Pagpakita hin Mapinairon nga Kalooy ha Butnga han Madarahog nga Kalibotan

USA nga tawo ha Burundi an grabe nga nasakit hin malaria. Kinahanglan madara dayon hiya ha hospital. Kondi paonan-o? Waray awto nga magagamit. Duha han iya kasangkayan an inabot basi buligan hiya. Ira iginsakay hiya ha bisikleta ngan gindinuso ito ha sulod hin lima ka oras ha kabukiran. Katapos iginsakay nira hiya ha bus nga nagdara ha iya ha pinakahirani nga hospital. Paglabay hin pipira ka adlaw, mas maopay na an iya kahimtang.

Ha luyo nga bahin han tuna, katapos han Bagyo Katrina nga nakadaot han Gulpo han Estados Unidos han Agosto 2005, nakabiling an usa nga grupo hin boluntaryo hin balay nga nadat-ugan hin natumba nga mga puno. Ginamit han mga boluntaryo nga diri nakilala han tagbalay an bug-os nga adlaw ha pagkuha han nagkatutumba nga mga puno gamit hin mga chain saw. “Nagpapasalamat gud ako hini [nga mga tawo],” siring han tagbalay.

An sobra ka makangingirhat nga mga report han media agsob nga nagsusumat mahitungod han kamadarahog. Agsob nga natatabonan hini an mga buhat han pagpakita hin mapinairon nga kalooy ngan pagkabuotan. Kondi, diri hini nababag-o an kamatuoran nga an mga tawo ha bisan diin naghihingyap gud hin gugma, pagbati, ngan simpatiya. Nag-uungara gud kita nga pakitaan hin mapinairon nga kalooy! An sugad nga sentimyento bangin mas komon durante han Kapaskohan, diin damu an nagyayakan o nagkakanta mahitungod han ‘kamurayawan ngan kaopayan ha mga tawo.’—Lukas 2:14, King James Version.

Bangin diri masayon an pagpakita hin  mapinairon nga kalooy ha kalibotan nga baga hin waray pagbati ngan waray pagtagad. Ginhuhunahuna han kadam-an nga an kamadarahog ngan kawaray pagbati nagriresulta hin kalamposan ngan kadaogan. Damu an baga hin nagkikinabuhi uyon ha prinsipyo nga mas maaramon an madarahog kay han mapinairon. An kahakog ngan egotismo masayon makaulang ha pagpakita hin mapinairon nga kalooy.

Sugad nga resulta, gin-uuna han damu nga tawo an ira kalugaringon, bisan pa kon ginbabalewaray na nira an inaabat ngan kaopayan han iba. An mga sikat ha isport ngan kaliawan agsob nga iginpipresenta sugad nga “tunay nga lalaki” (mga macho) nga diri nagpapakita hin pagpaid. Sugad liwat hito an iba nga lider ha politika.

Salit angayan la nga magpakiana kita: Kay ano nga sadang kita magin maloloy-on? May-ada ba maopay nga impluwensya an pagpakita hin mapinairon nga kalooy? Ngan ano an makakabulig ha aton nga makagpakita hito? Ini nga mga pakiana paghihisgotan han masunod nga artikulo.

[Kahon ha pahina 3]

•Kaluyahan ba an pagpakita hin mapinairon nga kalooy?

•May-ada ba maopay nga impluwensya an pagpakita hin mapinairon nga kalooy?

•Ha ano nga praktikal nga paagi maipapakita mo an mapinairon nga kalooy?