Pag-usisa han “Higlarom nga mga Bagay han Dios”
Pag-usisa han “Higlarom nga mga Bagay han Dios”
“An espiritu nag-uusisa ha ngatanan nga mga bagay, oo, bisan pa an mga higlarom nga mga bagay han Dios.”—1 KORINTO 2:10.
1. Ano an pipira han kamatuoran nga nakakalipay ha bag-o nga mga estudyante han Biblia?
KADAM-AN ha aton ha Kristiano nga kongregasyon an mahinunumdom nga nalipay gud kita han hinbaroan pa la naton an kamatuoran. Hinbaroan naton kon kay ano nga importante an ngaran ni Jehova, kon kay ano nga iya gintutugotan an pag-antos, kon kay ano nga an iba nga tawo makadto ha langit, ngan kon ano an tidaraon han magtinumanon nga katawohan. Bangin gin-usisa na naton ito ha Biblia hadto, kondi igintago ito ha aton sugad man ha kadam-an nga tawo. Sugad kita hin tawo nga nakukurian pagkita han mga korales ha ilarom han dagat. Tungod kay waray hiya aparato, diri niya nakikita hin maopay an makaruruyag nga mga linarang ha ilarom. Kondi ha bulig han silip, nalipay gud hiya han makita ha siyahan nga higayon an mag-opay an kolor nga korales, kaisdaan, mga sea anemone, ngan iba pa nga magpakaruruyag nga linarang. Sugad man, han may binulig ha aton nga masabtan an Kasuratan, nasabtan naton ha siyahan nga higayon an “higlarom nga mga bagay han Dios.”—1 Korinto 2:8-10.
2. Kay ano nga magpapabilin an aton kalipay ha pag-aram ha Pulong han Dios?
2 Sadang ba kita makontento na ha pagkaada hababaw la nga kahibaro han kamatuoran ha Biblia? An “higlarom nga mga bagay han Dios” nag-uupod han pagsabot ha iya kinaadman nga iginpahayag pinaagi han baraan nga espiritu ha mga Kristiano kondi igintago ha iba. (1 Korinto 2:7) Waray gud tubtoban an kinaadman han Dios ngan malilipay hinduro kita ha pag-usisa hito! Diri gud naton hibabaroan an ngatanan mahitungod han Iya maaramon nga mga buhat. Bisan pa hito, magpapabilin an kalipay nga inabat naton han hinbaroan pa la naton an basihan nga mga katutdoan ha Biblia kon magpadayon kita ha pagsaliksik han “higlarom nga mga bagay han Dios.”
3. Kay ano nga kinahanglan masabtan naton hin matin-aw an basihan han aton mga gintotoohan?
3 Kay ano nga kinahanglan masabtan naton ito nga “higlarom nga mga bagay”? An pakasabot diri la ha kon ano an aton gintotoohan kondi kon kay ano nga natoo kita hito—an basihan han aton mga gintotoohan—nagpaparig-on han aton pagtoo ngan pagsarig. Gin-aaghat kita han Kasuratan nga gamiton an aton abilidad ha pangatadongan basi “kasayoran [naton] kon ano an maopay ngan karuruyagon ngan hingpit nga kaburut-on han Dios.” (Roma 12:1, 2) Napaparig-on an aton determinasyon nga sugton hi Jehova tungod kay nasasabtan naton kon kay ano nga gin-aaghat kita niya nga magkinabuhi uyon ha iya paagi. Salit, an kahibaro ha “higlarom nga mga bagay” makakapakusog ha aton nga atohan an pagsulay ha pagbuhat hin supak ha balaud ngan makakapagios ha aton nga magin madasigon ha “mag-opay nga buhat.”—Tito 2:14.
4. Ano an nahiuupod ha pag-aram ha Biblia?
4 Kinahanglan nga mag-aram kita basi masabtan an higlarom nga mga bagay. Kondi, an pag-aram diri kay pahapyaw la nga pagbasa. Nag-uupod ito hin detalyado nga pag-usisa han mga impormasyon basi masabtan kon ano an kalabotan hito ha aton hinbabaroan na. (2 Timoteo 1:13) Nagkikinahanglan ito hin pakasantop ha mga pangatadongan han iginsasaysay. Sadang iupod ha pag-aram ha Biblia an pamalandong kon paonan-o naton magagamit an aton hinbabaroan ha paghimo hin maaramon nga mga desisyon ngan pagbulig ha iba. Tungod kay “an ngatanan nga mga Baraan nga Surat nga ginpakaaghat han Dios may kapulsanan,” sadang liwat naton pag-adman “an ngatanan nga pulong, nga nagowa ha baba han Dios.” (2 Timoteo 3:16, 17; Mateo 4:4) Kinahanglan gud an kamaduruto ha pag-aram ha Biblia! Kondi makalilipay liwat ito, ngan diri makuri hinduro masabtan an “higlarom nga mga bagay han Dios.”
Binubuligan ni Jehova an mga Mapainubsanon nga Makasabot
5. Hin-o an makakasabot han “higlarom nga mga bagay han Dios”?
5 Bisan kon waray ka manguna ha eskwelahan ngan diri ka hiara mag-aram, ayaw paghunahuna nga diri mo masasabtan an “higlarom nga mga bagay han Dios.” Durante han ministeryo ni Jesus dinhi ha tuna, iginpahayag ni Jehova an pagsabot ha iya katuyoan, diri ha mga maaramon ngan intelihente, kondi ha mga waray hibabroan ngan waray sarabotan nga mapainubsanon nga nagpatutdo ha surugoon han Dios. Baga hin gudtiay hira nga kabataan kon itanding ha mga nagpakaeskwela. (Mateo 11:25; Buhat 4:13) Mahitungod han “mga bagay nga igin-andam han Dios ha ngatanan nga nahigugma ha iya,” hi apostol Pablo nagsurat ha iya mga igkasi-tumuroo: “Ha aton iginpahayag ito han Dios pinaagi ha espiritu: kay an espiritu nag-uusisa ha ngatanan nga mga bagay, oo, bisan pa an mga higlarom nga mga bagay han Dios.”—1 Korinto 2:9, 10.
6. Ano an kahulogan han 1 Korinto 2:10?
6 Paonan-o gin-uusisa han espiritu han Dios an ‘ngatanan nga bagay, bisan pa an higlarom nga bagay han Dios’? Imbes nga ipahayag ni Jehova ha tagsa nga Kristiano an kamatuoran, iya ginagamit an baraan nga espiritu basi giyahan an iya organisasyon, nga naghahatag ha iya nagkakaurosa nga katawohan hin pagsabot ha Biblia. (Buhat 20:28; Efeso 4:3-6) Ha bug-os nga kalibotan, an ngatanan nga kongregasyon nagpapahimulos hin parapriho nga programa han pag-aram ha Biblia. Ha paglabay han katuigan, ira gin-aadman an ngatanan nga katutdoan han Biblia. Nagios an baraan nga espiritu pinaagi han kongregasyon basi buligan an mga tawo nga magkaada disposisyon nga ginkikinahanglan ha pagsabot han “higlarom nga mga bagay han Dios.”—Buhat 5:32.
Kon Ano an Nahiuupod ha “Higlarom nga mga Bagay han Dios”
7. Kay ano nga damu nga tawo an diri nasabot han “higlarom nga mga bagay han Dios”?
7 Diri naton hunahunaon dayon nga makuri gud masabtan an “higlarom nga mga bagay.” An kahibaro ha “higlarom nga mga bagay han Dios” igintago ha kadam-an nga tawo, diri tungod kay makuri hinduro masabtan an kinaadman han Dios, kondi tungod kay ginlilimbongan ni Satanas an mga tawo nga isalikway an bulig ni Jehova pinaagi han Iya organisasyon.—2 Korinto 4:3, 4.
8. Ano nga higlarom nga mga bagay an gin-unabi ni Pablo ha ikatulo nga kapitulo han iya surat ha mga taga-Efeso?
8 Ipinapakita han ikatulo nga kapitulo han surat ni Pablo ha mga taga-Efeso nga an “higlarom nga mga bagay han Dios” nag-uupod hin damu nga kamatuoran nga nasasabtan hin maopay han kadam-an han katawohan ni Jehova, sugad han pangirilal-an han iginsaad nga Binhi, pagpili hin mga tawo nga may langitnon nga paglaom, ngan Mesianiko nga Ginhadian. Hi Pablo nagsurat: “Ha iba nga mga katulinan [ini nga tinago] waray igpakilala ha mga anak han mga tawo, sugad niyan nga iginpahayag na ha iya mga baraan nga mga apostol, ngan mga manaragna [pinaagi] ha espiritu; ha kahulogan, nga an mga Hentil igkasi ta mga manurunod, ngan mga kabahin han amo nga lawas, ngan mga igkasi angbit naton ha saad ni Kristo Jesus.” Hi Pablo nagsiring nga igintoka hiya ha “pagpakita ha ngatanan nga mga tawo kon ano an pag-ataman hadton tinago nga nahilom ha mga katuigan ha Dios.”—Efeso 3:5-9.
9. Kay ano nga pribelihiyo an pakasabot han “higlarom nga mga bagay han Dios”?
9 Nagpadayon hi Pablo ha pagsaysay nga kaburut-on han Dios nga ipahibaro liwat “ha mga langitnon nga lugar pinaagi han singbahan an magkadirodilain nga mga kinaadman han Dios.” (Efeso 3:10) Nahibabaro an mga anghel pinaagi han pag-obserba ngan pagsabot han maaramon nga pagdumara ni Jehova ha Kristiano nga kongregasyon. Daku gud an pribelihiyo naton nga masabtan an mga butang nga makapainteres bisan ha mga anghel! (1 Pedro 1:10-12) Sunod, hi Pablo nagsiring nga sadang mangalimbasog kita nga ‘masabtan upod han ngatanan nga baraan, kon ano an kahiluag ngan kahilaba ngan kahitaas ngan kahilarom’ han Kristiano nga pagtoo. (Efeso 3:11, 18) Aton yana paghisgotan an pipira nga ehemplo han higlarom nga mga bagay nga makakapauswag han aton pagsabot.
Mga Ehemplo han Higlarom nga mga Bagay
10, 11. Sumala ha Kasuratan, kakan-o hi Jesus nagin siyahan nga bahin han “binhi” han langitnon nga “babaye” han Dios?
10 Maaram kita nga hi Jesus an siyahan nga bahin han “katulinan [“binhi,” NW]” han langitnon nga “babaye” han Dios nga gin-unabi ha Genesis 3:15. Basi mapauswag an aton pagsabot, mahimo kita magpakiana: ‘Kakan-o hi Jesus nagin iginsaad nga Binhi? Durante ba ito han iya pag-eksister antes hiya magin tawo, han igin-anak hiya, han ginbawtismohan hiya, o han ginbanhaw hiya?’
11 Nagsaad an Dios nga an langitnon nga bahin han iya organisasyon nga gin-unabi ha tagna sugad nga iya “babaye,” magkakaada binhi nga magtutultog han ulo han halas. Kondi yinukot ka tuig an naglabay ngan an babaye han Dios waray magkaada binhi nga makakabungkag kan Satanas ngan ha iya mga buhat. Salit ha tagna ni Isaias tinatawag hiya nga “baw-as” ngan “masamdong ha espiritu.” (Isaias 54:1, 5, 6) Pag-abot han panahon, natawo hi Jesus ha Betlehem. Kondi han matapos la an iya bawtismo, han gindihogan hiya pinaagi han baraan nga espiritu ngan salit nagin espirituwal nga anak ni Jehova nga Dios, nga Iya iginpahayag: ‘Ini an akon Anak.’ (Mateo 3:17; Juan 3:3) An siyahan nga bahin han “binhi” han babaye ha kataposan nagpresenta han iya kalugaringon. Katapos hito, an iya mga sumurunod gindihogan liwat pinaagi han baraan nga espiritu ngan nagin mga anak han Dios. An “babaye” ni Jehova, nga ha maiha hinduro nga panahon inabat nga pariho hiya hin babaye nga “waray pag-anak,” makakasinggit na ha “pagkanta” tungod ha kalipay.—Isaias 54:1; Galasia 3:29.
12, 13. Ano nga mga teksto an nagpapakita nga an ngatanan nga dinihogan dinhi ha tuna nagkukompwesto han “matinumanon ngan maaramon nga uripon”?
12 An ikaduha nga ehemplo han higlarom nga mga bagay nga iginpahayag ha aton, amo an katuyoan han Dios ha pagpili hin 144,000 tikang ha katawohan. (Pahayag 14:1, 4) Natoo kita ha katutdoan nga an ngatanan nga dinihogan nga nagkikinabuhi dinhi ha tuna ha anoman nga panahon nagkukompwesto han “matinumanon ngan maaramon nga uripon” nga siring ni Jesus maghahatag hin napapanahon nga “pagkaon” para ha iya mga surugoon. (Mateo 24:45, NW) Ano nga mga teksto ha Biblia an nagpapamatuod nga husto ini nga pagsabot? Posible ba nga an gin-unabi ni Jesus ha kabug-osan amo an bisan hin-o nga Kristiano nga nagpaparig-on ha iya kabugtoan pinaagi han espirituwal nga pagkaon?
13 An Dios nagsiring ha nasud han Israel: “Kamo an akon mga saksi . . . ngan akon surugoon nga akon ginpili.” (Isaias 43:10) Kondi han Nisan 11 han tuig 33 K.P., ginsumatan ni Jesus an mga lider han Israel nga iginsalikway na han Dios an ira nasud sugad nga Iya surugoon. Hiya nagsiring: “An ginhadian han Dios kukuhaon ha iyo, ngan ihahatag ha usa nga nasud, nga mapabunga ha iya.” Hi Jesus nagsiring ha katawohan: “Kitaa, an iyo balay binabayaan ha iyo nga mamingaw.” (Mateo 21:43; 23:38) Sugad nga uripon ni Jehova, an Israel waray magmatinumanon ngan magmaaramon. (Isaias 29:13, 14) Ha urhi hito nga adlaw, han hi Jesus nagpakiana kon “hin-o gud ba an matinumanon ngan maaramon nga uripon,” sugad hin nagpapakiana hiya, ‘Ano nga maaramon nga nasud an masaliwan ha Israel nga magigin matinumanon nga uripon han Dios?’ Ginbaton ito ni apostol Pedro han ginsidngan niya an kongregasyon han dinihogan nga mga Kristiano: “Kamo [an] . . . baraan nga nasud, katawohan nga kalugaringon han Dios.” (1 Pedro 1:4; 2:9) Ito nga espirituwal nga nasud, ‘an Israel han Dios,’ nagin bag-o nga uripon ni Jehova. (Galasia 6:16) Sugad la nga an ngatanan nga membro han kadaan nga Israel nagkompwesto han usa nga “surugoon,” an ngatanan liwat nga dinihogan nga Kristiano dinhi ha tuna ha anoman nga panahon nagkukompwesto han usa nga “matinumanon ngan maaramon nga uripon.” Daku gud nga pribelihiyo naton an pagkarawat hin “pagkaon” pinaagi han uripon han Dios!
Makalilipay an Personal nga Pag-aram
14. Kay ano nga an pag-aram ha Biblia mas makalilipay kay ha pagbasa la hito?
14 Kon ginsusumatan kita hin bag-o nga pagsabot ha Kasuratan, diri ba kita nalilipay nga napaparig-on hito an aton pagtoo? Ito an rason kon kay ano nga an pag-aram ha Biblia mas makalilipay kay ha pagbasa la. Salit, kon ginbabasa mo an mga publikasyon, pakianhi an imo kalugaringon: ‘Ano an kaibahan hini nga pagsaysay ha akon hinsasabtan na mahitungod hini nga topiko? Ano pa nga mga teksto o pangatadongan ha Kasuratan an akon mahuhunahuna nga mas magpaparig-on han mga konklusyon hini nga artikulo?’ Kon kinahanglan pa an pagsaliksik, isurat an pakiana nga karuyag mo mabaton, ngan himoa ito nga topiko han sunod nga proyekto ha pag-aram.
15. Ano nga mga proyekto ha pag-aram an makalilipay, ngan paonan-o ito makakahatag hin permanente nga kapulsanan?
15 Ano nga mga proyekto ha pag-aram an makakalipay ha imo tungod han bag-o nga pagsabot? An mga proyekto sugad han detalyado nga pag-aram ha magkalain-lain nga kauyonan nga ginamit han Dios para ha kaopayan han katawohan mas magpapahilarom han aton pagsabot. Mapaparig-on mo an imo pagtoo pinaagi han pag-aram ha mga tagna mahitungod kan Jesu-Kristo o pag-usisa han kada bersikulo han usa nga libro han mga tagna ha Biblia. Makaparig-on liwat ha pagtoo an pagrepaso ha moderno nga kasaysayan han mga Saksi ni Jehova nga ginagamit an libro nga Jehovah’s Witnesses—Proclaimers of God’s Kingdom. a Ngan an pagrepaso han iginpublikar nga “Mga Pakiana Tikang ha mga Magbarasa” ha An Barantayan mabulig gud ha imo nga mas masabtan an ginhihisgotan nga mga teksto. Tigamni hin maopay an ginamit nga mga pangatadongan uyon ha Kasuratan nga nakabulig ha paghimo hin mga konklusyon. Mabulig ini ha imo nga mabansay an imo “balatian” o abilidad ha pagsabot ngan mapauswag an husto nga pagturutimbang. (Hebreo 5:14) Samtang nag-aaram ka, isurat an importante nga mga punto dida ha imo Biblia o ha notbuk basi an imo pag-aram maghatag hin permanente nga kapulsanan ha imo ngan hadton imo nabubuligan.
Buligi an Kabataan nga Malipay ha Pag-aram ha Biblia
16. Paonan-o mo mabubuligan an kabataan nga malipay ha pag-aram ha Biblia?
16 Daku an mahihimo han mga kag-anak basi ganahan an ira mga anak han espirituwal nga pagkaon. Ayaw pagminosa an abilidad han kabataan ha pagsabot han higlarom nga mga bagay. Kon iyo pasaliksikon hira hin topiko sugad nga pagpangandam para ha panpamilya nga pag-aram ha Biblia, mahimo niyo pakianhan hira kon ano an ira hinbaroan. Mahimo liwat iupod ha iyo pag-aram an mga sesyon ha pagbansay basi hira mahibaro ha pagdepensa han ira gintotoohan ngan pagpamatuod nga husto an igintutdo ha ira. Dugang pa, mahimo niyo gamiton an brosyur nga “See the Good Land” b ha pagtutdo han heograpiya han Biblia ngan pagpatin-aw han iyo gin-aadman ha sinemana nga pagbasa han Biblia.
17. Kay ano nga kinahanglan magin timbang kita ha aton mga proyekto ha personal nga pag-aram ha Biblia?
17 An mga proyekto ha personal nga pag-aram ha Biblia makapainteres ngan makaparig-on ha pagtoo. Kondi siguroha nga diri ito makaubos han iyo panahon ha pangandam para ha mga katirok han kongregasyon—usa pa nga paagi han pagtutdo ni Jehova ha aton pinaagi han “matinumanon ngan maaramon nga uripon.” Kondi, an dugang pa nga pagsaliksik makakabulig ha iyo nga makagkomento hin mapulsanon ha mga katirok—pananglitan ha Pag-aram ha Libro han Kongregasyon o durante han paghisgot han importante nga mga punto tikang ha sinemana nga pagbasa han Biblia ha Teokratiko nga Eskwelahan ha Ministeryo.
18. Kay ano nga mapulsanon gud an pangalimbasog ha pag-aram han “higlarom nga mga bagay han Dios”?
18 An maduruto nga personal nga pag-aram ha Pulong han Dios makakabulig ha imo nga magin duok kan Jehova. Basi ipakita an kapulsanan han sugad nga pag-aram, an Biblia nasiring: “An kinaadman usa nga arayopan, bisan sugad nga an kwarta usa nga arayopan; kondi an kamahalan han hibaro amo, nga an kinaadman naghihirot han kinabuhi niya nga may-ada hini.” (Eklesiastes 7:12) Salit, mapulsanon gud an pangalimbasog ha pagpahilarom han imo pagsabot ha espirituwal nga mga butang. An Biblia nagsasaad hadton padayon nga nag-uusisa: “Makakaagi [ka] han paghibaro han Dios.”—Proberbios 2:4, 5.
[Mga footnote]
a Iginpublikar han mga Saksi ni Jehova.
b Iginpublikar han mga Saksi ni Jehova.
Maisasaysay Mo Ba?
• Ano an “higlarom nga mga bagay han Dios”?
• Kay ano nga sadang magpadayon an aton pag-aram han higlarom nga mga bagay?
• Kay ano nga an kalipay ha pagsabot han “higlarom nga mga bagay han Dios” mahimo maeksperyensyahan han ngatanan nga Kristiano?
• Paonan-o ka magpapahimulos hin bug-os ha “higlarom nga mga bagay han Dios”?
[Mga Pakiana]
[Retrato ha pahina 28]
Kakan-o hi Jesus nagin an iginsaad nga Binhi?
[Retrato ha pahina 31]
Mahimo hatagan han mga kag-anak an ira mga anak hin mga topiko nga sasaliksikon sugad nga pagpangandam para ha panpamilya nga pag-aram