Mahimo ba Magin Kapyestahan han mga Kristiano an Pagano nga Kapyestahan?

HAN katugnaw han 2004, nagkaada makapainteres nga debate ha Italya durante han Kapaskohan. An iba nga opisyal ngan instruktor ha mga eskwelahan sinuporta han ideya ha paglimita o pagwara han bisan ano nga relihiyoso nga tradisyon han Pasko. Iginrekomenda nira ini tungod ha pagtahod han nagtitikadamu nga estudyante nga diri Katoliko o Protestante. Kondi, an iba nga edukador ngan iba an propesyon nagsiring nga sadang tahuron ngan tipigan gud an mga tradisyon.

Gawas han ginsusuportahan hini nga kontrobersya, ano gud ba an tinikangan han damu han tradisyon han Pasko? Samtang nagtikatarapos an debate, an peryodiko han Vatican nga L’Osservatore Romano nagkaada makapainteres nga mga obserbasyon.

May kalabotan ha petsa han pagsaurog han Pasko, ito nga peryodiko han Katoliko nagsiring: “Sumala ha kasaysayan, an tinuod nga petsa han katawo ni Jesus nakatago ha diri masasarigan nga kasaysayan han Roma, an sensus han imperyo hito nga panahon ngan an pagsaliksik han sumunod nga mga siglo waray maghatag hin sigurado nga impormasyon han tinuod nga petsa. . . . An petsa nga Disyembre 25, nga  hinbabaroan han kadam-an, ginpili han Iglesia han Roma han ikaupat ka siglo. Ini nga petsa ha pagano nga Roma ginpahinungod ha dios nga Adlaw . . . Bisan kon an Kristianidad kinakarawat na ha Roma tungod hin Dekreto ni Constantino, an patootoo mahitungod han . . . dios nga Adlaw kalyap pa gihapon, labi na ha mga sundalo. An gin-unabi nga mga selebrasyon nga ngatanan nahitabo han Disyembre 25, nagtikang gud ha popular nga tradisyon. Naghatag ini ha Iglesia han Roma han ideya ha pagpasilsil ha mga tawo nga an Disyembre 25 may-ada bili ha mga Kristiano pinaagi ha pagsaliwan han dios nga Adlaw han tinuod nga Adlaw han Hustisya, hi Jesu-Kristo, ngan ha pagpili hito sugad nga an adlaw ha pagsaurog han iya katawo.”

Kumusta man an Christmas tree, nga bahin yana ha tradisyon han Katoliko?

An artikulo ha peryodiko han Katoliko nagsiring nga ha kadaan nga panahon, damu nga evergreen, sugad han mga sanga han pine tree, an gintotoohan nga may-ada gahum ha pagpanalipod kontra ha sakit pinaagi ha mahika o medisina.” Nagpadayon ito: “Ha Nochebuena, ha ika-24 han Disyembre, sinasaurog an handumanan nira Adan ngan Eva pinaagi hin popular hinduro nga istorya mahitungod han Puno ha Paraiso ha tuna . . . Mansanas unta an puno, kondi tungod kay diri angayan ito ha panahon han katugnaw, pine tree an iginbutang ha entablado ngan an mga sanga hito ginbitayan hin mga mansanas ha pagsimbolo han tiarabot nga Kaluwasan, may-ada liwat mga ostyas nga may dinugmok nga biskwit nga espesyal an pagkamolde nga nagsisimbolo kan Jesus durante han pagkumulgar, ngan may-ada liwat magtam-is nga pagkaon ngan mga regalo ha kabataan.” Kumusta man katapos hito?

An L’Osservatore Romano, ha pag-unabi nga an tradisyon han paggamit hin Christmas tree nagtikang ha Alemanya han ika-16 ka siglo, nagsiring: “An Italya usa han mga nasud nga urhi na nga kinarawat han Christmas tree, ha bahin tungod han kalyap nga hurub-hurob nga an paggamit hito tradisyon han Protestante, salit sadang liwanan han pasungan [an Belen].” Gintikangan ni Papa Paul VI “an tradisyon ha pagbutang [ha St. Peter’s Square, Roma] hin daku hinduro nga Christmas tree” hirani ha Belen.

Gintatagad mo ba nga husto hunahunaon han usa nga lider han relihiyon nga kinakarawat han Kristiano nga katutdoan an mga panhitabo ngan mga simbolo nga nagtikang ha kadaan nga paganismo? May kalabotan ha kon ano an husto, an Kasuratan nagsasagdon ha tinuod nga mga Kristiano: “Oonan-on ba an pagkatampo han katadongan ngan han diri katadongan? O oonan-on ba an pagkaangbit han kalamrag ngan han kangitngit?”—2 Korinto 6:14-17.

[Retrato ha pahina 9]

“Christmas tree” (ha luyo nga pahina) ngan an Belen ha Vatican

[Ginkuhaan han Retrato]

© 2003 BiblePlaces.com

[Retrato ha pahina 9]

An dios nga adlaw

[Ginkuhaan han Retrato]

Museum Wiesbaden