalaoman mo ha pagkinabuhi uyon ha katuyoan han Dios? Pakiistorya ha mag-iha na nga surugoon ni Jehova, labi na adton damu ka tuig na ha bug-os-panahon nga ministeryo. Makapatagbaw gud ngan may katuyoan an ira kinabuhi! (Proberbios 10:22) Isusumat nira ha imo nga bisan ha magkuri nga kahimtang, hi Jehova diri gud nagpapasibaya ha pagbulig ha ira basi magkaada han ira ginkikinahanglan ngan hin labaw pa hito. (Filipos 4:11-13) Tikang han 1955 tubtob 1961, an The Watchtower nagpublikar hin serye han mga istorya ha kinabuhi han magtinumanon nga tawo ilarom han ulohan nga “Pursuing My Purpose in Life (Pagpamiling han Akon Katuyoan ha Kinabuhi).” Tikang hito nga panahon, ginatos nga iba pa nga istorya ha kinabuhi an iginpupublikar. Ipinapakita han kada istorya an kadasig ngan kalipay nga nagpapahinumdom ha aton han mga asoy nga mababasa ha libro han Biblia nga Mga Buhat. An pagbasa han sugad nga makaruruyag nga mga istorya magpapagios ha imo nga sumiring, ‘Ito an klase hin kinabuhi nga karuyag ko!’

16. Ha ano nga paagi nagigin may katuyoan ngan makalilipay an kinabuhi han Kristiano?

¹⁶ Hi Aaron, nga gin-unabi ha tinikangan, nahinumdom: “Ha Aprika, agsob ako igkita hin mga batan-on nga napakadto ha magkalain-lain nga lugar ha nasud basi mamiling hin katuyoan ha kinabuhi. Kadam-an an waray gud makabiling hito. Kondi aanhi kami, nagkikinabuhi uyon ha katuyoan han Dios pinaagi han pagsangyaw han maopay nga sumat han Ginhadian, ngan malipayon ngan may katuyoan an amon kinabuhi. Naeksperyensyahan namon mismo nga mas daku an kalipay ha paghatag kay ha pagkarawat.”—Buhat 20:35.

17. Kay ano nga kinahanglan magkinabuhi kita yana uyon ha katuyoan han Dios?

¹⁷ Kumusta ka man? Ano nga katuyoan an imo ginbibiling? Kon waray ka espisipiko nga tumong ha espirituwal, mauubos dayon an imo panahon ngan kusog ha iba nga tinguha. Kay ano nga karagan an imo presyoso nga kinabuhi ha mga butang nga igin-aaghat ni Satanas? Diri na maiha, pag-abot han “daku nga kagol-anan,” mawawaray pulos an materyal nga mga bahandi ngan mga katungdanan ha kalibotan. An importante amo an aton relasyon kan Jehova. Mapasalamaton gud kita nga nag-aalagad kita ha Dios ngan nabulig ha iba ngan bug-os nga nagkikinabuhi uyon ha katuyoan han Dios!—Mateo 24:21; Pahayag 7:14, 15.

[Mga footnote]

Maisasaysay Mo Ba?

• Ano an inaabat ni Jehova ha aton pag-alagad ha iya?

• Paonan-o an pagin praktikal ngan timbang nabulig ha aton ha pag-alagad ha Dios ngan pagbulig ha iba?

• Ano nga mga pribilehiyo an abrido ha aton?

• Paonan-o kita magkikinabuhi yana nga may-ada gud katuyoan?

[Mga Pakiana]

[Mga Retrato ha pahina 23]

Ginkikinahanglan an pagin timbang basi bug-os-kalag nga makapadayon kita ha pag-alagad kan Jehova

[Mga Retrato ha pahina 24]

Damu an pribilehiyo ha sagrado nga pag-alagad