May-ada Ka ba Espirituwal nga Magsaragdon?

HAN 16 anyos pa la hi Usiya, nagin hadi hiya han sur nga ginhadian han Juda. Nagmando hiya hin sobra 50 ka tuig, tikang han 829 tubtob ha 778 A.K.P. Tikang ha pagkabata, hiya “nagbuhat hadton matadong ha mga mata ni Jehova.” Ano an nakaimpluwensya ha iya nga buhaton an husto? An rekord han kasaysayan nasiring: “Nagtinguha [hi Usiya] pagpangita han Dios ha mga adlaw ni Sakarias, [an instruktor] nga may pagsabot han bisyon han Dios: ngan ha panahon nga hiya nangita kan Jehova, an Dios nagpauswag ha iya.”—2 Kronikas 26:1, 4, 5.

Diri damu an hinbabaroan mahitungod kan Sakarias, an magsaragdon han hadi, gawas hini nga asoy ha Biblia. Kondi, sugad nga “[an instruktor] nga may pagsabot han bisyon han Dios,” maopay an iya impluwensya ha batan-on nga hadi ha pagbuhat han husto. An The Expositor’s Bible nasiring nga hi Sakarias matin-aw nga “pamilyar ha Kasuratan, damu an kahibaro ha espirituwal nga butang, ngan maaram ha pagpaangbit han iya kahibaro.” Usa nga eskolar ha Biblia an nagsiring mahitungod ha iya: “Maaram gud hiya ha tagna ngan . . . baltok, debotado, matadong; ngan baga hin daku an iya impluwensya kan Usiya.”

Tungod han pagin matinumanon ni Usiya kinarawat hiya hin damu nga bendisyon, ngan hiya “nagtubo ha kakusog hinduro” tungod kay “an Dios [padayon nga] binmulig ha iya.” Oo, an kalamposan han iya sekular nga pangalimbasog nadepende han iya pagsunod ha Dios “ha mga adlaw ni Sakarias.” (2 Kronikas 26:6-8) Kondi, han nagmalampuson hi Usiya, iginsalikway niya an katutdoan ni Sakarias, an iya espirituwal nga magsaragdon. An kan Usiya “kasingkasing inmalsa, nga hiya nagbuhat ha mahugaw, ngan hiya nagtalapas patok kan Jehova nga iya Dios.” Sugad nga resulta hin pagpasipara ha Dios, nagkaada hiya makangingirhat nga sakit ha panit nga nakabalda gud ha iya, salit diri na niya nabubuhat an ngatanan han iya buruhaton sugad nga hadi.—2 Kronikas 26:16-21.

May-ada ka ba espirituwal nga magsaragdon nga nakakaimpluwensya ha imo ha “pagpangita han Dios”? Posible nga may-ada ka—edaran ka man o batan-on pa, lalaki ka man o babaye. Pabilhi hiya, tungod kay an iya sagdon makakabulig ha imo ha padayon nga pagbuhat han husto ha paniplatan ni Jehova. Pamatii inin hamtong nga Kristiano, ngan tagda gud an iya sagdon. Hinaot diri mo balewarayon an maaramon nga sagdon han sugad nga instruktor nga mahadlok ha matuod nga Dios.—Proberbios 1:5; 12:15; 19:20.