Pauswaga an mga Kalidad nga Makakabulig ha Imo ha Paghimo hin mga Disipulo

“Lakat kamo, ngan manhimo kamo hin mga tinon-an ha ngatanan nga mga nasud.”—MATEO 28:19.

1. Ano nga mga abilidad ngan disposisyon an ginkinahanglan han iba nga surugoon han Dios ha naglabay?

 HA PANA-PANAHON kinahanglan pauswagon han mga surugoon ni Jehova an mga abilidad ngan disposisyon nga mabulig ha ira ha pagbuhat han iya kaburut-on. Pananglitan, tungod ha sugo han Dios, binayaan nira Abraham ngan Sara an mainuswagon nga syudad han Ur ngan ha paglabay han panahon ginkinahanglan nga magkaada hira mga kalidad ngan abilidad sugad nga mga umurukoy ha tolda. (Hebreo 11:8, 9, 15) An pagpanguna ni Josue ha mga Israelita ngadto ha Tuna nga Iginsaad nagkinahanglan han iya kaisog, pagsarig kan Jehova, ngan kahibaro ha Iya Balaud. (Josue 1:7-9) Ngan sigurado nga napauswag pa an anoman nga abilidad nira Besalel ngan Oholiab pinaagi han espiritu han Dios salit malampuson nga nakabulig hira ha buruhaton ngan ha panginano ha pagtukod han tabernakulo ngan mga trabaho nga may kalabotan hito.—Eksodo 31:1-11.

2. Ano nga mga pakiana an aton paghihisgotan may kalabotan ha paghimo hin mga disipulo?

² Paglabay hin mga siglo, ginsugo ni Jesu-Kristo an iya mga sumurunod: “Lakat kamo, ngan manhimo kamo hin mga tinon-an ha ngatanan nga mga nasud . . . pagtutdui hira han pagbantay han ngatanan nga mga bagay, nga akon iginsugo ha iyo.” (Mateo 28:19, 20) Yana pa gud la tinagan an mga tawo hin pribilehiyo ha pagbuhat hinin daku nga buruhaton. Ano nga mga kalidad an ginkikinahanglan ha paghimo hin mga disipulo? Paonan-o naton mapapauswag ito nga mga kalidad?

Magpakita hin Hilarom nga Gugma ha Dios

3. An sugo nga maghimo hin mga disipulo naghahatag ha aton hin ano nga higayon?

³ An pakiistorya ha mga tawo ngan pangalimbasog ha pagkombinse ha ira nga magsingba ha matuod nga Dios nagkikinahanglan han aton hilarom nga gugma kan Jehova. Mapapamatud-an han mga Israelita an ira gugma ha Dios pinaagi han bug-os-kasingkasing nga pagsugot ha iya mga sugo, paghatag hin kinakarawat nga halad, ngan pagdayaw ha iya pinaagi han pagkanta. (Deuteronomio 10:12, 13; 30:19, 20; Salmo 21:13; 96:1, 2; 138:5) Sugad nga parahimo hin mga disipulo, ginsusunod liwat naton an mga balaud ni Jehova, ngan iginpapahayag an aton gugma ha iya pinaagi han pagsumat ha iba mahitungod ha iya ngan han iya mga katuyoan. Kinahanglan  magyakan kita nga may pagtoo, ginpipili an husto nga mga pulong ha pagpahayag han aton kinasingkasing nga mga pagbati mahitungod han aton hatag-han-Dios nga paglaom.—1 Tesalonika 1:5; 1 Pedro 3:15.

4. Kay ano nga nalipay hi Jesus ha pagtutdo ha mga tawo mahitungod kan Jehova?

⁴ Tungod kay hinigugma gud ni Jesus hi Jehova, nalipay hiya hinduro ha pagsumat mahitungod han mga katuyoan han Dios, han Iya Ginhadian, ngan han tinuod nga pagsingba. (Lukas 8:1; Juan 4:23, 24, 31) Ha pagkamatuod, hi Jesus nagsiring: “An akon karan-on amo an pagbuhat han kaburut-on han nagpakanhi ha akon, ngan paghuman han iya buhat.” (Juan 4:34) Ini nga ginsiring han salmista naaplikar kan Jesus: “Nalilipay ako hin pagsugot han imo kaburut-on, O Dios nakon; ngan an imo balaud aadi ha sakob han akon kasingkasing. Nagpasabot ako hin mag-opay nga sumat tungod han katadongan didto ha daku nga katig-uban; iini, diri nakon pagpupugngan an akon dila, O Jehova, ikaw maaram.”—Salmo 40:8, 9; Hebreo 10:7-10.

5, 6. Ano an nangunguna nga kalidad nga ginkikinahanglan han parahimo hin mga disipulo?

⁵ Tungod kay napapagios han gugma ha Dios, an mga bag-ohan nga nahibabaro pa la han kamatuoran han Biblia usahay may pagtoo nga nagsusumat mahitungod kan Jehova ngan han Ginhadian salit epektibo hira ha pagkombinse ha iba nga mag-usisa han Kasuratan. (Juan 1:41) An gugma ha Dios amo an nangunguna nga kalidad nga nagpapagios ha aton nga makigbahin ha paghimo hin mga disipulo. Salit tipigan naton nga buhi ito nga gugma pinaagi han regular nga pagbasa ngan pamalandong ha iya Pulong.—1 Timoteo 4:6, 15; Pahayag 2:4.

⁶ An gugma kan Jehova sigurado nga nakabulig kan Jesu-Kristo nga magin madasigon nga magturutdo. Kondi diri la ito an hinungdan kon kay ano nga epektibo hiya nga parasamwak han Ginhadian. Kon sugad, ano pa nga kalidad an nakabulig ha iya nga magin malampuson nga parahimo hin disipulo?

Magpakita hin Mahigugmaon nga Pagtagad ha mga Tawo

7, 8. Paonan-o gintagad ni Jesus an mga tawo?

⁷ Hi Jesus nagtagad ha mga tawo ngan nagpakita ha ira hin sinsero nga interes. Bisan antes pa hiya magin tawo sugad nga maabtik nga magburuhat han Dios, nalilipay na hiya ha mga tawo. (Proberbios 8:30, 31) Han nakanhi hiya ha tuna sugad nga tawo, pinaid hiya ha ira ngan ginliaw adton nadaop ha iya. (Mateo 11:28-30) Ipinakita ni Jesus an gugma ngan pagpaid ni Jehova, ngan nakadani ini ha mga tawo nga magsingba ha amo la nga matuod nga Dios. An ngatanan nga klase hin tawo namati kan Jesus tungod kay nagpakita hiya hin mahigugmaon nga pagtagad ha ira ngan ha ira kahimtang.—Lukas 7:36-50; 18:15-17; 19:1-10.

⁸ Han an usa nga lalaki nagpakiana kon ano an kinahanglan buhaton niya basi makapanunod han kinabuhi nga waray kataposan, ‘hi Jesus kinulaw ha iya ngan nahigugma ha iya.’ (Markos 10:17-21) Mahitungod han mga tawo nga gintutdoan ni Jesus ha Betanya, aton mababasa: “Hi Jesus naghigugma kan Marta, ngan han iya bugto nga babaye, ngan kan Lasaro.” (Juan 11:1, 5) Nagtagad gud hi Jesus ha mga tawo salit imbes nga pumahuway, iya gintutdoan hira. (Markos 6:30-34) Iton hilarom ngan mahigugmaon nga pagtagad ha mga igkasi-tawo nakabulig kan Jesus nga magin mas epektibo kay ha bisan hin-o ha pagdani ha mga tawo ngada ha tinuod nga pagsingba.

9. Ano an disposisyon ni Pablo sugad nga parahimo hin disipulo?

⁹ Hi apostol Pablo liwat nagtagad gud ha mga tawo nga iya ginsangyawan. Pananglitan, iya ginsidngan adton nagin mga Kristiano ha Tesalonika: “Naghigugma gud kami ha iyo, ngan naruruyag kami, diri la ha paghatag han maopay nga sumat han Dios, kondi sugad man an amon mga kalag, tungod kay mga hinigugma kamo namon.” Sugad nga resulta han mahigugmaon nga mga pangalimbasog ni Pablo, an iba ha Tesalonika binaya ‘ha mga ladawan, ngan nag-alagad ha buhi nga Dios.’ (1 Tesalonika 1:9; 2:8) Kon sinsero nga gintatagad naton an mga tawo, sugad han ginbuhat nira Jesus ngan Pablo, maieksperyensyahan liwat naton an kalipay ha pakakita nga an maopay nga sumat nakakabantad han mga kasingkasing hadton mga “tinunguran han kinabuhi nga waray kataposan.”—Buhat 13:48.

Magpakita hin Pagsakripisyo ha Kalugaringon

10, 11. Kay ano nga ginkikinahanglan an pagsakripisyo ha kalugaringon kon naghihimo kita hin mga disipulo?

¹⁰ An epektibo nga parahimo hin mga disipulo  nagsasakripisyo ha kalugaringon. Diri gud nira gintatagad nga pinakaimportante an pagtirok hin mga bahandi. Ha pagkamatuod, hi Jesus nagsiring ha iya mga disipulo: “Pagkamakuri ha mga manggaran ha pagsulod ha ginhadian han Dios!” Nanhipausa an mga disipulo ha pakabati hini, kondi hi Jesus nagsiring: “Mga kabataan, pagkamakuri ha pagsulod ha ginhadian han Dios hadton mga nagsasarig ha mga manggad! Ito masarosayon pa ha usa nga kamelyo pag-agi ha kaguhoan han dagum, kay . . . ha manggaran pagsulod ha ginhadian han Dios.” (Markos 10:23-25) Igin-aghat ni Jesus an simple nga paagi han pagkinabuhi ha iya mga sumurunod basi maisentro an ira atensyon ha paghimo hin mga disipulo. (Mateo 6:22-24, 33) Kay ano nga an pagsakripisyo ha kalugaringon nabulig ha aton ha paghimo hin mga disipulo?

¹¹ An pagtutdo han ngatanan nga iginsugo ni Jesus nagkikinahanglan hin daku nga pangalimbasog. Ha kabug-osan an parahimo hin mga disipulo nangangalimbasog ha pagdumara hin pag-aram ha Biblia ha interesado kada semana. Basi magkaada dugang nga higayon ha pakabiling hin mga sinsero, binayaan han iba nga parasamwak han Ginhadian an ira bug-os-panahon nga trabaho ngan nagbiling hin part-time. Yinukot nga Kristiano an nag-aaram hin iba nga yinaknan basi makasangyaw ha pipira nga etniko nga grupo ha ira lugar. May-ada binalhin ha iba nga lugar o nasud basi makabulig hin dugang pa ha pag-ani. (Mateo 9:37, 38) Ini ngatanan nagkikinahanglan hin pagsakripisyo ha kalugaringon. Kondi labaw pa an ginkikinahanglan basi magin epektibo nga parahimo hin disipulo.

Magin Mapailubon Kondi Ayaw Pagkaragi an Panahon

12, 13. Kay ano nga importante gud an pagpailob ha paghimo hin mga disipulo?

¹² An pagpailob usa pa nga kalidad nga nabulig ha aton ha paghimo hin mga disipulo. Nagkikinahanglan hin apurado nga paggios an aton mensahe, kondi an paghimo hin mga disipulo agsob nga nagkikinahanglan hin daku nga panahon ngan pagpailob. (1 Korinto 7:29) Mapailubon hi Jesus ha iya bugto ha iroy nga hi Jakobo. Bisan kon maaram gud hi Jakobo han pagsangyaw nga buruhaton ni Jesus, ha usa ka peryodo han panahon may-ada nakapugong ha iya nga magin disipulo. (Juan 7:5) Kondi, ha halipot nga panahon butnga han kamatay ni Kristo ngan han Pentekostes 33 K.P., matin-aw nga nagin disipulo hi Jakobo tungod kay gin-uunabi han Kasuratan nga kaupod hiya han iya iroy, kabugtoan, ngan mga apostol ha pag-ampo. (Buhat 1:13, 14) Nag-uswag gud hi Jakobo sugad nga disipulo ngan ha urhi nagkaada hiya magbug-at nga responsabilidad ha Kristiano nga kongregasyon.—Buhat 15:13; 1 Korinto 15:7.

¹³ Pariho ha mga parauma, ginkukultibar han mga Kristiano an mga butang nga kasagaran mahinay tumubo—pagsabot ha Pulong han Dios, gugma kan Jehova, ngan disposisyon nga pariho han kan Kristo. Nagkikinahanglan ini hin pagpailob. Hi Jakobo nagsurat: “Mga kabugtoan, pag-ilob kamo, ngada ha pag-abot han Ginoo. Kitaa an parauma naghuhulat han hamili nga bunga han tuna, hin mapailubon, ngada han kakarawat niya han una ngan urhi nga uran. Mag-ilob man kamo; rig-ona niyo an iyo mga kasingkasing: kay an pag-abot han Ginoo hirani na.” (Jakobo 5:7, 8) Ginsasagda ni Jakobo an iya mga igkasi-tumuroo nga ‘mag-ilob ngada ha pag-abot han Ginoo.’ Kon diri nasasabtan han mga disipulo an usa nga butang, mapailubon nga iginsasaysay o igin-iilustrar ito ni Jesus. (Mateo 13:10-23; Lukas 19:11; 21:7; Buhat 1:6-8) Yana nga an Ginoo naghahadi na, ginkikinahanglan liwat an pariho nga pagpailob samtang nangangalimbasog kita ha paghimo hin mga disipulo. Adton nagigin mga sumurunod ni Jesus ha  aton panahon kinahanglan tutdoan nga may pagpailob.—Juan 14:9.

14. Bisan kon mapailubon kita, paonan-o naton magagamit hin maaramon an aton panahon sugad nga parahimo hin mga disipulo?

¹⁴ Bisan kon mapailubon kita, an pulong diri nagbubunga ha kadam-an nga tawo nga natitikangan naton hin pag-aram ha Biblia. (Mateo 13:18-23) Salit, katapos han duro nga mga pangalimbasog ha pagbulig ha ira, maaramon nga naundang kita ha paggasto hin panahon ha sugad nga mga tawo ngan namimiling hadton posible nga mas nagpapabili han kamatuoran han Biblia. (Eklesiastes 3:1, 6) Syempre, bisan adton maapresyaron nga mga tawo bangin magkinahanglan hin dugang nga bulig basi mabag-o an ira mga panhunahuna, disposisyon, ngan prayoridad ha kinabuhi. Salit mapailubon kita, sugad la nga hi Jesus mapailubon ha iya mga disipulo nga nagkinahanglan hin dugang nga panahon ha pagpauswag han husto nga disposisyon.—Markos 9:33-37; 10:35-45.

Pauswaga an Abilidad ha Pagtutdo

15, 16. Kay ano nga importante an maopay nga pangandam ngan pagin simple kon naghihimo kita hin mga disipulo?

¹⁵ An gugma ha Dios, pagtagad ha mga tawo, pagsakripisyo ha kalugaringon, ngan pagpailob importante ha malampuson nga paghimo hin mga disipulo. Kinahanglan pauswagon liwat an mga abilidad ha pagtutdo tungod kay makakabulig ito ha aton ha pagsaysay han mga impormasyon ha matin-aw ngan simple nga paagi. Pananglitan, damu nga puplunganon han Bantogan nga Magturutdo, hi Jesu-Kristo, an labi nga epektibo tungod ha pagin simple hito. Bangin nahinunumdoman mo an mga ginsiring ni Jesus sugad hini: “Magtirok kamo hin bahandi ha langit.” “Diri niyo ihatag ha mga ayam an mga baraan nga butang.” “An kinaadman ginmatadong han iya mga anak [“buhat,” NW].” “Ihatag kan Cesar an mga butang ni Cesar, ngan ha Dios, an kanan Dios.” (Mateo 6:20; 7:6; 11:19; 22:21) Syempre, diri la haglipot an mga ginsiring ni Jesus. Igintutdo ngan iginsaysay niya hin matin-aw an mga impormasyon kon kinahanglanon. Paonan-o mo masusubad an paagi han pagtutdo ni Jesus?

¹⁶ Importante an maopay nga pangandam basi makagtutdo hin simple ngan matin-aw. An diri andam nga ministro may tendensya nga magyinakan hinduro. Bangin diri niya maipatin-aw an importante nga mga punto tungod ha sobra nga pagyinakan, ginsisiring an ngatanan nga iya hinbabaroan hito nga topiko. Ha kabaliktaran, an andam hin maopay nga ministro naghuhunahuna mahitungod han tawo nga gintututdoan, namamalandong han topiko, ngan matin-aw nga iginpipresenta an ginkikinahanglan la. (Proberbios 15:28; 1 Korinto 2:1, 2) Iya gintatagad kon mationan-o kadamu na an hinbabaroan han estudyante ngan kon ano nga mga punto an sadang niya pabug-atan durante han pag-aram. Bangin damu nga makapainteres nga detalye mahitungod han topiko an hinbabaroan han ministro, kondi magigin matin-aw ito kon diri iupod an diri kinahanglanon nga impormasyon.

17. Paonan-o naton mabubuligan an mga tawo nga mangatadongan ha Kasuratan?

¹⁷ Ginbuligan liwat ni Jesus an mga tawo nga mangatadongan, imbes nga hatagan la hira hin mga impormasyon. Pananglitan, ha usa nga higayon, hiya nagpakiana: “Ano an nahuhunahuna nimo, Simon? An mga hadi ha tuna, tikang kan kanay an ira pagkarawat han mga kasangkapan, o buhis? Tikang ha ira mga anak, o tikang ha mga dumuruong?” (Mateo 17:25) Tungod kay bangin nalilipay gud kita ha pagsaysay hin damu tikang ha Biblia, kinahanglan pugngan naton an duro nga pagyinakan basi makagpahayag an estudyante o makagsaysay han ginhihisgotan durante han pag-aram ha Biblia. Syempre, diri naton sadang pakianhan hin damu an mga tawo. Lugod, pinaagi  han pagin mataktika, maopay nga mga ilustrasyon, ngan ginhunahuna hin maopay nga mga pakiana, mabubuligan naton hira nga masabtan an mga punto ha Kasuratan dida ha aton mga publikasyon nga basado ha Biblia.

18. Ano an nahiuupod ha pagpauswag han abilidad ha pagtutdo?

¹⁸ An Kasuratan nag-uunabi han abilidad ha pagtutdo. (2 Timoteo 4:2; Tito 1:9) Nag-uupod ito hin labaw pa kay ha pagbulig la ha usa nga memoryahon an mga impormasyon. Sadang buligan naton an estudyante han Biblia nga masabtan an kaibahan han kamatuoran ngan han sayop, han maopay ngan han maraot, han kinaadman ngan han kalurongan. Samtang ginbubuhat naton ini ngan nangangalimbasog nga mapatubo ha kasingkasing han tawo an gugma kan Jehova, bangin masabtan niya kon kay ano nga sadang sugton Hiya.

Madasigon nga Makigbahin ha Paghimo hin mga Disipulo

19. Paonan-o nabulig an ngatanan nga Kristiano ha paghimo hin mga disipulo?

¹⁹ An Kristiano nga kongregasyon usa nga organisasyon nga naghihimo hin mga disipulo. Kon nagigin disipulo an usa nga bag-ohan, an Saksi ni Jehova nga nakaagi ngan binulig ha iya nga mahibaro han igintututdo han Biblia diri la amo an malipayon. Kon an mga tawo nag-oorganisa hin grupo ha pagbiling hin nawara nga bata, bangin usa la ha grupo an makaagi ha iya. Kondi kon maibalik na an bata ha iya mga kag-anak, malipayon an ngatanan nga binulig ha pagbiling. (Lukas 15:6, 7) Sugad man, an paghimo hin mga disipulo pinangangalimbasogan han bug-os nga kongregasyon. An ngatanan nga Kristiano nabulig ha pagbiling hadton mahimo magin mga disipulo ni Jesus. Ngan kon an bag-ohan nagtitikang tumambong ha mga katirok ha Kingdom Hall, an ngatanan nga Kristiano nga presente nabulig ha pagparig-on han iya apresasyon ha tinuod nga pagsingba. (1 Korinto 14:24, 25) Salit, an ngatanan nga Kristiano maglipayon gud nga ginatos ka yukot an nagigin bag-o nga disipulo kada tuig.

20. Ano an sadang mo buhaton kon karuyag mo tutdoan an iba han kamatuoran han Biblia?

²⁰ Damu nga magtinumanon nga Kristiano an nalilipay ha pagtutdo ha mga tawo mahitungod kan Jehova ngan ha tinuod nga pagsingba. Kondi, bisan pa han ira mga pangalimbasog, bangin diri nira nahihimo ito. Kon ito an imo kahimtang, padayon nga parig-ona an imo gugma kan Jehova, magin matinagaron ha mga tawo, magsakripisyo ha kalugaringon, magpailob ngan pauswaga an imo mga abilidad ha pagtutdo. Labaw ha ngatanan, ig-ampo an imo hingyap ha pagtutdo han kamatuoran. (Eklesiastes 11:1) Sadang ka maliaw nga an ngatanan nga imo ginbubuhat ha pag-alagad kan Jehova nabulig ha paghimo hin mga disipulo nga naghihimaya ha Dios.

Maisasaysay Mo Ba?

• Kay ano nga an paghimo hin mga disipulo nagsasari han aton gugma ha Dios?

• Ano nga mga kalidad an ginkikinahanglan han parahimo hin mga disipulo?

• Ano an nahiuupod ha abilidad han pagtutdo?

[Mga Pakiana]

[Retrato ha pahina 21]

Pinaagi han paghimo hin mga disipulo, ipinapakita han mga Kristiano an ira hilarom nga gugma ha Dios

[Retrato ha pahina 23]

Kay ano nga an parahimo hin mga disipulo sadang magtagad ha iba?

[Retrato ha pahina 24]

Ano nga mga kalidad an ginkikinahanglan han mga parahimo hin disipulo?

[Retrato ha pahina 25]

Nalilipay an ngatanan nga Kristiano nga makita an mag-opay nga resulta han paghimo hin mga disipulo