An Pulong ni Jehova Natutuman Gud

“Waray usa nga butang [“pulong,” NW] nga nakawang ha ngatanan nga mag-opay nga butang nga kan Jehova nga iyo Dios iginyakan mahitungod ha iyo; an ngatanan natuman para ha iyo.”—JOSUE 23:14.

1. Hin-o hi Josue, ngan ano an iya ginbuhat ha ikatarapos han iya kinabuhi?

 MAKUSOG ngan maisugon hiya nga kumander han kasundalohan ngan usa nga tawo nga may pagtoo ngan integridad. Nagbuhat hiya kaupod ni Moises ngan ginpili ni Jehova nga manguna ha nasud han Israel tikang ha makaharadlok nga kamingawan pakadto ha tuna nga nag-aagay hin gatas ngan dugos. Ha ikatarapos han iya kinabuhi, inin talahuron gud nga tawo, hi Josue, naghatag hin makapabantad nga pahayag ha katigurangan han Israel. Sigurado nga nagparig-on ito han pagtoo hadton namati ha iya. Makakaparig-on liwat ito ha imo.

2, 3. Han nagpahayag hi Josue ha katigurangan han Israel, ano an kahimtang han nasud, ngan ano an iya ginsiring?

² Handurawa an kahimtang nga iginhulagway ha Biblia: “Nahinabo ha katapos han damu nga adlaw, han kan Jehova paghatagi hin pahuway han Israel tikang ha ngatanan nira nga kaaway ha palibot, ngan hi Josue lagas na ngan hitaas na an panuigon; nga tinawag ni Josue an bug-os nga Israel, an ira katigurangan ngan an ira mga pangulo, ngan an ira mga hukom ngan an ira mga punoan, ngan sidngon hira: Ako lagas na ngan hitaas na an panuigon.”—Josue 23:1, 2.

³ Hi Josue haros 110 anyos na ngan nagkinabuhi ha usa han pinakamakatirigamnan nga peryodo ha kasaysayan han katawohan han Dios. Hinkit-an niya an gamhanan nga mga buhat ni Jehova ngan an katumanan han Iya damu nga saad. Tungod hito, bug-os an pagsarig nga hiya nagsiring: “Maaram kamo ha ngatanan niyo nga mga kasingkasing ngan ha ngatanan niyo nga mga kalag, nga waray usa nga butang nga nakawang ha ngatanan nga mag-opay nga butang nga kan Jehova nga iyo Dios iginyakan mahitungod ha iyo; an ngatanan natuman para ha iyo, waray usa nga butang nga nakawang hini.”—Josue 23:14.

4. Ano an iginsaad ni Jehova ha mga Israelita?

⁴ Ano nga mga pulong ni Jehova an natuman ha panahon ni Josue? Aton paghihisgotan an tulo nga saad ni Jehova ha mga Israelita. Siyahan, iya tatalwason hira tikang ha pagkauripon. Ikaduha, pananalipdan niya hira. Ikatulo, mamangnoan niya hira. Ito liwat an iginsasaad ni Jehova ha iya katawohan yana, ngan nakikita naton an katumanan hito ha aton panahon. Kondi, antes naton paghisgotan an Iya ginbubuhat yana, tagdon anay naton an Iya ginbuhat ha panahon ni Josue.

Gintatalwas ni Jehova an Iya Katawohan

5, 6. Paonan-o gintalwas ni Jehova an mga Israelita tikang ha Ehipto, ngan ano an ipinapakita hini?

⁵ Han an mga Israelita nangaraba kan Jehova tungod han ira pagkauripon ha Ehipto, nalooy Hiya. (Eksodo 2:23-25) Ha naglalaga nga kahoy-kahoy, Hiya nagsiring kan Moises: “Ako nakanhi pagluwas ha [akon katawohan] tikang ha mga kamot han mga Ehiptohanon, ngan ha pagdara ha ira tikang hadto nga tuna, ngadto ha tuna nga daku ngan haluag, ngadto ha tuna diin pag-aagay an gatas ngan an dugos.” (Eksodo 3:8) Makalilipay gud nga gintuman ito ni Jehova! Han waray tumugot hi Paraon nga pagawson an Israel ha Ehipto, ginsumatan hiya ni Moises nga hihimoon han Dios nga magin dugo an katubigan han Salog Nilo. Natuman an pulong ni Jehova. An katubigan hito nagin dugo. Nagkamatay an kaisdaan, ngan an tubig diri na naiinom. (Eksodo 7:14-21) Hi Paraon nagpabilin nga matig-a, salit hi Jehova nagpadapat hin siyam nga peste ngan iya iginsumat nga daan kon ano an iya pagbubuhaton.  (Eksodo, kapitulo 8-12) Katapos han ikanapulo nga peste nga nakamatay ha mga suhag han Ehipto, ginpalakat ni Paraon an mga Israelita—ngan binaya dayon hira!—Eksodo 12:29-32.

⁶ Ito nga katalwasan naghatag kan Jehova hin higayon nga tag-iyahon an Israel sugad nga iya pinili nga nasud. Naghimaya ito kan Jehova sugad nga Paratuman han iya mga saad, an usa nga diri napapakyas an pulong. Ipinakita hito nga hi Jehova supremo kay ha mga dios han mga nasud. An pagbasa mahitungod hito nga katalwasan nagpaparig-on han aton pagtoo. Handurawa an imo aabaton kon naeksperyensyahan mo ito! Nakita ni Josue nga hi Jehova ha waray ruhaduha amo “an Gihitaasi ha bawbaw han tuna.”—Salmo 83:18.

Ginpapanalipdan ni Jehova an Iya Katawohan

7. Paonan-o ginpanalipdan ni Jehova an mga Israelita tikang ha kasundalohan ni Paraon?

⁷ Kumusta man an ikaduha nga saad nga pananalipdan ni Jehova an iya katawohan? Marig-on ini nga iya saad nga tatalwason hira tikang ha Ehipto ngan pasusudlon ha Tuna nga Iginsaad. Hinumdumi nga ginlanat an mga Israelita han nangangalas gud nga hi Paraon upod han iya magkusog nga kasundalohan nga may-ada ginatos nga karomata. Sigurado nga daku gud an kompyansa hiton mapahitas-on nga hi Paraon labi na han an mga Israelita baga hin waray na mapapalagiwan butnga han kabukiran ngan han kadagatan! Yana ginios dayon an Dios ha pagpanalipod ha iya katawohan pinaagi han pagbutang hin dampog ha butnga han duha nga kampo. Madulom ha kampo han mga Ehiptohanon; kondi malamrag ha kampo han mga Israelita. Samtang an dampog nakaulang ha paglanat han mga Ehiptohanon, gin-alsa ni Moises an iya tungkod ngan nabahin an katubigan han Dagat nga Pula, salit nagin agian ito ha kaluwasan para ha mga Israelita ngan nagin lit-ag ito para ha mga Ehiptohanon. Bug-os nga ginbungkag ni Jehova an magkusog nga kasundalohan ni Paraon, kondi ginpanalipdan an Iya katawohan nga diri mapirde.—Eksodo 14:19-28.

8. Ano nga panalipod an naeksperyensyahan han mga Israelita (a) ha kamingawan ngan (b) han pag-abot nira ha Tuna nga Iginsaad?

⁸ Katapos makatabok ha Dagat nga Pula, an mga Israelita nagbarubalhin ha tuna nga iginhulagway sugad nga “haluag hinduro ngan peligroso nga kamingawan nga puno hin maglara nga halas ngan alakdan, ngan mamara nga tuna nga waray tubig.” (Deuteronomio 8:15, The New English Bible) Ginpanalipdan liwat ni Jehova an iya katawohan didto. Ngan ano an nahitabo ha ira pag-abot ha Tuna nga Iginsaad? Ginkontra hira han magkusog nga kasundalohan han Kanaan, kondi hi Jehova nagsiring kan Josue: “Tumindog ka, tabok hinin Jordan, ikaw, ngan ini ngatanan nga katawohan, ngadto ha tuna nga akon ihahatag ha ira, bisan ha mga anak ni Israel. Waray bisan hin-o nga tawo nga takos makaato ha imo ha ngatanan nga adlaw han imo kinabuhi: sugad nga ako upod kan Moises, sugad man maupod ako ha imo: diri ko ikaw kakawangon, diri ko ikaw  babayaan.” (Josue 1:2, 5) Natuman gud ito nga mga pulong ni Jehova. Ha sulod hin mga unom ka tuig, ginpirde ni Josue an 31 nga hadi ngan ginsakop an dagku nga bahin han Tuna nga Iginsaad. (Josue 12:7-24) Imposible gud ito nga pagsakop kon waray an panalipod ngan pagmangno ni Jehova.

Ginmamangnoan ni Jehova an Iya Katawohan

9, 10. Paonan-o ginmangnoan ni Jehova an iya katawohan ha kamingawan?

⁹ Tagda yana an ikatulo nga saad—mamangnoan ni Jehova an iya katawohan. Waray pag-iha katapos nira matalwas ha Ehipto, an Dios nagsaad ha mga Israelita: “Kitaa, akon pauuranon hin tinapay tikang ha langit tungod ha iyo; ngan an katawohan manggawas ngan manirok han [iya] bahin han usa ka adlaw ha ikinaadlaw.” Sugad la han ginsiring han Dios, hiya nagtagana hin “tinapay tikang ha langit.” “Han pagpakakita han mga anak ni Israel hini, siniring hira ha usa kag usa: Ano ito?” Ito an manna, an tinapay nga iginsaad ni Jehova ha ira.—Eksodo 16:4, 13-15.

¹⁰ Ha sulod hin 40 ka tuig ha kamingawan, ginmangnoan ni Jehova an mga Israelita, ngan gintagan hira hin pagkaon ngan tubig. Ginsiguro pa ngani niya nga diri madaan an ira panapton ngan diri manhubag an ira mga tiil. (Deuteronomio 8:3, 4) Hinkit-an ni Josue ini ngatanan. Gintalwas, ginpanalipdan, ngan ginmangnoan ni Jehova an iya katawohan, sugad gud han iya iginsaad ha ira.

Katalwasan Yana nga Panahon

11. Ano an iginpahibaro ha Brooklyn, New York, han 1914, ngan inabot an panahon para ha ano?

¹¹ Kumusta man ha aton panahon? Han Biernes nga aga, han Oktubre 2, 1914, hi Charles Taze Russell, nga nanguna hito nga panahon ha mga Estudyante han Biblia, sinulod ha pangaonan ha Bethel ha Brooklyn, New York. Malipayon hiya nga nagsiring, “Maopay nga aga ha iyo ngatanan.” Katapos, antes lumingkod, iya iginpahibaro: “An panahon han mga Hentil natapos na; natapos na an adlaw han ira mga hadi.” Inabot na liwat an panahon ni Jehova, an Soberano han uniberso, ha pagbuhat para ha iya katawohan. Ngan ginios dayon hiya!

12. Ano nga pagtalwas an nahitabo han 1919, ngan ano an nagin resulta hini?

¹² Paglabay hin lima la ka tuig, gintalwas ni Jehova an iya katawohan tikang ha ‘Babilonya nga Daku,’ an gamhanan nga imperyo han palso nga relihiyon ha kalibotan. (Pahayag 18:2) Pipira la ha aton an nakakita hiton makalilipay nga katalwasan. Kondi, matin-aw nga nakikita naton an mga resulta hito. Ginparig-on utro ni Jehova an putli nga pagsingba ngan gin-urosa adton naghihingyap ha pagsingba ha iya. Igintagna ini pinaagi kan propeta Isaias: “Mahinanabo ha urhi nga mga adlaw, nga an bukid han balay ni Jehova pagtitindugon dida ha igbaw han kabukiran, ngan pagpapahitaason labaw han kabungtoran; ngan an ngatanan nga nasud maawas ngada hini.”—Isaias 2:2.

13. Ano nga pag-uswag ha katawohan ni Jehova an imo nakikita?

¹³ Natuman gud an tagna ni Isaias. Han 1919,  nagtikang an kampanya han dinihogan nga nanhibilin ha maisugon nga pagsangyaw ha bug-os nga kalibotan, nga nagpahitaas han pagsingba ha matuod nga Dios. Ha mga dekada han 1930, nagin matin-aw nga an ‘iba nga mga karnero’ gintitirok ngada ha putli nga pagsingba. (Juan 10:16) Siyahan yinukot, sunod ginatos ka yukot, ngan yana minilyon na an nasuporta ha putli nga pagsingba! Ha bisyon ni apostol Juan, iginhuhulagway hira sugad nga “daku nga panon, nga waray tawo nga makakaihap, tikang ha ngatanan nga nasud ngan mga panon ngan katawohan ngan mga yinaknan.” (Pahayag 7:9, NW) Ano an imo nakita durante han imo panahon? Pira pa la an mga Saksi ni Jehova dinhi ha tuna han hinbaroan mo an kamatuoran? Yana, adton nag-aalagad kan Jehova sobra na 6,700,000. Pinaagi han pagtalwas ni Jehova ha iya katawohan tikang ha Babilonya nga Daku, iginhatag niya an higayon para ha makalilipay nga pag-uswag nga nakikita naton yana ha bug-os nga kalibotan.

14. Ano pa nga pagtalwas an pagbubuhaton?

¹⁴ Hi Jehova may-ada pa pagtalwas nga pagbubuhaton—mahidadabi hini an ngatanan ha bug-os nga tuna. Ha urusahon nga pagpakita han iya gahum, bubungkagon niya an ngatanan nga nakontra ha iya ngan tatalwason an iya katawohan ngadto ha bag-o nga kalibotan diin mag-uukoy an katadongan. Makalilipay gud nga makita an kataposan han karaotan ngan an tinikangan han pinakamaopay nga panahon ha bug-os nga kasaysayan han tawo!—Pahayag 21:1-4.

An Panalipod ni Jehova ha Aton Yana

15. Kay ano nga ginkikinahanglan an panalipod ni Jehova yana?

¹⁵ Sugad han hinbaroan naton, an mga Israelita ha panahon ni Josue nagkinahanglan han panalipod ni Jehova. Ginkikinahanglan ba liwat ito han katawohan ni Jehova yana? Oo! Hi Jesus nagpahamangno ha iya mga sumurunod: “Ira kamo igtutubyan ha kagol-anan, ngan pamamatayon kamo, ngan pagdudumtan kamo han ngatanan nga nasud tungod han akon ngaran.” (Mateo 24:9) Ha naglabay nga katuigan, an mga Saksi ni Jehova ha damu nga katunaan nag-antos hin duro nga pagkontra ngan mabangis nga pagtimaraot. Bisan pa hito, matin-aw nga binubuligan ni Jehova an iya katawohan. (Roma 8:31) An iya Pulong nagpapasarig ha aton nga waray bisan ano—‘waray hinganiban nga ginhitsura patok ha aton’—an makakapaundang ha aton pagsangyaw han Ginhadian ngan pagtutdo nga buruhaton.—Isaias 54:17.

16. Ano nga ebidensya an imo nakikita nga ginpapanalipdan ni Jehova an iya katawohan?

¹⁶ Bisan pa han kangalas han kalibotan, an katawohan ni Jehova padayon nga nagtitikadamu. An mga Saksi ni Jehova nag-uuswag ha 236 nga katunaan—makakombinse gud nga ebidensya nga hi Jehova kaupod naton basi magpanalipod tikang  hadton naruruyag ha pagbungkag o pagpahilom ha aton. Nahinunumdoman mo ba an mga ngaran han gamhanan nga mga lider ha politika o relihiyon nga nagtalumpigos ha katawohan han Dios durante han imo panahon? Ano an nahitabo ha ira? Hain na hira yana? Kadam-an ha ira an nagkamatay na, sugad la kan Paraon ha panahon nira Moises ngan Josue. Ngan kumusta man an mga surugoon han Dios yana nga nagkamatay nga matinumanon? Nagpapabilin hira ha panumdoman ni Jehova. Waray na iba nga lugar nga mas talwas para ha ira. Matin-aw, may kalabotan ha panalipod, natutuman gud an mga pulong ni Jehova.

Ginmamangnoan ni Jehova an Iya Katawohan Yana

17. Ano an iginsaad ni Jehova may kalabotan ha espirituwal nga pagkaon?

¹⁷ Ginmangnoan ni Jehova an iya katawohan ha kamingawan ngan ginmamangnoan niya an iya katawohan yana nga panahon. Ginpapakaon kita ha espirituwal pinaagi han “matinumanon ngan maaramon nga uripon.” (Mateo 24:45, NW) Igintututdo ha aton an espirituwal nga mga kamatuoran nga igintago hin mga siglo. An anghel nagsiring kan Daniel: “Sadhi an mga pulong, ngan lakrehi an basahon, bisan ngadto ha panahon ha kataposan, damu an madalagan ngadto nganhi, ngan an hibaro magdudugang.”—Daniel 12:4.

18. Kay ano nga masisiring nga hura gud kita yana han husto nga kahibaro?

¹⁸ Nagkikinabuhi na kita yana ha panahon han kataposan, ngan hura gud kita han husto nga kahibaro. Ha bug-os nga kalibotan, an baraan nga espiritu naggigiya ha mga mahigugmaon han kamatuoran nga magkaada husto nga kahibaro mahitungod ha matuod nga Dios ngan han iya mga katuyoan. Damu hinduro an Biblia ha tuna yana, sugad man an mga publikasyon nga nabulig ha mga tawo nga makasabot han presyoso nga mga kamatuoran nga aada ha Biblia. Tagda pananglitan an mga sulod han aradman nga libro nga Ano Gud ba an Igintututdo han Biblia? a Ini an pipira han mga kapitulo hito: “Ano an Kamatuoran Mahitungod ha Dios?,” “Hain an mga Patay?,” “Ano an Ginhadian han Dios?,” ngan “Kay Ano nga Tinutugotan han Dios an Pag-antos?” Ginpapamalandong han mga tawo an sugad nga mga pakiana ha sulod hin yinukot ka tuig na. May-ada na mga baton hito yana. Bisan pa han maiha na nga kaignorante han mga tawo mahitungod han Biblia ngan han apostata nga mga katutdoan han Kakristianohan, an Pulong han Dios naglalampos ngan nagpaparig-on ha ngatanan nga naghihingyap nga mag-alagad kan Jehova.

19. Ano nga mga saad an nakikita mo nga natutuman, ngan ano an imo masisiring?

¹⁹ Waray ruhaduha nga tikang ha aton nakita mismo, makakasiring kita: “Waray usa nga butang [“pulong,” NW] nga nakawang ha ngatanan nga mag-opay nga butang nga kan Jehova nga iyo Dios iginyakan mahitungod ha iyo; an ngatanan natuman para ha iyo, waray usa nga butang nga nakawang hini.” (Josue 23:14) Gintatalwas, ginpapanalipdan ngan ginmamangnoan ni Jehova an iya mga surugoon. May-ada ka ba mauunabi nga bisan ano nga saad nga waray matuman ha iya itinanda nga panahon? Waray gud. Maaramon kita kon tumoo kita ha masasarigan nga Pulong han Dios.

20. Kay ano nga makakasarig kita nga matutuman an aton ginlalaoman ha tidaraon?

²⁰ Kumusta man an tidaraon? Hi Jehova nagsusumat ha aton nga an kadam-an ha aton makakalaom ha pag-ukoy ha tuna nga magigin makaruruyag nga paraiso. An pipira ha aton naglalaom nga magmamando upod ni Kristo ha langit. Anoman an aton paglaom, may-ada gud kita hinungdan ha pagpabilin nga matinumanon sugad kan Josue. Maabot an panahon nga matutuman an aton ginlalaoman. Hito nga panahon, mahinunumdoman naton an ngatanan nga iginsaad ni Jehova, ngan kita liwat masiring: “An ngatanan natuman.”

[Footnote]

Maisasaysay Mo Ba?

• Ano nga mga saad ni Jehova an nakita ni Josue nga natuman?

• Ano nga mga saad han Dios an nakikita mo nga natutuman?

• Ano an masisiguro naton mahitungod han pulong han Dios?

[Mga Pakiana]

[Retrato ha pahina 23]

Gintalwas ni Jehova an iya katawohan

[Retrato ha pahina 23]

Paonan-o ginpanalipdan ni Jehova an iya katawohan ha Dagat nga Pula?

[Retrato ha pahina 24]

Paonan-o ginmangnoan ni Jehova an iya katawohan ha kamingawan?

[Mga Retrato ha pahina 25]

Ginmamangnoan ni Jehova an iya katawohan yana