“Tindog hin Marig-on Ngan Kitaa an Pagluwas ni Jehova”

“Hi Jehova aada mahitungod ha akon; diri ako mahahadlok: Ano ba an mabubuhat han tawo ha akon?”—SALMO 118:6.

1. Ano nga peligroso nga mga hitabo an maieksperyensyahan han katawohan?

 YANA, an katawohan hirani na umatubang hin mga hitabo nga waray pa gud maeksperyensyahi ha naglabay. Han igintagna ni Jesus an mahitungod han aton panahon, nagpahamangno hiya ha iya mga sumurunod: “Maabot an daku nga kagol-anan, sugad nga waray pa mahinabo tikang ha tinikangan han kalibotan tubtob yana, ngan diri [na] gud mahinanabo. Ngan kon diri pagpahaliputon adto nga mga adlaw waray unod nga maluluwas; kondi tungod han mga pinili adto nga mga adlaw pahahaliputon.”—Mateo 24:21, 22.

2. Ano an nagpupugong ha pagtikang han daku nga kagol-anan?

² Bisan kon diri nakikita han mga tawo, ginpupugngan yana han mga anghel iton daku nga kagol-anan. Nakapribilehiyo hi apostol Juan nga masantop kon kay ano nga ginpupugngan ito pinaagi han iginpahayag ha iya ni Jesus. Ini an iya paghulagway hito: “Hinkit-an ko an upat nga mga anghel nga nagkakatukdaw ha upat nga palwis han tuna . . . Ngan hinkit-an ko an lain nga anghel nga nasaka tikang ha sinirangan, nga may-ada niya selyo han buhi nga Dios: ngan nagguliat hiya hin daku nga tingog ngadto ha upat nga mga anghel . . . Ayaw niyo paghibanga iton tuna, bisan iton dagat, o mga kakahoyan, ngada han pagkasiselyohi namon han mga agtang han mga surugoon han aton Dios.”—Pahayag 7:1-3.

3. Ano an siyahan nga bahin han daku nga kagol-anan?

³ Hirani na matapos an ultimo nga pagselyo ha dinihogan nga “mga surugoon han aton Dios.” An upat nga anghel andam na ha pagbul-iw hiton nakakabungkag nga mga hangin. Kon bul-iwan na nira ito, ano an siyahan nga mahitatabo? Usa nga anghel an binaton: “Sugad hini kakusog an pagkalaglag han Babilonya, an daku nga bungto, mahilalabog, ngan diri na gud hiaagian.” (Pahayag 18:21) Magrarayhak gud an langit kon mahitabo ito, kon bungkagon na an imperyo han palso nga relihiyon!—Pahayag 19:1, 2.

4. Ano an mahitatabo ha tidaraon?

⁴ An ngatanan nga nasud magkakaurosa kontra ha katawohan ni Jehova. Maglalampos ba hira ha pagpoo ha magtinumanon nga Kristiano? Baga hin maglalampos hira. Kondi kitaa! Sisiguruhon gud han langitnon nga kasundalohan nga nasunod kan Kristo Jesus nga mabungkag inin mga pwersa han tawo. (Pahayag 19:19-21) Ha kataposan, an Yawa ngan an iya mga anghel ilalabog ha simboliko nga kahiladman diin magigin diri aktibo hira. Diri na nira malilimbongan an katawohan tungod kay gagapuson hira ha sulod hin usa ka yukot ka tuig. Daku gud ito nga katalwasan para ha naluwas nga daku nga panon!—Pahayag 7:9, 10, 14; 20:1-3.

5. Ano nga makalilipay nga hitabo an maieksperyensyahan han mga nagpapabilin nga maunungon kan Jehova?

⁵ Hirani na naton maeksperyensyahan inin makalilipay ngan urusahon gud nga mga hitabo. May kalabotan ito ngatanan ha pagbindikar han katungod ni Jehova ha pagmando ngan han iya pagkasoberano ha uniberso. Ngan hunahunaa ini: Kon magpapabilin kita nga maunungon kan Jehova ngan kon marig-on nga susuportahan naton an iya pagkasoberano, makakapribilehiyo kita ha pakigbahin ha pagbaraan han iya ngaran ngan ha pagtuman han iya katuyoan. Waray gud kapariho ito nga kalipay!

6. May kalabotan ha tiarabot nga panhitabo, ano an sadang tagdon naton?

⁶ Andam ba kita para hiton makatirigamnan nga mga hitabo? Natoo ba kita ha nagluluwas nga gahum ni Jehova? Nasarig ba kita nga bubuligan  kita niya ha husto nga panahon ngan ha gimaopayi nga paagi? Ha pagbaton hinin personal nga mga pakiana, mahimo naton hinumdoman an ginsiring ni apostol Pablo ha iya mga igkasi-Kristiano ha Roma: “An ngatanan nga mga butang nga nahisurat na nga daan ginsurat ha pagtutdo ha aton, basi tungod ha pag-ilob ngan ha paglipay han mga Maopay nga Surat may maada ta paglaom.” (Roma 15:4) Usa han iginsurat ha pagtutdo ha aton nga naghahatag ha aton hin pagliaw ngan paglaom amo an panhitabo han ginluwas ni Jehova an mga Israelita tikang ha mabangis nga pag-uripon ha ira han matalumpiguson nga mga Ehiptohanon. An pag-usisa hin maopay hiton makapainteres nga mga hitabo han ginluwas ni Jehova an mga Israelita, magpaparig-on gud ha aton samtang ginpapamulat naton an hirani na umabot nga daku nga kagol-anan.

Gintatalwas ni Jehova an Iya Katawohan

7. Han 1513 A.K.P., ano nga makangingirhat nga kahimtang an nahitabo ha Ehipto?

⁷ Tuig adto han 1513 A.K.P. Iginpadapat na ni Jehova an siyam nga peste ha mga Ehiptohanon. Katapos han ultimo nga peste, ginpalakat dayon ni Paraon hi Moises, nasiring: “Umiwas ka tikang ha akon, pagbantay ha imo kalugaringon, diri ka na kumita hinin akon nawong; kay ha adlaw nga makakita ka hinin akon nawong ikaw mapatay.” Hi Moises binaton: “Maopay an ginyakan mo; diri na ako makita han imo nawong.”—Eksodo 10:28, 29.

8. Ano nga mga instruksyon para ha kaluwasan an iginhatag ha mga Israelita, ngan ano an resulta?

⁸ Iginpahibaro ni Jehova kan Moises nga usa pa nga peste an iya ipapadapat kan Paraon ngan ha ngatanan nga Ehiptohanon, ito an ultimo. Ha ika-14 han Abib (Nisan), mamamatay an ngatanan nga suhag han mga Ehiptohanon ngan han ira mga hayop. Kondi matatalwas an mga Israelita kon susundon nira hin maopay an mga instruksyon han Dios pinaagi kan Moises. Kinahanglan nira wisikan hin dugo han lalakì nga karnero an duha nga poste han purtahan ngan an igbaw han ira balay ngan diri hira gumawas. Ano an nahitabo hito nga gab-i? Hi Moises nagsiring: “Nahinabo ha katutnga han gab-i, nga pinanhampak ni Jehova an ngatanan nga suhag ha tuna ha Ehipto.” Ginios dayon hi Paraon. Iya ginpatawag hira Moises ngan Aaron ngan nagsiring ha ira: “Pagkabuhat kamo, gawas kamo tikang ha akon katawohan, . . . ngan lakat, pag-alagad kan Jehova, sugad han iyo isiniring.” Ngan linakat dayon an mga Israelita, posible nga sobra tulo ka milyon hira ngan kaupod nira an diri maihap nga “nagkakasaralakot nga kadam-an” nga diri-Israelita.—Eksodo 12:1-7, 29, 31, 37, 38.

9. Ha ano nga ruta ginpaagi han Dios an Israel ha ira paggawas ha Ehipto, ngan kay ano?

⁹ An pinakahirani nga ruta nga puydi agian han mga Israelita amo an ha ligid han Dagat Mediteranyo tipakadto ha Pilistia. Kondi teritoryo ito han mga kaaway. Salit, basi mailikay an iya katawohan ha pakig-away, posible nga ginpaagi hira ni Jehova ha kamingawan hirani ha Dagat nga Pula. Bisan kon minilyon hira nga nagbabaktas, organisado hira. An Biblia nasiring:  “An mga anak ni Israel ginawas ha tuna ha Ehipto” sugad hin organisado nga mga sundalo.—Eksodo 13:17, 18.

“Kitaa an Pagluwas ni Jehova”

10. Kay ano nga ginsidngan han Dios an Israel nga magkampo ha Pihahirot?

¹⁰ Sunod, may-ada urusahon nga nahitabo. Hi Jehova nagsiring kan Moises: “Sidnga an mga anak ni Israel, nga bumalik hira ngan manmahuway ha atubangan ha Pihahirot, ha butnga ha Migdol ngan han dagat ha atubangan ha Baal-sepon.” Han ginsunod nira ini nga instruksyon, inin daku nga kadam-an nahingadto ha lugar diin napalibotan hira han kabukiran ngan han Dagat nga Pula. Baga hin waray na hira mapapalagiwan. Kondi, maaram hi Jehova han iya ginbubuhat. Iya ginsidngan hi Moises: “Akon patitig-ahon an kan Paraon kasingkasing, ngan hiya maglalanat ha ira; ngan paghihimayaon ako ni Paraon, ngan han iya mga kasundalohan; ngan an mga Ehiptohanon makilala nga ako hi Jehova.”—Eksodo 14:1-4.

11. (a) Ano an ginbuhat ni Paraon, ngan ano an reaksyon han mga Israelita? (b) Ano an reaksyon ni Moises ha mga reklamo han mga Israelita?

¹¹ Tungod kay inabat ni Paraon nga nagsayop hiya ha pagpalakat ha mga Israelita tikang ha Ehipto, ginlanat niya upod an iya 600 nga pinili nga kasundalohan nga may mga karomata ha pakig-away an mga Israelita. Han nakita han mga Israelita an kasundalohan, nahadlok hira ngan nagsinggit kan Moises: “Waray ba mga lubnganan didto ha Ehipto nga imo kami gindara ha pagpakamatay dinhi ha kamingawan?” Tungod kay nasarig ha pagluwas ni Jehova, hi Moises binaton: ‘Ayaw kamo kahadlok, tukdaw hin waray kiwakiwa [“marig-on,” NW], ngan kitaa an pagluwas ni Jehova, nga iya pagbubuhaton tungod ha iyo niyan. Hi Jehova makikig-away tungod ha iyo, ngan ayaw la kamo hin aringasa.’—Eksodo 14:5-14.

12. Paonan-o gintalwas ni Jehova an iya katawohan?

¹² Uyon ha ginsiring ni Moises nga hi Jehova mismo an makikig-away para ha mga Israelita, Iya ginamit an labaw ha tawo nga mga pwersa. An harigi nga dampog nga naggigiya ha mga Israelita, milagroso nga iginbalhin han anghel ni Jehova ngadto ha ira urhi. Tungod hito nagin masirom ha dapit han mga Ehiptohanon, kondi naghatag ito hin lamrag ha mga Israelita. (Eksodo 13:21, 22; 14:19, 20) Ha pagsunod ha sugo han Dios, igin-unat ni Moises an iya kamot. An asoy nagpapadayon: “Kan Jehova ginpabalik an dagat pinaagi hin makusog nga hangin tikang ha sinirangan ha bug-os nga gab-i . . . Ngan an mga anak ni Israel napakadto ha butnga han dagat ha bawbaw han mamara nga tuna: ngan an katubigan nahimo nga kuta nira, ha too ngan ha wala.” Nagpadayon an mga Ehiptohanon ha paglanat, kondi ginpanalipdan ni Jehova an iya katawohan. Iya gin-gupong an mga Ehiptohanon ngan nagsiring hiya kan Moises: “Unata an imo kamot ha igbaw han dagat, basi an mga tubig bumalik liwat ha mga Ehiptohanon, ha ira mga karomata ha pakig-away, ngan ha ira mga kakabayohan.” Nabungkag gud an ngatanan nga kasundalohan ni  Paraon nga waray bisan usa nga nahibilin nga buhi!—Eksodo 14:21-28; Salmo 136:15.

Mahibaro Tikang ha Kaluwasan han Israel

13. Ano an reaksyon han mga Israelita ha ira kaluwasan?

¹³ Ano an epekto hinin milagroso nga kaluwasan ha mga natalwas? Hi Moises ngan an mga anak ni Israel nagkanta dayon ha pagdayaw kan Jehova! Hira nagkanta: “Magkakanta ako kan Jehova, kay nagdaog hiya nga mahimayaon. . . . Hi Jehova maghahadi ha waray kataposan.” (Eksodo 15:1, 18) Oo, an ira siyahan nga nahunahuna amo an pagdayaw ha Dios. Hito nga kahimtang, naipakita an pagkasoberano ni Jehova.

14. (a) Uyon ha naeksperyensyahan han mga Israelita, ano an mahibabaroan naton mahitungod kan Jehova? (b) Ano an teksto para ha tuig han 2008?

¹⁴ Ano nga instruksyon, pagliaw, ngan paglaom an aton nakakarawat tikang hinin makalilipay nga mga hitabo? Syempre mahisasabtan naton nga mahimo panalipdan ni Jehova an iya katawohan ha bisan ano nga kasakitan. Masusulbad niya an anoman nga problema nga bangin inaatubang nira. An Dagat nga Pula waray makaulang ha mga Israelita han ginpahinabo ni Jehova an makusog nga hangin tikang ha sinirangan. Ngan iya ginpahinabo nga ito liwat nga katubigan an magin lubnganan han kasundalohan ni Paraon. Kon aton pamalandungon ini, masisiring liwat naton an ginsiring han salmista: “Hi Jehova aada mahitungod ha akon; diri ako mahahadlok: Ano ba an mabubuhat han tawo ha akon?” (Salmo 118:6) Makakaliaw liwat ha aton an mga pulong ni Pablo ha Roma 8:31: “Kon an Dios upod ha aton hin-o ba an makontra ha aton?” Marig-on gud ini nga pasarig ha aton! Nakakawara ito han anoman nga kahadlok ngan pagruhaduha nga bangin inaabat naton ngan naghahatag ha aton hin paglaom. Salit, angayan gud an aton teksto para ha tuig han 2008: “Tindog hin marig-on ngan kitaa an pagluwas ni Jehova”!—Eksodo 14:13, NW.

15. Kay ano nga importante an pagsunod para ha kaluwasan han mga Israelita ha Ehipto, ngan kay ano nga importante ito yana?

¹⁵ Ano pa an aton hibabaroan tikang ha Pagbaya han Israel ha Ehipto? Mahibabaroan naton nga kinahanglan sundon naton an ngatanan nga iginpapabuhat ni Jehova. Ginsunod han mga Israelita an detalyado nga instruksyon ha pag-andam para ha Paskua. Masinugtanon nga nagpabilin hira ha sulod han balay ha gab-i han Nisan 14. Han binaya na hira ha Ehipto, kinahanglan lumakat hira sugad hin mga sundalo nga organisado. (Eksodo 13:18) Yana, importante gud nga sundon naton an giya pinaagi han “matinumanon ngan maaramon nga uripon”! (Mateo 24:45, NW) Kinahanglan mamati kita hin maopay ha pulong han Dios tikang ha aton luyo nga nasiring: “Amo ini an dalan, maglakat kamo dida hini; kon kamo sumimang ha too nga kamot, ngan kon kamo sumimang ha wala.” (Isaias 30:21) Samtang nagtitikahirani kita ha pag-abot han daku nga kagol-anan, posible gud nga makakarawat kita  hin detalyado nga mga instruksyon. An aton talwas nga pagbiyahe durante hiton masamok nga panahon madepende ha aton padayon nga pakig-urosa ha maunungon nga mga surugoon ni Jehova.

16. Ano an aton mahibabaroan ha paagi han Dios ha pagpahinabo han mga butang ha pagluwas ha mga Israelita?

¹⁶ Hinumdumi liwat nga ginpaagi ni Jehova an mga Israelita ha iba nga ruta diin baga hin waray hira makakadtoan tungod kay napalibotan hira han kabukiran ngan han Dagat nga Pula. Baga hin diri ito husto nga desisyon. Kondi kontrolado ni Jehova an ngatanan ngan naglampos ito para ha iya kadayawan ngan ha kaluwasan han iya katawohan. Yana, bangin diri naton nasasabtan kon kay ano nga an pipira nga butang may kalabotan ha organisasyon gindudumara ha sugad nga paagi, kondi makakasarig gud kita ha giya ni Jehova pinaagi han iya matinumanon nga ahensya han komunikasyon. Usahay, an aton mga kaaway baga hin naglalampos. Tungod kay limitado an aton pagsabot, bangin diri naton masabtan an bug-os nga kahimtang. Kondi, mapapahinabo ni Jehova an mga butang ha husto nga takna, sugad la han iya ginbuhat hadto ha mga Israelita.—Proberbios 3:5.

Sarig kan Jehova

17. Kay ano nga makakasarig gud kita ha giya han Dios?

¹⁷ Nahahanduraw mo ba an pagsarig nga posible nga inabat han mga Israelita han ginpamalandong nira an mahitungod hiton harigi nga dampog ha adlaw ngan harigi nga kalayo ha gab-i? Ebidensya ito nga ginigiyahan hira han “anghel han Dios” ha ira pagbiyahe. (Eksodo 13:21, 22; 14:19) Yana, makakasarig kita nga hi Jehova kaupod han iya katawohan basi giyahan, panalipdan, ngan talwason hira. Malalaoman naton an saad: “[Hi Jehova] diri nagpapasibaya ha iya mga baraan; hira ginbabantayan hin waray kataposan.” (Salmo 37:28) Diri gud naton hingalimtan an gamhanan nga mga anghel nga nabulig ha mga surugoon han Dios yana. Tungod han ira suporta, ‘makakatindog kita hin marig-on ngan makakakita han pagluwas ni Jehova.’—Eksodo 14:13, NW.

18. Kay ano nga kinahanglan aton ‘isul-ot an bug-os nga hinganiban han Dios’?

¹⁸ Ano an makakabulig ha aton ngatanan nga ‘makatindog hin marig-on’ ha dalan han kamatuoran? An pagsul-ot han espirituwal nga hinganiban ha pakig-away nga iginhulagway ni Pablo ha iya surat ha mga taga-Efeso. Tigamni nga ginsagdonan kita niya nga ‘isul-ot an bug-os nga hinganiban han Dios.’ Iginsusul-ot ba naton an ngatanan nga bahin hinin espirituwal nga hinganiban? Ha maabot nga tuig, maaramon nga usisahon han kada tagsa an iya kalugaringon basi masiguro nga iginsusul-ot niya hin maopay an ngatanan nga bahin hito nga hinganiban. An aton kaaway, hi Satanas nga Yawa, maaram han aton kaluyahan ngan nangangalimbasog hiya nga malit-agan o masulay kita. May-ada kita “pakig-away” ha magraot nga espiritu. Kondi, pinaagi han kusog ni Jehova, magdadaog kita!—Efeso 6:11-18; Proberbios 27:11.

19. Kon makapailob kita, magkakaada kita ano nga pribilehiyo?

¹⁹ Hi Jesus nagsiring ha iya mga sumurunod: “Ha iyo kamailob matitipigan an iyo mga kalag.” (Lukas 21:19) Hinaot magin usa kita hadton matinumanon nga nagpapailob ha anoman nga kakurian nga bangin atubangon nira ngan makapribilehiyo ha ‘pagtindog hin marig-on ngan pagkita han pagluwas ni Jehova’ pinaagi han iya diri takos nga pagkabuotan.

Ano an Imo Baton?

• Ano nga makapainteres nga mga hitabo an hirani na umabot?

• Paonan-o ipinakita ni Jehova an iya nagluluwas nga gahum han 1513 A.K.P.?

• Determinado ka nga buhaton an ano ha tidaraon?

[Mga Pakiana]

[Blurb ha pahina 20]

An teksto para ha tuig han 2008: “Tindog hin marig-on ngan kitaa an pagluwas ni Jehova.”—Eksodo 14:13, NW.

[Retrato ha pahina 17]

“An ngatanan nga mga butang nga nahisurat na nga daan ginsurat ha pagtutdo ha aton”

[Retrato ha pahina 18]

An pagin matig-a ni Paraon nagresulta hin kalamidad ha Ehipto

[Retrato ha pahina 19]

Natalwas an Israel han ginsunod nira an ngatanan nga iginsugo ni Jehova