Kon Kay Ano nga Makuri an Pagpaubos

PARA ha damu nga tawo, baga hin waray kapulsanan an pagin mapainubsanon yana nga panahon. An mga nangangalimbasog gud nga magin labaw, an mga garbuso, ngan an mga nagpipirit nga makuha an ira karuyag amo an mga kilala ngan an baga hin pinakamalampuson. Kadam-an nga tawo an naaawa ha paagi han pagkinabuhi han riko ngan sikat, diri han mapainubsanon ngan maaghop. Adton malampuson kasagaran nga naruruyag maghambog nga naglampos hira tungod han ira kalugaringon nga pangalimbasog. Imbes nga magpaubos, naghahambog hira nga hira la an hinungdan han ira pag-asenso.

Usa nga parasaliksik nga taga-Canada an naghisgot mahitungod han “pag-eksister [ha ira nasud] han disposisyon nga ‘kalugaringon la an ginhuhunahuna.’” An iba naabat nga nag-uukoy kita ha sosiedad nga an pagpalipay ha kalugaringon gintatagad nga mas importante kay ha pagin responsable, ngan naoobserbahan nira nga an mga tawo nagigin mas makikalugaringon. Ha kalibotan yana, an pagin mapainubsanon baga hin diri makaruruyag nga kalidad.

Syempre, damu an mauyon ha ideya nga maopay an pagpaubos tungod kay masayon pakiupdan an mapainubsanon. Kondi, hinin nagpapalabaw-labaw nga kalibotan, nahahadlok an iba nga kon magin mapainubsanon hira, huhunahunaon hira han iba nga maluya.

Igintagna han Pulong han Dios, an Biblia, nga ha aton panahon an mga tawo magigin “hambog, palabilabihon.” (2 Timoteo 3:1, 2) Diri ka ba mauyon nga natutuman na ini? May-ada ka ba nakikita nga bentaha ha pagin mapainubsanon? O naghuhunahuna ka ba nga an mapainubsanon tatagdon nga maluya, masayon la mauwat?

Ha pagkamatuod, naghahatag an Biblia hin mag-opay nga hinungdan ha pagpabili ngan pagkultibar han pagpaubos. Naghahatag ito hin timbang ngan positibo nga pagtagad hito nga kalidad, ngan nagpapakita ito nga an tinuod nga pagpaubos pangirilal-an hin maopay nga kalidad, diri kaluyahan. An masunod nga artikulo magsasaysay kon kay ano.

[Retrato ha pahina 3]

Paonan-o naton tatagdon an aton mga kalamposan?