Andam Ka na ba ha Adlaw ni Jehova?
Andam Ka na ba ha Adlaw ni Jehova?
“An daku nga adlaw ni Jehova hirani na, hirani na ngan nagdadagmit gud.”—SEPANIA 1:14.
1-3. (a) Ano an ginsisiring han Biblia mahitungod han adlaw ni Jehova? (b) Ano nga “adlaw ni Jehova” an ginpapamulat naton?
AN DAKU nga adlaw ni Jehova diri 24 oras la. Hilawig ito nga panahon nga durante hito iya ipapadapat an iya paghukom ha magraot. Adton diri nag-aalagad ha Dios nahahadlok hito nga adlaw han kasisidman, kapungot, mabangis nga kasina, kaguol ngan kabungkagan. (Isaias 13:9; Amos 5:18-20; Sepania 1:15) “Hiyay tungod han adlaw,” siring han tagna ni Joel, “kay an adlaw ni Jehova hirani na, ngan sugad hin kagunawan tikang ha Makagarahum ini maabot”! (Joel 1:15) Kondi, hiton daku nga adlaw, luluwason han Dios adton ‘matadong an kasingkasing.’—Salmo 7:10.
2 An mga pulong nga “adlaw ni Jehova” naaplikar ha pagpadapat han paghukom han Dios ha iba-iba nga panahon. Pananglitan, an “adlaw ni Jehova” inabot ha mga umurukoy han Jerusalem han ginbungkag ito han Babilonya han 607 A.K.P. (Sepania 1:4-7) An pariho nga paghukom han Dios nahitabo han 70 K.P. han gin-gamit niya an mga Romano ha pagpadapat han iya paghukom ha Judio nga nasud nga nagsalikway han iya Anak. (Daniel 9:24-27; Juan 19:15) An Biblia nagtatagna liwat han “adlaw ni Jehova” kon hiya ‘makikiaway patok ha ngatanan nga nasud.’ (Sakarias 14:1-3) Pinaagi han giya han Dios, iginpariho ni apostol Pablo ito nga adlaw ha presensya ni Kristo nga nagtikang han kahitrono ni Jesus sugad nga langitnon nga Hadi han 1914. (2 Tesalonika 2:1, 2) Tungod kay an mga tigaman nagpapakita nga hirani na gud an adlaw ni Jehova, angayan gud an tinuig nga teksto han mga Saksi ni Jehova para han 2007. Ginkotar ito ha Sepania 1:14: “An daku nga adlaw ni Jehova hirani na.”
3 Tungod kay hirani na an daku nga adlaw ni Jehova, yana na an panahon nga magin andam ka. Paonan-o ka makakag-andam para hito nga adlaw? Ano pa an kinahanglan mo buhaton basi magin andam para hito?
Mag-andam Kamo
4. Nag-andam hi Jesus para ha ano nga makuri nga pagsari?
4 Ha tagna ni Jesu-Kristo mahitungod han ikatarapos han sistema, nagsiring hiya ha iya mga disipulo: “Mag-andam man kamo.” (Mateo 24:44) Han ginsiring ito ni Jesus, hiya mismo andam ha makuri nga pagsari—an iya kamatayon sugad nga halad lukat. (Mateo 20:28) Ano an mahibabaroan naton ha paagi han iya pag-andam?
5, 6. (a) Paonan-o an gugma ha Dios ngan ha mga tawo nabulig ha aton nga magin andam ha adlaw ni Jehova? (b) Mahitungod ha gugma ha igkasi-tawo, ano nga susbaranan an ipinakita ni Jesus?
5 Bug-os-kasingkasing nga hinigugma ni Jesus hi Jehova ngan an Iya magtadong nga prinsipyo. Mahitungod kan Jesus, an Hebreo 1:9 nasiring: “Ginhigugma mo an katadongan, ngan gindumtan mo an karaotan; busa an Dios, nga imo Dios, naghirog ha imo han lana han kalipayan labaw pa gud kay ha imo mga kaupod.” Tungod kay hinigugma ni Jesus an iya langitnon nga Amay, nagpabilin hiya nga maunungon ha Iya. Kon sugad liwat hito an aton gugma ha Dios ngan ginbubuhat an Iya mga kinahanglanon, pananalipdan kita Niya. (Salmo 31:23) An sugad nga gugma ngan pagkamasinugtanon mabulig ha aton nga magin andam ha daku nga adlaw ni Jehova.
6 An gugma ha tawo amo an nangunguna nga kalidad ni Jesus. Oo, “hiya nalooy ha ira; kay nanluluya ngan nagpapatlaag, sugad hin mga karnero nga waray magbarantay.” (Mateo 9:36) Tungod hito, iginsangyaw ni Jesus an maopay nga sumat, sugad la nga an gugma nagpapagios ha aton nga ipasamwak an mensahe han Ginhadian ha aton igkasi-tawo. An gugma ha Dios ngan ha aton igkasi-tawo nagpapagios ha aton nga magpabilin nga aktibo nga mga Kristiano ngan hito nga paagi nabubuligan kita nga magin andam ha daku nga adlaw ni Jehova.—Mateo 22:37-39.
7. Samtang naghuhulat kita ha adlaw ni Jehova, kay ano nga mahimo kita magin malipayon?
7 Nalipay gud hi Jesus ha pagbuhat han kaburut-on ni Jehova. (Salmo 40:8) Kon pariho hito an aton disposisyon, malilipay kita ha pagbuhat han sagrado nga pag-alagad ha Dios. Pariho kan Jesus, magigin mahinatagon kita, ngan makakalipay gud ini ha aton. (Buhat 20:35) Oo, “an kalipay ni Jehova amo an [aton] kusog.” Tungod hito, magigin mas andam kita ha daku nga adlaw han Dios.—Nehemia 8:10.
8. Kay ano nga sadang makiistorya kita hin mas agsob kan Jehova ha pag-ampo?
8 An sinsero nga pag-ampo ha Dios nakabulig kan Jesus nga magin andam ha mga pagsari han pagtoo. Nag-ampo hiya han ginbawtismohan hiya ni Juan. Nag-ampo hiya ha bug-os nga gab-i antes niya pilion an iya mga apostol. (Lukas 6:12-16) Ngan may-ada ba makakabasa han Biblia nga diri madadasig ha iya kinasingkasing nga pag-ampo ha iya ultimo nga gab-i dinhi ha tuna? (Markos 14:32-42; Juan 17:1-26) Agsob ka ba mag-ampo sugad kan Jesus? Pakiistorya hin agsob kan Jehova, ayaw pagdagmit kon nag-aampo, pangaro han giya han baraan nga espiritu, ngan karawata dayon kon naabot ito. Importante an marig-on nga relasyon ha aton langitnon nga Amay hinin peligroso nga panahon diin madagmit nga nagtitiarabot an daku nga adlaw han Dios. Salit, ayaw gud pag-alang ha pakiistorya pirme kan Jehova ha pag-ampo.—Jakobo 4:8.
9. Kay ano nga importante an paghingyap ha pagbaraan han ngaran ni Jehova?
9 An hingyap ni Jesus ha pagbaraan han ngaran ni Jehova nakabulig liwat ha iya nga magin andam ha mga pagsari. Ha pagkamatuod, iya gintutdoan an iya mga sumurunod nga an ira mga pag-ampo ha Dios sadang mag-upod han hangyo: ‘Pagdayawon an imo ngaran.’ (Mateo 6:9) Kon hingyap gud naton nga pagbaraanon an ngaran ni Jehova, mangangalimbasog kita nga diri magbuhat hin bisan ano nga magpapasipara hito. Sugad nga resulta, mas magigin andam kita ha daku nga adlaw ni Jehova.
Sadang Ka ba Maghimo hin mga Pagbag-o?
10. Kay ano nga kinahanglan naton usisahon an aton kinabuhi?
10 Kon umabot buwas an adlaw ni Jehova, andam ka na gud ba para hito? Sadang usisahon hin maopay han kada tagsa an iya kinabuhi kon may-ada ba mga buhat o batasan nga sadang bag-ohon. Tungod han kahalipot ngan kawaray kasigurohan han kinabuhi han tawo yana, an tagsa ha aton kinahanglan magin aktibo ha espirituwal kada adlaw. (Eklesiastes 9:11, 12; Jakobo 4:13-15) Salit aton paghisgotan an pipira nga bahin nga kinahanglan hatagan naton hin atensyon.
11. Ano an imo tumong ha imo pagbasa han Biblia?
11 An usa nga importante nga bahin amo an sagdon han ‘matinumanon nga uripon’ nga basahon an Biblia adlaw-adlaw. (Mateo 24:45, NW) Mahimo mo magin tumong an pagbasa ngan pagpamalandong han Kasuratan tikang ha Genesis tubtob ha Pahayag hin usa ka beses kada tuig. Kon magbasa ka hin mga upat nga kapitulo kada adlaw, mababasa mo an 1,189 nga kapitulo han Biblia ha sulod hin usa ka tuig. An tagsa nga hadi ha Israel kinahanglan magbasa han Balaud ni Jehova “ha ngatanan nga adlaw han iya kinabuhi.” Matin-aw nga ito liwat an ginbuhat ni Josue. (Deuteronomio 17:14-20; Josue 1:7, 8) Importante gud nga basahon han mga tigurang ha kongregasyon an Pulong han Dios adlaw-adlaw tungod kay nabulig ini ha ira nga maipaangbit an “putli nga pagturon-an”!—Tito 2:1.
12. An pagkahirani han adlaw ni Jehova sadang magpagios ha imo nga buhaton an ano?
12 An pagkahirani han adlaw ni Jehova sadang magpagios ha imo nga regular nga tumambong ha mga katirok ngan bug-os nga makigbahin hito kon posible. (Hebreo 10:24, 25) Kon buhaton mo ito, mabulig ito ha imo nga mapauswag an imo mga abilidad sugad nga parasamwak han Ginhadian nga nangangalimbasog ha pagbiling ngan pagbulig ha mga tinunguran han kinabuhi nga waray kataposan. (Buhat 13:48) Mahimo ka liwat magin mas aktibo ha kongregasyon ha iba nga paagi, sugad han pagbulig ha mga lagas ngan pagdasig ha mga batan-on. Makalilipay gud ito!
An Imo Relasyon ha Iba
13. Ano an mahimo naton ipakiana ha aton kalugaringon mahitungod ha pagsul-ot han bag-o nga personalidad?
13 Tungod kay hirani na gud an adlaw ni Jehova, nagkikinahanglan ka ba nga dugang nga mangalimbasog ha ‘pagsul-ot han bag-o nga personalidad nga ginlarang sumala ha kaburut-on han Dios ha tinuod nga katadongan ngan pagkamaunungon’? (Efeso 4:20-24, NW) Samtang ginkukultibar mo an diosnon nga mga kalidad, posible nga maobserbahan han iba nga ‘naglalakat ka pinaagi han espiritu han Dios’ ngan nagpapakita han mga bunga hito. (Galasia 5:16, 22-25) May mauunabi ka ba nga espisipiko nga ginbuhat mo ngan han imo pamilya basi masul-ot an bag-o nga personalidad? (Kolosas 3:9, 10) Pananglitan, kilala ka ba nga buotan ha mga igkasi-tumuroo ngan ha iba? (Galasia 6:10) An regular nga pag-aram ha Kasuratan mabulig ha imo ha pagkultibar han diosnon nga mga kalidad nga mag-aandam ha imo ha adlaw ni Jehova.
14. Kay ano nga sadang mag-ampo para han baraan nga espiritu samtang nangangalimbasog ha pagkultibar han pagpugong ha kalugaringon?
14 Ano man kon madagmit ka masina ngan nasantop mo nga kinahanglan mo an dugang nga pagpugong ha kalugaringon? Ito nga kalidad bahin han bunga nga mahimo patuboon han baraan nga espiritu han Dios dida ha imo. Salit, pag-ampo para hito, uyon ha ginsiring ni Jesus: “Pangamuyo, ngan ihahatag ha iyo; pamilnga, ngan iyo hiaagian; pagtuktok, ngan aabrihan kamo. . . . Kon kamo nga mga magraot, mahibabaro kamo paghatag hin mag-opay nga mga hatag ha iyo mga kabataan labi pa gud an iyo Amay nga langitnon, nga mahatag han espiritu santo ha mga nangangaro ha iya”!—Lukas 11:9-13.
15. Ano an sadang mo buhaton kon ikaw ngan an imo igkasi-tumuroo may-ada diri-pagsinabtanay?
15 Ano an imo bubuhaton kon ikaw ngan an imo igkasi-tumuroo may-ada diri-pagsinabtanay? Pangalimbasugi gud nga mahibalik an iyo maopay nga relasyon, hito nga paagi napapauswag an kamurayawan ngan pagkaurosa ha kongregasyon. (Salmo 133:1-3) Sunda an sagdon ni Jesus ha Mateo 5:23, 24 o Mateo 18:15-17. Kon imo ginpapasagdan nga matunod an adlaw nga nasisina pa gihapon, magin madagmit ha pagtadong hito. Agsob nga an ginkikinahanglan la amo an pagin disidido ha pagpasaylo. Hi Pablo nagsurat: “Magmalolooyon kamo an usa kag usa, magmahumok an iyo kasingkasing, magpinasayloay kamo an usa kag usa, sugad nga ginpasaylo man kamo han Dios pinaagi kan Kristo.”—Efeso 4:25, 26, 32.
16. Ha ano nga paagi ginkikinahanglan an pagpaid ha pag-asawa?
16 Ha pag-asawa ginkikinahanglan an malumo nga pagpaid ngan usahay an pagpasaylo. Kon kinahanglan ka nga magin mas mahigugmaon ngan mapinairon ha imo asawa o bana, pangalimbasugi nga ipakita ini pinaagi han bulig han Dios ngan han iya Pulong. May-ada ka ba kinahanglan kultibaron basi masunod an 1 Korinto 7:1-5 nga tungod hito maiibanan an tensyon ngan malilikyan an pagkadiri-maunungon? Sigurado nga usa ini nga bahin han kinabuhi diin ginkikinahanglan nga magin mapinairon an mag-asawa.
17. Ano an sadang buhaton kon nakahimo hin seryoso nga sala an usa?
17 Ano man kon nakahimo ka hin seryoso nga sala? Tadonga dayon ito. Ayaw pag-alang ha pangaro hin bulig ha mga tigurang. An ira pag-ampo ngan sagdon mabulig nga mahibalik an imo espirituwal nga kahimsog. (Jakobo 5:13-16) Pag-ampo kan Jehova nga may mabinasulon nga disposisyon. An diri pagbuhat hito magriresulta ha pag-abat hin pagkasalaan ngan kakonsensya. Naeksperyensyahan ito ni David, kondi mas nag-opay gud an iya pag-abat han iginsumat niya ito kan Jehova! Hi David nagsurat: “Bulahan adto hiya nga an iya pagsupak ginpasaylo; adto nga an iya sala gintabonan. Bulahan an tawo nga waray ni Jehova isipa hin karat-an, ngan dida hiton iya espiritu waray limbong.” (Salmo 32:1-5) Ginpapasaylo ni Jehova adton nakasala kondi sinsero nga nagbabasol.—Salmo 103:8-14; Proberbios 28:13.
Magpabilin nga Diri Bahin han Kalibotan
18. Paonan-o mo sadang hunahunaon an kalibotan?
18 Sigurado nga ginpapamulat mo gud an urusahon nga bag-o nga kalibotan nga iginsaad han aton langitnon nga Amay. Paonan-o mo, kon sugad, huhunahunaon an diri-matadong nga mga tawo nga binulag ha Dios? Hi Satanas, an “prinsipe han kalibotan,” waray kontrol kan Jesu-Kristo. (Juan 12:31; 14:30) Sigurado nga diri mo karuyag nga kontrolon ka han Yawa ngan han iya kalibotan, salit sunda an ginsiring ni apostol Juan: “Ayaw niyo higugmaa an kalibotan, bisan an mga bagay ha kalibotan.” Maaramon gud ito tungod kay “an kalibotan nawawara, ngan an iya kairiphon; kondi an nagbubuhat han kaburut-on han Dios nagpapadayon ha gihapon.”—1 Juan 2:15-17.
19. Gindadasig an mga batan-on nga magkaada ano nga tumong?
19 Binubuligan mo ba an imo mga anak nga tipigan an ira kalugaringon nga “waray buring hini nga kalibotan”? (Jakobo 1:27) Sugad hin tawo nga nangangawil hin isda, karuyag ni Satanas nga kawilon an imo mga anak. Gindisenyo an magkalain-lain nga asosasyon ngan iba nga organisasyon basi umabat an mga batan-on nga bahin hira han kalibotan ni Satanas. Kondi, bahin na an mga surugoon ni Jehova han amo la nga organisasyon nga maluluwas ha kataposan hinin maraot nga sistema. Salit sadang dasigon an mga batan-on nga magkaada damu nga “buruhaton han Ginoo.” (1 Korinto 15:58) Kinahanglan buligan han diosnon nga mga kag-anak an ira mga anak nga magkaada tumong nga maghahatag ha ira hin malipayon ngan makapatagbaw nga kinabuhi nga nagpapasidungog ha Dios ngan mabulig ha ira nga magin andam ha adlaw ni Jehova.
Kitaa an Lahos Pa han Daku nga Adlaw ni Jehova
20. Kay ano nga sadang hunahunaon naton pirme an kinabuhi nga waray kataposan?
20 Mapapamulat mo an adlaw ni Jehova nga diri nababaraka kon hunahunaon mo pirme an kinabuhi nga waray kataposan. (Judas 20, 21) Ginlalaoman mo an kinabuhi nga dayon ha Paraiso, ngan tungod hito naglalaom ka nga mahibalik an kusog han pagkabatan-on ngan waray tubtoban nga panahon ha pagbuhat han mag-opay nga tumong ngan mahibaro hin damu pa mahitungod kan Jehova. Ha pagkamatuod, mahibabaro ka mahitungod ha Dios ha kadayonan tungod kay “an mga sidsid la han iya mga dalan” an hinbabaroan yana han mga tawo. (Job 26:14) Makalilipay gud ito!
21, 22. Ano nga mga butang an posible pag-uroistoryahan kaupod han mga binanhaw?
21 Ha Paraiso, isusumat han mga binanhaw an mga panhitabo ha naglabay nga waray naton hibaroi. Isasaysay ni Enok kon paonan-o hiya nagmaisugon ha pagpahayag han mensahe ni Jehova ha diri-diosnon nga mga tawo. (Judas 14, 15) Sigurado nga isusumat ni Noe kon paonan-o niya gintukod an arka. Isusumat nira Abraham ngan Sara kon ano an ira inabat han binayaan nira an maopay nga kahimtang ha Ur ngan inukoy ha mga tolda. Hunahunaa hi Ester nga detalyado nga nagsasaysay kon paonan-o niya gindepensahan an iya katawohan ngan ginpugngan an plano ni Haman ha pagpoo ha ira. (Ester 7:1-6) Handurawa hi Jonas nga nagsusumat han iya kahimtang ha tiyan han daku nga isda ha sulod hin tulo ka adlaw o hi Juan nga Parabaptis nga nagsasaysay han iya inabat han ginbawtismohan niya hi Jesus. (Lukas 3:21, 22; 7:28) Makapainteres gud hibaroan ini ngatanan!
22 Durante han Usa ka Yukot ka Tuig nga Pagmando ni Kristo, bangin makapribilehiyo ka ha pagbulig ha mga binanhaw nga magkaada kahibaro mahitungod ha Dios. (Proberbios 2:1-6) Yana, makalilipay gud makita an mga tawo nga nakarawat han kahibaro ni Jehova nga Dios ngan nagios uyon hito! Kondi hunahunaa an imo kalipay ha tidaraon kon bendisyonan na ni Jehova an imo pangalimbasog ha pagtutdo ha mga tawo nga nabuhi ha naglabay ngan mapasalamaton nga nakarawat hito!
23. Sadang magin determinado kita nga buhaton an ano?
23 An mga kapulsanan nga nakakarawat naton yana sugad nga katawohan ni Jehova lahos pa han naiihap o nababanabana han diri hingpit nga tawo. (Salmo 40:5) Mapasalamaton gud kita labi na ha espirituwal nga mga tagana han Dios. (Isaias 48:17, 18) Anoman an aton kahimtang, bug-os-kasingkasing nga buhaton naton an sagrado nga pag-alagad samtang ginhuhulat naton an daku nga adlaw ni Jehova.
Ano an Imo Baton?
• Ano “an adlaw ni Jehova”?
• Paonan-o ka magigin andam ha adlaw ni Jehova?
• Tungod kay hirani na gud an daku nga adlaw han Dios, ano nga mga pagbag-o an bangin kinahanglan naton himoon?
• Ano an imo ginlalaoman nga mahitatabo katapos han adlaw ni Jehova?
[Mga Pakiana]
[Retrato ha pahina 12]
Andam gud hi Jesus ha mga pagsari
[Retrato ha pahina 15]
Daku gud nga pribilehiyo an pagbulig ha mga binanhaw nga mahibaro kan Jehova!