Importante nga mga Punto Tikang ha Libro han Malakias
An Pulong ni Jehova Buhi
Importante nga mga Punto Tikang ha Libro han Malakias
SOBRA 70 ka tuig na nga natapos an gintukod utro nga templo ha Jerusalem. Kondi, ha paglabay han panahon, nagluya hinduro an relasyon han mga Judio ha Dios. Nagin maraot bisan an mga saserdote. Hin-o an magpapahibaro ha ira han ira tinuod nga kahimtang ngan mangangalimbasog ha pagbulig nga magin duok ha Dios? Hi propeta Malakias an gintokahan ni Jehova.
Mapwersa an estilo han pagsurat ni Malakias han kataposan nga libro han Hebreo nga Kasuratan nga may-ada mga tagna nga giniyahan han Dios. An pagpamati ha iya tagna makakabulig ha aton nga magin andam ha “daku ngan makalilisang nga adlaw ni Jehova,” kon bungkagon na an maraot nga sistema.—Malakias 4:5.
‘DAMU AN NAHIPAKDOL’ HA MGA SASERDOTE
Iginpahayag ni Jehova an iya pagbati ha Israel nga nasiring: “Akon kamo hinigugma.” Kondi gintamay han mga saserdote an Iya ngaran. Paonan-o? Pinaagi ha ‘paghalad hin tinapay nga mahugaw dida ha [iya] halaran’ ngan hin “piol ngan masakiton” nga hayop.— Malakias 1:2, 6-8.
‘Damu an nahipakdol ha balaud’ tungod han mga saserdote. An mga tawo “nagbuhat hin malingoon” ha usa kag usa. An pipira nag-asawa hin mga diri Judio. An iba nagin malingoon ha “asawa han [ira] pagkabatan-on.”—Malakias 2:8, 10, 11, 14-16.
Mga Baton ha mga Pakiana Mahitungod ha Kasuratan:
2:2—Ha ano nga paagi nga kan Jehova ‘ginpanhimaraot an mga bendisyon’ han matinalapasnon nga mga saserdote? Ginbuhat ini han Dios ha paagi nga an bendisyon nga gin-aaro hito nga mga saserdote nagin panhimaraot.
2:3—Ano an kahulogan han pagsarang han “baya” ha nawong han mga saserdote? Sumala ha Balaud, an baya han iginhahalad nga hayop gindadara ha gawas han kampo ngan ginsusunog. (Lebitiko 16:27) An pagsarang han baya ha nawong han mga saserdote nangangahulogan nga iginsalikway ni Jehova an mga halad, ngan kinangangalasan niya an mga naghahalad hito.
2:13—Kan kanay mga luha an nakatabon ha halaran ni Jehova? Mga luha ini han mga asawa nga nakadto ha santuaryo han templo ngan nanginyupo kan Jehova. Ano an hinungdan han ira duro nga kasubo? An ira Judio nga mga bana nakigdiborsyo ha ira tungod hin diri uyon ha balaud nga mga hinungdan ngan ginbayaan hira, posible nga basi mag-asawa hin mas batan-on nga kababayin-an nga tikang ha iba nga nasud.
Mga Leksyon Para ha Aton:
1:10. Diri nalilipay hi Jehova ha mga halad han hakog nga mga saserdote nga nagpapabayad bisan ha simple nga mga serbisyo sugad han pagsara han mga purtahan o pagharing hin kalayo ha halaran. Importante gud nga an aton mga buhat ha pagsingba, upod na an aton ginbubuhat ha ministeryo, maaghat han diri-hakugnon nga gugma ha Dios ngan igkasi-tawo, ngan diri tungod han kwarta!—Mateo 22:37-39; 2 Korinto 11:7.
1:14; 2:17. Diri ginkukonsinter ni Jehova an pagkasalingkapaw.
2:7-9. Sadang siguruhon han may-ada mga pribilehiyo ha pagtutdo ha kongregasyon nga an ira igintututdo uyon ha Pulong han Dios, an Baraan nga Kasuratan, ngan ha basado-ha-Biblia nga mga publikasyon han ‘matinumanon nga tinaporan.’—Lukas 12:42; Jakobo 3:11.
2:10, 11. Ginlalaoman ni Jehova an iya mga magsiringba nga sundon hin seryoso an sagdon nga mag-asawa ha “Ginoo la.”—1 Korinto 7:39.
2:15, 16. Kinahanglan tahuron han tinuod nga magsiringba an kauyonan ha pag-asawa pinaagi ha pagin maunungon ha asawa han ira pagkabatan-on.
‘AN GINOO MAABOT HA IYA TEMPLO’
“An Ginoo [Jehova nga Dios] . . . maabot hin hinanali ngada ha iya templo” upod “an sinugo han kauyonan [hi Jesu-Kristo].” An Dios “mahirani [ha iya katawohan] ha paghukom” ngan magigin madagmit nga testigo kontra ha ngatanan nga magburuhat hin sayop. Dugang pa, isusurat an “usa nga basahon ha panumdoman” para ha mga nahahadlok kan Jehova.—Malakias 3:1, 3, 5, 16.
An adlaw nga “naglalaga sugad hin hudno” maabot ngan maglalamoy ha ngatanan nga magraot. Antes umabot ito nga adlaw, ipapadara an propeta basi birikon “an kasingkasing han mga amay ngada ha mga anak, ngan an kasingkasing han mga anak ngadto ha ira mga amay.”—Malakias 4:1, 5, 6.
Mga Baton ha mga Pakiana Mahitungod ha Kasuratan:
3:1-3—Kakan-o kinadto ha templo an matuod nga “Ginoo” ngan “an sinugo han kauyonan,” ngan hin-o an abanse nga iginpadara antes ha ira? Kinadto hi Jehova ha iya templo pinaagi hin representante ngan ginlimpyohan ito han Nisan 10, 33 K.P. Ito an okasyon han sinulod hi Jesus ha templo ngan ginpaiwas an mga namamalit ngan namamaligya. (Markos 11:15) Tulo ngan tunga ka tuig ini katapos hiya dihogan sugad nga Pinili-nga-Hadi. Ha pariho nga paagi, baga hin tulo ngan tunga ka tuig katapos han iya kahitrono sugad nga Hadi ha langit, gin-updan niya hi Jehova ha espirituwal nga templo ngan nakita niya nga kinahanglan limpyohan an katawohan han Dios. Ha siyahan nga siglo, iginpadara hi Juan nga Parabaptis basi andamon an mga Judio ha pag-abot ni Jesu-Kristo. Ha moderno nga panahon, abanse nga iginpadara an usa nga mensahero basi andamon an agian ha pag-abot ni Jehova ha iya espirituwal nga templo. Tikang pa han dekada han 1880, usa nga grupo han mga estudyante ha Biblia an nagtikang makigbahin ha pagtutdo han Biblia nga buruhaton basi ipahiuli an damu nga basihan nga kamatuoran ha kasingkasing han sinsero nga mga indibiduwal.
3:10—An pagdara ba han ‘bug-os nga ikanapulo’ nagrirepresentar ha paghatag kan Jehova han ngatanan nga aton gintatag-iya? Ginwara na an Mosaiko nga Balaud pinaagi han kamatayon ni Jesus, salit an kwarta nga ikanapulo diri na gin-oobligar. Kondi, may-ada ito simboliko nga kahulogan. (Efeso 2:15) Diri ito nagrirepresentar ha paghatag han aton ngatanan nga panag-iya. An ikanapulo gindadara kada tuig, kondi gindadara naton an aton ngatanan nga panag-iya kan Jehova hin usa la ka beses—kon igindidedikar naton an aton kalugaringon ha iya ngan ginsisimbolohan ini pinaagi han bawtismo ha tubig. Tikang hito nga panahon, an ngatanan nga gintatag-iya naton, gintatag-iya na ni Jehova. Bisan pa hito, gintutugotan kita niya nga magpili hin bahin han aton gintatag-iya—an simboliko nga ikanapulo—basi gamiton ha pag-alagad ha iya. Ito an igintutugot han aton kahimtang ngan igin-aaghat han aton kasingkasing. An iginhahalad naton kan Jehova nag-uupod han panahon, kusog, ngan panag-iya nga ginagamit ha pagsangyaw han Ginhadian ngan paghimo hin mga disipulo. Nag-uupod liwat ito han pagtambong ha mga katirok, pagbisita ha mga may sakit ngan edaran na nga igkasi-tumuroo, ngan pagsuporta ha pinansyal ha tinuod nga pagsingba.
4:3—Ha ano nga paagi nga pagtatamak-tamakan han magsiringba ni Jehova “an mga magraot”? Diri literal nga pagtatamak-tamakan han katawohan han Dios ha tuna “an mga magraot,” nga amo an pakigbahin ha pagpadapat han Iya paghukom ha ira. Lugod, nagpapasabot ini nga simboliko nga bubuhaton ito han mga surugoon ni Jehova ha tuna pinaagi ha bug-os kasingkasing nga pakigbahin ha selebrasyon han kadaogan katapos han kabungkag han kalibotan ni Satanas.—Salmo 145:20; Pahayag 20:1-3.
4:4—Kay ano nga kinahanglan naton ‘hinumdoman an balaud ni Moises’? Diri obligado an mga Kristiano nga sundon ito nga Balaud, kondi ito an “landong han mga mag-opay nga mga bagay nga tiarabot.” (Hebreo 10:1) Tungod hito, an aton pagtagad ha Mosaiko nga Balaud mabulig ha aton nga makita kon paonan-o natutuman an mga iginsurat dida hito. (Lukas 24:44, 45) Dugang pa, nag-uupod ito han “dagway han mga langitnon nga mga bagay.” Importante an pag-aram hito kon karuyag naton masabtan an Kristiano nga mga katutdoan ngan paggawi.—Hebreo 9:23.
4:5, 6—Hin-o an ginrirepresentaran ni “Elias an manaragna”? Igintagna nga hi “Elias” magbubuhat hin pagpahiuli, nga amo an pag-andam han kasingkasing han mga tawo. Han siyahan nga siglo K.P., kinilala ni Jesu-Kristo hi Juan nga Parabaptis sugad nga hi “Elias.” (Mateo 11:12-14; Markos 9:11-13) An iya katugbang yana iginpapadara antes umabot “an daku ngan makalilisang nga adlaw ni Jehova.” Ha aton panahon, hi Elias nagrirepresentar han “matinumanon ngan maaramon nga uripon.” (Mateo 24:45, NW) Ini nga dinihogan nga mga Kristiano maduruto nga nabulig ha mga tawo nga ipahiuli an ira relasyon ha Dios.
Mga Leksyon Para ha Aton:
3:10. An kapakyas ha paghatag kan Jehova han aton gimaopayi nangangahulogan hin diri pakakarawat hin bendisyon tikang ha iya.
3:14, 15. Tungod han diri maopay nga ehemplo han mga saserdote, gintagad han mga Judio nga diri importante an pag-alagad ha Dios. Sadang magin susbaranan an may-ada mga pribilehiyo ha Kristiano nga kongregasyon.—1 Pedro 5:1-3.
3:16. Nagtitipig hi Jehova hin rekord ha mga nahahadlok ngan matinumanon ha iya. Nahinunumdoman Niya hira ngan luluwason hira kon bungkagon na an maraot nga kalibotan ni Satanas. Salit, diri gud naton tugotan nga magluya an aton determinasyon nga tipigan an aton integridad ha Dios.—Job 27:5.
4:1. Ha adlaw han pakighusay kan Jehova, pariho an dadangatan han “sanga” ngan “gamot”—pariho nga paghukom an kakarawaton han gudtiay nga anak ngan han ira mga kag-anak. Responsabilidad gud han mga kag-anak an ira minor-de-edad nga mga anak! Kinahanglan mangalimbasog gud an Kristiano nga mga kag-anak nga magkaada pag-uyon han Dios ngan magtipig hin maopay nga relasyon ha Iya.—1 Korinto 7:14.
“Kahadluki an Dios”
Hin-o an maluluwas ha “daku ngan makalilisang nga adlaw ni Jehova”? (Malakias 4:5) “Para ha iyo nga nahadlok han akon ngaran,” nasiring hi Jehova, “masirang an adlaw han pagkamatadong nga may dara nga tambal dida ha iya mga pako; ngan kamo magawas, ngan maglulukso-lukso sugad hin nati nga baka ha toril.”—Malakias 4:2.
“An adlaw han pagkamatadong,” hi Jesu-Kristo, nasanag ha matinalahuron nga nahahadlok ha ngaran han Dios, ngan nakakarawat nira an pag-uyon ni Jehova. (Juan 8:12) Para ha ira, may-ada liwat ‘pagtambal ha mga pako’ hito—pagtambal ha espirituwal yana ngan bug-os nga pagtambal ha pisikal, mental, ngan emosyonal ha bag-o nga kalibotan han Dios. (Pahayag 22:1, 2) Malipayon hira hinduro ngan nagios sugad hin ginpatambok nga “nati nga baka.” Tungod han mga bendisyon nga aton ginpapamulat, sadang naton sundon an sagdon ni Hadi Salomon: “Kahadluki an Dios, ngan bantayi an iya mga sugo; kay amo ini an bug-os nga turumanon han tawo.”—Eklesiastes 12:13.
[Retrato ha pahina 26]
Hi propeta Malakias madasigon ngan matinumanon nga surugoon han Dios
[Retrato ha pahina 29]
An aton igintututdo sadang magin uyon ha Biblia
[Retrato ha pahina 29]
Gintatahod han mga surugoon ni Jehova an ira kauyonan ha pag-asawa