Magkinabuhi nga Ginhuhunahuna an Tidaraon

“DIRI kamo mangarit tungod han buwas nga adlaw,” nagsiring hi Jesu-Kristo ha iya bantogan nga pahayag ha ligid han usa nga bukid ha Galilea. Hiya nagpadayon: “Kay an buwas nga adlaw may-ada kalugaringon nga pangarit.”—Mateo 6:34.

Ha imo hunahuna, ano an karuyag sidngon hini nga mga pulong, “an buwas nga adlaw may-ada kalugaringon nga pangarit”? Igin-aaghat ba hito nga sadang ka magkinabuhi para la yana ngan balewarayon an tidaraon? Uyon gud ba ito ha gintotoohan ni Jesus ngan han iya mga sumurunod?

“Diri Kamo Mangarit”

Alayon basaha an kabug-osan nga ginsiring ni Jesus ha Mateo 6:25-32. Ha bahin, hiya nagsiring: “Diri kamo mangarit ha iyo kinabuhi kon ano an iyo kakaunon, o kon ano an iyo iinumon; bisan tungod ha iyo lawas kon ano an iyo igsusul-ot. . . . Kitaa an katamsihan ha langit, nga waray magsabwag, bisan pagbari, bisan pagtirok ha buhos; ngan an iyo Amay, nga aadto ha langit nagpapakaon ha ira. . . . Hin-o ha iyo, nga tungod ha pangarit makadugang hin usa ka maniko ha iya kahitaas? Ngan kay ano an iyo pangarit ha nahitutungod han panapton? Hunahunaa an mga liryo ha kapatagan kon ano an ira pagtubo: diri hira nagbubuhat, bisan paglusbid . . . Busa diri kamo mangarit, nga masiring: Ano an aton kakaunon, o ano an aton iinumon, o ano an aton igpapanapton? Kay an mga Hentil nanmimiling han ngatanan hini nga mga butang; kay an iyo Amay nga langitnon, maaram nga kamo nagkikinahanglan hini ngatanan.”

Gintapos ni Jesus ini nga bahin han iya pahayag pinaagi hin duha nga sagdon. An siyahan: “Kondi pamilnga niyo siyahan an ginhadian han Dios, ngan an iya katadongan; ngan ngatanan ini nga mga butang mahidudugang ha iyo.” An ikaduha: “Busa diri kamo mangarit tungod han buwas nga adlaw; kay an buwas nga adlaw may-ada  kalugaringon nga pangarit. Igo na han [tagsa nga] adlaw an iya kamaraot.”—Mateo 6:33, 34.

Maaram an Imo Amay han Imo Ginkikinahanglan

Ginhuhunahuna mo ba nga diri na igin-aaghat ni Jesus ha iya mga disipulo, upod na ha mga parauma, an ‘pagsabwag, pagbari, o pagtirok’ han ira produkto ha bodega? O an ‘pagbuhat ngan paglusbid’ basi magkaada mga panapton nga ira ginkikinahanglan? (Proberbios 21:5; 24:30-34; Eklesiastes 11:4) Sigurado nga diri. Kon umundang hira ha pagtrabaho, posible gud nga hira “makikilimos ha katbari” nga waray na makakaon o maisusul-ot.—Proberbios 20:4.

Ano man an ginsiring ni Jesus may kalabotan ha kabaraka? Iya ba iginpapasabot ha iya mga mamarati nga bug-os nira nga malilikyan ito? Imposible gud ito. Hiya mismo nakaeksperyensya hin duro nga kasubo ngan kabaraka ha gab-i han pagdakpa ha iya.—Lukas 22:44.

Hi Jesus nag-uunabi la hin basihan nga kamatuoran. An sobra nga kabaraka diri gud mabulig ha imo ha pagsulbad han anoman nga problema nga imo inaatubang. Pananglitan, diri ito mabulig ha imo nga magkaada mas hilawig nga kinabuhi. Nasiring hi Jesus nga diri ito ‘makakadugang hin usa ka maniko’ ha imo kinabuhi. (Mateo 6:27) Ha pagkamatuod, an duro ngan ginpipinaiha nga kabaraka posible gud nga makapahalipot han imo kinabuhi.

An iya sagdon praktikal hinduro. Damu han aton ginkakabarak-an an diri man ngani nahitatabo. Nasantop ini han politiko nga hi Winston Churchill han Britanya han iya ginhuhunahuna an madulom nga panahon han Girra ha Kalibotan II. May kalabotan han iya mga ginkakabarak-an hito nga panahon, hiya nagsiring: “Kon akon ginhuhunahuna an ngatanan hini nga kabaraka, nahinunumdoman ko an istorya mahitungod han lagas nga hirani na mamatay nga nagsiring nga damu an iya ginkakabarak-an, kondi kadam-an hito an waray gud mahitabo.” Oo, maaramon an pag-atubang han tagsa nga adlaw nga naabot, labi na kon an mga tensyon ngan problema nga aton gin-aatubang masayon magresulta hin duro nga kabaraka.

‘Pamilnga Siyahan an Ginhadian han Dios’

Ha pagkamatuod, damu an ginhunahuna ni Jesus kay han pisikal ngan emosyonal nga kaopayan la han iya mga mamarati. Maaram hiya nga an kabaraka mahitungod ha pagkaada mga kinahanglanon ha kinabuhi, sugad man han duro nga  paghingyap hin panag-iya ngan kalipayan, makakaulang han imo pangalimbasog para ha mas importante nga mga butang. (Filipos 1:10) ‘May-ada pa ba mas importante kay ha pagkaada mga kinahanglanon ha kinabuhi?’ bangin maghunahuna ka. An baton amo an espirituwal nga mga butang nga may kalabotan ha aton pagsingba. Ginpabug-atan ni Jesus nga an pinakaimportante ha aton kinabuhi amo an ‘pagpamiling siyahan han ginhadian han Dios ngan han iya katadongan.’—Mateo 6:33.

Ha panahon ni Jesus, damu an nangangalimbasog gud nga magkaada materyal nga mga butang. An pagriko amo an ira prayoridad. Kondi iya gin-aghat an iya mga mamarati nga magkaada hin iba nga disposisyon. Sugad nga katawohan nga dedikado ha Dios, an ira “bug-os nga turumanon” amo an ‘pagkahadlok ha Dios ngan pagbantay han iya mga sugo.’—Eklesiastes 12:13.

An sobra kasagipo ha materyal nga mga butang—an ‘pangarit ha kalibotan ngan an limbong han mga manggad’—mahimo makadaot ha espirituwalidad han iya mga mamarati. (Mateo 13:22) “An mga naghuhunahuna ha pagkamanggaranon,” nagsurat hi apostol Pablo, ‘nagkahulog ha pagsulay ngan lit-ag ngan damu nga tinuyaw ngan makahiribang nga mga kaipa, nga nakakalumos ha mga tawo ha pagkaguba ngan pagkawara.’ (1 Timoteo 6:9) Basi mabuligan hira nga malikyan ini nga ‘lit-ag,’ ginpahinumdoman ni Jesus an iya mga sumurunod nga an ira langitnon nga Amay maaram nga ginkikinahanglan nira ini ngatanan. Magtatagana an Dios ha ira sugad la nga nagtagana hiya ha “katamsihan ha langit.” (Mateo 6:26, 32) Imbes nga mabug-atan tungod han kabaraka, kinahanglan buhaton nira an ngatanan nga ira mahihimo ha pagtagana han ira mga panginahanglan ngan katapos sumarig kan Jehova.—Filipos 4:6, 7.

Han hi Jesus nagsiring nga “an buwas nga adlaw may-ada kalugaringon nga pangarit,” an iya la iginpapasabot nga diri naton tugotan an sobra nga kabaraka han mahimo mahitabo ha tidaraon nga makadugang ha aton mga problema yana. An usa pa nga hubad han Biblia nasiring: “Ayaw kamo kabaraka mahitungod hiton buwas nga adlaw; may-ada hito kalugaringon nga mga kabaraka. Sanglit ayaw na dugangi an mga kabaraka ha kada adlaw.”—Mateo 6:34, Maopay nga Sumat nga Biblia.

“Kumanhi an Imo Ginhadian”

Kondi, may-ada daku nga kaibahan han diri sobra nga pagkinabaraka ha mahimo mahitabo ha tidaraon ngan han bug-os nga pagbalewaray hito. Waray gud aghata ni Jesus an iya mga disipulo nga balewarayon an tidaraon. Ha kabaliktaran, iya ginsagda hira nga magin interesado gud hito. Husto nga ig-ampo nira an ira presente nga panginahanglan—an ira pagkaon ha adlaw-adlaw. Kondi sadang anay nira ig-ampo an mga butang nga aada pa ha tidaraon—an pag-abot han Ginhadian han Dios ngan an katumanan han iya kaburut-on ha tuna.—Mateo 6:9-11.

Diri kita sadang magin pariho ha mga tawo ha panahon ni Noe. Sagipo gud hira ha ‘pagpinangaon ngan pagpinanginom, ngan pagpangasawa ngan pagpakasal’ salit “waray hibaro” han mahitatabo. Ano an resulta hito? ‘Inabot an lunop ngan gin-anod hira ngatanan.’ (Mateo 24:36-42) Gin-gamit ni apostol Pedro ito nga panhitabo ha pagpahinumdom ha aton han panginahanglan nga magkinabuhi nga ginhuhunahuna an tidaraon. “Busa nga hinbaroan niyo nga ini nga mga butang pagtutunawon,” nagsurat hiya, “mga magtionan-o an iyo mga ginawian nga mga tawo ha ngatanan nga putli nga pangabuhi ngan pagtahod ha Dios, nga naghuhulat ngan nagtitinguha gud kamo han pag-abot han adlaw han Dios.”—2 Pedro 3:5-7, 11, 12.

Pagtirok hin Bahandi ha Langit

Oo, tipigan naton ha hunahuna an adlaw ni Jehova. An pagbuhat hito makakaapekto gud kon paonan-o naton gagamiton an aton panahon, kusog, kaabtik, karikohan, ngan abilidad. Diri kita sadang magin sagipo hinduro ha pagpangalimbasog nga magkaada materyal nga mga butang—kinahanglanon o kalipayan ha kinabuhi—nga gutiay na la an aton panahon ha mga buruhaton nga nagpapakita hin diosnon nga debosyon. An pagsentro la ha mga panhitabo yana bangin may-ada dayon resulta, kondi bisan ito nga mag-opay nga resulta temporaryo la. Mas maaramon gud kon sugad an ginsiring ni Jesus nga ‘magtirok hin bahandi ha langit’ imbes nga ha tuna.—Mateo 6:19, 20.

 Ginpabug-atan ni Jesus ito nga punto ha iya ilustrasyon mahitungod hin tawo nga naghimo hin dagku nga plano para ha tidaraon. Mga plano ito nga waray mag-upod han iya relasyon ha Dios. An katunaan hito nga tawo mabungahon hinduro. Nagdesisyon hiya nga gub-on an iya mga bodega ngan magtukod hin mas dagku basi magkinabuhi hin mas komportable, kumaon, uminom, ngan maglipay. May-ada ba sayop hito? Namatay hiya antes mapahimulosan an bunga han iya pangalimbasog. Ngan mas maraot pa gud, waray hiya magkaada maopay nga relasyon ha Dios. Hi Jesus nagtapos: “Amo ini an nagtitirok hin manggad ha iya kalugaringon, ngan diri manggaranon ha Dios.”—Lukas 12:15-21; Proberbios 19:21.

Ano an Mahimo Mo Buhaton?

Ayaw pagbuhata an sayop nga ginbuhat han tawo nga iginhulagway ni Jesus. Usisaha kon ano an katuyoan han Dios para ha tidaraon, ngan pagkinabuhi nga nakasentro hito. Iginpahibaro han Dios ha katawohan an iya pagbubuhaton. “An Ginoo nga hi Jehova,” nagsurat hi propeta Amos han kadaan nga panahon, “diri magbubuhat hin bisan ano, gawas la kon hiya magpahayag han iya tinagoan ngada ha iya mga surugoon an mga manaragna.” (Amos 3:7) An iginpahayag ni Jehova pinaagi han iya mga propeta mapapahimulosan mo na ha iya giniyahan nga Pulong, an Biblia.—2 Timoteo 3:16, 17.

An usa nga butang nga iginpapahayag han Biblia amo an mahitatabo ha diri na maiha nga makakaapekto ha bug-os nga kalibotan ha waray kapariho nga sukol. Hi Jesus nagsiring: “Maabot an daku nga kagol-anan, sugad nga waray pa mahinabo tikang ha tinikangan han kalibotan tubtob yana.” (Mateo 24:21) Waray tawo nga makakapugong hito. Oo, waray hinungdan nga pupugngan ito han tinuod nga mga magsiringba. Kay ano? Tungod kay pagwawad-on hini an ngatanan nga karaotan ha tuna, ngan pahihinaboon hito an “bag-o nga langit ngan bag-o nga tuna,” karuyag sidngon usa nga bag-o nga pagmando ha langit ngan usa nga bag-o nga sosiedad ha tuna. Dida hiton bag-o nga kalibotan, “pagpapahiron [han Dios] an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud.”—Pahayag 21:1-4.

Kon sugad, makatadunganon ba an pagkaada panahon yana nga usisahon an ginsisiring han Biblia mahitungod hito? Kinahanglan mo ba hin bulig ha pagbuhat hito? Alayon pangaro hin bulig ha mga Saksi ni Jehova, o pagsurat ha mga nagpublikar hini nga magasin. Oo, siguroha nga magkinabuhi diri la para yana kondi para ha urusahon nga tidaraon.

[Mga Retrato ha pahina 7]

“Diri kamo mangarit . . . An buwas nga adlaw may-ada kalugaringon nga pangarit”