Mga Pakiana Tikang ha mga Magbarasa

Husto ba para ha usa nga Saksi ni Jehova nga tumambong ha kasal han diri-Saksi nga paryente o sangkay?

Malipayon nga okasyon an kasal, ngan natural la nga maruyag an usa nga Kristiano nga makigbahin hiton makalilipay nga okasyon. Syempre, an mga minor de edad nga imbitado ha pagtambong sadang sumunod ha ira mga kag-anak o ha mga nagbabantay ha ira nga may katungod ha paghimo han ultimo nga desisyon. (Efeso 6:1-3) Kondi, anoman kon an usa nga bana nga diri-Saksi ni Jehova magpaupod ha iya Saksi nga asawa ha kasal nga pagdudumarahon ha singbahan? Bangin an iya konsensya magtugot ha iya nga tumambong sugad nga paraobserba la nga determinado nga diri makigbahin ha bisan ano nga relihiyoso nga seremonya may kalabotan han okasyon.

Kon sugad, an pagtambong o diri pagtambong ha usa nga kasal personal nga desisyon. Kondi, sadang hinumdoman han tagsa nga Kristiano an iya baratunon kan Jehova ngan tagdon an pipira nga prinsipyo ha Biblia kon nagdidesisyon ha pagtambong ha kasal han usa nga diri-Saksi.

An pinakaimportante ha usa nga Kristiano amo an hingyap nga makarawat an pag-uyon han Dios. Hi Jesus nagsiring: “An Dios Espiritu: ngan adton nagsisingba ha iya, kinahanglan magsingba ha iya ha espiritu ngan ha kamatuoran.” (Juan 4:24) Tungod hito, an mga Saksi ni Jehova diri nakikigbahin ha mga buruhaton han iba nga relihiyon, sugad han mga pag-ampo, rituwal, o seremonya nga nakontra ha kamatuoran han Biblia.—2 Korinto 6:14-17.

Maaram an usa nga Kristiano nga an iya desisyon mahimo liwat makaapekto ha iba. Kon magdesisyon ka ha pagtambong, diri ba mahihiubos an imo mga paryente kon diri ka bug-os nga makigbahin ha okasyon? Kinahanglan liwat tagdon an posible nga epekto ha mga igkasi-tumuroo. (Roma 14:13) Bisan kon naghuhunahuna ka o an iba nga imo kapamilya nga diri sayop an pagtambong ha kasal han diri-Saksi, posible ba nga maapektohan gud an imo kabugtoan ha pagtoo? Makakadaot ba ito han konsensya han iba?

An mga seremonya ha kasal han diri-Saksi nga mga paryente mahimo magbangon hin magkuri nga kahimtang. Anoman kon hangyoon ka nga mag-abay? O kumusta man kon an imo padis diri-Saksi ngan naruruyag nga makigbahin gud? Kon sibil an kasal nga pagdudumarahon hin huwes o opisyal han gobyerno, an pagtambong bangin mag-uupod la ha pagtestigo hin legal nga proseso.

Ha luyo nga bahin, an kasal nga gindudumara ha relihiyoso nga establisemento o gindudumara hin usa nga klero nagbabangon hin dugang nga problema. Basi masunod an imo konsensya nga ginbansay uyon ha Biblia ngan makalikay ha pagkompromiso han imo gintotoohan o pakahiubos ha karaslon ngan han ira pamilya, mahimo ka magdesisyon nga diri tumambong. (Proberbios 22:3) Malilikyan mo ngan han imo pamilya an duro nga tensyon pinaagi han abanse nga pagsaysay han imo mga gintotoohan nga basado ha Biblia, nga nagsusumat han tubtoban han imo posible nga pakigbahin.

Katapos pagturutimbangon hin maopay an ngatanan, bangin hunahunaon han pipira nga Kristiano nga diri sayop an simple nga pagtambong ha kasal han diri-Saksi sugad nga paraobserba. Kondi kon nasasantop han usa nga Kristiano nga kon tumambong hiya, bangin masulay hiya ha pagkompromiso han iya diosnon nga prinsipyo, mahimo niya hunahunaon nga may mas daku nga peligro ha pagtambong kay han posible nga bentaha hito. Kon magdesisyon hiya nga diri tumambong ha seremonya han kasal, kondi tumambong sugad nga imbitado nga bisita ha resepsyon katapos hito, sadang magin determinado hiya nga ‘buhaton an ngatanan ha himaya han Dios.’ (1 Korinto 10:31) Ha paghimo hin sugad nga mga desisyon, “an tagsa-tagsa magdadara han iya kalugaringon nga darad-on.” (Galasia 6:5) Salit, anoman an imo desisyon, hinumdumi nga importante an pagtipig hin maopay nga konsensya ha atubangan ni Jehova nga Dios.