Posible Gud an May Katuyoan nga Kinabuhi!

DAMU an nagkikinabuhi basi magkaada kwarta ngan han mga napapalit hito. An iba basi magin tanyag. An pipira basi mahingpit an ira artistiko nga mga kaabtik. May-ada liwat mga tawo nga an tumong ha kinabuhi amo an pagbulig ha iba. Kondi damu an diri maaram kon ano an katuyoan han ira kinabuhi o kon kay ano nga naeksister hira.

Kumusta ka man? Nahunahuna mo na gud ba kon kay ano nga aanhi ka? Kay ano nga diri tagdon an pipira nga tumong han mga tawo ngan usisahon kon may kapulsanan gud ba ito ngan kon nakakahatag ito hin katagbaw? Ha ano nga paagi nagigin posible an may katuyoan nga kinabuhi?

May-ada Husto nga Bahin an Kwarta Ngan Kaliawan

An Eklesiastes 7:12 nasiring: “An kinaadman usa nga arayopan, bisan sugad nga an kwarta usa nga arayopan; kondi an kamahalan han hibaro amo, nga an kinaadman naghihirot han kinabuhi niya nga may-ada hini.” Oo, may kapulsanan an kwarta. Nagkikinahanglan ka hin kwarta basi mabuhi, labi na kon may-ada ka responsabilidad ha pagtagana para ha imo pamilya.—1 Timoteo 5:8.

Ano an kapulsanan han kinabuhi kon waray han mga kaliawan nga nagigin posible tungod han kwarta? Bisan kon ginkarawat ni Jesu-Kristo, an nagpatikang han Kristianidad, nga waray hiya mauunlan, usahay nakaon hiya hin magrasa nga pagkaon ngan nainom hin primera klase nga alaksiw. Dugang pa, marahalon an iya mga panapton.—Mateo 8:20; Juan 2:1-11; 19:23, 24.

Kondi, diri an pagkaada hin kaliawan an prayoridad ni Jesus. Naghimo hiya hin matin-aw ngan husto nga mga prayoridad. Hiya nagsiring: “An kinabuhi han usa nga tawo diri ha kahuraan han  mga butang, nga iya ginkakaptan.” Katapos, nag-istorya hiya hin ilustrasyon mahitungod hin riko nga tawo nga may-ada kaumhan nga damu an produkto ngan nangatadongan ha iya kalugaringon: “Ano an akon bubuhaton? Kay ako waray ginhihimosan han akon mga bunga. . . . Akon paggugub-on an akon mga buhos, ngan maghihimo hin darodaku, ngan didto ko paghihimosa an akon ngatanan mga bunga, ngan an akon mga manggad. Ngan ako masiring ha akon kalag: Kalag, may damu ka nga manggad, nga gintirok ha kadam-an nga mga tuig: pahuway, kaon inom, ngan paglipay.” Ano an sayop ha panhunahuna hini nga tawo? An ilustrasyon nagpapadayon: “An Dios siniring ha [riko nga tawo]: Kulangkulang, yana nga gab-i an imo kalag aaroon ha imo, ngan an mga butang nga imo gin-andam, maka kan kanay man hira?” Bisan pa kon gintirok han tawo an iya produkto, diri niya mapapahimulosan an karikohan nga iya natirok kon mamatay hiya. Ha pagtapos, iginpahayag ni Jesus ini nga leksyon ha iya mga mamarati: “Amo ini an nagtitirok hin manggad ha iya kalugaringon, ngan diri manggaranon ha Dios.”—Lukas 12:13-21.

Oo, nagkikinahanglan gud kita hin kwarta, ngan an kaliawan may-ada husto nga bahin ha aton kinabuhi. Bisan pa hito, diri an kwarta o an kalipay an pinakaimportante. An pagin bahandianon ha Dios, karuyag sidngon, an pagkinabuhi nga inuuyonan han Dios an pinakaimportante nga butang nga angay pangalimbasogan.

Importante ba an Pagkaada Ngaran nga Diri Mahingangalimtan?

Damu an nangangalimbasog basi magkaada ngaran nga diri mahingangalimtan. Diri sayop ito nga hingyap. “An maopay nga ngaran maoroopay kay han birilhon nga lana,” siring han Biblia, “ngan an adlaw han kamatayon kay han adlaw han katawo hin usa.”—Eklesiastes 7:1.

Ha adlaw han kamatay, nahibabaroan an rekord han bug-os nga kinabuhi han tawo. Kon maopay an iya mga nahimo, an adlaw han iya kamatay mas maopay kay han adlaw han iya katawo diin diri pa hinbabaroan an iya bug-os nga pagkatawo.

An nagsurat han libro ha Biblia han Eklesiastes amo hi Hadi Salomon. An iya magurang nga hi Absalon naruyag maghimo hin ngaran nga diri mahingangalimtan. Kondi, matin-aw nga batan-on pa nga namatay an tulo nga anak nga lalaki ni Absalon nga mapapasahan unta niya han iya ngaran. Salit ano an iya ginbuhat? An Kasuratan nasiring: “Yana hi Absalon . . . nagpatindog para ha iya hin harigi, nga aada ha walog han hadi; kay hiya nagsiring: Waray ako anak nga lalaki nga magtitipig han akon ngaran nga handumanan: ngan iya ginngaranan an harigi han iya kalugaringon nga ngaran.” (2 Samuel 14:27; 18:18) Waray mabilngi an kagubaan hini nga harigi. Mahitungod kan Absalon, kilala hiya han mga estudyante han Biblia sugad nga rebelde nga nakigkunsabo ha pag-agaw han trono han iya amay nga hi David.

Damu yana an nangangalimbasog nga mahinumdoman pinaagi han ira mga nahimo. Namimiling hira hin himaya ha paniplatan han mga tawo nga nagbuburobag-o an karuyag samtang nalabay an panahon. Kondi, ano an nahitatabo ha sugad nga katanyagan? Ha libro nga The Culture of Narcissism, hi Christopher Lasch nagsurat: “Ha aton panahon, diin an kalamposan han tawo ha kadak-an iginbabasar ha pagkabatan-on, pagkamakaruruyag, ngan pagin naiiba, an katanyagan nagin mas temporaryo kay ha bisan kakan-o pa man, ngan adton mga sikat pirme nababaraka  nga malaos.” Sugad nga resulta, damu nga sikat an nagamit hin droga ngan alkohol nga agsob nagpapahalipot han ira kinabuhi. Oo, waray pulos an pagpinangalimbasog nga magin tanyag.

Kon sugad, kan kanay kita sadang magkaada maopay nga reputasyon? Ha paghisgot mahitungod han mga nagtipig han iya Balaud, hi Jehova nagsiring pinaagi han iya propeta nga hi Isaias: “Ha ira akon ihahatag dida ha akon balay ngan ha sulod han akon bungbong an usa nga handumanan ngan an usa nga ngaran . . . Akon ihahatag ha ira an ngaran nga dayon, nga diri makukuha.” (Isaias 56:4, 5) Tungod han ira pagkamasinugtanon ha Dios, magkakaada hira ‘handumanan ngan ngaran.’ Mahinunumdoman han Dios an ira ngaran ha ‘kadayonan,’ ngan tungod hito diri hira mapupuo. Ito an klase han ngaran nga gin-aaghat han Biblia nga aton pangalimbasogan nga magkaada kita—usa nga maopay nga reputasyon ha paniplatan ni Jehova, an aton Maglalarang.

Hi Isaias nagtagna mahitungod han panahon diin an magtinumanon makarawat hin kinabuhi nga waray kataposan ha Paraiso ha tuna. An “kinabuhi nga waray kataposan” dida hito nga Paraiso amo an “kinabuhi nga totoo”—an klase han kinabuhi nga karuyag han Dios ihatag ha katawohan han iya ginlarang hira. (1 Timoteo 6:12, 19) Imbes nga magpahimulos hin temporaryo ngan diri makapatagbaw nga kinabuhi, diri ba sadang kita mangalimbasog ha pagkaada kinabuhi nga waray kataposan?

Artistiko nga mga Pangalimbasog o Pagbulig ha Iba—Diri Igo Na

Damu nga artistiko nga indibiduwal an naghihingyap ha pagpauswag han ira mga obra maestra basi magin hingpit ito. Kondi, halipot hinduro an presente nga kinabuhi ha pagbuhat hito. Han sobra 89 anyos na hi Hideo, an debuhista nga gin-unabi ha nauna nga artikulo, nangalimbasog hiya ha pagpauswag han iya abilidad. Bisan kon umabot ha punto nga tagbaw na an usa nga debuhista han iya mga nahimo, hito nga panahon bangin diri na niya mabuhat an iya nahimo han batan-on pa hiya. Kondi kumusta man kon may-ada hiya kinabuhi nga waray kataposan? Hunahunaa an ngatanan nga posibilidad ha paghingpit han iya talento!

Kumusta man an mahitungod han mga pangalimbasog ha pagbulig ha iba? Darayawon para ha usa nga maghatag hin atensyon ha mga pobre ngan gamiton an iya panag-iya ha pagbulig ha ira. An Biblia nasiring: ‘Burobulahan an paghatag kay ha pagkarawat.’ (Buhat 20:35) An pagpakita hin pagtagad ha kaopayan han iba mahimo magin makapatagbaw gud. Kondi, tubtob ha ano nga sukol an mahihimo han usa, bisan kon bug-os nga gamiton niya an iya kinabuhi para hini? Sugad nga mga tawo, limitado la an mahihimo naton ha pagpagaan han pag-antos han iba. Waray birilhon nga materyal nga regalo an makakatagbaw han usa nga importante nga panginahanglan nga ginbabalewaray han kadam-an, ngan nagpapabilin ito nga diri gud natatagbaw ha ira kinabuhi. Ano ito nga panginahanglan?

Pagtagbaw han Natural nga Panginahanglan—Importante Gud

Ha Sermon ni Jesus ha Bukid, naghisgot hiya hin usa nga natural ngan importante nga panginahanglan han hiya siniring: “Malipayon adton mahunahunaon han ira espirituwal nga panginahanglan, tungod kay ira an ginhadian han langit.” (Mateo 5:3, NW) Kon sugad, sumala ha Biblia, an tinuod nga kalipay diri nadepende ha karikohan, katanyagan, artistiko nga mga nahimo, o mga pangalimbasog ha pagbulig ha iba. Lugod, nadepende ito ha pagtagbaw han aton espirituwal nga panginahanglan—an panginahanglan ha pagsingba ha Dios.

Gindasig ni apostol Pablo adton diri nakilala ha Maglalarang nga pamilngon hiya. Hi Pablo nagsiring: “Tikang ha usa . . . ginbuhat [han Dios] an ngatanan nga mga nasud han mga tawo, basi paukyon ha ngatanan nga bayhon han tuna, ngan igintungod ha ira an pagkasunod-sunod han mga panahon, ngan an mga ginkatakipan han ira urukyan; basi hira mamiling han Dios, kay bangin la hira makahikap ha iya, ngan hiagian hiya nira; bisan kon hiya diri hirayo ha tagsa-tagsa ha aton. Kay ha iya mabubuhi kita, ngan makakagkiwa kita.”—Buhat 17:26-28.

An pagtagbaw han panginahanglan ha pagsingba ha matuod nga Dios amo an yawi ha pagkaada tinuod nga kalipay. Naghahatag liwat ito ha aton hin paglaom nga magkaada “kinabuhi nga  totoo.” Tagda pananglitan hi Teresa nga nagin sikat nga artista ha ira nasud han hiya an nagin siyahan nga Aprikana-Amerikana nga artista nga nagin istaring ha iya kalugaringon nga serye han usa ka oras nga drama. Kondi, waray pag-iha, ginbayaan niya ito ngatanan. Kay ano? Hiya nagsiring: “Kombinsido ako nga an pagsunod ha sagdon han Pulong han Dios amo an gimaopayi nga paagi han pagkinabuhi.” Diri niya karuyag madaot an iya relasyon ha Dios pinaagi ha pagkaada serye ha telebisyon nga nagpapasidungog han sekso ngan kamadarahog. Waray na hiya mag-artista kondi sinulod ha makapatagbaw gud nga kinabuhi, tungod kay nag-alagad hiya sugad nga bug-os panahon nga magsarangyaw han maopay nga sumat han Ginhadian, nga nangangalimbasog ha pagbulig ha iba nga magkaada maopay nga relasyon ha Dios.

Mahitungod han desisyon ni Teresa nga umundang ha pag-artista, usa han iya katrabaho hadto an nagsiring: “Nasubo gud ako tungod kay diri ko karuyag nga bayaan niya an iya karera nga akon ginhuhunahuna nga malampuson. Kondi matin-aw nga nabilngan niya an usa nga butang nga mas importante ngan mas makapatagbaw.” Ha urhi, namatay hi Teresa. Kondi, han namatay hiya, an amo la gihapon nga katrabaho nagsiring: “Malipayon hiya, ngan ito an importante ha kinabuhi. Pero pipira ha aton an makakasiring nga malipayon hira?” Para hadton nag-una han ira relasyon ha Dios kondi namatay, aada an urusahon nga paglaom han pagkabanhaw ilarom han pagmando han Ginhadian.—Juan 5:28, 29.

May-ada katuyoan an Maglalarang para ha tuna ngan ha mga tawo dida hito. Karuyag niya nga masabtan mo ini nga katuyoan ngan magpahimulos han kinabuhi nga waray kataposan ha Paraiso ha tuna. (Salmo 37:10, 11, 29) Yana an panahon nga dugang nga mahibaro mahitungod kan Jehova—an Maglalarang han mga langit ngan han tuna, ngan han iya katuyoan para ha imo. Malilipay an mga Saksi ni Jehova ha iyo lugar ha pagbulig ha imo nga magkaada hito nga kahibaro. Alayon pakiistorya ha ira, o pagsurat ha mga nagpublikar hini nga magasin.

[Retrato ha pahina 5]

Ano an sayop ha pangatadongan han riko nga tawo ha ilustrasyon ni Jesus?

[Retrato ha pahina 7]

Karuyag mo ba magpahimulos hin kinabuhi nga waray kataposan ha Paraiso ha tuna?