Usa nga Riko nga Magmarando nga Naghimo hin Diri Maaramon nga Desisyon

AN RIKO nga batan-on nga magmarando matadong, masinugtanon ha balaud, ngan relihiyoso. Ha pagdaop kan Jesus, linuhod hiya ngan nagpakiana: “Maopay nga Magturutdo ano an maopay nga akon buhaton, basi ako mamay-ada kinabuhi nga waray kataposan?”

Hi Jesus binaton nga basi magkaada kinabuhi kinahanglan sundon han batan-on an mga sugo han Dios. Han ginhangyo niya hi Jesus nga magin espisipiko, hi Jesus siniring: “Diri ka magpatay; diri ka manlibog; diri ka mangawat; diri ka magtestigo han buwa. Tumahod ka ha imo amay ngan ha iroy nimo; ngan higugmaon mo an imo igkasitawo sugad ha imo ngahaw.” Ini an basihan nga mga sugo ha Balaud nga iginhatag kan Moises. Katapos an batan-on siniring: “Ngatanan ini nga mga bagay akon ginbantayan: ano pa an akon kakulangan?”—Mateo 19:16-20.

‘Ginhigugma hiya’ ni Jesus ngan hi Jesus siniring: “Usa nga bagay an kinahanglan ha imo: lakat, ibaligya an ngatanan nga imo, ngan ipanhatag ha mga kablas, ngan ikaw may-ada manggad ha langit; ngan kadi, sunod ha akon.”—Markos 10:17-21.

Tigda nga an batan-on nga magmarando kinahanglan maghimo hin seryoso nga desisyon. Ano an iya bubuhaton? Andam ba hiya nga bayaan an iya karikohan ngan magin sumurunod ni Jesus, o titipigan ba niya an iya mga panag-iya? Mamimiling ba hiya hin mga bahandi ha tuna, o mangangalimbasog hiya nga magkaada mga bahandi ha langit? Sigurado nga nakurian gud hiya pagdesisyon. Matin-aw nga interesado hiya ha iya relasyon ha Dios tungod kay ginsusunod niya an Balaud ngan nagpakiana kon ano pa an iya hihimoon basi makarawat an pag-uyon han Dios. Ano an iya desisyon? Hiya ‘binulag nga masurub-on, kay damu an iya manggad.’—Markos 10:22.

Diri maaramon an desisyon han magmarando. Kon nagin matinumanon hiya nga sumurunod ni Jesus, nakarawat unta niya an iya ginbibiniling—an kinabuhi nga waray kataposan. Waray kita impormasyon kon ano an  nahitabo ha iya. Kondi, maaram kita nga paglabay hin mga upat ka dekada, ginbungkag han Romano nga kasundalohan an Jerusalem ngan an kadak-an nga bahin han Judea. Damu nga Judio an nawad-an han ira panag-iya ngan kinabuhi.

Diri pariho ha batan-on nga magmarando, hi apostol Pedro ngan an iba nga disipulo naghimo hin maaramon nga desisyon. Ira “binayaan an ngatanan” ngan sinunod kan Jesus. Nagpahimulos gud hira hito nga desisyon! Ginsidngan hira ni Jesus nga makarawat hira hin labaw pa han ira ginbayaan. Dugang pa, makakapanunod hira han kinabuhi nga waray kataposan. An ira desisyon diri gud nira pagbabasulan.—Mateo 19:27-29.

Kita ngatanan kinahanglan magdesisyon—an iba diri duro kaimportante, an iba importante hinduro. Ano an sagdon ni Jesus may kalabotan hito? Kakarawaton mo ba an iya sagdon? Pinaagi ha pagdesisyon nga karawaton ito, makarawat ka hin hura nga bendisyon. Tagdon naton yana kon paonan-o naton masusunod hi Jesus ngan mapapahimulosan an iya ginsiring.