Paglipay ha “Kadaogan Upod han Kordero”

HA USA nga surat ni Carey W. Barber han 1971, iya ginpamalandong an iya siyahan nga 50 ka tuig han pag-alagad ha matuod nga Dios, hiya nagsiring: “An mga tuig ha pag-alagad kan Jehova maopay gud hinduro. An pakig-upod ha iya katawohan; an panalipod tikang ha magburuhat hin maraot ha kalibotan ni Satanas; an paglaom han kadaogan upod han Kordero, hi Jesu-Kristo; ngan an pamatuod han gugma ni Jehova nga nagriresulta hiton makaruruyag nga kamurayawan ngan personal nga katagbaw nga nagbabantay han kasingkasing ngan nakakahatag hin sigurado nga paglaom ha ultimo nga kadaogan.”

Paglabay hin unom ka tuig, hi Bugto Barber, usa nga dinihogan nga Kristiano, nagtikang pag-alagad sugad nga membro han Nagmamando nga Lawas han mga Saksi ni Jehova. Durante han sumunod nga 30 ka tuig nga pagin membro hito, padayon hiya nga naglalaom ha “kadaogan upod han Kordero.” Nakab-ot niya ito pinaagi ha pagin matinumanon tubtob han iya kamatay han Domingo, Abril 8, 2007, ha edad nga 101.—1 Korinto 15:57.

Natawo hi Carey Barber ha Inglatera han 1905, ngan nabawtismohan hiya ha Winnipeg, Canada han 1921. Paglabay hin duha ka tuig, hiya ngan an iya karuha, hi Norman, binalhin ha Brooklyn, New York, basi bumulig ha bag-o nga proyekto. Hito nga panahon, an katawohan ni Jehova hirani na magtikang ha paghimo han ira kalugaringon nga mga libro basi ipasarang an maopay nga sumat han Ginhadian “ha bug-os nga kalibotan.” (Mateo 24:14) Ha gutiay nga makina ha pag-imprinta an usa han siyahan nga mga toka ni Bugto Barber. Upod han ira gin-imprinta amo an mga legal nga dokumento para han mga kaso nga gindadara ngadto ha Korte Suprema han Estados Unidos. Inabot an panahon, nagtrabaho hiya ha Service Department, diin nakasentro an iya toka ha mga butang may kalabotan han kongregasyon ngan ha pagsangyaw ha bug-os nga nasud.

An eksperyensya ni Bugto Barber nakahimo ha iya nga magin kwalipikado gud ha toka nga iginhatag ha iya han 1948 sugad nga nagbibiyahe nga ministro—nagbibisita ha mga asembleya ngan mga kongregasyon ha bug-os nga weste nga bahin han Estados Unidos. Hiya nagsiring nga labi nga naruruyag hiya ha pagin aada ha gawas ha pagsangyaw ha publiko. Tungod hini, damu nga kabugtoan an iya nakilala. An iya alerto nga hunahuna ngan kadasig ha ministeryo nakabulig gud han ineskwela hiya ha ika-26 nga klase han Watchtower Bible School of Gilead. Durante han klase, nagin duok hiya kan Sydney Lee Brewer nga iya kaklase nga taga-Canada. Katapos han gradwasyon, ginkasal hira ngan nag-honeymoon durante han halipot nga pagbiyahe ngadto ha mga kongregasyon ha Chicago, Illinois. Hi Sydney maopay gud nga padis ngan padayon nga gintitikangan hin suporta han iya bana durante han duha ka dekada nga ira pag-alagad ha pagbiyahe nga ministeryo.

An mga iginkaupod ngan iginkakilala ni Bugto Barber durante han mga dekada han iya pag-alagad sugad nga paramangno han distrito o sirkito o durante han trenta ka tuig nga iya gin-gamit ha pagbuhat ngan pagbiyahe sugad nga membro han Nagmamando nga Lawas diri gud mahingangalimot han iya mga pahayag ngan buhi nga mga komento. May-ada kita han ngatanan nga hinungdan nga malipay han iya “kadaogan upod han Kordero.”