Mga Pakiana Tikang ha mga Magbarasa

Paonan-o sadang tagdon han usa nga Kristiano an pagpanganop ngan pagpangisda?

An Biblia diri nagkukondenar han pagpanganop o pagpangisda. (Deuteronomio 14:4, 5, 9, 20; Mateo 17:27; Juan 21:6) Bisan pa hito, kinahanglan tagdon han mga Kristiano nga nanganganop o nangingisda an pipira nga prinsipyo ha Biblia.

Gintugotan han Dios hi Noe ngan an iya katulinan ha pagpatay ngan pagkaon hin mga hayop, basta la ira paagason anay an dugo hito antes kaunon. (Genesis 9:3, 4) Ginpabug-atan hini nga sugo nga kinahanglan tahuron an kinabuhi han hayop sugad nga tikang ha Dios. Tungod hito, an mga Kristiano diri nagpapatay hin mga hayop para la ha isport o kaliawan, ngan diri nira ginbabalewaray an kinabuhi.—Proberbios 12:10.

Sadang liwat naton tagdon an dugang nga punto may kalabotan han aton disposisyon. An mga apostol nga parapangisda posible nga nalipay han damu nga dakop. Kondi, waray ebidensya nga nanhambog hira han ira abilidad ha pagpangisda o pagpanganop, o nakigkompetensya hira ha iba. Ngan waray liwat ebidensya nga ginbuhat nira ito basi pamatud-an la an ira pagkalalaki, o para han kalipay han paglanat, pagdakop, ngan pagpatay.—Salmo 11:5; Galasia 5:26.

Kon sugad, mahimo naton pakianhan an aton kalugaringon: ‘Nagpapakita ba ako hin pagtahod ha pagtagad ni Jehova ha kinabuhi? An pagpanganop o pagpangisda na la ba an akon pirme ginhuhunahuna ngan gin-iistorya? An akon ba paagi ha pagkinabuhi nagpapakita nga naruruyag gud ako ha paglanat, pagdakop, o pagpatay hin mga hayop o isda, o nagpapakita ba ito nga ministro ako han Dios? Nagigin duok ba ako ha mga diri-tumuroo, o napapabay-an ko ba an akon pamilya tungod ha pagpanganop o pagpangisda?’—Lukas 6:45.

Ha pipira nga nasud, may-ada panahon nga legal nga igintutugot an pagpangisda o pagpanganop. An iba naabat nga makatadunganon nga balewarayon an espirituwal nga buruhaton durante hini nga panahon. Kondi, ipinapakita naton an aton pagtoo ngan pagsarig ha Dios kon diri naton gintutugotan an bisan ano nga magin mas importante kay han iya kaburut-on. (Mateo 6:33) Dugang pa, ginsusunod han mga Kristiano an ngatanan nga balaud ni “Cesar” may kalabotan ha pagpanganop ngan pagpangisda, igpatuman man ito han gobyerno o diri.—Mateo 22:21; Roma 13:1.

Ha pagtuman han pagtagad ni Jehova ha pagpanganop ngan pagpangisda, bangin kinahanglan ipahiuyon han pipira an ira panhunahuna may kalabotan ha Iya suruklan. (Efeso 4:22-24) Ha luyo nga bahin, kinahanglan naton tahuron an desisyon han iba nga uyon han ira konsensya. Naghatag hi apostol Pablo hin angayan nga sagdon may kalabotan hini: “Ayaw na kita paghinukmanay ha usa kag usa: kondi paghukom lugod kamo hini; nga mawaray tawo nga magbutang dida ha dalan han iya bugto hin hiparakdolan.” (Roma 14:13) An pagpakita han sugad nga diri-makikalugaringon nga gugma ngan pagtahod nagriresulta hin kamurayawan ha kongregasyon ngan nagpapalipay ha aton Maglalarang, an Surok han ngatanan nga kinabuhi.—1 Korinto 8:13. a

[Footnote]