An Imo Pagkinabuhi Para la ba Yana?

“DIRI ko gud ginhuhunahuna an tidaraon. Naabot na la ito.” Iton agsob kotaron nga mga pulong ginsiring han kilala nga syentista nga hi Albert Einstein. Sugad liwat hito an panhunahuna han damu nga tawo. “Kay ano nga mabaraka han tidaraon?” bangin magsiring hira. O bangin makabati ka hin mga tawo nga nasiring: “Padayon la anoman an imo ginbubuhat.” “Magkinabuhi para yana.” “Hingalimti an tidaraon.”

Syempre, ito nga panhunahuna han kadam-an diri bag-o. “Kaon, inom, ngan pagrayhak. An ngatanan nga iba nga butang diri importante.” Ito an puplunganon han mga Epikureo han naglabay nga panahon. Ito liwat an opinyon han iba ha panahon ni apostol Pablo, hira nasiring: ‘Pangaon ngan panginom kita, kay buwas mapatay kita.’ (1 Korinto 15:32) Natoo hira nga waray na iba nga kinabuhi labot hinin aton halipot nga kinabuhi yana, salit igin-aaghat nira nga salingabuton naton ito.

Para ha minilyon nga umurukoy ha tuna, an pagsalingabot hini nga kinabuhi sigurado nga diri nangangahulogan nga kalipayan la an importante ha kinabuhi. Tungod han makuri nga kahimtang han damu, padayon hira nga nagpipinangalimbasog basi mabuhi. Salit kay ano nga huhunahunaon pa nira an tidaraon, an “buwas” nga agsob nga baga hin diri maaantos an kadulom ngan kawaray paglaom?

Sadang ba Kita Magplano Para ha Tidaraon?

Bisan an mga tawo nga diri sugad kakuri an kahimtang agsob maghunahuna nga waray pulos an pagplano para ha tidaraon. “Kay ano nga magpuproblema ka pa ha pagplano?” bangin magpakiana hira. An iba bangin mangatadongan nga an mga nagpaplano napapakyas man la ngani. Bisan an patriarka nga hi Job han kadaan nga panahon nakaeksperyensya hin duro nga kasubo han nasantop niya nga an iya mga plano ‘nabungkag,’ nga nakadaot han iya ginpundar nga para unta han iya makalilipay nga tidaraon ngan han iya pamilya.—Job 17:11; Eklesiastes 9:11.

Iginpariho han parasurat hin siday nga hi Robert Burns nga taga-Scotland an aton kakurian ha kahimtang han gutiay nga yatot han an salag hito waray tuyoa nga iya naguba pinaagi han iya arado. Katapos madaot an inuukyan hito, dinalagan ito basi diri mamatay. ‘Oo,’ siring ni Burns, ‘agsob gud nga inaabat naton nga waray kita  nabubuhat kon naatubang kita hin panhitabo nga waray naton mahihimo nga bisan an pinakamaopay nga plano agsob nga diri naglalampos.’

Salit waray ba pulos an pagplano para ha tidaraon? Ha pagkatinuod, an kawaray igo nga pagplano mahimo magkaada maraot nga resulta kon may-ada mga bagyo o iba nga kalamidad. Oo, waray makakapugong hito; pananglitan waray nakapugong han bagyo nga Katrina. Kondi, diri ba an mas maopay nga abanse nga panlantaw ngan pagplano daku an mahihimo basi maibanan an danyos hito ha syudad ngan ha mga naukoy hito?

Ano an imo opinyon? Makatadunganon gud ba nga magkinabuhi para la yana ngan balewarayon an tidaraon? Tagda an paghihisgotan han masunod nga artikulo may kalabotan hini.

[Mga Retrato ha pahina 3]

“Kaon, inom, ngan pagrayhak. An ngatanan nga iba nga butang diri importante”

[Retrato ha pahina 4]

Diri ba an abanse nga panlantaw ngan pagplano nakaiban unta han mga danyos han bagyo nga Katrina?

[Ginkuhaan han Retrato]

U.S. Coast Guard Digital