Mga Kakurian ha Pagdul-ong han Maopay nga Sumat

AN AMON trak inabot ha checkpoint nga may-ada mga 60 nga armado nga kalalakin-an, kababayin-an, ngan mga tinedyer. An iba nakauniporme; an iba nakasibilyan. Iginwawara-wara han damu an ira awtomatik nga pusil. Baga hin naghuhulat hira ha amon. Hito nga panahon may-ada kasamok didto.

Upat ka adlaw na kami nga nagbibiyahe dara an napulo ka tonilada nga literatura. Naghunahuna kami kon paaagion nira kami. Mangangaro ba hira hin kwarta? Mationan-o daw la kaiha an pagkombinse ha ira nga maopay an amon katuyoan?

Usa nga tawo an naikag pagpabuto han iya riple tipaigbaw basi ipakita ha amon nga hiya an lider. Hinkit-an niya an amon mga selyular nga telepono ngan nagpirit hiya nga kuhaon ito. Han nag-alang kami paghatag, nagmuwestra hiya han iya tudlo pinaagi ha pagguhit hito ha iya liog nga matin-aw nga nagpapasabot han mahitatabo ha amon kon diri kami sumunod. Salit, iginhatag namon ito.

Tigda la nga may usa nga babaye nga nakauniporme an nagkuha han iya pusil ngan dinaop ha amon. Hiya an “sekretarya,” ngan karuyag niya nga may ihatag liwat kami ha iya. Makuri an kinabuhi ngan importante an bisan ano nga gutiay nga “regalo.” Katapos gin-abrihan han usa pa nga sundalo an amon tangke han krudo basi pun-on an iya surudlan. Waray niya kami pamatii han amon hangyo nga diri ito ibanan, nagsiring hiya nga nasunod la hiya ha sugo. Waray kami nahimo. Naglaom na la kami nga diri unta subaron ito han iba.

Ha kataposan, ginkuha an barikada ngan ginpaagi kami. Nakaginhawa na ako ngan an akon upod. Makakurulba adto nga panhitabo, kondi nahiara na kami hinin nakakanerbiyos nga mga checkpoint. Tikang han Abril 2002 tubtob han Enero 2004, nagbiyahe kami hin 18 ka beses tikang ha pantalan han Douala, Cameroon, tipakadto ha Bangui, an kapital han Republika han Sentro nga Aprika. An 1,600 ka kilometro nga pagbiyahe puno pirme hin peligro ngan diri linalaoman nga panhitabo. a

“Damu nga leksyon an amon hinbabaroan tikang  hini nga mga pagbiyahe,” siring nira Joseph ngan Emmanuel nga regular nga nagdadrayb dinhi hini nga mga ruta. “Maaramon an pirme nga pag-ampo ngan pagpabilin nga kalmado. ‘Ha Dios nagsarig ako, diri ako mahahadlok,’ nagsurat an salmista. ‘Ano an mahihimo han tawo ha akon?’ Nangalimbasog kami nga magkaada hin pariho nga disposisyon. Sigurado kami nga maaram hi Jehova nga an amon pagbiyahe amo an pagdul-ong han mensahe han paglaom nga ginkikinahanglan gud.”—Salmo 56:11.

Bug-os-Kalibotan nga Pangalimbasog ha Pagtagana han Espirituwal nga Pagkaon

Hini nga bahin han Aprika, damu an naruruyag pagpamati han maopay nga sumat han Ginhadian han Dios. An literatura nga amon gindadara gindisenyo basi matagbaw an ira espirituwal nga panginahanglan. (Mateo 5:3; 24:14) An sanga nga opisina han mga Saksi ni Jehova ha Cameroon nga nahimumutang ha Douala regular nga nagsusuplay hin literatura ha sobra 30,000 nga magwarali han Ginhadian ngan mga interesado nga nag-uukoy ha Cameroon ngan ha upat nga higrani nga nasud.

Ini nga mga publikasyon hirayo na an ginbiyahian. Kadam-an hito an gin-imprinta ha Alemanya, Espanya, Finland, Inglatera, ngan Italya. Katapos ginpadara ito tikang ha Fransia pinaagi hin barko. Kasagaran nga an kargamento nga mga literatura naabot ha pantalan han Douala kada duha ka semana.

An kargamento iginkakarga ha trak ngan gindadara ito ha sanga nga opisina. Gin-uurosa an publikasyon han mga nagtatrabaho ha Shipping Department uyon ha pagdadad-an hito. Diri masayon an pagdara hito ha higrayo nga lugar. Kondi bahin ini han pagdara han maopay nga sumat “ha sidsid gud han kalibotan.” (Buhat 1:8) Nasarig an sanga nga opisina ha nagsasakripisyo nga mga boluntaryo nga andam hini nga peligroso nga pagbiyahe. Tungod hito, an literatura regular nga nakakarawat han minilyon nga tawo ha sentral nga bahin han Aprika.

Usa nga Tipikal nga Pagbiyahe

An literatura ginbibiyahe pinaagi hin trak ngadto ha Cameroon, Chad, Equatorial Guinea, Gabon, ngan Republika han Sentro nga Aprika.  Handurawon naton nga upod kita ha usa nga trak ngan kasapit kita ha mga drayber hito. Katapos, pag-andam ha makakurulba kondi makapainteres nga pagbiyahe nga maabot hin napulo ka adlaw o sobra pa.

Unom nga drayber an nagsasarusaliwan ha pagdrayb. Kinahanglan magkusog hira, may kapas, pasensyoso, ngan desente mamado. Hira nakasul-ot hin kanan Aprikano bado o longsleeve nga may kurbata. Ha naglabay, an mga taga-kustom nagkomento: “Kitaa inin malimpyo nga trak ngan an desente nga mga drayber nga pariho han iyo makikita ha mga retrato ha ira publikasyon.” Ngan an mas makapainteres pa gud kay han hitsura han mga drayber amo an ira pagin disidido ha pagkadto ha bisan diin ha pagserbi ha iba.—Salmo 110:3.

An pagbaya ha Douala mga alas sais ha aga, pakasirang han adlaw, basi malikyan an sobra ka trapik hinin nagtitikadaku nga syudad. Pakatabok namon han tulay hirani han sanga nga opisina ngan pakalahos han sagipo nga syudad, nagtipaeste kami ngadto ha amon siyahan nga destinasyon—Yaoundé, an kapital han Cameroon.

Susumatan kamo han unom nga drayber kon mationan-o kakuri an pagmaniobra hin trak nga kargado hin napulo ka tonilada nga mga libro. Gutiay la an problema ha siyahan nga tulo ka adlaw ha sementado nga kakalsadahan, bisan kon ginkikinahanglan an pagin atentibo gud ngan konsentrasyon. Katapos, tigda nga binunok. Tikang hito nga lugar diri na sementado an kalsada. Diri na nakikita ngan madalunot an dalan, ngan kinahanglan maghinay-hinay kami tungod kay mabatsi. Nagtitikagab-i na. Panahon na ha pagparada, pagkaon, ngan pagkaturog nga nakasaray an amon mga tiil ha dashboard. Sugad gud hito an kahimtang hini nga mga pagbiyahe!

Temprano ha kinabuwasan, nagpadayon kami pagbiyahe. Usa han drayber an nagkikita han amon inaagian ngan nagpapahamangno dayon kon nagtitikahirani na kami ha kanal ha ligid han kalsada. Maaram gud an mga drayber nga kon mahulog an trak dida hito, mahimo umabot hin pipira ka adlaw antes ito makuha. Maraot la gihapon an kalsada bisan han sinulod na kami ha giutan han Republika han Sentro nga Aprika. Han sumunod nga 650 ka kilometro, puro berde ngan kabungtoran an amon inaagian. An kabataan, kalagasan, ngan mga nanay nga may dara nga bata ha ira likod nagkakaway samtang naagi kami ha ira mga baryo. Tungod han girra sibil hito nga panahon, diri damu an awto nga nalabay, salit nanhihipausa hira ha amon.

Makapatagbaw nga mga Eksperyensya

Hi Janvier, usa han drayber, nagsumat ha amon nga bisan han okupado nga eskedyol, agsob hira humapit ha gudtiay nga baryo basi pumahuway hin madaliay ngan manaltag hin literatura. Hiya nahinumdom: “Ha Baboua pirme kami nakikiistorya ha usa nga nagtatrabaho ha hospital nga interesado gud ha mensahe mahitungod han Ginhadian, ngan nagdudumara kami ha iya hin halipot nga pag-aram mahitungod han Biblia. Usa ka adlaw ginpakita pa ngani namon ha iya ngan  ha iya pamilya an videocassette mahitungod kan Noe. Nagkaabot an iya kasangkayan ngan mga amyaw, ngan waray pag-iha napuno an iya balay hin naiikag nga magkirita. Hinbatian na hadto han ngatanan an mahitungod kan Noe, kondi yana makikita na nira ito. Makapabantad an ira apresasyon. Katapos, naghikay hira hin espesyal nga pangaon basi ipakita an ira pagpasalamat, ngan ginhawiran nira kami nga didto humuron. Kinahanglan namon bumaya dayon ngan ipadayon an amon hirayo nga pagbiyahe, kondi malipayon kami nga naipaangbit namon an maopay nga sumat ngada hinin ordinaryo nga mga tawo.”

Hi Israel, an usa pa nga drayber, nahinumdom han mga panhitabo han lain nga pagbiyahe ngadto ha Bangui, an amon destinasyon. “Samtang nagtitikahirani kami ha Bangui,” nagsiring hiya, “nagtitikadamu an amon inaagian nga checkpoint. Maopay na la nga damu an makisangkayon nga sundalo ngan natigamnan nira ini nga trak tungod han amon naglabay nga mga pagbiyahe. Ira kami ginpahampang ha ira, ngan malipayon nga ginkarawat an mga literatura. Para ha ira, an libro birilhon, salit ira iginsusurat an ira ngaran dida hito ngan an petsa ngan ngaran han naghatag. May-ada paryente nga mga Saksi an iba nga sundalo, ngan usa ito nga hinungdan han ira pagin makisangkayon.”

Hi Joseph, an pinakaeksperyensyado nga drayber, nagsumat han iya gintatagad nga pinakamaopay nga bahin han sugad nga mga pagbiyahe—an pag-abot ha destinasyon. Mahitungod ha usa nga pagbiyahe, hiya nahinumdom: “Pipira ka kilometro tikang ha Bangui tumawag kami ha pagsumat ha kabugtoan nga tiabot na kami. Gin-updan kami nira ha syudad, ngan ginbuligan ha pagproseso han ginkikinahanglan han balaud. Pag-abot namon, nagkagawas an ngatanan ha sanga nga opisina ha pagtapo ngan paghangkop ha amon. Inabot an kabugtoan tikang ha higrani nga kongregasyon basi bumulig, ngan ha sulod hin mga oras, gindiskarga ngan ginbutang didto an ginatos ka karton nga Biblia, libro, bokleta, ngan magasin.”

“Usahay,” nagsiring hi Joseph, “may-ada kami dara nga mga bado, sapatos, ngan gamit han kabataan nga donasyon para ha kahirani nga Demokratiko nga Republika han Congo. Makalilipay gud an pagkita han mga hiyom han mapasalamaton nga kabugtoan!”

Katapos han usa ka adlaw nga pagpahuway, gin-andam namon an trak para ha amon pagtipauli. Posible nga may-ada mga problema, kondi an makapatagbaw nga eksperyensya labaw pa gud kay ha bisan ano nga kakurian.

An higrayo nga pagbiyahe, pagbubunok, magraot nga dalan, plat nga kaliding, ngan karub-i nakakapanluya gud. Aada liwat pirme an problema mahitungod han abusado nga mga sundalo. Kondi, waray gud mas nakakapatagbaw hini nga mga drayber kay ha pagdul-ong han maopay nga sumat han Ginhadian ha higrayo nga lugar han Aprika ngan ha pakakita han epekto hito ha kinabuhi han nakarawat hito.

Pananglitan, tungod hini nga pandul-ong hin mga publikasyon, usa nga taga-huron ha hirayo nga bahin han Republika han Sentro nga Aprika hirani ha giutan han Sudan an may nababasa na yana nga moderno nga hubad han Biblia. An iya asawa nag-aaram han bag-o nga mga An Barantayan, ngan an ira mga anak nagpapahimulos han libro nga Mahibaro Tikang ha Bantogan nga Magturutdo. b Hira ngan an damu nga iba pa dinhi hini nga kahuronan nakarawat han espirituwal nga pagkaon, pariho han nakakarawat han kabugtoan ha damu nga dagku nga syudad. Makapatagbaw gud ini!

[Mga footnote]

[Mga Mapa/Retrato ha pahina 9]

(Para ha aktuwal nga format,  kitaa an publikasyon)

CAMEROON

Douala

REPUBLIKA HAN SENTRO NGA APRIKA

Bangui

[Retrato ha pahina 9]

Joseph

[Retrato ha pahina 9]

Emmanuel

[Retrato ha pahina 10]

Sanga nga opisina han Republika han Sentro nga Aprika ha Bangui

[Retrato ha pahina 10]

Pagdiskarga ha Bangui