Posible ba Magkaada Pagkaurosa ha Kalibotan?

ANO an dadangatan han aton kalibotan—kamurayawan ba o kabungkagan? Baga hin may-ada makakombinse nga argumento an tagsa nga opinyon.

Ha usa nga bahin, an pipira nga lider ha kalibotan nasarig nga posible gud makab-ot an kamurayawan ha bug-os nga kalibotan—bangin tungod kay kon diri ito mahitabo, makangingirhat gud hunahunaon an posible nga mahitabo ha kalibotan. Ha luyo nga bahin, damu an nahahadlok ha mga pakiana nga sugad hini: Ano nga mga nasud an may-ada hinganiban ha pamatay hin damu hinduro nga tawo? Matuod ba hira paggamit hito? Ano an mahitatabo kon gamiton nira ito?

Ipinapakita han kasaysayan nga an pagpalabaw-labaw ngan pagpasulabi maiha na nga nakakapugong ha pagkaurosa, ngan agsob nga gin-aaghat pa han relihiyon an pagkasaramok imbes nga wad-on ito. “An bisan ano nga hinungdan ha pagkabahin-bahin han mga tawo nakakaaghat hin kamadarahog, ngan an relihiyon usa han pinakamarig-on nga hinungdan han pagkabahin-bahin,” siring han parasurat nga hi James A. Haught. “Bisan pa han gintotoohan han kadam-an nga an relihiyon nakakahimo ha usa nga magin ‘maopay,’ matin-aw nga nakakaaghat ito ha mga tawo nga makahimo hin maraot hinduro nga buhat.” Ito liwat an gintotoohan han awtor nga hi Steven Weinberg. “An mag-opay nga tawo nakakabuhat hin maraot,” hiya nagsurat, “tungod han relihiyon.”

Makakalaom ba kita nga magkakaada pagkaurosa ha kalibotan? Oo! Kondi, an pagtitikangan hito diri an tawo o mga relihiyon nga hinimo han tawo, sugad han aton mahibabaroan.

[Blurb ha pahina 3]

An kalibotan ba pariho hin granada nga hirani na bumuto?