“An Salapi Akon, Ngan an Bulawan, Akon”

HAN ikaunom ka siglo A.K.P., ginpagawas ni Hadi Ciro han Persia an katawohan han Dios tikang ha pagkabihag ha Babilonya. Yinukot ha ira an binalik ha Jerusalem basi tukuron utro an guba nga templo ni Jehova. Waray kasigurohan an ira kahimtang ha pinansyal, ngan an magdarahog nga amyaw kinontra ha pagtukod. Tungod hito, an pipira ha ira naghunahuna kon matatapos ba nira iton daku nga proyekto.

Pinaagi han propeta ni Jehova nga hi Hagay, iya ginpasarig an magturukod nga iya uupdan hira. “Akon babay-ugon an ngatanan nga nasud, ngan an birilhon nga mga butang han ngatanan nga nasud mahinganganhi; ngan akon pupun-on ini nga balay hin himaya,” nagsiring an Dios. May kalabotan han pinansyal nga mga kabaraka han mga magturukod, iginpahayag ni Hagay ini nga mensahe: “An salapi akon, ngan an bulawan, akon, nasiring hi Jehova han mga kasundalohan.” (Hagay 2:7-9) Ha sulod hin lima ka tuig tikang han ginyakan ni Hagay iton makapadasig nga mga pulong, natapos an proyekto.—Esra 6:13-15.

Nakakaaghat liwat an mga pulong ni Hagay ha mga surugoon han Dios hinin bag-o la nga mga panahon kon may-ada hira dagku nga proyekto may kalabotan ha pagsingba kan Jehova. Han 1879, han gintikangan han matinumanon ngan maaramon nga uripon nga klase an pagpublikar hini nga barasahon, nga hito nga panahon gintatawag nga Zion’s Watch Tower and Herald of Christ’s Presence, nagsusulod ito han masunod nga mga pulong: “Natoo kami nga hi JEHOVA an parabulig han ‘Zion’s Watch Tower,’ ngan samtang ini an kahimtang diri gud ini makikilimos o maghahangyo ha mga tawo para han suporta. Kon Hiya nga nasiring: ‘Akon an ngatanan nga bulawan ngan salapi han kabukiran,’ mapakyas ha pagtagana han kinahanglanon nga mga pundo, sasabuton namon ito nga panahon na ha pag-undang han pagpublikar.”

Waray gud maundang an pagpublikar. An siyahan nga gowa hito, 6,000 nga kopya an gin-imprinta ha Ingles la nga yinaknan. Yana, 28,578,000 an aberids nga gin-iimprinta kada gowa ha 161 nga yinaknan. a An Barantayan ngan Awake! nga mga magasin gin-iimprinta ha 34,267,000 nga kopya, ngan an Awake! gin-iimprinta ha 80 nga yinaknan.

Damu an proyekto han mga Saksi ni Jehova nga an tumong pariho han An Barantayan—an pagpasidungog kan Jehova sugad nga an Soberano nga Ginoo han uniberso ngan an pagpasamwak han maopay nga sumat han iya Ginhadian. (Mateo 24:14; Pahayag 4:11) An pagtoo han mga Saksi yana pariho han ginsiring hini nga magasin han 1879. Natoo hira nga ginbubuligan han Dios an ira buruhaton ngan magkakaada pundo an mga proyekto nga iya gin-uuyonan. Kondi, ha praktikal nga paagi, paonan-o natataparan an mga buruhaton han mga Saksi ni Jehova? Ngan ano nga mga proyekto an ira ginhihimo basi maisangyaw an maopay nga sumat ha bug-os nga kalibotan?

Paonan-o Natataparan an Buruhaton?

Samtang nagsasangyaw an mga Saksi ni Jehova, ordinaryo la nga makabati hira hini nga pakiana, “Ginsusweldohan ba kamo?” Diri, diri hira ginsusweldohan para hito. Boluntaryo nga iginhahatag nira an ira panahon. Nagasto hira hin damu nga oras ha pakiistorya ha iba mahitungod kan Jehova, ngan han saad han Biblia nga mas maopay nga tidaraon tungod kay napapagios hira han ira pagin mapasalamaton. Gin-aapresyar nira an ginbubuhat han Dios para ha ira ngan an daku nga pag-uswag han ira kinabuhi ngan panlantaw tungod han maopay nga sumat. Salit, karuyag nira isumat ini ha iba. Ha pagbuhat hito, ginsusunod nira an prinsipyo nga ginsiring ni  Jesus: “Kinarawat niyo ha waray bayad, ihatag man niyo ha waray bayad.” (Mateo 10:8) Oo, an ira hingyap nga magin testigo para kan Jehova ngan kan Jesus nagpapagios ha ira nga gamiton an ira kwarta basi maisumat an ira gintotoohan ha mga tawo, bisan adton hirayo ha ira.—Isaias 43:10; Buhat 1:8.

An kahaluag hini nga pagsangyaw ngan an mga ginagamit basi matuman ito—mga imprintahan, opisina, Assembly Hall, urukyan han mga misyonero, ngan iba pa—nagkikinahanglan hin daku nga kwarta. Diin tikang an igin-gagasto hito? Tikang ha boluntaryo nga kontribusyon. Diri gin-oobligar han mga Saksi ni Jehova an mga membro han kongregasyon nga maghatag hin kwarta basi suportahan an mga buruhaton han organisasyon, diri man liwat nira ginpapabaydan an mga publikasyon nga ira ginpapahamutang. Kon may-ada naruruyag magdonar basi suportahan an ira edukasyonal nga buruhaton, nalilipay hira ha pagkarawat hito. Paghisgotan naton bisan an usa la nga bahin han mga pangalimbasog basi maisangyaw an maopay nga sumat ha bug-os nga kalibotan—an paghubad.

Mga Publikasyon ha 437 nga Yinaknan

Ha sulod hin mga dekada, an mga publikasyon han mga Saksi ni Jehova usa han barasahon nga ginhuhubad ha pinakadamu nga yinaknan ha bug-os nga kalibotan. An mga tract, brosyur, magasin, ngan libro ginhuhubad ha 437 nga yinaknan. Syempre an paghubad, pariho ha iba nga buruhaton nga may kalabotan ha pagsangyaw han maopay nga sumat, nagkikinahanglan hin daku nga kantidad. Ano gud ba an nahiuupod ha proseso han paghubad?

Katapos usisahon han mga editor han mga publikasyon han mga Saksi ni Jehova an Ingles nga artikulo, ginpapadara ito pinaagi han kompyuter ngadto ha mga grupo han binansay nga mga parahubad ha bug-os nga kalibotan. An tagsa nga grupo hin parahubad responsable para ha usa nga yinaknan. Depende ha kadamu han ira proyekto ngan han pagkakomplikado han ira yinaknan—an lokal nga yinaknan—ini  nga mga grupo mahimo magkompwesto hin 5 tubtob ha 25 nga membro.

An artikulo gin-uusisa kon husto an pagkahubad pati an iba nga aspekto hito sugad han ispeling ngan tuldok. Tubtob ha mahihimo, tumong hito nga an mga punto ha Ingles magin pariho ngan magin matin-aw ha lokal nga yinaknan. Diri masayon ini. Kon naghuhubad hin artikulo nga nagamit hin teknikal nga bokabularyo, bangin pagkinahanglanon han mga parahubad ngan mga proofreader nga duro nga magsaliksik ha Ingles ngan ha lokal nga yinaknan basi masiguro nga husto an pagkahubad hito. (An iba nga yinaknan iginhuhubad tikang ha Franses, Ruso, o Espanyol). Pananglitan, kon an usa nga artikulo ha Awake! naghihisgot hin teknikal o makasaysayan nga topiko, ginkikinahanglan an duro nga pagsaliksik.

Damu nga parahubad an nagtatrabaho ha mga sanga nga opisina han mga Saksi ni Jehova, an iba bug-os-panahon ngan an pipira part-time. An iba nagtatrabaho ha lugar diin ginyayakan an lokal nga yinaknan. Waray hira sweldo. Para ha bug-os-panahon nga mga parahubad, kwarto ngan pagkaon la an igintatagana ha ira ngan gutiay nga kantidad basi mataparan an ira importante nga kagarastohan. Ha bug-os nga kalibotan, may-ada mga 2,800 nga Saksi nga parahubad. Yana, 98 nga sanga nga opisina han mga Saksi ni Jehova an may-ada mga grupo hin parahubad, o nagdudumara hin mga grupo ha iba nga lugar. Pananglitan, an sanga nga opisina ha Russia nagdudumara hin sobra 230 nga bug-os-panahon o part-time nga parahubad nga naghuhubad ha sobra 30 nga yinaknan, upod na adton diri pamilyar nga pinulongan ha iba nga lugar, sugad han Chuvash, Ossetian, ngan Uighur.

Pagpauswag han Kalidad han Paghubad

Sugad han hinbabaroan han mga nagsari ha pag-aram hin iba nga yinaknan, diri masayon an husto nga paghubad hin magkalain-lain nga topiko. An tumong amo an paghubad han kamatuoran ngan impormasyon tikang ha Ingles ha husto ngan natural nga paagi, nga sugad hin orihinal nga iginsurat ito ha lokal nga yinaknan. Ginkikinahanglan an kaabtik basi mabuhat ini. Damu ka tuig an ginkikinahanglan basi magin maabtik an bag-o nga parahubad, ngan an  mga Saksi ni Jehova padayon nga nagtatagana hin programa ha pagbansay ha ira. Usahay ginbibisita han mga instruktor an mga parahubad basi buligan hira nga mapauswag an ira mga kaabtik ngan paggamit hin kompyuter.

Ini nga programa ha pagbansay may-ada mag-opay nga resulta. Pananglitan, an sanga nga opisina han Nicaragua nasiring: “Ha siyahan nga higayon, an amon mga parahubad ha Miskito nga yinaknan ginbansay ha pamaagi ngan teknik hin usa nga instruktor nga tikang ha sanga nga opisina han Mexico. Tungod hini, daku gud an pag-uswag han kalidad han ira trabaho.”

Mga Pulong nga Nakakabantad ha Kasingkasing

An pagbantad han kasingkasing amo an tumong han mga pangalimbasog ha pagpublikar han Biblia ngan han literatura nga basado ha Biblia ha yinaknan han mga tawo, ngan ito gud an nahitatabo. Han 2006, nalipay an mga Saksi ni Jehova ha Bulgaria han ipagowa an New World Translation of the Christian Greek Scriptures ha ira yinaknan. An sanga nga opisina didto nagreport ha pagkarawat hin damu nga surat hin pagpasalamat. An mga membro han kongregasyon nasiring nga “yana nababantad gud han Biblia an ira kasingkasing, diri la an ira hunahuna.” Usa nga lagas nga lalaki nga taga-Sofia an nagsiring: “Damu ka tuig na nga nagbabasa ako han Biblia, kondi yana pa gud la ako nakabasa hin hubad nga mas masayon masabtan ngan nakakatugkad dayon han kasingkasing.” Ha pariho nga paagi ha Albania, katapos makarawat han usa nga Saksi didto an iya kopya han bug-os nga New World Translation ha Albaniano nga yinaknan, hiya nagsiring: “Maopay gud pamation an Pulong han Dios ha Albaniano! Daku gud nga pribilehiyo nga kaistoryahon  ni Jehova ha amon kalugaringon nga yinaknan!”

An usa ka grupo hin parahubad bangin magkinahanglan hin pipira ka tuig ha paghubad han bug-os nga Biblia. Kondi kon an resulta hito amo an pakasabot han Pulong han Dios han minilyon nga tawo ha siyahan nga higayon, diri mo ba masisiring nga bawi gud an ngatanan nga pangalimbasog?

“Kita mga Kabulig han Dios”

Syempre, an paghubad usa la han damu nga buruhaton nga ginkikinahanglan basi epektibo nga maisangyaw an maopay nga sumat. An pagsurat, pag-imprinta, ngan pagpadara han mga publikasyon ngan an damu pa nga buruhaton han mga sanga nga opisina, sirkito, ngan kongregasyon nagkikinahanglan hin daku nga pangalimbasog ngan kwarta. Kondi, an katawohan han Dios ‘naghahalad ha ira ngahaw ha maopay nga kaburut-on’ basi matuman ini. (Salmo 110:3) Para ha ira, pribilehiyo an pakaamot ngan ginhuhunahuna nira ito nga dungog nga tungod hito, gintatagad hira ni Jehova nga iya “kabulig.”—1 Korinto 3:5-9.

Tinuod nga an usa nga nasiring “an salapi akon, ngan an bulawan, akon” diri nadepende ha aton pinansyal nga bulig basi matuman an iya buruhaton. Bisan pa hito, ginpapasidunggan ni Jehova an iya mga surugoon han pribilehiyo nga magkaada bahin ha pagbindikar han iya ngaran pinaagi han ira pagdonar para ha pagsangyaw “ha bug-os nga kalibotan” han kamatuoran nga nagluluwas han kinabuhi. (Mateo 24:14; 28:19, 20) Diri ka ba napapagios nga buhaton an ngatanan nga imo mahihimo ha pagsuporta hini nga buruhaton nga diri na gud mauutro?

[Footnote]

[Kahon ha pahina 18]

“NABUBULIGAN KAMI HITO NGA MAGHUNAHUNA HIN SERYOSO”

Usa nga 14-anyos nga daragita an nagsurat ha sanga nga opisina han mga Saksi ni Jehova ha Cameroon: “Katapos ko mapalit an akon garamiton ha eskwelahan para yana nga tuig, naibaligya ko hin 2,500 francs [$5, E.U.] an akon duha nga libro han naglabay nga tuig. Iginhahatag ko ini nga kwarta pati an 910 francs [$1.82, E.U.] nga akon natirok. Karuyag ko dasigon kamo nga ipadayon an iyo maopay nga buhat. Salamat ngay-an han Watchtower ngan Awake! nga mga magasin. Nabubuligan kami hito nga maghunahuna hin seryoso.”

[Kahon/Retrato ha pahina 18]

USA NGA NAIIBA NGA DONASYON

An sanga nga opisina han mga Saksi ni Jehova ha Mexico kinarawat hin surat tikang kan Manuel, usa nga maapresyaron nga sais-anyos nga taga-Chiapas State. Tungod kay diri pa hiya maaram magsurat, usa nga sangkay an nagsurat para ha iya. Hi Manuel nagsiring: “Gintagan ako ni Lola hin anay. Han nag-anak ito, ginpili ko an pinakamatambok nga pasi ngan ginpadaku ito ha bulig han kabugtoan. Upod an daku nga gugma, iginhahatag ko ha iyo an halin han baboy. Inabot ito hin 100 ka kilo, ngan ginbaydan ako hin 1,250 pesos [$110, E.U.]. Alayon gamita an kwarta para kan Jehova.”

[Kahon ha pahina 19]

‘GAMITA INI HA PAGHUBAD HAN BIBLIA’

Han 2005 distrito nga mga kombensyon han mga Saksi ni Jehova ha Ukraine, iginpagowa an New World Translation of the Christian Greek Scriptures ha ira yinaknan. Kinabuwasan, hinkit-an ini nga surat ha kahon han kontribusyon ha usa han kombensyon: “Noybe anyos ako. Damu nga salamat han Greek Scriptures. Kami nga magbugto gintagan ni nanay hin kwarta basi ipasahe ha bus tikadto ha eskwelahan. Kondi kon diri nauran, nagbabaktas la kami ngan natirok namon ini nga 50 hryvnia [$10, E.U.]. Karuyag ko ngan han akon manghod nga gamiton niyo ini ha paghubad han bug-os nga Biblia ha Ukrainiano nga yinaknan.”

[Kahon ha pahina 20, 21]

MGA PAAGI HAN PAGHATAG NGA GINPIPILI HAN IBA

MGA AMOT PARA HA BUG-OS-KALIBOTAN NGA BURUHATON

Damu an nagtitirok, o naggagahin, hin kantidad nga ira iginbubutang ha mga kahon para han donasyon nga minarkahan hin “Contributions for the Worldwide Work—Matthew 24:14.”

Kada bulan, ini nga kantidad iginpapadara han mga kongregasyon ha opisina han mga Saksi ni Jehova nga nagsiserbi ha ira mga nasud. An mga donasyon nga kwarta mahimo liwat direkta nga ipadara ha Watch Tower Bible and Tract Society of the Philippines, Attention Treasurer’s Office, P.O. Box 2044, 1060 Manila, o ha sanga nga opisina nga nagsiserbi ha iyo nasud. An mga tseke nga iginpapadara ha adres ha igbaw sadang igngaran ha “Watch Tower.” Mahimo liwat maghatag hin alahas o iba pa nga birilhon nga mga butang. Ini nga mga donasyon sadang updan hin halipot nga surat nga nagsusumat nga direkta ito nga regalo.

KAHIKAYAN HAN IGINTAPOD NGAN MAY-KONDISYON NGA DONASYON

An kwarta mahimo itapod ha Watch Tower basi magamit ha bug-os nga kalibotan. Kondi, kon hahangyoon ito han nagpahuram, ibabalik ito ha iya. Para ha dugang nga impormasyon, alayon pakigkomunikar ha Treasurer’s Office ha adres nga aada ha igbaw.

GINPLANO NGA PAGHATAG

Dugang pa ha direkta nga mga regalo nga kwarta, may-ada iba pa nga paagi han paghatag basi magamit ha pag-alagad ha Ginhadian ha bug-os nga kalibotan. Nag-uupod ini han:

Insurance: An Watch Tower Society mahimo himoon nga beneficiary han palisiya han life insurance o han plano ha pagretiro/pensyon.

Mga Deposito ha Bangko: An mga deposito ha bangko, mga sertipiko han deposito, o indibiduwal nga mga deposito ha pagretiro mahimo itapod o ihatag ha panahon han kamatay ha Watch Tower Society, uyon ha lokal nga mga kahikayan han bangko.

Kapital han Negosyo Ngan mga Bono: An mga kapital han negosyo ngan mga bono mahimo igdonar ha Watch Tower Society sugad nga direkta nga regalo.

Tuna Ngan Balay: An maibabaligya nga tuna ngan balay mahimo igdonar pinaagi han direkta nga pagregalo o, kon residensya nga panag-iya, pinaagi han pagreserba hin balay ngan tuna ha nagdonar, nga makakapadayon ha pag-ukoy dida samtang buhi pa hiya. Pahibaroa an sanga nga opisina ha iyo nasud antes himoon an dokumento han pagbalhin han bisan ano nga tuna ngan balay.

Gift Annuity: An gift annuity usa nga kahikayan diin an usa nagbabalhin hin kwarta o mga deposito ngadto ha usa nga pinili nga korporasyon nga ginagamit han mga Saksi ni Jehova. Sugad nga kabalyo, an naghatag, o an usa nga ginpili han naghatag, makarawat hin espisipiko nga kwarta kada tuig samtang hiya buhi. Iibanan an kabaraydan nga buhis han naghatag para ha tuig diin iya gintikangan an gift annuity.

Mga Testamento Ngan mga Igintatapod: An mga panag-iya o kwarta mahimo ihatag ha Watch Tower pinaagi hin testamento nga legal nga ginhimo, o an Watch Tower Society mahimo magin beneficiary han usa nga kasabotan ha pagtapod. An igintapod nga pahihimulsan han usa nga relihiyoso nga organisasyon mahimo maghatag hin pipira nga bentaha ha buhis.

Sugad han iginpapasabot han termino nga “ginplano nga paghatag,” ini nga mga klase hin mga donasyon kasagaran nga nagkikinahanglan hin pagplano han nahatag. Basi mabuligan an mga naghihingyap nga makabulig ha bug-os-kalibotan nga buruhaton han mga Saksi ni Jehova pinaagi han usa nga klase han ginplano nga paghatag, igin-andam an brosyur ha Ingles ngan Espanyol nga may ulohan nga Charitable Planning to Benefit Kingdom Service Worldwide. An brosyur iginsurat basi makahatag hin impormasyon mahitungod ha magkalain-lain nga paagi nga mahimo maihatag an mga regalo yana o ha kamatay pinaagi han pagbilin hin panurundon. Katapos mabasa an brosyur ngan magpakiana ha ira mga magsaragdon may kalabotan ha balaud o ha buhis, damu an nakabulig ha pagsuporta han mga Saksi ni Jehova ha bug-os nga kalibotan may kalabotan ha ira relihiyoso nga mga buruhaton ngan pagbulig ha iba, ngan nakakapahimulos hin daku ha ira buhis samtang binubuhat ito. Ini nga brosyur mahimo makuha pinaagi han paghangyo hin kopya direkta tikang ha Charitable Planning Office.

Para han dugang nga impormasyon, mahimo ka makigkomunikar ha Charitable Planning Office, pinaagi ha surat o ha telepono, ha adres nga nakalista ha ubos, o mahimo ka makigkomunikar ha opisina han mga Saksi ni Jehova nga nagsiserbi ha iyo nasud.

Charitable Planning Office

Watch Tower Bible and Tract Society of the Philippines

186 Roosevelt Avenue,

San Francisco Del Monte

1105 Quezon City

Telepono: (02) 411-6090

[Mga Retrato ha pahina 19]

Mga parahubad ha Miskito nga yinaknan ha sanga nga opisina han Nicaragua