Pagbiyahe Tipakadto ha Kalamrag

DIRI na maihap an natatalwas han mga parola. Kondi, para ha kapoy nga nagbibiyahe, an suga o kalamrag nga nakikita ha hirayo diri la kay pahamangno nga may-ada peligroso nga bakulod. Nagpapasabot liwat ito nga hirani na hiya ha iya destinasyon. Ha pariho nga paagi, an mga Kristiano yana nagtitikahirani na ha kataposan han hirayo nga pagbiyahe, usa nga naggigiya ha ira nga makalahos ha kalibotan nga madulom ngan peligroso ha espirituwal. Ha Biblia, an katawohan ha kabug-osan—an mga tawo nga binulag ha Dios—iginpariho ha “dagat nga ginsasamok; kay ini diri nakakapahuway, ngan an iya katubigan nagtatambak hin hanang ngan hin hugaw.” (Isaias 57:20) An katawohan han Dios napapalibotan han sugad nga kahimtang. Kondi, makakalaom hira hin katalwasan nga para ha ira sugad hin simboliko ngan masasarigan nga suga. (Mika 7:8) Tungod han bulig ni Jehova ngan han iya sinurat nga Pulong, “an kalamrag igintanom para ha mga magtadong, ngan an kalipay para han matul-id an kasingkasing.”—Salmo 97:11. a

Kondi, gintutugotan han iba nga Kristiano nga mahirayo hira tikang ha kalamrag ni Jehova nga tungod hito an ira pagtoo nadaot ha mga butang nga mahimo naton igpariho ha peligroso nga mga bato—materyalismo, imoralidad, ngan apostasya pa ngani. Oo, pariho ha siyahan nga siglo, may iba yana nga ‘nagkalulunod tungod ha pagtoo.’ (1 Timoteo 1:19; 2 Pedro 2:13-15, 20-22) An bag-o nga kalibotan mahimo igpariho ha duruongan nga aton kakadtoan. Tungod kay hirani na ito hinduro, makasurubo gud kon mawara han usa an pag-uyon ni Jehova!

Likayi an ‘Kalunod han Imo Pagtoo’

Ha naglabay nga mga siglo an usa nga barko mahimo nga talwas nga magnabigar ha lawod, kondi mahimo ito malunod kon tiduong na ito. Kasagaran nga an pagduong amo an diri gud masasarigan nga bahin han pagbiyahe. Ha pariho nga paagi para ha damu, an pinakapeligroso nga peryodo ha kasaysayan han tawo amo an “kataposan nga mga adlaw” han presente nga sistema. An Biblia husto nga naghuhulagway hito sugad nga makuri pakibagayan, labi na para ha mga Kristiano.—2 Timoteo 3:1-5.

Kay ano nga makuri hinduro inin kataposan nga mga adlaw? Aw, maaram hi Satanas nga “halipot na la nga oras” an nahibibilin ha iya pakig-away ha katawohan han Dios. Tungod hito, iya ginpakusog an iya maraot hinduro nga pamaagi ha pagdaot han ira pagtoo. (Pahayag 12:12, 17) Kondi may-ada kita bulig ngan giya. Hi Jehova nagpapadayon ha pagin darangpanan han mga nasunod ha iya. (2 Samuel 22:31) Gintatagan kita niya hin mga pahamangno nga nagbubuhayhag han intelihente kondi maraot hinduro nga mga taktika ni Satanas. Paghisgotan naton yana an duha nga ehemplo may kalabotan ha nasud han Israel samtang nagtitikahirani hira ha Tuna nga Iginsaad.—1 Korinto 10:11; 2 Korinto 2:11.

Hirani ha Tuna nga Iginsaad

Pinaagi ha pagpanguna ni Moises ha katawohan han Israel, nakapalagiw hira ha Ehipto. Waray pag-iha, hirani na hira ha sur nga giutan han Tuna nga Iginsaad. Katapos, nagsugo hi Moises hin 12 ka tawo ha pag-espiya ha tuna. Napulo nga waray pagtoo nga espiya an binalik nga may-ada makapaluya nga sumat, nagsiring hira nga diri magdadaog an Israel ha mga Kanaanhon tungod kay hira “higtaas ngan dagku an lawas” ngan magkusog an pwersa militar. Paonan-o ito nakaapekto ha mga Israelita? An asoy nagsusumat nga nagngurutob hira kan Moises ngan Aaron nga nasiring:  “Kay ano nga gindara kami ni Jehova nganhi hini nga tuna ha pagkapukan pinaagi ha kampilan? An amon mga asawa ngan an amon mga gudti nga kabataan mahimo nga mga bihag. . . . Magbuhat kita hin pangulo, ngan mamalik kita ngadto ha Ehipto.”—Numeros 13:1, 2, 28-32; 14:1-4.

Handurawa la! Ini mismo nga katawohan nakakita nga ginpaubos ni Jehova an gamhanan nga Ehipto—an pinakagamhanan ha kalibotan hito nga panahon—pinaagi han napulo nga peste ngan han makatarag-ob nga milagro ha Dagat nga Pula. Ngan hirani na hira ha Tuna nga Iginsaad, salit kinahanglan la hira magpahirani hito sugad hin barko nga nagtitipahirani ha suga nga nagtitigaman han destinasyon. Kondi diri hira natoo nga mapipirde ni Jehova an diri bantogan ngan nagkakabahin-bahin nga syudad nga mga ginhadian han Kanaan. Nakapasubo gud inin waray pagtoo nga reaksyon ha Dios ngan ha duha nga maisugon nga espiya, hira Josue ngan Kaleb, nga naabat nga an Kanaan pariho la hin “tinapay para ha [Israel]”! Iton duha nga espiya personal nga nakakita han kahimtang tungod kay nakakadto gud hira ha Kanaan. Han waray makasulod an katawohan ha Tuna nga Iginsaad, kinahanglan la gihapon nira nga magpabilin ha kamingawan ha sulod hin mga dekada, kondi waray hira mamatay didto upod han mga waray pagtoo. Ha pagkamatuod, binulig pa ngani hira ha pagpanguna han sunod nga henerasyon ha paggawas ha kamingawan ngan ha pagsulod ha Tuna nga Iginsaad. (Numeros 14:9, 30) Hinin ikaduha nga pangalimbasog han Israel ha pagsulod, maatubang hira hin lain nga pagsari. Ano daw la an ira pagbubuhaton?

Hi Hadi Balak han Moab nangalimbasog ha pagtimaraot han Israel pinaagi han palso nga propeta nga hi Balaam. Kondi, ginpugngan ni  Jehova ini pinaagi ha pag-aghat kan Balaam nga magyakan hin mga bendisyon imbes hin panhimaraot. (Numeros 22:1-7; 24:10) Tungod han pagin pursigido la gihapon ni Balaam, naghimo hiya hin usa pa nga maraot gud nga plano basi diri makasulod an katawohan han Dios ha tuna. Paonan-o? Pinaagi ha pag-aghat ha ira nga magbuhat hin imoralidad ngan magsingba kan Baal. Bisan kon ha kabug-osan napakyas liwat ini, naglampos gud ito ha pagsulay hin 24,000 nga Israelita. Nakighilawas hira ha kababayin-an han Moab ngan nagsingba kan Baal han Peor.—Numeros 25:1-9.

Hunahunaa gud ito! Damu hiton mismo nga mga Israelita an nakaeksperyensya han talwas nga pagtugway ni Jehova ha ira paglatas ha “dagku ngan makalilisang nga kamingawan.” (Deuteronomio 1:19) Bisan pa hito, han tisulod na hira ha ira panurundon nga tuna, 24,000 ha ira an nasulay han unudnon nga mga hingyap ngan ginpatay ni Jehova. Pahamangno gud ini para ha mga surugoon han Dios yana samtang nagtitikahirani hira ha mas maopay gud nga panurundon!

Ha ultimo nga pangalimbasog ni Satanas nga pugngan an mga surugoon ni Jehova yana nga kumarawat han ira balos, diri hi Satanas nagkikinahanglan hin bag-o nga mga taktika. Ha usa nga estratihiya nga nagpapahinumdom ha aton han nahitabo ha siyahan nga pangalimbasog han Israel nga makasulod ha Tuna nga Iginsaad, agsob nga nangangalimbasog hi Satanas ha pag-aghat hin kahadlok ngan pagruhaduha, pinaagi han mga panarhog, pagtimaraot, o pagtamay. An iba nga mga Kristiano naapektohan hini. (Mateo 13:20, 21) An usa pa nga napamatud-an nga malampuson nga paagi amo an pagdaot han husto nga mga prinsipyo han mga indibiduwal. Usahay, an iba nga nasulod ha kongregasyon nangangalimbasog ha pagdaot han magluya ha espirituwal ngan han diri naglalakat uyon ha kalamrag han Dios.—Judas 8, 12-16.

Para ha mga hamtong ngan alerto ha espirituwal, an madagmit nga pagtikaraot han kalibotan mabug-at nga ebidensya han pagin desperado ni Satanas. Oo, maaram hiya nga ha diri na mag-iiha diri na niya masusulay an maunungon nga mga surugoon han Dios. Salit, panahon na gud yana nga magpabilin nga alerto ha iya mga taktika.

Mga Bulig ha Pagpabilin nga Alerto ha Espirituwal

Iginhulagway ni apostol Pedro an tagna han Dios sugad nga “lamparahan nga nakakalamrag hin lugar nga masirom,” tungod kay nabulig ito ha mga Kristiano nga masabtan an katumanan han katuyoan han Dios. (2 Pedro 1:19-21) Adton nagkukultibar hin gugma ha Pulong han Dios ngan nagpapadayon nga magiyahan hito nakakaeksperyensya han pagtadong ni Jehova han ira “mga agianan.” (Proberbios 3:5, 6) Tungod kay puno hira hin paglaom, hira nga may apresasyon “magkakanta tungod han kahimongaya han kasingkasing,” samtang adton diri nakilala kan Jehova o adton binaya ha iya pamaagi, ha kataposan maabat hin “kasub-anan han kasingkasing” ngan kasakitan han “espiritu.” (Isaias 65:13, 14) Salit, pinaagi han maduruto nga pag-aram ha Biblia ngan pag-aplikar han aton hinbaroan, matitipigan naton an aton mga mata nga nakasentro ha sigurado nga paglaom imbes ha temporaryo nga kalipayan han presente nga sistema.

Importante liwat an pag-ampo ha aton pagpabilin nga alerto ha espirituwal. Han naghisgot hi Jesus mahitungod han kataposan han presente nga sistema, hiya nagsiring: “Busa, pag-agmahi niyo ha ngatanan nga panahon, ngan mag-ampo [“manginyupo,” NW] basi kamo magpakapalagiw ha ngatanan hini nga mga bagay nga maabot, ngan pagtukdaw hin marig-on ha atubangan han Anak han tawo.” (Lukas 21:34-36) Tigamni an paggamit ni Jesus han pulong nga “manginyupo,” nga usa nga klase hin sinsero gud nga pag-ampo. Maaram hi Jesus nga an kinabuhi nga waray kataposan namimeligro nga mawara hinin makuri nga panahon. Ipinapakita ba han imo mga pag-ampo an imo daku nga hingyap nga magpabilin nga alerto gud ha espirituwal?

Diri naton hingalimtan nga an pinakapeligroso nga bahin han pagbiyahe tipakadto ha aton panurundon posible nga amo an ultimo nga bahin hito. Salit, importante gud nga diri mawara ha aton paniplatan an kalamrag nga magtutugway ha aton ngadto ha kaluwasan.

Magin Alerto ha Palso nga mga Suga

Ha panahon nga de-layag pa nga barko an ginagamit, may peligro nga ginhihimo an magraot  nga tawo nga mas naruruyag hin dulom nga mga gab-i diin nakukurian an mga maglalayag nga makita an baybayon. Bangin magbutang hira hin mga suga ha peligroso nga baybayon basi mauwat an mga kapitan nga bag-ohon an ira ruta. Adton nauwat posible nga marub-an hin barko, makawatan hin kargamento, ngan magkamatay.

Ha pariho nga paagi, karuyag ni Satanas, an malimbong nga ‘anghel han kahayag,’ nga kuhaon ha katawohan han Dios an ira maopay nga relasyon ha Iya. Mahimo gamiton han Yawa an ‘buwa nga mga apostol’ ngan apostata nga mga ‘ministro han katadongan’ ha paglimbong ha mga diri alerto. (2 Korinto 11:13-15) Kondi, pariho ha alerto ngan eksperyensyado nga kapitan ngan tripulante nga posible diri mauwat han nakakalimbong nga mga suga, an mga Kristiano ‘nga pinaagi han paggamit han ira mga balatian nagin batid ha pagkilala han maopay ngan maraot’ diri nalilimbongan hadton nag-aaghat hin palso nga katutdoan ngan nakakadaot nga pilosopiya.—Hebreo 5:14; Pahayag 2:2.

An mga marinero nagdadara hin lista han mga parola nga ira maaagian ha ira ruta. Ipinapakita hito an pagkaiba han tagsa nga klase han parola ngan an naiiba nga mga sinyales han kada tagsa hito. An The World Book Encyclopedia nasiring: “Nahibabaroan han mga marinero kon ano nga parola an ira hinkikit-an—pati an lokasyon hito— pinaagi ha pag-obserba han pamaagi hito ngan pag-usisa han lista han mga parola.” Ha pariho nga paagi, an Pulong han Dios nabulig ha tangkod nga mga tawo nga hikilal-an an tinuod nga pagsingba ngan adton nagkikinabuhi uyon hito, labi na durante hinin kataposan nga mga adlaw diin iginpapahitaas ito ni Jehova labaw ha palso nga relihiyon. (Isaias 2:2, 3; Malakias 3:18) Ha pagpakita han matin-aw nga kaibahan han tinuod ngan palso nga pagsingba, an Isaias 60:2, 3 nasiring: “An kasisidman magpuputos han tuna, ngan an madakmol nga kasisidman han mga katawohan; kondi hi Jehova mabangon dida ha imo, ngan an iya himaya makikita dida ha imo. Ngan an mga nasud makada ha imo kapawa, ngan an kahadian ngada ha kahayag han imo pagsirang.”

Samtang an minilyon tikang ha ngatanan nga nasud nagpapadayon nga magiyahan han kalamrag ni Jehova, diri hira makakaeksperyensya han simboliko nga kalunod durante hinin ultimo nga bahin han ira pagbiyahe. Lugod, talwas nga magnanabigar hira ha nabibilin nga mga adlaw han presente nga sistema ngan ngadto ha mamurayawon nga bag-o nga kalibotan.

[Footnote]

[Retrato ha pahina 15]

Pariho han mga marinero, alerto an mga Kristiano nga diri malimbongan han palso nga mga suga