“Naapresyar Ko Gud an Iya Urusahon nga Determinasyon”

HI Günter Grass, Aleman nga awtor ngan nagdaog han Nobel Prize for Literature han 1999, nagpublikar han iya istorya ha kinabuhi han 2006. Dida hito iya iginsaysay an panahon han ginpaapi hiya ha grupo han depensa pansibilyan ha Alemanya. Ha amo gihapon nga libro, nag-istorya hiya mahitungod han usa ka tawo nga naapresyar gud niya salit nahinunumdoman pa niya bisan kon 60 ka tuig na an naglabay. Ito gud la nga tawo an nagpabilin nga marig-on ha iya pagtoo bisan pa han pagtimaraot.

Ha usa nga interbyu nga iginpublikar ha inadlaw nga pahayagan nga Frankfurter Allgemeine Zeitung, nag-istorya hi Grass mahitungod hinin makatirigamnan nga tawo nga nagdumiri pagsundalo. Siring ni Grass nga ini nga tawo “waray sumuporta ha bisan hain han popular nga mga ideolohiya; diri hiya Nazi, Komunista, o Sosyalista. Usa hiya han mga Saksi ni Jehova.” Diri na nahinunumdom hi Grass han ngaran hito nga Saksi, nga iya gin-agnayan hin Diri-kami-nagbubuhat-hito. Nakilala han mga parasaliksik nga Saksi ni Jehova nga hiya amo hi Joachim Alfermann. Pauroutro nga ginkastigo ngan ginpakaalohan hiya, ngan katapos iginbartolina. Kondi hi Alfermann nagpabilin nga marig-on ngan nagdumiri pagsundalo.

“Naapresyar ko gud an iya urusahon nga determinasyon,” siring ni Grass. “Nagpakiana ako ha akon kalugaringon: Paonan-o hiya nakakailob hito ngatanan? Paonan-o niya nahihimo ito?” Katapos han maiha nga pag-inilob han mga ginbubuhat ha pagbungkag han iya pagkamaunungon ha Dios, gindara hi Alfermann ha kampo nga prisohan ha Stutthof han Pebrero 1944. Ginpagawas hiya han Abril 1945, nakatalwas ha girra ngan nagpabilin nga maunungon nga Saksi ni Jehova tubtob ha iya kamatay han 1998.

Hi Alfermann usa han 13,400 nga Saksi—ha Alemanya ngan ha mga nasud nga ginsakop han mga Nazi—nga nag-antos hin kamadarahog tungod han ira pagtoo. Ira ginsunod an giya han Biblia, nagpabilin nga neutral ha politika ngan nagdumiri pagsundalo. (Mateo 26:52; Juan 18:36) Mga 4,200 nga Saksi an ginpriso ha mga kampo nga prisohan, ngan 1,490 an nagkamatay. Bisan yana, an ira pagkamaunungon naaapresyar han damu nga diri Saksi kondi nagdadayaw han ira karig-on.

[Retrato ha pahina 32]

Joachim Alfermann