‘Panul-ot Kamo hin Pagpaubos’

HI Saulo tikang ha bantogan nga syudad. Natawo hiya nga Romano ngan posible nga tikang ha prominente nga pamilya. Nagkaada hiya han gimaopayi nga mga edukasyon ha siyahan nga siglo K.P. Nakakayakan hiya hin diri maminos duha nga yinaknan, ngan membro hin kilala nga grupo hin relihiyon—an mga Pariseo.

Sigurado nga nahibaro hi Saulo pagtamay han ordinaryo nga mga tawo ngan paghambog tungod kay natoo hiya nga matadong hiya. (Lukas 18:11, 12; Buhat 26:5) An iya igkasi-Pariseo natoo nga labaw hira ha iba, ngan nalilipay hira ha kabantogan ngan mga titulo nga naghahatag hin importansya. (Mateo 23:6, 7; Lukas 11:43 ) An iya pakig-upod ha ira posible nga nakahimo ha iya nga arogante. Maaram kita nga aktibo nga persigidor hiya han mga Kristiano. Paglabay hin mga tuig, han ginkilala na hiya sugad nga hi apostol Pablo, hiya nasiring nga hadto hiya ‘parapasipara, ngan paratimaraot, ngan parahibang.’—1 Timoteo 1:13.

Oo, nagin Kristiano hi Saulo, an apostol nga hi Pablo, ngan an iya personalidad bug-os nga nabag-o. Sugad nga Kristiano nga apostol, mapainubsanon hiya nga nagsiring nga hiya “ubos han mga giuubusi ha ngatanan nga mga baraan.” (Efeso 3:8) Epektibo hiya nga ebanghelisador, kondi waray niya pasidunggi an iya kalugaringon tungod hini. Lugod, iginhatag niya an bug-os nga dungog ha Dios. (1 Korinto 3:5-9; 2 Korinto 11:7 ) Hiya an nag-aghat ha mga igkasi-Kristiano: ‘Manul-ot kamo hin kasingkasing han pagpuangon, pagkalooy, pagpaubos, pagkaaghop, pagkamailob.’—Kolosas 3:12.

Aplikado pa ba ito nga sagdon ha aton yana? May kapulsanan ba an pagin mapainubsanon? Posible gud ba magin pangirilal-an hin maopay nga kalidad an pagin mapainubsanon?

 Mapainubsanon ba an Makagarahum-ha-Ngatanan nga Maglalarang?

Kinahanglan tagdon an panhunahuna han Dios kon naghihisgot mahitungod han pagpaubos. Kay ano? Tungod kay hiya an aton Soberano ngan Maglalarang. Diri pariho ha iya, kinahanglan kilalahon naton an aton limitasyon. Nadepende kita ha iya. “Mahitungod han Makagarahum, diri kita makakaagi ha iya: hiya daku ha kagahum,” nagsiring an maaramon nga hi Elihu ha kadaan nga panahon. (Job 37:23) Aw, bisan an pagpamalandong la han haluag hinduro nga uniberso nag-aaghat na ha aton nga magin mapainubsanon! “Alsaha ha hitaas an iyo mga mata,” siring ni propeta Isaias. “Hin-o an naghimo hini, nga nagpakita han ira panon ha kadam-an; iya hira ngatanan pinanawag ha ngaran; pinaagi han kadaku han iya gahum, ngan kay hiya makusog ha gahum, waray usa nga nakukulang.”—Isaias 40:26.

Gawas ha pagin makagarahum-ha-ngatanan, hi Jehova nga Dios mapainubsanon. Hi Hadi David nag-ampo ha iya: “Imo liwat ihinatag ha akon an taming han imo kaluwasan; ngan an imo pagkamanunuton [o pagpaubos] nakahimo ha akon nga daku.” (2 Samuel 22:36) Hi Jehova masisiring nga mapainubsanon tungod kay gintatagad niya an ubos nga mga tawo nga nangangalimbasog ha pagpalipay ha iya, ngan nalolooy hiya ha ira. Tikang ha langit, sugad hin nalusad hiya basi tagdon an mga nahahadlok ha iya.—Salmo 113:5-7.

Dugang pa, ginpapabilhan ni Jehova an pagpaubos han iya mga surugoon. Hi apostol Pedro nagsurat: “An Dios nasuwahi ha palabilabihon, kondi nahatag hin grasya ha mapaubsanon.” (1 Pedro 5:5) May kalabotan ha panhunahuna han Dios ha pagpahitaas, usa nga parasurat han Biblia an nagsiring: “An tagsa-tagsa nga palabilabihon an kasingkasing amo an mangil-ad kan Jehova.” (Proberbios 16:5) Paonan-o, kon sugad, an pagpaubos magigin pangirilal-an hin maopay nga kalidad?

Kon Ano an Kabaliktaran han Pagpaubos

An mapainubsanon nga tawo diri nagpapakaalo ha iba. Ha pipira nga kultura ha kadaan nga panahon, usa nga ehemplo han mapainubsanon nga tawo an uripon tungod kay hiya ubos, miserable, ngan minos. Ha kabaliktaran, ginpapabug-atan han Biblia nga an mapainubsanon nga panhunahuna nagriresulta hin kadungganan. Pananglitan, an maaramon nga tawo nagsurat: “An balos han kamapainubsanon ngan an kahadlok kan Jehova amo an bahandi, ngan an dungog, ngan an kinabuhi.” (Proberbios 22:4) Ngan ha Salmo 138:6, aton mababasa: “Bisan kon hitaas hi Jehova, natan-aw hin hirani ha makalolooy  [mapainubsanon, NW]; kondi hirayo niya kilalhon an palabilabihon.”

An pagin mapainubsanon diri nangangahulogan nga an usa waray abilidad o nahimo. Pananglitan, waray gud sumiring hi Jesu-Kristo nga diri hiya an bugtong nga anak ni Jehova ngan waray gud hiya gumios nga sugad hin diri importante an iya ministeryo ha tuna. (Markos 14:61, 62; Juan 6:51) Kondi, nagpakita hi Jesus hin pagkamapainubsanon pinaagi ha pagpasidungog ha iya Amay tungod han iya mga nahimo ngan pinaagi ha paggamit han iya gahum ha pagserbi ngan pagbulig ha iba imbes nga dominaron ngan talumpiguson hira.

Pangirilal-an han Maopay nga Kalidad

Waray ruhaduha nga ginkilala gud hi Jesu-Kristo han iya mga kadungandungan “tungod han mga katingalahan.” (Buhat 2:22) Kondi para ha pipira, hiya an “giuubusi han mga tawo.” (Daniel 4:17) Diri la kay nagkinabuhi hiya hin simple kondi pauroutro liwat nga igintutdo niya an bili han pagpaubos. (Lukas 9:48; Juan 13:2-16) Pero, an iya pagpaubos waray makahimo ha iya nga maluya. Maisugon hiya samtang iya gindidepensahan an ngaran han iya Amay ngan gintutuman an iya ministeryo. (Filipos 2:6-8) Ha Biblia, iginhuhulagway hi Jesus sugad nga maisugon nga leon. (Pahayag 5:5) Ipinapakita han iya susbaranan nga an pagpaubos paropariho ha karig-on ha moral.

Samtang nangangalimbasog kita nga makultibar an tinuod nga pagpaubos, nasasantop naton nga kinahanglanon gud an pangalimbasog basi magkinabuhi nga mapainubsanon. Nag-uupod ito han pagtuman pirme han kaburut-on han Dios imbes nga magkinabuhi ha pinakamasayon nga paagi o magpasulay ha mga hingyap han unod. Basi makultibar an pagpaubos kinahanglan naton an karig-on ha moral tungod kay sadang naton unahon an pag-alagad kan Jehova ngan an kaopayan han iba imbes han aton personal nga karuyag.

An mga Kapulsanan han Pagpaubos

An pagpaubos nangangahulogan hin diri pagpahitaas o kawaray garbo. Gin-gamit han Kasuratan an pulong nga “pagpaubos ha hunahuna” ha paghulagway hito. (Efeso 4:2, NW) Makukultibar naton an mapainubsanon nga panhunahuna kon reyalistiko nga uusisahon naton an aton kalugaringon—an aton mag-opay nga kalidad ngan kaluyahan, an aton kalamposan ngan kapakyasan. Naghatag hi Pablo hin maopay nga sagdon mahitungod hini han hiya nagsurat: ‘Nasiring ako ha tagsa ha iyo, nga diri kamo maghunahuna hin hitaas ha iyo kalugaringon kay han igo niyo paghunahunaon; kondi paghunahuna hin malinaw.’ (Roma 12:3) Mapainubsanon an bisan hin-o nga nag-aaplikar hito nga sagdon.

Naipapakita liwat naton an pagkamapainubsanon kon sinsero nga gin-uuna naton an kaopayan han iba imbes han aton. Hi Pablo gin-giyahan han Dios nga magsagdon ha mga Kristiano: “Diri kamo magbuhat hin bisan ano tikang ha pagkabahin-bahin o tungod hin padayaw, kondi ha pagpaubos ha hunahuna an tagsa-tagsa mag-isip han iba nga maoroopay pa ha iya ngahaw.” (Filipos 2:3) Uyon ini ha sugo ni Jesus ha iya mga sumurunod: “An gidadakui ha iyo maaamo an iyo uripon. Ngan bisan hin-o an nagpapakahitaas, mahiuubos, ngan bisan hin-o an magpapaubos, mahihitaas.”—Mateo 23:11, 12.

Oo, an mapainubsanon ha hunahuna hitaas ha paniplatan han Dios. Ito nga punto ginpabug-atan ni disipulo Jakobo han hiya nagsurat: “Magpaubos kamo ha atubangan [“paniplatan,” NW] han Ginoo, ngan pagbabayawon kamo niya.” (Jakobo 4:10) Hin-o an diri maruruyag nga ipahitaas han Dios?

An pagpahitaas nagriresulta hin duro nga kasamok butnga han mga grupo hin mga tawo ngan han mga indibiduwal. Ha luyo nga bahin, may mag-opay nga resulta ha pagin mapainubsanon.  Makakarawat naton an pag-uyon han Dios. (Mika 6:8) Magkakaada kita kamurayawan ha hunahuna tungod kay an mapainubsanon mas posible nga magin malipayon ngan kontento kay han mapahitas-on. (Salmo 101:5) Magigin mas maopay an aton relasyon ha aton kapamilya, kasangkayan, katrabaho, ngan ha iba pa. Ginlilikyan han mapainubsanon an pagin makilantugion ngan reklamador nga masayon makaaghat hin kasina, pagtugnaw han pagbati, pagdumot, ngan kangalas.—Jakobo 3:14-16.

Oo, an pagkultibar han pagpaubos maopay gud nga paagi basi matipigan an maopay nga relasyon ha iba. Makakabulig ito ha aton nga atubangon an ayat han hakugnon ngan nagpapalabaw-labaw nga kalibotan. Ha bulig han Dios, nalamposan ni apostol Pablo an iya pagkamapahitas-on ngan garbo. Ha pariho nga paagi, kinahanglan pugngan naton an tendensya ha pagpahitaas o paghunahuna nga mas maopay kita ha iba. “An palabilabi nag-uuna han pagkagunaw, ngan an mapahitas-on nga espiritu nag-uuna han pagkahulog,” nagpahamangno an Biblia. (Proberbios 16:18) Ha pagsunod han susbaranan ngan sagdon ni Pablo, mahibabaroan naton an kinaadman han ‘pagsul-ot han pagpaubos.’—Kolosas 3:12.

[Retrato ha pahina 4]

Nalamposan ni apostol Pablo an iya pagkamapahitas-on ngan garbo

[Retrato ha pahina 7]

An pagin mapainubsanon nabulig ha aton nga matipigan an maopay nga relasyon ha iba

[Ginkuhaan han Retrato ha pahina 5]

Anglo-Australian Observatory/David Malin Images