“Alayon Karawata an Akon Simple nga Regalo”

INI an mababasa ha usa nga surat nga nakarawat han sanga nga opisina han mga Saksi ni Jehova ha Russia. Kaupod hini an daku nga kahon nga puno hin magdakmol nga medyas.

Ito nga regalo tikang ha 67-anyos nga hi Alla, usa han mga Saksi ni Jehova ha kongregasyon ha Hirayo nga Sinirangan han Russia. Sobra napulo ka tuig na hiya nga nag-aalagad kan Jehova ngan madasigon nga nagsasangyaw han maopay nga sumat han Ginhadian. Kondi, tigda nga naparalisa an iya mga tiil tungod ha kaistrok. Pero, tungod kay napagios han gugma, ginsubad ni Alla an ginbuhat han siyahan-siglo nga Kristiano nga hi Dorkas nga naghimo hin mga bado para ha iya mga igkasi-tumuroo.—Buhat 9:36, 39.

Hi Alla nagsurat: “Diri ko na naikikiwa an akon mga tiil, kondi naikikiwa ko pa an akon mga kamot. Salit nagsasangyaw ako pinaagi han pagsurat.” Hiya nagsiring pa: “Nagdesisyon ako nga samtang naikikiwa ko pa an akon mga kamot, maggagansilyo ako hin magdakmol nga medyas. Karuyag ko ihatag ini ha kabugtoan nga nagtutukod hin mga Kingdom Hall ha matugnaw nga mga lugar, sugad han Hirayo nga Sinirangan han Russia ngan Siberia.”

Mahitungod han tinuod nga mga sumurunod ni Jesu-Kristo, hiya nagsiring: “Tungod hini an ngatanan makilala, nga kamo akon mga tinon-an, kon kamo maghigugmaay an usa kag usa.” (Juan 13:35) An gugma nga sugad han ipinakita ni Alla amo an pangirilal-an han tinuod nga mga disipulo ni Jesus.