Magpakita hin Mapinairon nga Kalooy

WARAY pa gud mahitabo ha bisan kakan-o pa man nga an damu hinduro han aton igkasi-tawo manginahanglan gud hin maloloy-on ngan mapinairon nga bulig samtang naieksperyensyahan an gutom, sakit, kapobrehan, krimen, girra sibil, ngan kalamidad. Ito nga kalidad nangangahulogan hin mapinairon nga pagtagad ha pag-antos o kakurian han iba, ngan hingyap ha pag-iban hito. Pariho han matugnaw nga tubig ha mapaso nga adlaw, an mapinairon nga kalooy mahimo makaliaw han nasusubo, makapakalma han kasakit, ngan makadasig han nag-aantos.

Maipapakita naton an mapinairon nga kalooy pinaagi han aton buhat ngan pulong—pagin interesado ha kaopayan han iba ngan pagbulig kon nagkikinahanglan hira ha aton. Diri maopay kon magpapakita la kita hito ha aton kapamilya, kasangkayan, ngan kakilala la. Mahimo kita magin maloloy-on bisan ha diri naton kilala. “Kon iyo higugmaon an nahigugma ha iyo, ano nga balos an iyo kakarawaton?” nagpakiana an mapinairon ngan maloloy-on nga hi Jesu-Kristo ha iya Sermon ha Bukid. Hiya nagdugang: “Busa, an ngatanan nga mga butang, nga buot niyo ipapagbuhat han mga tawo ha iyo, buhata man niyo ha ira.”—Mateo 5:46, 47; 7:12.

Mababasa mo ini nga mga pulong—nga tinatawag nga Bulawanon nga Surundon—ha Baraan nga Kasuratan. Damu an nauyon nga an Biblia an pinakamaopay nga giya ha pagpakita hin mapinairon nga kalooy. Pauroutro nga nagpapahinumdom ito han aton obligasyon ha pagbulig hadton, ha anoman nga hinungdan, waray mahihimo kon waray an bulig han iba. Iginpipresenta han Biblia an Awtor hito ngan an aton Maglalarang, hi Jehova nga Dios, sugad nga an nangunguna nga susbaranan ha pagpakita hito.

Pananglitan aton mababasa: ‘An Dios nagbubuhat han katadongan para ha ilo ngan ha balo ngan nahigugma han humarapit, ha paghatag ha iya hin pagkaon ngan panapton.’ (Deuteronomio 10:18) Hi Jehova nga Dios ginhuhulagway sugad nga “nagbubuhat hin katadongan ha mga tinalumpigos; Hiya [an] nahatag hin karan-on ha mga ginugutom.” (Salmo 146:7) May kalabotan han kablas nga dayo, hi Jehova nagsugo: “An dumuruong nga nahapit . . . masusugad para ha iyo hin usa nga natawo ha butnga niyo, ngan higugmaon mo hiya sugad han paghigugma mo ha imo ngahaw.”—Lebitiko 19:34.

Kondi, diri pirme masayon an pagpakita hin mapinairon nga kalooy. Hi apostol Pablo nagsurat ha mga Kristiano ha Kolosas: ‘Panlubas na kamo  han daan nga tawo upod han mga buhat hito, ngan manul-ot kamo han bag-o nga tawo, nga ginbag-o ha kinaadman sugad han dagway han nagbuhat ha iya. Panul-ot kamo, sugad nga pinili han Dios, baraan ngan hinigugma, hin kasingkasing han pagpuangon.’—Kolosas 3:9, 10, 12.

Kon sugad, an pagkultibar hin mapinairon nga kalooy nagkikinahanglan hin pangalimbasog. Bahin ito han bag-o nga personalidad nga ginlalaoman ha mga Kristiano. Hi Pablo nagkinabuhi ha madarahog nga panahon han kadaan nga Roma. Gin-aghat niya an iya igkasi-tumuroo nga maghimo hin daku nga pagbag-o ha ira personalidad basi hira magin mas maloloy-on ngan mapinairon.

An Gahum han Mapinairon nga Kalooy

Ginhuhunahuna han iba nga maluya adton nagpapakita hin mapinairon nga kalooy. Husto ba ito?

Diri! An tinuod nga nakakaaghat ha usa nga magpakita hin putli nga mapinairon nga kalooy amo an hilarom nga gugma nga tikang ha Dios, an nangunguna nga susbaranan ha pagpakita hin hingpit nga gugma. “An Dios amo an gugma.” (1 Juan 4:16) Hi Jehova husto nga tinatawag nga “an Amay han ngatanan nga pagkalooy ngan Dios han ngatanan nga paglipay.” (2 Korinto 1:3) Hiya “malolooyon hadton mga maglabyaw, ngan mga magraot”!—Lukas 6:35.

Gin-oobligar liwat kita han aton Maglalarang nga magpakita hin mag-opay nga kalidad, sugad han mapinairon nga kalooy. Aton mababasa ha Mika 6:8: “Hiya nagpakita ha imo, O tawo, kon ano an maopay; ngan ano an kan Jehova ginkikinahanglan ha imo, kondi an pagbuhat ha subay, ngan paghigugma han pagpaid?” Ha Proberbios 19:22, aton mababasa: ‘An nakakahimo han tawo nga hiringyapon amo an iya pagkamapinairon.’ An Anak han Dios, hi Jesu-Kristo, nga hingpit nga nagpapakita han personalidad han iya Amay, ha pariho nga paagi nagsagdon ha iya mga sumurunod: “Pagmalolooyon kamo, sugad nga an iyo Amay nga malolooyon.” (Lukas 6:36)

May-ada kita husto nga hinungdan nga magpakita hin mapinairon nga kalooy tungod kay makakahatag ito ha aton hin hura nga balos. Agsob nga nakikita naton an pagkatinuod han Proberbios 11:17: “An tawo nga maloloy-on nagbubuhat hin maopay ha iya kalugaringon nga kalag.” Kon nagpapakita kita hito ha mga nagkikinahanglan, gintatagad ito han Dios nga Iya utang nga kaburut-on ha aton. Ginhuhunahuna niya nga hiya an may responsabilidad ha pagbalos han kalooy nga iginpakita han iya magsiringba. Ha paggiya han Dios, hi Salomon nagsiring: “Hiya nga may  pagbati han kablas naalayon kan Jehova, ngan han iya maopay nga buhat Iya hiya pagbabayaran liwat.” (Proberbios 19:17) Ngan hi Pablo nagsurat: “Hinbaroan nga bisan ano nga maopay nga bagay nga pagbuhaton han tagsa-tagsa, amo man an iya kakarawaton ha Ginoo.”—Efeso 6:8.

An mapinairon nga kalooy may-ada gahum ha pagtipig han kamurayawan ngan ha pagsulbad han away o samok, ngan nag-aabri ito han dalan ha pagpasaylo. Mahimo magkaada diri pagsinabtanay tungod kay diri naton naipapahayag pirme an aton ginhuhunahuna o gin-aabat ha paagi nga aton unta karuyag, o mahimo liwat nga sayop nga sabuton an aton mga gios. Hini nga kahimtang, an pagpakita hin mapinairon nga kalooy nabulig ha pagsulbad han problema. Masayon magpasaylo ha tawo nga mapinairon. An mapinairon nga kalooy nabulig ha aton ha pagsunod han sagdon ni Pablo ha mga Kristiano: “Mag-inantusay kamo an usa kag usa, ngan magpinasayloay kamo an usa kag usa, kon may-ada usa ka tawo nga may igsusumbong kontra ha iba.”—Kolosas 3:13.

Mapinairon nga Kalooy nga May Buhat

Dugang pa, an mapinairon nga kalooy may-ada gahum ha pagpagaan han kasakitan. Sugad han aton nahisgotan na, ipinapakita hito an pagpaid ha mga nagsasakit ngan nag-aaghat ito ha aton nga magkaada empatiya ha nag-aantos. Nag-uupod liwat ito han mahigugmaon nga pagtagad ha mga nagkukuri, ngan han praktikal nga buhat basi buligan hira.

Pinaagi ha pagin maloloy-on, ginsusubad han mga Kristiano hi Jesus. May-ada gud hiya pirme panahon ha pagbulig ha iba ha materyal ngan ha espirituwal. Kon nasasantop niya nga an iba nagkukuri, mapinairon nga namimiling hiya hin paagi ha pagbulig.

Tagda kon ano an reaksyon ni Jesus han kinita hiya hin mga tawo nga ginpabay-an han ira mga lider han relihiyon: “Han pakakita niya han kadam-an, hiya nalooy ha ira; kay nanluluya ngan nagpapatlaag, sugad hin mga karnero nga waray magbarantay.” (Mateo 9:36) May kalabotan ha pulong nga ginhubad dinhi nga “nalooy,” usa nga eskolar han Biblia an nasiring nga nagpapasabot ito “hin emosyon nga nakapabantad gud ha usa.” Ha pagkamatuod, ini nga pulong usa han pinakamapwersa nga pulong ha Griego para ha pag-abat hin mapinairon nga kalooy.

Ha pariho nga paagi, an mapinairon nga Kristiano nagios dayon ha panginahanglan han iba ha materyal ngan ha espirituwal. Hi apostol Pedro nagsurat: “Magkaurosa kamo ngatanan ha hunahuna, mga malolooyon, mga mahigugmaon sugad ha magburugto, mga mapuanguron.” (1 Pedro 3:8) Pananglitan, han an usa nga pamilya han pobre nga mga Saksi kinahanglan bumalhin basi mapauswag an ira kahimsog, waray plete nga ginpagamit hira hin balay han mga igkasi-tumuroo hito nga lugar ha sulod hin unom ka bulan. An bana nagsiring: “Ginbibisita nira kami kada adlaw basi kumustahon, ngan tungod han ira pagdasig inabat namon nga nalilipay hira nga aanhi kami.”

Gintatagad liwat han tinuod nga mga Kristiano an panginahanglan han diri nira kilala. Malipayon nga ira ginagamit an ira panahon, kusog, ngan katigayonan basi makagserbi bisan ha sugad nga mga tawo. Mga Saksi ni Jehova an mga boluntaryo nga ginhisgotan ha nauna nga artikulo nga nagbulig ha diri nira kilala.

Kon sugad, makikita ha mga membro han Kristiano nga kongregasyon an mapinairon nga kalooy ngan mahigugmaon nga pagkabuotan. Tungod kay napapagios han gugma, an mga membro han kongregasyon naaaghat ha pagpamiling hin paagi ha pagserbi. Tungod han magkalain-lain nga problema, an mga ilo ngan balo ha kongregasyon bangin magkinahanglan han imo pagtagad ngan empatiya. Mahimo mo ba hira buligan basi maatubang nira an kapobrehan, kakulang hin medisina, kawaray mauukyan, o iba pa nga problema?

Tagda an usa nga mag-asawa ha Gresya. Naistrok an bana. Gindara hiya ngan an iya asawa ha hospital ha hirayo nga lugar. Kondi an ira gutiay nga kita nadepende la ha ira tanom nga aranghita. Hin-o an manginginano hito samtang aadto hira ha hospital? Ginios an ira mga kakongregasyon. Ira ginpamuro ngan ginbaligya an mga aranghita nga nakahatag hin kwarta ngan kamurayawan ha hunahuna ha mag-asawa.

 An mapinairon nga kalooy maipapakita ha damu nga paagi. Pananglitan, nasasantop han mapinairon nga mga Kristiano nga usahay an importante nga ginkikinahanglan han may problema amo an pagbisita han mga tawo nga maloloy-on nga namamati, nagpapakita hin empatiya, ngan nagtatagana hin Kasuratanhon nga pagliaw.—Roma 12:15.

Pakig-upod ha mga Nagpapakita hin Mapinairon nga Kalooy

An Kristiano nga kongregasyon ha bug-os nga kalibotan usa nga lugar han kamurayawan ngan pagliaw diin naieksperyensyahan an mapinairon nga kalooy ngan pagkabuotan. Maaram an tinuod nga mga Kristiano nga nakakadani an pagin maloloy-on, kondi nakakapasina an pagin diri matinagaron. Tungod hito, samtang ginsusubad nira an ira langitnon nga Amay, nangangalimbasog hira nga magpakita hin mapinairon nga kalooy ha praktikal nga paagi.

Mahigugmaon nga gindadasig ka han mga Saksi ni Jehova nga maeksperyensyahan an mapinairon nga kalooy, gugma, ngan pagtagad ha Kristiano nga kongregasyon. Nasisiguro nira nga maruruyagan mo ito.—Roma 15:7.

[Retrato ha pahina 5]

Gin-aghat ni Pablo an mga Kristiano ha Kolosas nga magpakita hin mapinairon nga kalooy

[Retrato ha pahina 7]

Kon nasasantop ni Jesus nga may panginahanglan, mapinairon nga namimiling hiya hin paagi ha pagbulig