Sinusuportahan Mo ba an Pagkasoberano ni Jehova?

“Igsumat ha mga nasud: Hi Jehova naghahadi.”—SALMO 96:10.

1, 2. (a) Ano an makatirigamnan nga nahitabo han Oktubre 29 K.P.? (b) Ano an kahulogan hito nga hitabo para kan Jesus?

 USA nga makatirigamnan nga hitabo nga waray pa gud makita ha tuna an nahitabo han Oktubre 29 K.P. An parasurat han Ebanghelyo nga hi Mateo nagsiring: “Han kabaptisi na kan Jesus, ha gilayon hiya hinaw-as ha tubig, ngan kitaa, an mga langit nabuksan ha iya; ngan iya [Juan nga Parabaptis] nakita an espiritu han Dios nga nalusad, sugad hin sarapati ngan kinada ha igbaw [ni Jesus]. Ngan, kitaa, an usa nga tingog tikang ha langit, nga nasiring: Ini amo an akon hinigugma nga Anak, nga akon nalilipayan.” Usa ini han pipira nga hitabo nga iginrekord han ngatanan nga upat nga nagsurat han Ebanghelyo.—Mateo 3:16, 17; Markos 1:9-11; Lukas 3:21, 22; Juan 1:32-34.

² An pagbubo han baraan nga espiritu kan Jesus nagpakilala ha iya sugad nga an Usa nga Dinihogan, nga nangangahulogan hin Mesias o Kristo. (Juan 1:33) Katapos hin maiha nga panahon, an iginsaad nga “binhi” inabot! Natindog ha atubangan ni Juan nga Parabaptis inin usa nga sasamaron ni Satanas ha tikod ngan magtutultog han ulo han daku nga kaaway ni Jehova nga nakontra ha Iya pagkasoberano. (Genesis 3:15, NW) Tikang hito nga panahon, bug-os nga maaram hi Jesus nga kinahanglan mangalimbasog gud hiya ha pagtuman han katuyoan ni Jehova may kalabotan han Iya pagkasoberano ngan han Ginhadian.

3. Paonan-o nangandam hi Jesus para ha iya pagbubuhaton ha pagsuporta han pagkasoberano ni Jehova?

³ Basi magin andam para ha bag-o nga toka, “hi Jesus, [nga] puno han espiritu santo, binalik tikang ha Jordan; ngan gindara han espiritu ngadto ha kamingawan.” (Lukas 4:1; Markos 1:12) Didto, ha sulod hin 40 ka adlaw nagkaada hiya panahon para ha hilarom nga pamalandong ha isyu han pagkasoberano nga iginbangon ni Satanas ngan ha toka nga sadang Niya buhaton ha pagsuporta han pagkasoberano ni Jehova. Nahidadabi hito nga isyu an ngatanan nga intelihente nga linarang—ha langit ngan ha tuna. Salit sadang naton tagdon an pagkamatinumanon ni Jesus ngan hunahunaon an kinahanglan buhaton basi ipakita nga hingyap liwat naton nga suportahan an pagkasoberano ni Jehova.—Job 1:6-12; 2:2-6.

Dayag nga Gin-aayat an Pagkasoberano ni Jehova

4. Ano an ginbuhat ni Satanas nga labi nga nag-ayat han pagkasoberano ni Jehova?

⁴ Syempre, maaram hi Satanas han mga panhitabo nga gin-unabi pa la. Nagtikang dayon hiya ha pag-atake ha nangunguna nga “binhi” han  “babaye” han Dios. (Genesis 3:15) Tulo ka beses nga ginsulay ni Satanas hi Jesus pinaagi ha pag-aghat nga buhaton an baga hin makakaopay ha iya imbes nga sundon an iginpapabuhat han iya Amay. An ikatulo nga pagsulay labi nga nag-ayat han pagkasoberano ni Jehova. Pinaagi ha pagpakita kan Jesus han “ngatanan nga ginhadian han kalibotan, ngan an ira himaya,” waray awod nga nagsiring hi Satanas ha iya: “Ngatanan ini nga mga butang akon ihahatag ha imo, kon ikaw lumuhod ngan yumukbo ngan magsingba ha akon.” Tungod kay bug-os nga maaram hi Jesus nga kontrolado gud han Yawa an “ngatanan nga ginhadian han kalibotan,” iya ipinakita kon hin-o an iya dinadapigan may kalabotan ha isyu han pagkasoberano, ngan hiya binaton: “Iwas ka dinhi, Satanas, kay nahisurat na: Magsingba ka ha imo Ginoo nga Dios, ngan ha iya la ikaw mag-aalagad.”—Mateo 4:8-10.

5. Ano an makuri nga toka nga gintuman ni Jesus?

⁵ Matin-aw nga nakita ha pagkinabuhi ni Jesus nga an pagsuporta ha pagkasoberano ni Jehova amo an iya pinakaimportante nga katuyoan. Maaram gud hiya nga kinahanglan magpabilin hiya nga matinumanon tubtob ha kamatayon ha kamot ni Satanas—an igintagna nga pagsamad ha tikod han “binhi” han babaye—basi mapamatud-an nga an Dios an may katungod ha pagmando. (Mateo 16:21; 17:12) Kinahanglan liwat niya ipahayag an kamatuoran nga an Ginhadian han Dios amo an ahensya nga ginhatagan ni Jehova hin gahum ha pagpoo ha rebelde nga hi Satanas ngan pagpahiuli han kamurayawan ngan pagkaurosa ha ngatanan nga linarang. (Mateo 6:9, 10) Ano an ginbuhat ni Jesus ha pagtuman hinin makuri nga toka?

“An Ginhadian han Dios Tikahirani Na”

6. Paonan-o ginpamatud-an ni Jesus nga an Ginhadian amo an ahensya nga gagamiton han Dios ha ‘pagbungkag han mga buhat han Yawa’?

⁶ Ha pagtikang, “inabot hi Jesus ha Galilea [ha] pagwali han maopay nga sumat han Dios. Ngan nasiring: An panahon natuman na, ngan an ginhadian han Dios tikahirani na.” (Markos 1:14, 15) Ha pagkamatuod, hiya nagsiring: “Kinahanglan gud, nga akon igwali an maopay nga sumat han ginhadian han Dios ha iba man nga mga bungto, kay tungod hini ako ginsugo.” (Lukas 4:18-21, 43) Nagbiyahe hi Jesus ha magkalain-lain nga bahin han tuna, “nanwawali, ngan nanunumat han mag-opay nga mga sumat han ginhadian han Dios.” (Lukas 8:1) Nagbuhat liwat hiya hin damu nga milagro—nagpakaon han damu hinduro nga tawo, nagpakalma han maraot nga panahon, nagtambal han magsakit, ngan nagbanhaw han mga patay. Pinaagi hini, iya ginpamatud-an nga wawad-on han Dios an ngatanan nga kadaot ngan pag-antos nga nagin epekto han pagrebelde ha Eden ngan hito nga paagi ‘bubungkagon an mga buhat han Yawa.’—1 Juan 3:8.

7. Ano an iginsugo ni Jesus ha iya mga sumurunod, ngan ano an nagin resulta hito?

⁷ Basi bug-os nga maipasamwak an maopay nga sumat han Ginhadian, gintirok ni Jesus an grupo han magtinumanon nga sumurunod ngan ginbansay hira para hito nga buruhaton. Siyahan, ginpili niya an 12 nga apostol ngan “ginsugo hira panumat han ginhadian han Dios.” (Lukas 9:1, 2) Katapos, ginsugo niya an 70 nga iba pa basi ipasamwak an mensahe: “An ginhadian han Dios nagtitikahirani na ha iyo.” (Lukas 10:1, 8, 9) Han binalik hira ngan iginsumat kan Jesus an kalamposan han ira pagsangyaw han Ginhadian, hiya binaton: “Akon hinkit-an hi Satanas nga nahulog, sugad hin kikidlat tikang ha langit.”—Lukas 10:17, 18.

8. Ano an matin-aw nga nakita ha pagkinabuhi ni Jesus?

⁸ Hi Jesus nangalimbasog gud ngan ginsalingabot an ngatanan nga higayon ha pagsangyaw han Ginhadian. Ha adlaw ngan gab-i padayon nga nagbuhat hiya, tinalikdan pa ngani an mahimyang nga pagkinabuhi. “An mga garong may-ada mga buho ngan an mga katamsihan ha langit may-ada mga hapunan; kondi an Anak han tawo waray inuulnan han iya ulo,” nagsiring hiya. (Lukas 9:58; Markos 6:31; Juan 4:31-34) Han hirani na hiya mamatay, maisugon nga nagsangyaw hiya kan Ponsio Pilato: “Tungod hini ako kinanhi ha kalibotan, basi ako magtestigo han kamatuoran.” (Juan 18:37) Nakita ha bug-os nga pagkinabuhi ni Jesus nga kinanhi hiya, diri basi magin bantogan la nga magturutdo o magburuhat  hin milagro o nagsasakripisyo pa ngani nga Manluluwas, kondi basi suportahan an pagkasoberano ni Jehova ngan pamatud-an an Iya abilidad ha pagtuman han Iya kaburut-on pinaagi han Ginhadian.—Juan 14:6.

“Natuman Na”!

9. Paonan-o naglampos hi Satanas ha pagsamad ha tikod han “binhi” han babaye han Dios?

⁹ An ngatanan nga ginbuhat ni Jesus para ha Ginhadian waray makalipay ha Kaaway, hi Satanas nga Yawa. Pinaagi han kan Satanas tunan-on nga bahin han “binhi”—politika ngan relihiyon—pauroutro nga nangalimbasog hiya nga patayon an “binhi” han babaye han Dios. Tikang han katawo ni Jesus tubtob han iya kamatay, hiya an puntirya ni Satanas ngan han mga nasuporta ha iya. Ha kataposan, han katsaringsing han 33 K.P., inabot an panahon ha pagtubyan han Anak han tawo ha mga kamot han Kaaway nga magsasamad han iya tiil. (Mateo 20:18, 19; Lukas 18:31-33) An mga asoy han Ebanghelyo matin-aw nga nagpapakita kon paonan-o an mga tawo—sugad kan Judas Iskariote ngan han mga punoan nga saserdote, eskriba, Pariseo, ngan mga Romano—ginpagios ni Satanas ha pagkondenar kan Jesus ngan ha pagpaantos ha iya hin makuri nga kamatayon ha pasakitan nga kahoy.—Buhat 2:22, 23.

10. Ano an siyahan nga natuman pinaagi han kamatayon ni Jesus ha pasakitan nga kahoy?

¹⁰ Ano an imo nahuhunahuna kon nahinunumdoman mo hi Jesus ha pasakitan nga kahoy nga nag-aantos han hinay-hinay ngan masakit nga kamatayon? Bangin nahuhunahuna mo an halad lukat nga bug-os kasingkasing nga iya iginhatag para ha makasasala nga katawohan. (Mateo 20:28; Juan 15:13) Mahimo nga mahipausa ka ha daku nga gugma nga ipinakita ni Jehova ha pagtagana hito nga halad. (Juan 3:16) Posible nga abaton mo an inabat han Romano nga sundalo nga napagios ha pagsiring: “Matuod gud, ini amo an Anak han Dios.” (Mateo 27:54) Ini ngatanan husto gud nga reaksyon. Ha luyo nga bahin, hinumdumi an ultimo nga ginsiring ni Jesus ha pasakitan nga kahoy: “Natuman na”! (Juan 19:30) Ano an natuman? Bisan kon damu an natuman ni Jesus pinaagi han iya kinabuhi ngan kamatayon, diri ba an siyahan nga katuyoan han pagkanhi niya ha tuna amo an pagsulbad han isyu han pagkasoberano ni Jehova? Ngan diri ba igintagna nga sugad nga “binhi,” mag-aantos hiya hin duro nga pagsari ha mga kamot ni Satanas basi mawara an ngatanan nga pasipara ha ngaran ni Jehova? (Isaias 53:3-7) Mabug-at ini nga mga responsabilidad, kondi bug-os nga gintuman ini ni Jesus. Daku gud ito nga kalamposan!

11. Ano an bubuhaton ni Jesus basi bug-os nga matuman an igintagna ha Eden?

¹¹ Tungod kay matinumanon ngan maunungon hi Jesus, ginbanhaw hiya, diri sugad nga tawo, kondi sugad nga ‘espiritu nga naghahatag hin kinabuhi.’ (1 Korinto 15:45; 1 Pedro 3:18) Nagsaad hi Jehova ha iya ginhimaya nga Anak: “Lingkod ikaw dida ha akon too nga kamot, tubtob nga an imo mga kaaway magin paturumban han imo tiil.” (Salmo 110:1) Ito nga “mga kaaway” ginkukompwesto han nangunguna nga kriminal, hi Satanas, ngan han ngatanan nga iya “binhi.” Sugad nga Hadi han Mesianiko nga Ginhadian ni Jehova, hi Jesu-Kristo an mangunguna ha pagpoo han ngatanan nga rebelde ha langit ngan ha tuna. (Pahayag 12:7-9; 19:11-16; 20:1-3, 10) Katapos, bug-os nga matutuman na an tagna ha Genesis 3:15 ngan an pag-ampo nga igintutdo ni Jesus ha iya mga sumurunod: “Kumanhi an imo ginhadian. Matuman an imo pagburut-an, sugad ha langit, amo man ha tuna.”—Mateo 6:10; Filipos 2:8-11.

 Susbaranan nga Angay Sundon

12, 13. (a) Ano nga resulta an nakikita yana tungod ha pagsangyaw han maopay nga sumat han Ginhadian? (b) Ano an kinahanglan naton buhaton kon karuyag naton sundon an mga pitad ni Jesus?

¹² Yana, an maopay nga sumat han Ginhadian iginsasangyaw ha damu nga katunaan sugad han igintagna ni Jesus. (Mateo 24:14) Sugad nga resulta, minilyon an nagdidedikar han ira kinabuhi ngadto ha Dios. Malipayon nga ginpapamulat nira an mga bendisyon nga ihahatag han Ginhadian. Naglalaom hira nga mabuhi ha waray kataposan ha kamurayawan ngan kasigurohan ha paraiso nga tuna ngan malipayon nga iginsusumat nira ha iba an ira paglaom. (Salmo 37:11; 2 Pedro 3:13) Usa ka ba han mga parasamwak han Ginhadian? Kon amo, angay ka kumendasyonan. Kondi, may-ada pa usa nga butang nga sadang tagdon han tagsa ha aton.

¹³ Hi apostol Pedro nagsurat: “Hi Kristo nag-antos man tungod ha iyo, nga gintagan kamo hin susbaranan, basi kamo magsunod ha iya mga pagpitad.” (1 Pedro 2:21) Tigamni nga hini nga higayon gin-unabi ni Pedro, diri an kadasig ha pagsangyaw o kaabtik ha pagtutdo ni Jesus, kondi an iya pag-antos. Sugad nga nakakita han nahitabo, maaram gud hiya kon mationan-o kadisidido mag-antos hi Jesus basi magpasakop ha pagkasoberano ni Jehova ngan magpamatuod nga buwaon hi Satanas. Kon sugad, ha ano nga mga paagi masusunod naton an mga pitad ni Jesus? Kinahanglan pakianhan naton an aton kalugaringon: ‘Tubtob diin ako kadisidido mag-antos basi suportahan ngan pasidunggan an pagkasoberano ni Jehova? An akon ba pagkinabuhi ngan pagtuman han ministeryo nagpapakita nga an pagsuporta han pagkasoberano ni Jehova an pinakaimportante ha akon?’—Kolosas 3:17.

14, 15. (a) Ano an reaksyon ni Jesus ha sayop nga mga suhestyon ngan tanyag, ngan kay ano? (b) Ano nga isyu an kinahanglan hunahunaon naton pirme? (Iupod an iginsaysay ha kahon nga “Dapig kan Jehova.”)

¹⁴ Kada adlaw, naatubang kita hin mga kakurian ngan naghihimo hin mga desisyon, daku man ito o gutiay. Paonan-o naton hibabaroan kon ano an sadang buhaton? Pananglitan, kon ginsusulay kita nga magbuhat hin makakadaot han aton pagin Kristiano, ano an aton reaksyon? Han nagsiring hi Pedro kan Jesus nga malooy hiya ha iya kalugaringon, ano an reaksyon ni Jesus? “Iwas ha  akon atubangan Satanas . . . Waray ka makapaghunahuna han mga bagay han Dios, kondi han mga bagay han tawo,” nagsiring hiya. (Mateo 16:21-23) O kon gintatanyagan kita hin dugang nga kitá o hin promosyon ha trabaho nga makakaapekto ha aton pagin Kristiano, magios ba kita sugad han ginbuhat ni Jesus? Han inabat ni Jesus nga adton nakakita han iya mga milagro ‘nanaraon ha iya’ basi piriton ‘hiya nga magin hadi,’ pinalagiw dayon hiya ha ira.—Juan 6:15.

¹⁵ Kay ano nga sugad karig-on an ginbuhat ni Jesus hito nga mga higayon ngan ha iba pa? Tungod kay nasantop gud niya nga may-ada pa mas importante kay han iya personal nga katalwasan o kaopayan. Karuyag niya buhaton an kaburut-on han iya Amay ngan suportahan an Iya pagkasoberano anoman an mahitabo. (Mateo 26:50-54) Salit, kon diri matin-aw pirme ha aton hunahuna an isyu han pagkasoberano ni Jehova, aada pirme an peligro nga magkompromiso o mapakyas kita ha pagbuhat han husto. Kay ano? Tungod kay masayon la kita madaog han mga pagsulay ni Satanas, nga eksperto ha paghimo han sayop nga magin makaruruyag pagkit-on, sugad han iya ginbuhat ha pagsulay kan Eva.—2 Korinto 11:14; 1 Timoteo 2:14.

16. Ano an sadang magin siyahan nga tumong naton ha pagbulig ha iba?

¹⁶ Ha ministeryo, nangangalimbasog kita ha pakiistorya ha mga tawo mahitungod han ira mga problema ngan ha pagpakita ha ira han mga solusyon hito tikang ha Biblia. Epektibo ini nga paagi basi maaghat hira nga mag-aram ha Biblia. Kondi, an aton siyahan nga tumong diri la an pagbulig ha mga tawo nga mahibaro han katutdoan hito o han mga bendisyon nga ihahatag han Ginhadian han Dios. Kinahanglan buligan naton hira nga masabtan gud an isyu han pagkasoberano ni Jehova. Disidido ba hira magin tinuod nga Kristiano ngan magpas-an han ira “pasakitan nga kahoy” ngan mag-antos para ha Ginhadian? (Markos 8:34, NW) Andam ba hira makig-upod ha mga nasuporta ha pagkasoberano ni Jehova ngan hito nga paagi pamatud-an nga buwaon ngan parapakaraot hi Satanas? (Proberbios 27:11) Pribilehiyo naton nga suportahan an pagkasoberano ni Jehova ngan buligan an iba nga buhaton ito.—1 Timoteo 4:16.

Kon an Dios Magin “an Ngatanan ha Ngatanan”

17, 18. Ano nga makalilipay nga panahon an aton mahimo pamulaton kon susuportahan naton an pagkasoberano ni Jehova?

¹⁷ Samtang nangangalimbasog gud kita yana basi ipakita ha aton paggawi ngan ha ministeryo nga sinusuportahan naton an pagkasoberano ni Jehova, makakalaom kita ha pag-abot han panahon nga kan Jesu-Kristo na ‘itubyan an ginhadian ngadto ha iya Dios ngan Amay.’ San-o ito mahitatabo? Hi apostol Pablo nagsaysay: “Kon iya na pagwad-on an ngatanan nga pagdumara ngan an ngatanan nga kagamhanan, ngan gahum. Kay kinahanglan nga maghadi hiya, ngada han hibutang Niya han ngatanan nga iya mga kaaway ha ilarom han iya mga tiil. . . . Niyan an Anak ngahaw masasakop man ha nagsakop ha ngatanan nga mga bagay ha iya, basi nga an Dios magin an ngatanan ha ngatanan.”—1 Korinto 15:24, 25, 28.

¹⁸ Kon an Dios magin “an ngatanan ha ngatanan”—makalilipay gud ito nga panahon! Matutuman na han Ginhadian an katuyoan hito. Mawawara na an ngatanan nga nakontra ha pagkasoberano ni Jehova. Maipapahiuli na an kamurayawan ngan pagkaurosa ha bug-os nga uniberso. Uyon ha ginsiring han salmista, an ngatanan nga linarang magkakanta: “Ihatag ngadto kan Jehova an himaya nga angay ha iya ngaran . . . Igsumat ha mga nasud: Hi Jehova naghahadi.”—Salmo 96:8, 10.

Ano an Imo Baton?

• Paonan-o ipinakita ni Jesus nga pinakaimportante ha iya an isyu han pagkasoberano han Dios?

• Ano an siyahan nga natuman ni Jesus pinaagi han iya ministeryo ngan kamatayon?

• Ha ano nga mga paagi masusunod naton an susbaranan ni Jesus ha pagpakita nga sinusuportahan naton an pagkasoberano ni Jehova?

[Mga Pakiana]

[Kahon/Mga Retrato ha pahina 29]

DAPIG KAN JEHOVA

Sugad han naieksperyensyahan han kabugtoan ha Korea ngan ha iba pa nga lugar, kon naatubang an mga Kristiano hin duro nga kakurian, makakabulig gud nga magin matin-aw ha hunahuna an hinungdan kon kay ano nga nahitatabo ito ha ira.

“An nakabulig ha amon nga magpailob amo an matin-aw nga pagsabot ha isyu nga iginbangon ha hardin ha Eden—an isyu han katungod han Dios ha pagmando. . . . Maaram kami nga may-ada kami pribilehiyo ha pagdapig ha pagmando ni Jehova. . . . Nagparig-on ngan nakabulig ini ha amon nga magpabilin nga maunungon,” siring han usa nga Saksi ni Jehova nga napriso durante han pagmando han Sobyet hadto.

Usa pa nga Saksi an nagsaysay kon ano an nakabulig ha iya ngan ha iba pa nga Saksi ha usa nga kampo nga prisohan. “Ginbuligan kami ni Jehova,” siring niya. “Bisan pa han makuri nga kahimtang, aktibo kami ha espirituwal. Pirme kami nagdidinasigay pinaagi ha pagpahinumdom ha usa kag usa nga nadapig kami kan Jehova may kalabotan ha isyu han pagkasoberano ha uniberso.”

[Retrato ha pahina 26]

Paonan-o sinuportahan ni Jesus an pagkasoberano ni Jehova han ginsulay hiya ni Satanas?

[Retrato ha pahina 28]

Ano an natuman pinaagi han kamatayon ni Jesus?