Waray Hinganiban nga Ginhitsura Patok ha Imo an Maglalampos
Waray Hinganiban nga Ginhitsura Patok ha Imo an Maglalampos
“Waray hinganiban nga ginhitsura patok ha imo nga mauswag.”—ISAIAS 54:17.
1, 2. Paonan-o ipinapakita han mga eksperyensya han mga Saksi ni Jehova ha Albania an pagin tinuod han Isaias 54:17?
HA NAGLABAY nga mga dekada, ha usa ka gutiay nga kabukiran nga nasud ha sur-este nga Europa, may-ada grupo han maisugon nga mga Kristiano. An usa nga Komunista nga gobyerno nga diri natoo ha Dios nangalimbasog ha pagpoo ha ira. Kondi, an pagpasakit, pagpriso, ngan pag-atake han media waray makapoo ha ira. Hin-o hira? Hira an mga Saksi ni Jehova ha Albania. Bisan kon makuri hinduro an ira pagkatirok ngan pagsangyaw, an ira pagkamapinadayunon ha sulod hin mga dekada nagpahitaas ngan nagpasidungog ha Kristianidad ngan nakagdayaw ha ngaran ni Jehova. Ha naglabay nga tuig, ha dedikasyon han ira bag-o nga pasilidad han sanga nga opisina, usa nga maiha na nga matinumanon nga Saksi an nagsiring: “Bisan pa kon ano an himoon ni Satanas, pirme hiya mapipirde, ngan pirme hi Jehova magdadaog!”
2 Ini ngatanan ebidensya han pagin tinuod han saad han Dios ha iya katawohan ha Isaias 54:17: “Waray hinganiban nga ginhitsura patok ha imo nga mauswag; ngan an tagsa-tagsa nga dila nga mabangon patok ha imo ha paghukom imo pagsasayupon.” Pinamamatud-an han kasaysayan nga waray mahihimo an kalibotan ni Satanas ha pagpaundang ha dedikado nga mga surugoon ni Jehova nga Dios ha pagsingba ha iya.
Diri Malampuson nga mga Pangalimbasog ni Satanas
3, 4. (a) Ano an nahiuupod ha mga hinganiban ni Satanas? (b) Ha ano nga paagi napamatud-an nga diri naglalampos an mga hinganiban han Yawa?
3 An mga hinganiban nga ginagamit kontra ha tinuod nga mga magsiringba nag-uupod han mga pagdiri, pagkamadarahog, pagpriso, ngan ‘pagbuhat hin maraot pinaagi han kasugoanan.’ (Salmo 94:20) Ha pagkamatuod, ha iba nga katunaan, bisan hini nga takna nga gin-aadman han mga Saksi ni Jehova ini nga artikulo, inin tinuod nga mga Kristiano ‘ginpuproybahan’ may kalabotan han ira integridad ha Dios.—Pahayag 2:10.
4 Pananglitan, usa nga sanga nga opisina han mga Saksi ni Jehova an nagreport nga ha sulod la hin usa ka tuig, may-ada 32 nga kaso han pagkastigo ha mga surugoon han Dios samtang nagsasangyaw. Dugang pa, may-ada 59 nga insidente diin gin-aresto han mga polis an mga nagsasangyaw—batan-on ngan lagas, lalaki ngan babaye. An iba ginkuhaan hin fingerprint, ginretratohan, ngan ginpriso nga baga hin mga kriminal. An pipira gintarhog nga kakastiguhon. Ha usa pa nga nasud, sobra 1,100 na yana an nakarekord nga kaso han mga Saksi nga gin-aresto, ginmultahan, o ginkastigo. Sobra 200 hini an nahitabo ha adlaw han nagkatirok hira ha pagsaurog han kamatayon ni Jesus! Kondi, an espiritu ni Jehova nabulig ha iya katawohan nga makailob bisan pa han duro nga kakurian dinhi hini nga katunaan ngan ha iba nga nasud. (Sakarias 4:6) An duro nga kasina han kaaway diri makakapugong han baba hadton nagdadayaw kan Jehova. Oo, nasarig kita nga waray hinganiban an makakapugong han katuyoan han Dios.
Ginkondenar an Buwaon nga mga Dila
5. Ano nga buwaon nga mga ‘dila an binangon’ kontra ha mga surugoon ni Jehova ha siyahan nga siglo?
5 Hi Isaias nagtagna nga pamamatud-an han katawohan han Dios nga sayop an “tagsa-tagsa nga dila” nga nakontra ha ira. Ha siyahan nga siglo, an mga Kristiano agsob nga puntirya han sayop nga mga impormasyon ngan iginhuhulagway hira nga mga magburuhat hin maraot. An ginsiring ha Buhat 16:20, 21 usa han ehemplo han sugad nga akusasyon: “Ini nga mga tawo . . . nagsasamok hin daku han aton bungto. Ngan iginsusumat an mga batasan, nga diri angay karawaton, bisan pagsunda, kay kita mga Romanhon.” Ha usa pa nga panhitabo, gin-aghat han relihiyoso nga mga parakontra an mga magmarando han syudad nga kontrahon an mga sumurunod ni Kristo, nasiring: “Ini nga mga nagbaliskad han kalibotan nakanhi man dinhi; . . . [ngan hira] naghihimo hin kontra ha mga kasugoanan ni Cesar.” (Buhat 17:6, 7) Hi apostol Pablo gintawag nga “maamong-among” ngan lider hin sekta nga nag-aaghat hin sedisyon ha “bug-os nga kalibotan.”—Buhat 24:2-5.
6, 7. Ano an usa nga paagi nga nagpapakita nga ginkukondenar han tinuod nga mga Kristiano an berbal nga pagpakaraot ha ira?
6 Tungod hito, diri kita nahipapausa nga an tinuod nga mga Kristiano yana tinuyo nga ginpapakaraot. Kay ano nga masisiring nga ginkukondenar naton an sugad nga berbal nga pagpakaraot?—Isaias 54:17.
7 An sugad nga mga akusasyon ngan propaganda agsob nga napapamatud-an nga buwa pinaagi han maopay nga paggawi han mga Saksi ni Jehova. (1 Pedro 2:12) Kon ipinapakita han mga Kristiano nga masinugtanon hira ha balaud ngan limpyo ha moral nga nagpapakita hin tinuod nga pagtagad ha kaopayan han ira mga igkasi-tawo, an mga akusasyon ha ira napapamatud-an nga buwa. An aton maopay nga paggawi nagpapamatuod nga matadong kita. Samtang nakikita han iba an aton padayon nga pagbuhat hin maopay, agsob nga napapagios hira ha pagdayaw han aton langitnon nga Amay ngan ha pagkilala han hitaas nga paagi han pagkinabuhi han iya mga surugoon.—Isaias 60:14; Mateo 5:14-16.
8. (a) Ano usahay an kinahanglan basi depensahan an aton gintotoohan uyon ha Kasuratan? (b) Ha pagsubad kan Kristo, paonan-o naton ginkukondenar an mga parakontra?
8 Dugang pa ha aton Kristiano nga paggawi, usahay bangin kinahanglan nga aton maisugon nga depensahan an aton tinotoohan uyon ha Kasuratan. An usa nga paagi amo an pag-apela ha mga gobyerno ngan hukmanan para hin proteksyon. (Ester 8:3; Buhat 22:25-29; 25:10-12) Han nakanhi hi Jesus ha tuna, may mga kahimtang nga prangka nga binabaton niya an iya mga kritiko ngan pinamamatud-an nga sayop an ira mga akusasyon. (Mateo 12:34-37; 15:1-11) Ha pagsubad kan Jesus, ginsasalingabot naton an higayon nga isaysay hin matin-aw ha iba an aton sinsero nga gintotoohan. (1 Pedro 3:15) Hinaot diri gud naton tugotan an pagtamay ha eskwelahan, trabaho, o han diri-tumuroo nga mga paryente nga magpaundang ha aton ha pagpahayag han kamatuoran han Pulong han Dios.—2 Pedro 3:3, 4.
Jerusalem—“Usa nga Mabug-at nga Bato”
9. Ano nga Jerusalem an ginsisimbolohan han “mabug-at nga bato” nga gin-unabi ha Sakarias 12:3, ngan hin-o an nagrirepresentar hito ha tuna?
9 Ipinapatin-aw han tagna ni Sakarias an hinungdan kon kay ano nga ginkukontra han mga nasud an tinuod nga mga Kristiano. Tigamni an ginsisiring han Sakarias 12:3: “Mahinanabo hadto nga adlaw, nga akon hihimoon an Jerusalem nga usa nga mabug-at nga bato para ha ngatanan nga mga katawohan.” Ano nga Jerusalem an gin-uunabi hini nga tagna? Ini nga tagna nga may kalabotan ha Jerusalem naaplikar ha “langitnon nga Jerusalem,” an langitnon nga Ginhadian diin gintawag an dinihogan nga mga Kristiano. (Hebreo 12:22) May-ada gutiay nga nanhibilin hinin manurunod han Mesianiko nga Ginhadian nga aanhi pa ha tuna. Kaupod an ‘iba nga mga karnero,’ ira ginsasagda an mga tawo nga magin sakop han Ginhadian han Dios samtang may-ada pa panahon. (Juan 10:16; Pahayag 11:15) Ano an reaksyon han mga nasud hini nga imbitasyon? Ano an kalabotan hini nga kapahayagan ha suporta ni Jehova ha tinuod nga mga magsiringba yana? Aton mahibabaroan ini samtang aton dugang nga gin-uusisa an kahulogan han Sakarias kapitulo 12. Ha pagbuhat hito, makakasarig kita nga ‘waray hinganiban nga mauswag’ kontra ha mga dinihogan han Dios ngan ha ira dedikado nga mga kaupod.
10. (a) Kay ano nga gin-aatake an katawohan han Dios? (b) Ano an nahihitabo hadton nangangalimbasog ha pagkuha han “mabug-at nga bato”?
10 Ipinapakita han Sakarias 12:3 nga an mga nasud “masasamad gud.” Paonan-o ini nahitatabo? Nagsugo an Dios nga kinahanglan igsangyaw an maopay nga sumat han Ginhadian. Ginsusunod gud han mga Saksi ni Jehova ito nga obligasyon. Kondi, an pagpasamwak han Ginhadian sugad nga an amo la nga paglaom han katawohan nagigin “usa nga mabug-at nga bato” ha mga nasud. Nangangalimbasog hira ha pagkuha hito pinaagi ha pag-ulang ha mga magsarangyaw han Ginhadian. Tungod hito, an nag-uulang nga mga nasud ‘nasamad gud.’ Nadaot pa ngani an ira reputasyon tungod han ira makaarawod nga kapakyasan. Diri nira napapahilom an tinuod nga mga magsiringba nga nagpapabili ha pribilehiyo han pagpasamwak han “waray kataposan nga maopay nga sumat” han Mesianiko nga Ginhadian han Dios antes matapos ini nga sistema. (Pahayag 14:6) Han nakita han gwardya ha prisohan ha usa nga nasud ha Aprika an kamadarahog nga ginbuhat ha mga surugoon ni Jehova, hiya nagsiring: ‘Ginkakaragan niyo an iyo kusog ha pagtimaraot hini nga mga tawo. Diri gud hira magkukompromiso. Nagdadamu la hira.’
11. Paonan-o gintuman han Dios an iya saad ha Sakarias 12:4?
11 Alayon basaha an Sakarias 12:4. Hi Jehova nagsaad nga simboliko nga bubutahon ngan ‘hahadlukon’ niya adton nakikig-away ha iya maisugon nga mga mensahero. Iya ito gintuman. Pananglitan, ha usa nga nasud diin igindidiri an tinuod nga pagsingba, waray mapugngi han mga parakontra nga makarawat han katawohan han Dios an mga literatura. Usa nga pahayagan an nagsiring pa ngani nga nagamit an mga Saksi ni Jehova hin mga lobo basi an literatura makasulod ha nasud! Natuman an saad han Dios ha iya maunungon nga mga surugoon: “Akon pupukraton an akon mga mata, . . . hahampakon ko ha pagkabuta an tagsa nga kabayo han mga katawohan.” Tungod kay nabuta han duro nga kasina, an mga kaaway han Ginhadian diri maaram kon makain hira. Kondi, kombinsido kita nga luluwason ni Jehova an iya katawohan sugad nga grupo ngan tatagdon an ira kaopayan.—2 Hadi 6:15-19.
12. (a) Ha ano nga paagi nagharing hin kalayo hi Jesus han nakanhi hiya ha tuna? (b) Ha ano nga paagi nga nagpapalaga an dinihogan nga nanhibilin ha espirituwal nga paagi, ngan ano an mga resulta?
12 Alayon basaha an Sakarias 12:5, 6. “An mga pangulo ha Juda” nagtutudlok ha mga nagmamangno ha katawohan han Dios. Gindadasig gud hira ni Jehova para ha kaopayan han tunan-on nga bahin han iya Ginhadian. Ha usa nga higayon, hi Jesus nagsiring ha iya mga disipulo: “Ako nakanhi ha pagbutang hin kalayo ha tuna.” (Lukas 12:49) Oo, sugad hin nagharing hiya hin simboliko nga kalayo. Pinaagi han iya madasigon nga pagsangyaw, iginpatin-aw niya ha mga tawo nga an mensahe han Ginhadian amo an pinakaimportante. Nakaaghat ini hin duro nga kontrobersya ha bug-os nga nasud han mga Judio. (Mateo 4:17, 25; 10:5-7, 17-20) Ha pariho nga paagi, “sugad hin karaha nga suluran hin kalayo dida ha mga sungo, ngan sugad hin naglilinaga nga sulo dida ha mga upong,” an mga sumurunod ni Kristo ha aton panahon nagpapalaga liwat ha espirituwal nga paagi. Prangka nga iginbuhayhag han libro nga iginpublikar han 1917 nga The Finished Mystery a an pagkasalingkapaw han Kakristianohan. Nasina gud hito an mga klero. Ha mas bag-o la, an Kingdom News Num. 37, “Hirani na an Kataposan han Palso nga Relihiyon!” nagpagios ha damu nga tawo nga dumapig o kumontra ha Ginhadian han Dios.
Naluwas an “mga Salapdag han Juda”
13. Ano an iginpapasabot han mga pulong nga “mga salapdag han Juda,” ngan kay ano nga luluwason hira ni Jehova?
13 Alayon basaha an Sakarias 12:7, 8. Ha kadaan nga Israel, ordinaryo la an mga salapdag nga usahay ginagamit han mga magbarantay han kakarnerohan ngan parauma. Hira an siyahan nga naaapektohan ngan nagkikinahanglan hin panalipod kon naatake an kaaway nga nasud ha Jerusalem. An mga pulong nga “mga salapdag han Juda” nagpapasabot nga an dinihogan nga nanhibilin ha aton panahon aada ha lugar nga waray panalipod, siring pa, ha gawas han kinuta nga mga syudad. Didto, maisugon nga gindidepensahan nira an may kalabotan ha Mesianiko nga Ginhadian. Hi Jehova han mga kasundalohan magluluwas “siyahan han mga salapdag han Juda” tungod kay hira an puntirya han pag-atake ni Satanas.
14. Paonan-o gindidepensahan ni Jehova adton aada ha “mga salapdag han Juda” ngan ginpapanalipdan hira nga diri mahipakdol?
14 Oo, pinamamatud-an han kasaysayan nga gindidepensahan ni Jehova inin dinihogan nga mga embahador han Ginhadian ha ira mga “salapdag” ha gawas han kuta. b Iya ginpapanalipdan hira nga diri “mahipakdol” pinaagi ha pagparig-on ngan pagpakusog ha ira pariho kan David, an girriro nga hadi.
15. Kay ano nga karuyag ni Jehova nga ‘gunawon an ngatanan nga nasud,’ ngan san-o niya bubuhaton ini?
15 Alayon basaha an Sakarias 12:9. Kay ano nga karuyag ni Jehova nga ‘gunawon an ngatanan nga nasud’? Tungod kay padayon nga ginkukontra nira an Mesianiko nga Ginhadian. Ginhukman na hira tungod ha pagtalumpigos ngan pagtimaraot nira ha katawohan han Dios. Ha diri na mag-iiha, ultimo nga aatakehon han tunan-on nga mga ahente ni Satanas an tinuod nga magsiringba han Dios nga magriresulta ha kahimtang han kalibotan nga iginhulagway ha Biblia nga Har–Magedon. (Pahayag 16:13-16) Hito nga pag-atake, dedepensahan han Supremo nga Hukom an iya mga surugoon ngan pagbabaraanon an iya ngaran ha mga nasud.—Esekiel 38:14-18, 22, 23.
16, 17. (a) Ano “an panurundon han mga surugoon ni Jehova”? (b) Ano an ginpapamatud-an han aton pagpailob ha mga pag-atake ni Satanas?
16 Waray hinganiban hi Satanas nga makakapaluya han pagtoo o makakapatugnaw han kadasig han katawohan han Dios ha bug-os nga kalibotan. An aton espirituwal nga kamurayawan, nga resulta han nagluluwas nga gahum ni Jehova, amo “an panurundon han mga surugoon ni Jehova.” (Isaias 54:17) Waray bisan hin-o nga makakaagaw han aton kamurayawan ngan maopay nga relasyon ha Dios. (Salmo 118:6) Magpapadayon hi Satanas ha pag-aghat hin pagkontra ngan kasakitan. An aton maunungon nga pagpailob bisan pa han pasipara nagpapamatuod nga may-ada kita han espiritu han Dios. (1 Pedro 4:14) Iginpapasamwak ha bug-os nga kalibotan an maopay nga sumat han naestablisar na nga Ginhadian ni Jehova. Pariho hin nakakapanluya nga mga ulang, damu nga simboliko nga “ilalabyog nga mga bato” han pagkontra an iginbabato ha katawohan han Dios. Kondi, pinaagi han kusog ni Jehova nalalamposan ito han iya mga surugoon, nga sugad hin diri ito nakakaapekto ha ira. (Sakarias 9:15) Diri gud mapapaundang an dinihogan nga nanhibilin ngan an ira maunungon nga mga kaupod!
17 Ginpapamulat naton an bug-os nga kaluwasan ha mga pag-atake han Yawa. Naliliaw gud kita ha pasarig nga ‘waray hinganiban nga ginhitsura patok ha aton an mauswag; ngan an tagsa-tagsa nga dila nga mabangon patok ha aton ha paghukom aton pagsasayupon’!
[Mga footnote]
a Iginpublikar han mga Saksi ni Jehova kondi diri na gin-iimprinta yana.
b Para ha dugang nga detalye, kitaa an libro nga Jehovah’s Witnesses—Proclaimers of God’s Kingdom, pahina 675-6, iginpublikar han mga Saksi ni Jehova.
Ano an Imo Baton?
• Ano an nagpapakita nga an mga hinganiban ni Satanas diri naglalampos?
• Paonan-o nagin “mabug-at nga bato” an langitnon nga Jerusalem?
• Paonan-o ginluluwas ni Jehova an “mga salapdag han Juda”?
• Samtang nagtitikahirani an Armagedon, ano an imo ginsasarigan?
[Mga Pakiana]
[Retrato ha pahina 21]
An katawohan ni Jehova ha Albania nagpabilin nga matinumanon bisan pa han mga pag-atake ni Satanas
[Retrato ha pahina 23]
Ginpamatud-an ni Jesus nga sayop an ira mga akusasyon
[Retrato ha pahina 24]
Waray hinganiban nga ginhimo patok hadton nagpapasamwak han maopay nga sumat an maglalampos