Pagpamiling hin Makapatagbaw nga Katuyoan ha Kinabuhi

“An ngatanan nga may-ada gininhawa magdayaw kan Jehova.”—SALMO 150:6.

1. Isaysay an pagpamiling han usa nga batan-on hin katuyoan ha kinabuhi.

 “NAG-ESKWELA ako ha pagkadoktor tungod kay karuyag ko gamiton an akon kinabuhi ha pagbulig ha mga tawo. Inabat ko liwat nga magigin kilala ako ngan riko salit magigin malipayon ako,” siring ni Seung Jin nga nagtubo ha Korea. a “Han nasantop ko nga gutiay gud la ngay-an an maibubulig han mga doktor ha mga tawo, nasubo ako. Salit nag-aram ako hin fine arts, kondi gutiay la nga kaopayan an naihatag hito ha iba, ngan inabat ko nga akon la kalugaringon an akon ginhuhunahuna. Tungod hito, nagmaestro ako ngan waray pag-iha nasantop ko nga mga impormasyon la an akon maitututdo, diri an giya nga mahimo magresulta hin tinuod nga kalipay.” Pariho han damu, namimiling hi Seung Jin hin makapatagbaw nga katuyoan ha kinabuhi.

2. (a) Ano an kahulogan han pagkaada hin katuyoan ha kinabuhi? (b) Kay ano nga makakasiring kita nga an Maglalarang may-ada katuyoan ha pagbutang ha aton dinhi?

² An pagkaada tinuod nga katuyoan ha kinabuhi nangangahulogan hin pagkaada hinungdan para mabuhi, matin-aw nga tumong, ngan usa nga katuyoan nga ginpapangalimbasogan gud naton nga makab-ot. Mahimo gud ba magkaada hin sugad nga katuyoan an mga tawo? Oo! Tungod kay ginlarang kita nga may-ada intelihensya, konsensya, ngan abilidad ha pagturutimbang, nagpapasabot ini nga an Maglalarang may-ada maopay nga katuyoan ha pagbutang ha aton dinhi ha tuna. Salit, makatadunganon la nga hiaagian ngan matutuman naton an aton tinuod nga katuyoan pinaagi la han pagkinabuhi uyon ha katuyoan han Maglalarang.

3. Ano an nahiuupod ha katuyoan han Dios para ha mga tawo?

³ An Biblia nagsusumat nga damu an nahiuupod ha katuyoan han Dios para ha aton. Pananglitan, an urusahon nga pagkahimo ha aton kapahayagan gud han may pagsakripisyo nga gugma han Dios. (Salmo 40:5; 139:14) Salit, an pagkinabuhi uyon ha katuyoan han Dios amo an pagsubad han iya may pagsakripisyo nga gugma ha iba. (1 Juan 4:7-11) Nangangahulogan liwat ito hin pagsugot ha mga instruksyon han Dios nga nabulig ha aton nga magkinabuhi uyon ha iya mahigugmaon nga katuyoan.—Eklesiastes 12:13; 1 Juan 5:3.

4. (a) Ano an ginkikinahanglan basi magkaada tinuod nga katuyoan ha kinabuhi? (b) Ano an gimaopayi nga katuyoan nga mabibilngan han bisan hin-o?

 ⁴ Katuyoan liwat han Dios nga an mga tawo magkinabuhi nga malipayon ngan mamurayawon upod han iba nga tawo ngan han iba pa nga linarang. (Genesis 1:26; 2:15) Kondi, ano an kinahanglan buhaton naton basi magin malipayon, talwas, ngan mamurayawon? Pariho hin bata nga kinahanglan la umabat han presensya han iya mga kag-anak basi magin malipayon ngan talwas, kinahanglan magkaada kita maopay nga relasyon ha aton langitnon nga Amay basi mabilngan an tinuod nga katagbaw ngan katuyoan ha kinabuhi. (Hebreo 12:9) Ginhihimo han Dios nga magin posible an sugad nga relasyon ha iya pinaagi han pagtugot ha aton nga magin duok ha iya ngan pinaagi han pagpamati ha aton mga pag-ampo. (Jakobo 4:8; 1 Juan 5:14, 15) Kon may pagtoo nga ‘maglakat kita upod han Dios’ ngan magin sangkay niya, mapapalipay ngan madadayaw naton an aton langitnon nga Amay. (Genesis 6:9; Proberbios 23:15, 16; Jakobo 2:23) Ito an gimaopayi nga katuyoan nga mabibilngan han bisan hin-o. An salmista nagsurat: “An ngatanan nga may-ada gininhawa magdayaw kan Jehova.”—Salmo 150:6.

Ano an Imo Katuyoan ha Kinabuhi?

5. Kay ano nga diri-maaramon nga unahon an materyal nga mga butang?

⁵ Bahin han katuyoan han Dios para ha aton nga mangnoan naton an aton kalugaringon ngan an aton pamilya. Kaupod hini an pagtagana han mga panginahanglan ha pisikal ngan ha espirituwal. Kondi, ginkikinahanglan an pagin timbang ha pagbuhat hini, basi an sekular nga mga buruhaton diri makaulang ha mas importante nga espirituwal nga buruhaton. (Mateo 4:4; 6:33) Makasurubo nga an prayoridad han damu nga tawo haros an pagkaada gud la hin materyal nga mga butang. Kondi, diri-maaramon an pangalimbasog ha pagtagbaw han ngatanan nga aton panginahanglan pinaagi la han materyal nga mga butang. Usa nga bag-o la nga surbey ha mga milyonaryo ha Asia an nagpapakita nga damu ha ira an “naabat hin kawaray-kasigurohan ngan kabaraka, bisan kon kilala hira ngan naabat nga may-ada nahihimo tungod han ira karikohan.”—Eklesiastes 5:11.

6. Ano an iginsagdon ni Jesus may kalabotan ha pagtinguha hin mga manggad?

⁶ Ginhisgotan ni Jesus an mahitungod han “limbong han mga manggad.” (Markos 4:19) Ha ano nga paagi nakakalimbong an mga manggad? Mahimo hunahunaon han mga tawo nga nakakalipay ito ha ira, kondi diri ngay-an. “Hiya nga nahigugma han salapi diri matatagbaw,” siring han maaramon nga hi Hadi Salomon. (Eklesiastes 5:10) Kondi posible ba an pagkab-ot hin materyalistiko nga mga tumong ngan bug-os-kalag pa gihapon nga mag-alagad ha Dios? Diri. Hi Jesus nagsaysay: “Waray tawo nga makakagmangno hin duha nga agaron; kay magdudumot ha usa, ngan maghigugma han ikaduha; kon iya pagsundon an usa, ngan pagtatamayon an usa. Diri kamo makakagmangno ha Dios ngan ha manggad.” Ginsagda ni Jesus an iya mga sumurunod nga diri magtirok hin mga bahandi ha tuna, kondi “mga bahandi ha langit,” nga amo an pagkaada maopay nga rekord ha Dios, nga “maaram kon ano nga mga butang an iyo ginkikinahanglan, nga diri pa kamo nangangaro ha iya.”—Mateo 6:8, 19-25.

7. Paonan-o magigin marig-on an aton paglaom ha “kinabuhi nga totoo”?

⁷ Han nagsurat hi apostol Pablo kan Timoteo nga iya igkasi-magburuhat, marig-on nga nagsagdon hiya may kalabotan hini. Hiya nagsiring: “Sugoa adton mga manggaranon . . . nga diri nira ibutang an ira paglaom dida ha diri kamarig-on han mga bahandi, kondi ha Dios, nga nahatag ha aton hin kahuraan ha ngatanan ha pagkalipay . . . , nga maandam hira ha panhatag, ngan ha kalooy. Nga nagtitirok ha ira kalugaringon hin maopay nga patukoranan andam han tidaraon nga panahon, basi nga madakop nira an kinabuhi nga amo an kinabuhi nga totoo.”—1 Timoteo 6:17-19.

Ano “an Kinabuhi nga Totoo”?

8. (a) Kay ano nga damu an nangangalimbasog nga magin riko ngan kilala? (b) Ano an diri nira nasasabtan?

⁸ Para ha kadam-an, “an kinabuhi nga totoo” nagpapasabot hin kahimyang ngan kalipay. Usa nga magasin han mga sumat ha Asia an nasiring: “Adton nagkikita hin mga sine o TV nahibabaro maghingyap han ira nakikita, mag-ungara han ira mga karuyag.” Nagigin tumong ha kinabuhi han damu nga tawo nga magin riko ngan  kilala. Basi makab-ot ini, iginsasakripisyo nira an ira pagkabatan-on, kahimsog, pamilya, ngan pagsingba ha Dios. Pipira la an namumurubuot nga an sugad nga ipinapakita han media mga kapahayagan la han “espiritu han kalibotan”—an kalyap nga panhunahuna nga nakakaimpluwensya ha kadam-an ngan nag-aaghat ha ira nga kumontra ha katuyoan han Dios para ha katawohan. (1 Korinto 2:12; Efeso 2:2) Diri urusahon nga damu hinduro an masurub-on yana!—Proberbios 18:11; 23:4, 5.

9. Ano an diri gud mahihimo han mga tawo, ngan kay ano?

⁹ Kumusta man adton nagsasakripisyo para ha kaopayan han iba, nga nangangalimbasog pagsulbad han gutom, sakit, ngan kawaray-hustisya? Agsob nga daku an naibubulig han ira darayawon ngan may pagsakripisyo nga mga pangalimbasog. Kondi, bisan pa han ira maopay gud nga mga pangalimbasog, diri gud nira mababag-o ini nga sistema basi magin matadong ngan maopay. Kay ano? Tungod kay ha pagkamatuod ‘an bug-os nga kalibotan kanan yawan-on’—kan Satanas—ngan diri niya karuyag nga mabag-o ito.—1 Juan 5:19.

10. San-o an magtinumanon magpapahimulos han “kinabuhi nga totoo”?

¹⁰ Makasurubo gud kon an ginlalaoman la han usa amo an kinabuhi dinhi hini nga kalibotan! “Kon kita may paglaom kan Kristo hini la niyan nga kinabuhi, kita an labi [nga] magpakalolooy ha ngatanan nga mga tawo,” nagsurat hi Pablo. “Pangaon ngan panginom kita, kay buwas mapatay kita,” ini an disposisyon hadton natoo nga sugad la hini an kinabuhi. (1 Korinto 15:19, 32) Kondi may-ada kita ginlalaoman ha tidaraon, nga ‘sumala ha saad han Dios naghuhulat kita hin bag-o nga langit ngan bag-o nga tuna, diin mag-uukoy an katadongan.’ (2 Pedro 3:13) Hito nga panahon, an mga Kristiano magpapahimulos han “kinabuhi nga totoo,” nga amo an “kinabuhi nga waray kataposan” ha kahingpitan, ha langit man o ha tuna ilarom han mahigugmaon nga pagmando han Ginhadian han Dios!—1 Timoteo 6:12.

11. Kay ano nga may katuyoan an pagsuporta ha buruhaton han Ginhadian han Dios?

¹¹ An Ginhadian han Dios la an bug-os nga maglalampos ha pagsulbad han mga problema han katawohan. Salit, an pagsuporta ha buruhaton han Ginhadian han Dios amo an pinakamakapatagbaw nga pangalimbasog nga mahihimo han bisan hin-o. (Juan 4:34) Samtang nakikigbahin kita hito, may-ada kita duok nga relasyon ha aton langitnon nga Amay. Malipayon  liwat kita ha pag-alagad upod han minilyon nga espirituwal nga kabugtoan nga nangangalimbasog ha pagkab-ot han pariho nga katuyoan ha kinabuhi.

Pagbuhat han Husto nga mga Sakripisyo

12. Isaysay an kaibahan han kinabuhi ha presente nga sistema ngan han “kinabuhi nga totoo.”

¹² An kalibotan yana “nawawara, ngan an iya kairiphon,” siring han Biblia. Waray bahin han kalibotan ni Satanas, upod na an kabantogan ngan karikohan, nga diri mabubungkag, “kondi an nagbubuhat han kaburut-on han Dios nagpapadayon ha gihapon.” (1 Juan 2:15-17) Diri sugad han masayon mawara nga mga manggad, madaliay la nga kabantogan, ngan hababaw nga kalipay ha presente nga sistema, “an kinabuhi nga totoo”—kinabuhi nga waray kataposan ilarom han Ginhadian han Dios—permanente ngan takos han aton mga pagsakripisyo, kon husto nga ginbubuhat naton ito.

13. Ha ano nga mga paagi nagsakripisyo an usa nga mag-asawa?

¹³ Tagda hira Henry ngan Suzanne. Bug-os an ira pagtoo ha saad han Dios nga bubuligan niya an ngatanan nga gin-uuna an Ginhadian. (Mateo 6:33) Salit, ginpili nira nga mag-ukoy ha simple nga balay basi imbes nga hira nga duha an magtatrabaho, may-ada hira mas damu nga panahon ha espirituwal nga buruhaton upod an ira duha nga anak. (Hebreo 13:15, 16) Diri masabtan han usa nga sinsero nga sangkay an ira desisyon. Hiya nagsiring: “Suzanne, kon karuyag mo gud mag-ukoy ha mas maopay nga balay, kinahanglan may-ada ka isakripisyo.” Kondi, maaram hira Henry ngan Suzanne nga kon uunahon nira hi Jehova, may-ada ‘saad hini niyan nga kinabuhi ngan ha tiarabot pa.’ (1 Timoteo 4:8; Tito 2:12) An ira mga anak nagin magdasigon nga bug-os-panahon nga ebanghelisador. Sugad nga pamilya, inaabat nira nga waray kulang ha ira; lugod, tungod kay nagin katuyoan nira an pagkab-ot han “kinabuhi nga totoo,” nagpahimulos gud hira.—Filipos 3:8; 1 Timoteo 6:6-8.

Ayaw ‘Gamita hin Labi an Kalibotan’

14. Ano an magigin maraot nga resulta kon hingalimtan naton an aton tinuod nga katuyoan?

¹⁴ Kondi, peligroso gud kon hingalimtan naton an aton tinuod nga katuyoan ngan magluya an aton paglaom ha “kinabuhi nga totoo.” Namimeligro kita nga ‘malumos ha mga pangarit, kamanggaran, ngan kalipayan han kinabuhi.’ (Lukas 8:14) An diri-mapugngan nga paghingyap hin materyal nga mga butang ngan an ‘mga pangarit ha kinabuhi’ mahimo magresulta hin duro nga kahidabi hini nga sistema. (Lukas 21:34) Makasurubo, nagin okupado hinduro an iba ha kalyap nga hingyap nga magin manggaranon ngan “nagsimang ha ira pagtoo, ngan nagtugob ha ira hin damu nga kasakitan,” nawara pa ngani an ira presyoso nga relasyon kan Jehova. Makasurubo gud ini nga resulta han diri pagtipig hin marig-on nga paglaom ha kinabuhi nga waray kataposan!—1 Timoteo 6:9, 10, 12; Proberbios 28:20.

15. Paonan-o nagpahimulos an usa nga pamilya tungod han ‘diri paggamit hin labi han kalibotan’?

¹⁵ Hi Pablo nagsagdon nga ‘an mga nagamit han kalibotan, magin sugad ha waray paggamit hin labi hito.’ (1 Korinto 7:31) Ginsunod ini nira Keith ngan Bonnie. “Nagin Saksi ni Jehova ako han hirani na ako maggradwar ha pagkadentista,” siring ni Keith. “May-ada ako mapipilian. Puydi ako kumarawat hin damu nga pasyente ngan magkaada daku nga kita, kondi makakaulang ito han amon pag-alagad ha Dios. Waray ako kumarawat hin damu nga pasyente basi magkaada mas damu nga panahon para ha espirituwal ngan emosyonal nga kaopayan han akon asawa ngan lima nga anak. Bisan kon talagsa la kami magkaada hin sobra nga kwarta, nahibaro kami ha pag-ekonomiya, ngan may-ada kami pirme han amon kinahanglanon. An amon pamilya duok, puno hin gugma, ngan malipayon gud. Inabot an panahon nga nagin bug-os-panahon nga ebanghelisador kami ngatanan. Yana an amon mga anak malipayon nga mga inasaw-an na, ngan tulo ha ira an may-ada na mga anak. An ira pamilya maglipayon liwat tungod kay padayon nga inuuna nira an katuyoan ni Jehova.”

Unaha an Katuyoan han Dios ha Imo Kinabuhi

16, 17. Ano nga mga ehemplo han mga tawo nga may mga abilidad an iginsasaysay ha Biblia, ngan ano an aton nahinunumdoman ha ira?

¹⁶ Mababasa naton ha Biblia an mga ehemplo  hadton nagkinabuhi ngan waray magkinabuhi uyon ha katuyoan han Dios. An mga leksyon hito naaplikar ha ngatanan anoman an ira pangidaron, kultura, ngan kahimtang. (Roma 15:4; 1 Korinto 10:6, 11) Hi Nimrod nagtukod hin dagku nga syudad, kondi ginbuhat niya ito ha pagkontra kan Jehova. (Genesis 10:8, 9) Kondi damu an mag-opay nga susbaranan. Pananglitan, waray magin tumong ni Moises an pagtipig han iya katungdanan sugad nga dungganon nga Ehiptohanon. Lugod, mas ginpabilhan niya an iya espirituwal nga mga pribilehiyo kay han “mga bahandi han Ehipto.” (Hebreo 11:26) An doktor nga hi Lukas posible nga binulig kan Pablo ngan ha iba nga matambal ha ira sakit. Kondi daku gud an naibulig ni Lukas sugad nga ebanghelisador ngan parasurat han Biblia. Mahitungod kan Pablo, kilala hiya diri sugad nga eksperto ha Balaud, kondi sugad nga misyonero, usa nga “apostol ha mga Hentil.”—Roma 11:13.

¹⁷ Hi David nahinunumdoman gud, diri sugad nga kumander ha militar o musikero ngan paragkomposo, kondi sugad nga ‘tawo nga nasunod ha kasingkasing han Dios.’ (1 Samuel 13:14) Kilala naton hi Daniel, diri tungod han iya trabaho sugad nga opisyal ha gobyerno han Babilonya, kondi tungod han iya pag-alagad sugad nga maunungon nga propeta ni Jehova. Hi Ester nakilala diri sugad nga rayna han Persia, kondi sugad nga susbaranan han kaisog ngan pagtoo. Hira Pedro, Andres, Jakobo, ngan Juan, nakilala diri sugad nga malampuson nga parapangisda, kondi sugad nga mga apostol ni Jesus. Ngan labaw ha ngatanan, hi Jesus mismo nahinunumdoman naton diri sugad nga “an panday,” kondi “an Kristo.” (Markos 6:3; Mateo 16:16) Nasabtan gud nira ngatanan nga anoman an ira abilidad, panag-iya, o katungdanan, kinahanglan nga an ira prayoridad ha kinabuhi diri an ira sekular nga trabaho, kondi an ira pag-alagad ha Dios. Maaram hira nga an pinakadungganon ngan pinakamakapatagbaw nga tumong amo an pagin tawo nga may kahadlok ha Dios.

18. Paonan-o ginamit han usa nga batan-on nga Kristiano an iya kinabuhi, ngan ano an iya nasabtan?

¹⁸ Nasabtan liwat ini ni Seung Jin, nga gin-unabi ha tinikangan hini nga artikulo. “Imbes nga gamiton an akon bug-os nga kusog ha pagin doktor, pintor, o maestro, nagdesisyon ako nga gamiton an akon kinabuhi uyon ha akon dedikasyon ha Dios,” siring niya. “Nabulig ako yana ha lugar nga nanginginahanglan gud hin mga magturutdo ha Biblia, binubuligan an mga tawo nga hingada ha dalan tipakadto ha kinabuhi nga waray kataposan. Kahuna ko hadto nga an pagin bug-os-panahon nga ministro diri gud makalilipay. Mas malipayon gud ako yana kay han hadto, samtang nangangalimbasog ako nga mapauswag an akon personalidad ngan abilidad ha pagtutdo ha mga tawo nga iba-iba an kultura. Nasasabtan ko nga magigin mapulsanon la an kinabuhi kon an katuyoan ni Jehova an magigin katuyoan liwat naton.”

19. Paonan-o naton hiaagian an tinuod nga katuyoan ha kinabuhi?

¹⁹ Sugad nga mga Kristiano, ginbendisyonan kita hin kahibaro nga nagluluwas han kinabuhi, ngan hin paglaom ha kaluwasan. (Juan 17:3) Salit, diri naton “karawaton an grasya han Dios, hin waray kapulsanan.” (2 Korinto 6:1) Lugod, aton gamiton an aton presyoso nga mga adlaw ngan katuigan ha kinabuhi ha pagdayaw kan Jehova. Aton ipasamwak an kahibaro nga nagriresulta hin tinuod nga kalipay yana ngan nagtutugway ngadto ha kinabuhi nga waray kataposan. Ha pagbuhat hito, maieksperyensyahan naton an pagkatinuod han ginsiring ni Jesus: ‘Burobulahan pa an paghatag kay ha pagkarawat.’ (Buhat 20:35) Ngan hiaagian naton an tinuod nga katuyoan ha kinabuhi.

[Footnote]

Maisasaysay Mo Ba?

• Ano an gimaopayi nga tumong ha kinabuhi nga makakab-ot naton?

• Kay ano nga diri-maaramon nga unahon an materyal nga mga butang?

• Ano “an kinabuhi nga totoo” nga iginsasaad han Dios?

• Paonan-o naton magagamit an aton kinabuhi para ha katuyoan han Dios?

[Mga Pakiana]

[Mga Retrato ha pahina 18]

Kinahanglan buhaton han mga Kristiano an husto nga mga sakripisyo