“An Imo Birilhon Hinduro nga Regalo”

ITO an ginsiring han primero ministro hadto han Belgium mahitungod han libro nga The Greatest Man Who Ever Lived. a Usa nga sangkay an binisita ha iya ngan ginregalohan hiya hito nga libro. Waray pag-iha, nagsurat hiya ha pagpasalamat: “Nalipay gud ako han imo pagbisita, ngan mas nakalipay gud ha akon an imo birilhon hinduro nga regalo: an libro mahitungod han ‘Pinakabantogan nga Tawo.’”

Ginbasa ito hin maopay han primero ministro hadto ngan nagsiring: “Kon an mga tawo magigin mas interesado ha mensahe han Ebanghelyo ngan magbubuhat uyon ha mga prinsipyo ni Jesu-Kristo, mas maopay gud unta an kahimtang han kalibotan yana. Katapos, diri na unta kita magkikinahanglan hin Security Council; waray na unta liwat mga pag-atake han mga terorista ngan kamadarahog ha kalibotan.” Bisan kon para ha iya baga hin diri ito matutuman, ginpapabilhan niya an maopay nga ginbuhat han iya sangkay.

An surat nagpadayon: “Kaupod ka han darayawon gud nga grupo han mga tawo nga may maopay nga kaburut-on nga diri pirme positibo o negatibo, kondi natoo nga mag-uuswag pa an kahimtang han mga tawo ngan han mga butang.”

An mga Saksi ni Jehova natoo nga ha kataposan, an Dios, diri an mga tawo, an maghahatag hin mas maopay nga kahimtang ha kalibotan. Nangangalimbasog hira ha pagsubad ha pinakabantogan nga tawo, hi Jesu-Kristo. May-ada ba binisita pa la ha imo nga mga Saksi ni Jehova? Posible nga malilipay ka ha pakiistorya ha ira mahitungod han pinakabantogan nga tawo nga nabuhi. Ngan malilipay hira paghatag ha imo han libro nga naruyagan gud han primero ministro hadto.

[Footnote]