Subara an Bantogan nga Parahimo hin Disipulo

“Pagmatngon kamo ha iyo pamati.”—LUKAS 8:18.

1, 2. Kay ano nga sadang mo tagdon kon paonan-o gintratar ni Jesus an mga tawo durante han iya ministeryo?

 GINTUTUMAN ni Jesu-Kristo an iya bahin sugad nga Bantogan nga Magturutdo ngan Parahimo hin Disipulo han nagsiring hiya ha iya mga sumurunod: “Pagmatngon [‘Magtagad,’ NW] kamo ha iyo pamati.” (Lukas 8:16-18) Ito nga prinsipyo mapulsanon ha imo ministeryo sugad nga Kristiano. Kon imo gintatagad an igintututdo may kalabotan ha espirituwal, iaaplikar mo ito ngan magigin epektibo ka nga parasamwak han Ginhadian. Syempre, diri mo mababatian an tingog ni Jesus yana, kondi mababasa mo an iya ginsiring ngan ginbuhat, sugad han iginpahayag ha Kasuratan. Ano an iginsusumat hito mahitungod ha pagtratar ni Jesus ha mga tawo durante han iya ministeryo?

² Hi Jesus maopay hinduro nga parasangyaw han maopay nga sumat ngan bantogan nga magturutdo han Kasuratan. (Lukas 8:1; Juan 8:28) An paghimo hin mga disipulo nag-uupod han pagsangyaw ngan pagtutdo, kondi an pipira nga Kristiano nga mag-opay nga parasangyaw nakukurian pagtutdo ha mga tawo ha epektibo nga paagi. An pagsangyaw nag-uupod hin pagpasamwak han mensahe, samtang an pagtutdo ha mga tawo mahitungod kan Jehova ngan han iya mga katuyoan kasagaran nga nagkikinahanglan nga magkaada maopay nga relasyon ha ira an parahimo hin disipulo. (Mateo 28:19, 20) Mahihimo ini pinaagi han pagsubad kan Jesu-Kristo, an Bantogan nga Magturutdo ngan Parahimo hin Disipulo.—Juan 13:13.

3. Ano an maibubulig han imo pagsubad kan Jesus ha imo pangalimbasog ha paghimo hin mga disipulo?

³ Kon imo subaron an mga paagi ni Jesus ha pagtutdo, masusunod mo an sagdon ni apostol Pablo: “Manggawi kamo ha kaaram ha mga aadto ha gawas, nga pagpahimulsan niyo an panahon. An iyo pulong kinahanglan nga may maada grasya, nga ginparasa hin asin, basi nga iyo hibaroan an pagbatonay han usa kag usa.” (Kolosas 4:5, 6) An pagsubad kan Jesus ha paghimo hin mga disipulo nagkikinahanglan hin pangalimbasog,  kondi pinaagi hito magigin epektibo an imo pagtutdo tungod kay mabulig ito ha imo ha ‘pagbaton ha kada usa’ uyon ha iya panginahanglan.

Gin-aghat ni Jesus an Iba nga Magyakan

4. Kay ano nga makakasiring kita nga hi Jesus maopay nga mamarati?

⁴ Tikang ha kabata, batasan na ni Jesus an pagpamati ha mga tawo ngan pagdasig ha ira nga ipahayag an ira mga opinyon. Pananglitan, han 12 anyos hiya, hin-agian hiya han iya mga kag-anak ha butnga han mga magturutdo ha templo nga ‘nagpipinamati ngan nagpipinakiana ha ira.’ (Lukas 2:46) Waray hiya kumadto ha templo basi pakaalohan an mga magturutdo tungod kay mas damu an iya hinbabaroan. Kinadto hiya basi mamati, kondi nagpakiana liwat hiya. An iya pagin maopay nga mamarati bangin usa han kalidad nga naruyagan ha iya han Dios ngan han mga tawo.—Lukas 2:52.

5, 6. Paonan-o kita nahibaro nga hi Jesus namati ha mga ginsiring hadton iya gintutdoan?

⁵ Katapos han bawtismo ni Jesus ngan pagdihogi ha iya sugad nga Mesias, nagpabilin hiya nga interesado mamati ha mga tawo. Waray hiya magsentro hinduro ha iya igintututdo nga nahingalimtan na niya adton inabot basi mamati ha iya. Agsob nga naundang hiya hin madaliay, nagpapakiana kon ano an ira opinyon, ngan namamati ha ira baton. (Mateo 16:13-15) Pananglitan, han mamatay an bugto ni Marta nga hi Lasaro, hi Jesus nagsiring ha iya: “An ngatanan nga nabubuhi, ngan nagtotoo ha akon, diri mamamatay.” Katapos nagpakiana hiya kan Marta: “Natoo ka ba hini?” Ngan namati gud hi Jesus ha iya baton: “Oo, Ginoo, ako tinoo nga ikaw amo hi Kristo nga Anak han Dios.” (Juan 11:26, 27) Makalilipay gud hibatian an pagpahayag ni Marta han iya pagtoo hito nga paagi!

⁶ Han binayaan hi Jesus han damu nga disipulo, interesado hiya nga mabatian an opinyon han iya mga apostol. Salit hiya nagpakiana: ‘Karuyag ba liwat niyo bumulag ha akon?’ Hi Simon Pedro binaton: “Ginoo, hin-o an amon kakadtoan pa? Ikaw an may mga pulong han kinabuhi nga waray kataposan. Ngan kami tinoo ngan nakilala, nga ikaw amo an Baraan han Dios.” (Juan 6:66-69) Nakalipay gud ito kan Jesus! Sigurado nga malilipay ka liwat ha pariho hito nga kapahayagan han pagtoo han usa nga estudyante han Biblia.

Matinalahuron nga Namati hi Jesus

7. Kay ano nga damu nga Samariahanon an tinoo kan Jesus?

⁷ An usa pa nga hinungdan kon kay ano nga hi Jesus epektibo nga parahimo hin disipulo tungod kay matinagaron hiya ha mga tawo ngan matinalahuron nga namati ha ira. Pananglitan, ha usa nga higayon, nagsangyaw hiya ha Samaritana hirani ha atabay ni Jakob ha Sikar. Durante han ira pag-istorya, diri la hi Jesus an nagyinakan; namati hiya ha ginsiring han Samaritana. Samtang namamati ha iya, naobserbahan ni Jesus an iya interes ha pagsingba ngan ginsumatan niya an Samaritana nga an Dios namimiling hadton naruruyag magsingba ha Iya ha espiritu ngan kamatuoran. Nagpakita hi Jesus hin pagtahod ngan pagtagad hini nga babaye, salit iginsumat niya ha iba an mahitungod kan Jesus, ngan “damu han mga Samariahanon, nga tikang hadto nga bungto, tinoo ha iya tungod han pulong han babaye.”—Juan 4:5-29, 39-42.

8. Paonan-o an hilig han mga tawo ha pagpahayag han ira mga opinyon makakabulig ha imo ha pagtikang han pakiistorya ha ministeryo?

⁸ An mga tawo kasagaran nga naruruyag magpahayag han ira mga opinyon. Pananglitan, an mga umurukoy ha kadaan nga Atenas naruyag ha pagpahayag han ira mga opinyon ngan pagpamati hin bag-o nga mga impormasyon. Nagresulta ini hin epektibo nga diskurso ni apostol Pablo ha Areopago hito nga syudad. (Buhat 17:18-34) Ha pagtikang hin pakiistorya ha usa nga tawo ha ministeryo yana, mahimo ka sumiring, “Nabisita ako ha imo tungod kay interesado ako han imo opinyon mahitungod ha [usa nga topiko].” Pamati ha iya opinyon, ngan komentohi ito o pagpakiana mahitungod hito. Katapos, ipakita ha iya an ginsisiring han Biblia mahitungod hito.

 Maaram hi Jesus Kon Ano an Isisiring

9. Ano an ginbuhat ni Jesus antes niya ‘ginbuklad an Santos nga Surat’ kan Kleopas ngan ha iya kaupod?

⁹ Hi Jesus diri gud nauubosan hin isisiring. Gawas pa ha pagin maopay nga mamarati, agsob nga hinbabaroan niya an ginhuhunahuna han mga tawo, ngan maaram gud hiya kon ano an isisiring. (Mateo 9:4; 12:22-30; Lukas 9:46, 47) Pananglitan: Waray pag-iha katapos banhawon hi Jesus, duha han iya mga disipulo an nagbibinaktas tikang ha Jerusalem ngadto ha Emaus. An Ebanghelyo nag-aasoy: “Han naghiruhimangraw hira, ngan nagpinakianahay, . . . hi Jesus ngahaw napahirani ha ira ngan binunyog ha ira. Kondi an ira mga mata nakulangan ha pagkilala ha iya. Ngan hiya siniring ha ira: Ano ba ini nga mga pulong, nga iyo ginyiyinakan ha usa kag usa, han naglilinakat kamo? Ngan nagkabakdaw hira nga magsurub-on. Ngan an usa ha ira, nga an ngaran hi Kleopas, han pagbaton, siniring ha iya: Ikaw la ba an dumuruong ha Jerusalem, nga diri maaram hini nga mga bagay, nga nahinabo didto hini nga mga adlaw? Ngan hiya siniring ha ira: Ano ba nga mga bagay?” Namati an Bantogan nga Magturutdo samtang nagsasaysay hira nga hi Jesus nga Nasaretnon nagtutdo ha mga tawo, nagbuhat hin mga milagro, ngan ginpatay. An iba nagsiring nga ginbanhaw hiya. Ginpinayakan la ni Jesus hi Kleopas ngan an iya kaupod. Katapos iya iginsaysay an kinahanglan nira hibaroan, ngan ‘ginbuklad an Santos nga Surat’ ha ira.—Lukas 24:13-27, 32.

10. Paonan-o mo hibabaroan an gintotoohan han imo ginsasangyawan?

¹⁰ Bangin waray ka ideya mahitungod ha gintotoohan han imo kaistorya. Basi hibaroan ito, mahimo ka sumiring nga karuyag mo mabatian kon ano an opinyon han mga tawo mahitungod ha pag-ampo. Katapos pakianhi hiya, “Ha imo paghunahuna may-ada gud ba namamati ha mga pag-ampo?” An iya baton mahimo magpahayag hin damu mahitungod han iya opinyon ngan gintotoohan. Kon relihiyoso hiya, bangin mas damu pa an imo mahibaroan pinaagi han pagpakiana, “Ha hunahuna mo, namamati ba an Dios ha ngatanan nga pag-ampo, o may-ada niya diri pinamamatian?” Pinaagi hito nga mga pakiana magigin relaks an iyo pag-istorya. Kon angayan nga isumat an ginsisiring han Biblia, maopay nga magin mataktika ngan ayaw pag-atakeha an iya mga gintotoohan. Bangin maruyag hiya nga bumisita ka utro kon nalipay hiya pagpinamati ha imo. Kondi ano an imo bubuhaton kon magpakiana hiya nga diri ka maaram han baton? Mahimo ka magsaliksik ngan bumalik nga andam ha ‘pagbaton nga may kaaghop ngan pagtahod, kon ano an hinungdan han imo pagtoo.’—1 Pedro 3:15.

Gintutdoan ni Jesus an mga Takos

11. Ano an mabulig ha imo nga hiagian adton takos tutdoan?

¹¹ An hingpit nga tawo nga hi Jesus may-ada pagsabot nga nakabulig ha iya nga makilala an mga takos tutdoan. Kondi makuri gud kita makabiling han “mga tinunguran han kinabuhi nga waray kataposan.” (Buhat 13:48) Ito liwat an naeksperyensyahan han mga apostol nga ginsidngan ni Jesus: “Bisan diin nga bungto ngan baryo nga iyo sudlan, usisaha niyo kon hin-o didto an takos.” (Mateo 10:11) Pariho ha ira, kinahanglan  pamilngon mo an mga tawo nga disidido mamati ngan matutdoan han kamatuoran han Biblia. Hiaagian mo an mga takos pinaagi han pagpamati hin maopay ha ngatanan nga imo nakakaistorya ngan pag-obserba ha disposisyon han kada usa.

12. Paonan-o mo padayon nga mabubuligan an interesado?

¹² Katapos makiistorya ha tawo nga interesado ha mensahe han Ginhadian, maopay nga imo hunahunaon pirme an iya espirituwal nga panginahanglan. Kon imo isurat an hinbaroan mo katapos makiistorya ha iya mahitungod han maopay nga sumat, magagamit mo ini ha padayon nga pagbulig ha iya ha espirituwal. Durante han mga pagbalik bisita, kinahanglan mamati ka hin maopay basi hibaroan pa an mahitungod han iya mga gintotoohan, disposisyon, o kahimtang.

13. Ano an makakabulig ha imo nga hibaroan an opinyon han usa nga tawo mahitungod han Biblia?

¹³ Paonan-o mo maaaghat an mga tawo nga isumat ha imo an ira opinyon mahitungod ha Pulong han Dios? Ha iba nga lugar, epektibo an pagpakiana, “Makuri mo ba masabtan an Biblia?” An baton hito kasagaran nga magpapahayag han disposisyon han imo kaistorya may kalabotan ha espirituwal. Usa pa nga paagi amo an pagbasa hin teksto ngan pagpakiana, “Ano an imo masisiring mahitungod hito?” Pariho kan Jesus, posible nga damu an imo mahihimo ha ministeryo pinaagi han paggamit hin angayan nga mga pakiana. Kondi, kinahanglan an pag-ikmat.

Epektibo nga Gin-gamit ni Jesus an mga Pakiana

14. Paonan-o mo maipapakita nga interesado ka ha opinyon han mga tawo bisan kon diri magpinakiana hin sobra?

¹⁴ Magpakita hin interes ha opinyon han iba ha paagi nga diri hira maaawod. Subara an paagi ni Jesus. Mataktika hiya nga nagpakiana ngan naggamit hin makapagios ha hunahuna nga mga pakiana. Matinagaron liwat hiya nga mamarati nga nagliaw han sinsero nga mga tawo salit waray hira mag-alang ha iya. (Mateo 11:28) Ngatanan nga klase hin tawo waray maawod ha pagsumat ha iya han ira mga problema. (Markos 1:40; 5:35, 36; 10:13, 17, 46, 47) Basi diri mag-alang an mga tawo ha pagsumat ha imo han ira opinyon mahitungod han Biblia ngan han mga katutdoan hito, likyi an sobra nga pagpinakiana.

15, 16. Paonan-o mo maaaghat an mga tawo nga mag-istorya mahitungod han ira gintotoohan?

¹⁵ Dugang pa ha paggamit hin mga pakiana ha epektibo nga paagi, maaaghat mo an iba nga makiistorya pinaagi han pagsumat hin makapainteres nga impormasyon ngan pagpamati ha ira baton. Pananglitan, hi Jesus nagsiring kan Nikodemo: “Waray bisan hin-o nga diri ig-anak [utro] tikang ha igbaw nga sadang makakita han ginhadian han Dios.” (Juan 3:3) Nagin interesado gud hito hi Nikodemo salit waray hiya makapugong ha pagbaton ngan pagpamati kan Jesus. (Juan 3:4-20) Maaaghat mo liwat an mga tawo nga makiistorya ha pariho nga paagi.

¹⁶ Yana, an pagdamu han bag-o nga relihiyon usa han makapainteres gud nga topiko ha pakiistorya ha mga lugar sugad han Aprika, Este nga Europa, ngan Latin Amerika. Ha mga lugar nga pariho hini, kasagaran nga makakagtikang ka ha pakiistorya pinaagi han pagsiring: “Nasasamok ako nga damu hinduro an relihiyon. Kondi naglalaom ako nga diri mag-iiha, an mga tawo han ngatanan nga nasud magkakaurosa ha tinuod nga pagsingba. Karuyag mo ba makita nga nahitatabo ito?” Pinaagi han pagsiring hin makapainteres mahitungod han imo paglaom, bangin maaghat mo an mga tawo nga magpahayag han ira opinyon. Ngan mas masayon batunon an pakiana kon duha la an posible nga baton. (Mateo 17:25) Katapos bumaton an imo kaistorya, ipahayag an imo baton pinaagi hin usa o duha nga teksto. (Isaias 11:9; Sepania 3:9) Ha pagpamati hin maopay ngan pagtigaman han iya baton, hibabaroan mo kon ano an iyo paghihisgotan ha imo sunod nga pagbisita.

Namati hi Jesus ha Kabataan

17. Ano an nagpapakita nga interesado hi Jesus ha kabataan?

¹⁷ Hi Jesus interesado diri la ha mga adulto  kondi ha kabataan liwat. Maaram hiya han ira gin-uuyag ngan han ira ginsisiring. Usahay iya gin-aaghat an kabataan nga dumaop ha iya. (Lukas 7:31, 32; 18:15-17) Damu nga kabataan an kaupod han katawohan nga namati ha iya. Han ginuliat an batan-on nga kalalakin-an ha pagdayaw ha Mesias, gintagan niya ito hin atensyon ngan nagsiring hiya nga igintagna ini han Kasuratan. (Mateo 14:21; 15:38; 21:15, 16) Yana, damu nga kabataan an nagigin mga disipulo ni Jesus. Salit paonan-o mo hira mabubuligan?

18, 19. Paonan-o mo mabubuligan ha espirituwal an imo anak?

¹⁸ Basi mabuligan ha espirituwal an imo anak, pamati gud ha iya. Kinahanglan masabtan mo an iya mga ideya nga diri uyon ha panhunahuna ni Jehova. Anoman an isiring han imo anak, maopay gud nga kumendasyonan anay hiya. Katapos mahimo mo gamiton an angayan nga mga teksto basi mabuligan hiya nga masabtan an panhunahuna ni Jehova.

¹⁹ An mga pakiana mabulig ha imo nga masabtan an ira inaabat. Kondi pariho ha mga adulto, an kabataan diri naruruyag nga pagpinakianahan. Imbes nga pabatunon an imo anak hin magkuri nga pakiana, kay ano nga diri magsaysay hin halipot mahitungod ha imo kalugaringon? Depende ha iyo ginhihisgotan, mahimo ka sumiring nga sugad hito an inabat mo hadto ngan isaysay kon kay ano. Katapos pakianhi hiya, “Sugad ba liwat hito an imo inaabat?” An iya baton mahimo magresulta hin mapulsanon ngan makapadasig nga paghisgot ha Kasuratan.

Padayon nga Subara an Bantogan nga Parahimo hin Disipulo

20, 21. Kay ano nga sadang ka magin maopay nga mamarati sugad nga parahimo hin disipulo?

²⁰ Nakikiistorya ka man ha imo anak o ha bisan hin-o, importante gud an pagpamati hin maopay. Oo, pagpakita ito hin gugma. Pinaagi han pagpamati, nagios ka nga mapainubsanon ngan naipapakita mo ha imo kaistorya an pagtahod ngan mahigugmaon nga pagtagad. Syempre, kon namamati ka kinahanglan tagdon mo an ginsisiring han imo kaistorya.

²¹ Samtang nakikigbahin ka ha ministeryo, pamati pirme hin maopay ha imo kaistorya. Hito nga paagi, posible nga hibaroan mo kon ano nga bahin han kamatuoran han Biblia an maruruyagan gud nira. Katapos, pangalimbasog nga mabuligan hira pinaagi han paggamit hin magkalain-lain nga paagi han pagtutdo ni Jesus. Kon buhaton mo ito, babalosan ka hin kalipay ngan katagbaw tungod kay ginsusubad mo an Bantogan nga Parahimo hin Disipulo.

Ano an Imo Baton?

• Paonan-o gin-aghat ni Jesus an iba nga igpahayag an ira mga opinyon?

• Kay ano nga namati hi Jesus ha iya mga gintutdoan?

• Paonan-o mo gagamiton an mga pakiana ha ministeryo?

• Ano an mahimo mo buhaton basi mabuligan ha espirituwal an kabataan?

[Mga Pakiana]

[Retrato ha pahina 28]

Samtang nagsasangyaw, pamati hin maopay

[Retrato ha pahina 30]

Ginsusubad naton hi Jesus kon binubuligan naton ha espirituwal an kabataan