Nahinunumdoman Mo Ba?

Nagpahimulos ka ba ha pagbasa han bag-o nga mga gowa han An Barantayan? Bueno, kitaa kon mababaton mo an masunod nga mga pakiana:

• Kay ano nga may-ada nagpapadayon nga bili an “Daan nga Testamento”?

An Awtor hito diri madarahog kondi mahigugmaon nga Dios, hi Jehova. Padayon nga gin-gamit ni Jesus ngan han iya siyahan nga mga sumurunod an Hebreo nga Kasuratan. Nagsusulod ito hin praktikal nga sagdon para ha adlaw-adlaw nga pagkinabuhi ngan naghahatag hin urusahon nga paglaom para ha tidaraon.—9/1, pahina 4-7.

• Ano an napamatud-an han pagtugot nga lumabay an panahon tikang han nakasala hira Adan ngan Eva?

Hinin yinukot nga katuigan, hi Satanas napamatud-an nga buwaon—namatay hira Adan ngan Eva ngan an minilyon han ira anak. Ipinapakita han panahon nga waray magin mas maopay an kahimtang han tawo han binulag hira ha Dios ngan waray hira katungod o abilidad ha paggiya han ira mga pitad.—9/15, pahina 6-7.

• Kay ano nga waray sawaya hi Jakob han nagpakuno-kuno hiya nga hiya hi Esaw?

May katungod hi Jakob nga bendisyonan han iya amay tungod han iya pagpalit han katungod ha pagkamagurang tikang kan Esaw. Han hinbaroan ni Isaak nga hi Jakob an iya ginbendisyonan, waray na niya ito bag-oha. Ngan an Dios, nga makakapugong unta hito, matin-aw nga naruruyag nga mahingadto kan Jakob an bendisyon.—10/1, pahina 31.

• Ha ano nga paagi nasumpaki ha ebolusyon an aton pagkaada konsensya?

Ha ngatanan nga rasa ngan kultura, disidido an mga tawo ha pagbulig ha iba, bisan kon mameligro hira ha pagbuhat hito. Ito nga kinaiya ha pagkamabinuligon diri malalaoman kon an mga tawo mga hayop la nga nangangalimbasog mabuhi anoman an mahitabo.—10/15, pahina 20.

• Kay ano nga makakasiring kita nga mapainubsanon an Dios, ngan ha ano nga paagi niya ipinapakita ini nga kalidad?

Sugad nga Soberano ngan Maglalarang, an Dios diri pariho ha aton nga may limitasyon. Kondi, uyon ha 2 Samuel 22:36, an Dios masisiring nga mapainubsanon tungod kay gintatagad niya an ubos nga mga tawo nga nangangalimbasog ha pagpalipay ha iya, ngan nalolooy hiya ha ira. Sugad hin nalusad hiya basi tagdon an mga nahahadlok ha iya.—11/1, pahina 4-5.

• Ha ano nga paagi an kadaan nga mga tipak o buong nga tibod nagpaparig-on han mga rekord ha Biblia?

An mga arkeologo nakabiling hin mga tipak ha Samaria nga may-ada pito nga ngaran han pamilya nga nakarekord ha Josue 17:1-6. Nagpaparig-on an mga tipak tikang ha Arad han impormasyon mahitungod han mga pamilya nga pagtitikangan han mga saserdote ngan may-ada ito ngaran han Dios. An mga tipak tikang ha Lakis naghuhulagway han kahimtang ha politika ngan kasamok ha Juda antes han pag-atake han mga Babilonyahanon.—11/15, pahina 12-14.

• Ano an nagtutugway ha konklusyon nga hi Lukas an nagsurat han libro han Mga Buhat?

An Ebanghelyo ni Lukas ngan an Mga Buhat han mga Apostol iginsurat para kan Teopilo, nga nagpapasabot nga ginsurat ni Lukas ini nga duha. An paggamit han pronombre nga “kami,” “namon,” ngan “amon,” nagpapasabot nga kaupod hi Lukas ha pipira nga panhitabo. (Buhat 16:8-15)—11/15, pahina 18.

• Paonan-o sadang tagdon han usa nga Kristiano an pagpanganop ngan pagpangisda?

Tikang han panahon ni Noe, gintugotan han Dios an mga tawo ha pagpatay ngan pagkaon hin mga hayop. Kondi, an sugo nga paagason an dugo hito nagpapabug-at nga kinahanglan tahuron an kinabuhi han hayop sugad nga tikang ha Dios. An mga Kristiano diri sadang magpatay hin hayop para ha isport o ha kalipay han paglanat o pagpatay. Importante an pagsunod han mga balaud ni Cesar ngan pagtagad ha konsensya han iba. (Roma 14:13)—12/1, pahina 31.