Ginsasalingabot Mo ba an mga Higayon ha Pagsumat han Imo mga Gintotoohan?

“MAY-ADA ba bug-os nga kamatuoran?” Ito an topiko han nasyonal nga kompetisyon ha Polandia ha paghimo hin halipot nga sinurat. An mga instruksyon hito nasiring: “Diri kami nagkikinahanglan hin bug-os nga kamatuoran. Waray nagkikinahanglan hito. Sabagay, waray man ngani bug-os nga kamatuoran.” Hi Agata nga 15-anyos nga estudyante ha hayskul ngan usa han mga Saksi ni Jehova, nagdesisyon nga salingabuton ini nga higayon ha pagsumat ha iba han iya relihiyoso nga mga gintotoohan.

Ha pagpangandam para ha kompetisyon, hi Agata nag-ampo anay nga giyahan hiya ni Jehova ngan katapos nagtikang pagtirok hin mga impormasyon may kalabotan hito nga topiko. May-ada hiya nabilngan ha An Barantayan han Hulyo 1, 1995. Iya ginkotar an pakiana ni Ponsio Pilato kan Jesus: “Ano an kamatuoran?” (Juan 18:38) Hiya nagsiring, ito nga pakiana nagpapakita hin pagkamaruhaduhaon nga baga hin nasiring: ‘Kamatuoran? Ano ito? Waray kamatuoran!’ Hi Agata nagsurat, “an pakiana ni Pilato nagpahinumdom ha akon han mga instruksyon hito.”

Sunod, iya iginsaysay an ideya nga an kamatuoran para ha usa nga tawo bangin diri kamatuoran para ha iba ngan bangin “husto” hira nga duha. Nagpakiana hiya, “Hin-o ha aton an masakay ha eruplano kon diri kita kombinsido nga bug-os nga kamatuoran an mga balaud han aerodynamics?” Katapos iya gin-unabi an Biblia, nasiring: “Makakasarig kita ha Pulong han Dios tungod kay marig-on nga iginbasar ito ha tinuod nga mga impormasyon.” Iya iginpahayag an iya paglaom nga adton sinsero nga namimiling han bug-os nga kamatuoran magkaada unta pagpailob ha pagpamiling hito.

Nagdaog hi Agata hin espesyal nga sertipiko ngan nagkaada liwat hiya higayon nga ipresenta ito ha bug-os nga klase. Ginkarawat han pipira han iya mga kaeskwela an iya tanyag nga pag-aram ha Biblia. Nagpapasalamat gud hi Agata nga iya ginsalingabot an higayon ha pagsumat ha iba han iya mga gintotoohan. Oo, an pagin andam ha pagsumat han imo pagtoo mahimo magresulta hin maopay. Ano nga mga higayon an mahimo mo salingabuton?