“Adton mga Tinunguran” Nakarawat han Mensahe
“Adton mga Tinunguran” Nakarawat han Mensahe
“Adton mga tinunguran han kinabuhi nga waray kataposan ngatanan nagtoo.”—BUH. 13:48.
1, 2. Paonan-o ginios an siyahan-siglo nga mga Kristiano ha tagna ni Jesus nga an maopay nga sumat igsasangyaw ha bug-os nga tuna?
GINTITIPIGAN ha libro han Mga Buhat ha Biblia an makapainteres nga asoy kon paonan-o ginios an siyahan nga mga Kristiano ha tagna ni Jesus nga an maopay nga sumat han Ginhadian igsasangyaw ha bug-os nga tuna. (Mat. 24:14) An madasigon nga magsarangyaw nagpakita hin susbaranan para ha ngatanan nga masunod ha ira. Sugad nga resulta han maduruto nga pagsangyaw han mga disipulo ni Jesus ha Jerusalem, yinukot an nakig-upod ha siyahan-siglo nga kongregasyon, upod na an ‘daku nga kadam-an han mga saserdote.’—Buh. 2:41; 4:4; 6:7.
2 An siyahan nga mga misyonero binulig ha mas damu nga tawo nga karawaton an Kristianidad. Pananglitan, hi Felipe nagpakadto ha Samaria, ngan damu hinduro didto an namati ha iya iginsangyaw. (Buh. 8:5-8) Hi Pablo nagpakadto ha damu nga lugar nga iba-iba an iya kaupod. Ira iginsangyaw an mensahe mahitungod kan Kristo didto ha Kipre, mga bahin han Asia Minor, Masedonia, Gresya, ngan Italya. Ha mga syudad nga iya ginsangyawan, damu hinduro nga Judio ngan Griego an nagin Kristiano. (Buh. 14:1; 16:5; 17:4) Hi Tito nagsangyaw ha Kreta. (Tito 1:5) Hi Pedro aktibo hinduro ha Babilonya, ngan han paghimoa niya han iya siyahan nga surat han 62-64 K.P., an buruhaton han mga Kristiano bantog na ha Ponto, Galasia, Kapadosia, Asia, ngan Bitinia. (1 Ped. 1:1; 5:13) Makalilipay gud adto nga panahon! Maduruto nga nagsangyaw adton siyahan-siglo nga mga Kristiano salit nakasiring an mga kaaway nga hira “nagbaliskad han kalibotan.”—Buh. 17:6; 28:22.
3. Ano an mga resulta han pagsangyaw yana han mga parasamwak han Ginhadian, ngan ano an epekto hito ha imo?
3 Ha aton panahon liwat, daku gud an pag-uswag ha Kristiano nga kongregasyon. Diri ka ba napaparig-on kon nababasa mo an tinuig nga report han mga Saksi ni Jehova ngan nakikita an mag-opay nga resulta ha bug-os nga kalibotan? Diri ka ba nalilipay nga an mga parasamwak han Ginhadian nagdumara hin sobra unom ka milyon nga pag-aram ha Biblia durante han 2007 nga tuig han pag-alagad? Dugang pa, an kadamu han tinambong ha Memoryal han kamatayon ni Jesu-Kristo han naglabay nga tuig nagpapakita nga hirani napulo ka milyon nga diri pa Saksi ni Jehova an interesado gud ha maopay nga sumat. Ipinapakita hini nga daku pa gud an pagbubuhaton.
4. Hin-o an nakarawat han mensahe han Ginhadian?
4 Yana, sugad han ha siyahan nga siglo, “adton mga tinunguran han kinabuhi nga waray kataposan” nakarawat han mensahe han kamatuoran. (Buh. 13:48) Gintitirok ni Jehova an sugad nga mga tawo ngada ha iya organisasyon. (Basaha an Hagay 2:7.) Ano nga disposisyon ha ministeryo an kinahanglan tipigan naton basi makabulig hin bug-os hini nga pagtirok?
Pagsangyaw nga Waray Ginpapasulabi
5. Ano nga klase hin mga tawo an inuuyonan ni Jehova?
5 Nasabtan han siyahan-siglo nga mga Kristiano nga ‘an Dios waray ginpapasulabi ha mga tawo; kondi tikang ha ngatanan nga nasud hiya nga nahahadlok ha iya, ngan nagbubuhat hin matadong, naruruyagan niya.’ (Buh. 10:34, 35) An naruruyag magkaada hin maopay nga relasyon kan Jehova, kinahanglan tumoo ha halad lukat ni Jesus. (Juan 3:16, 36) Ngan kaburut-on ni Jehova nga “an ngatanan nga mga tawo maluwas, ngan makadangat ha pagkilala han kamatuoran.”—1 Tim. 2:3, 4.
6. Ano an diri sadang buhaton han magsarangyaw han Ginhadian, ngan kay ano?
6 Diri maopay kon hukman nga daan han mga parasamwak han maopay nga sumat an mga tawo tungod ha ira rasa, kahimtang ha kinabuhi, hitsura, relihiyon, o iba pa nga hinungdan. Pamalandonga ini: Diri ka ba mapasalamaton nga an siyahan nga nagsumat ha imo han Kasuratanhon nga kamatuoran waray maghukom nga daan ha imo? Salit kay ano nga mag-aalang ka ha pagsumat han mensahe nga magluluwas han kinabuhi han bisan hin-o nga bangin mamati hito?—Basaha an Mateo 7:12.
7. Kay ano nga kinahanglan likyan naton an paghukom ha aton ginsasangyawan?
7 Ginpili ni Jehova hi Jesus sugad nga Hukom; salit waray kita katungod ha paghukom ha bisan hin-o. Husto ito, tungod kay—diri pariho kan Jesus—makakaghukom la kita sumala ha ‘hinkikit-an han aton mga mata’ o ‘hinbabatian han aton mga talinga,’ samtang hi Jesus maaram kon ano an aada ha hunahuna ngan kasingkasing.—Isa. 11:1-5; 2 Tim. 4:1.
8, 9. (a) Ano nga klase hin tawo hi Saulo antes hiya magin Kristiano? (b) Ano an igintututdo ha aton han eksperyensya ni Pablo?
8 An ngatanan nga klase hin tawo posible magin surugoon ni Jehova. Usa nga makatirigamnan nga ehemplo amo hi Saulo han Tarso, nga ha urhi nagin hi apostol Pablo. Hi Saulo, usa nga Pariseo nga mabangis nga parakontra ha mga Kristiano. Tungod kay kombinsido hiya nga diri tinuod nga magsiringba ni Jehova an Kristiano nga kongregasyon, iya gintimaraot ito. (Gal. 1:13) Ha panhunahuna han tawo, baga hin imposible gud nga magin Kristiano hi Pablo, kondi nakita ni Jesus an maopay ha iya kasingkasing ngan ginpili hiya ha pagtuman han espesyal nga toka. Sugad nga resulta, hi Saulo nagin usa han pinakaaktibo ngan maduruto nga membro han siyahan-siglo nga kongregasyon.
9 Ano an igintututdo ha aton han iya eksperyensya? Ha aton teritoryo, bangin may-ada mga grupo hin tawo nga baga hin nakontra ha aton mensahe. Bisan kon baga hin imposible nga magin tinuod nga Kristiano an bisan hin-o ha ira, diri kita sadang umundang ha pangatadongan ha ira. Usahay bisan adton ginhuhunahuna naton nga diri interesado ha aton mensahe amo lugod an nakarawat. An sugo ha aton amo an pagpadayon han ‘waray ukoy’ nga pagsangyaw ha ngatanan.—Basaha an Buhat 5:42.
Naghuhulat an mga Bendisyon Hadton Nagsasangyaw nga ‘Waray Ukoy’
10. Kay ano nga diri kita sadang mag-alang ha pagsangyaw ha mga tawo nga baga hin makaharadlok? Isaysay an lokal nga mga eksperyensya.
10 An hitsura mahimo makalimbong. Pananglitan, hi Ignacio a nagtikang mag-aram ha Biblia ha mga Saksi ni Jehova samtang priso hiya ha usa nga nasud ha Amerika del Sur. Ginkakahadlokan hiya tungod han iya kamadarahog. Salit, an iya mga igkasi-priso nga naghihimo ngan nagbabaligya hin pipira nga butang, nagsugo ha iya nga mangulekta ha mga priso nga makuri magbayad. Kondi, samtang nag-uuswag hi Ignacio ha iya pag-aram ha Biblia ngan nag-aaplikar han iya hinbabaroan, inin madarahog ngan maton hadto, nagin buotan. Salit waray na nagsusugo ha iya nga mangulekta han mga utang. Kontento na hi Ignacio nga an kamatuoran han Biblia ngan an espiritu han Dios nagbag-o han iya personalidad. Mapasalamaton liwat hiya ha kawaray pagpasulabi han mga magwarali han Ginhadian nga nangalimbasog pagbulig ha iya ha pag-aram.
11. Kay ano nga padayon nga nabalik kita pagbisita ha mga tawo?
11 Padayon nga nabalik kita pagbisita ha mga nakaistorya naton mahitungod han maopay nga sumat, tungod kay an mga kahimtang ngan disposisyon mahimo magbag-o ngan nagbabag-o gud. Tikang ha aton urhi nga pagbisita ha ira, an iba bangin nagkasakit hin grabe, nawad-an hin trabaho, o namatayan hin hinigugma. (Basaha an Eklesiastes 9:11.) Tungod han mga panhitabo ha kalibotan, an mga tawo bangin mabaraka gud mahitungod han ira tidaraon. Salit an mga diri interesado hadto—o nakontra pa ngani—bangin magin interesado na. Kon sugad, diri kita sadang mag-alang ha pagsangyaw han maopay nga sumat ha ngatanan nga higayon.
12. Paonan-o naton sadang tagdon an mga tawo nga aton ginsasangyawan, ngan kay ano?
12 Kinaiya na han mga tawo nga iklasipikar ngan hukman an iba. Kondi, gintatagad ni Jehova an mga tawo sugad nga indibiduwal. Ginkikita niya an mag-opay nga kalidad han kada tagsa. (Basaha an 1 Samuel 16:7.) Ha ministeryo, sadang mangalimbasog kita nga buhaton liwat ito. Damu nga eksperyensya an nagkakaada mag-opay nga resulta kon gintatagad naton hin maopay an ngatanan nga aton ginsasangyawan.
13, 14. (a) Kay ano nga sayop an impresyon ni Sandra ha iya ginsangyawan? (b) Ano an mahibabaroan naton tikang hini nga eksperyensya?
13 Hi Sandra, usa nga payunir nga nakigbahin ha pagsangyaw ha usa nga isla han Carribbean han nasangyawan niya hi Ruth, nga aktibo hinduro ha mga pyesta ha karnabal. Makaduha nga ginkoronahan hi Ruth sugad nga rayna han karnabal ha bug-os nga nasud. Nagpakita hiya hin sinsero nga interes ha iginsaysay ni Sandra, salit ginhikay an pag-aram ha Biblia. Hi Sandra nagsiring: “Pagsulod ko ha ira salas, nakita ko an daku nga retrato ni Ruth nga nakabiste hin magarbo nga pankarnabal, ngan an mga tropiyo nga iya dinag-an. Sayop nga naghunahuna ako nga diri mahimo magpabilin nga interesado ha kamatuoran an usa nga popular ngan aktibo gud ha karisyohan ha karnabal. Salit inundang ako ha pagbisita ha iya.”
14 Paglabay hin pipira ka panahon, kinadto hi Ruth ha Kingdom Hall, ngan katapos han katirok, nagpakiana hiya kan Sandra, “Kay ano nga waray mo na ako bisitaha?” Nangaro hin pasaylo hi Sandra ngan nagsabot hira nga igpadayon an pag-aram. Madagmit nga nag-uswag hi Ruth, gintangtang niya an iya mga retrato ha karnabal, nagtikang makigbahin ha ngatanan nga buruhaton ha kongregasyon, ngan nagdedikar han iya kinabuhi kan Jehova. Syempre, ha urhi nasantop ni Sandra nga sayop an iya siyahan nga impresyon.
15, 16. (a) Ano an nagin resulta han pagsangyaw ni Joyce ha iya bayaw? (b) Kay ano nga an kahimtang han usa nga paryente diri sadang makapugong ha aton ha pagsangyaw ha iya?
15 Mag-opay liwat an resulta han damu nga nagsangyaw ha diri-Saksi nga mga kapamilya, bisan kon baga hin diri hira interesado. Tagda pananglitan an eksperyensya ni Joyce, usa nga Saksi ha Estados Unidos. An iya bayaw gawas-sulod ha prisohan tikang pa han tinedyer hiya. “Siring han mga tawo nga waray pulos an iya kinabuhi,” nagsiring hi Joyce, “tungod kay nagdudroga hiya, kawatan, ngan damu nga magraot an iya ginbuhat. Bisan pa hito, nagpadayon ako ha pagsumat ha iya han mga kamatuoran han Biblia ha sulod hin 37 ka tuig.” Hura nga ginbalosan an mapailubon nga pangalimbasog ni Joyce ha pagbulig ha iya bayaw han ha kataposan, nagtikang hiya pag-aram ha Biblia ha mga Saksi ni Jehova ngan naghimo hin daku nga pagbag-o ha iya kinabuhi. Diri pa la maiha, ha edad nga 50, nabawtismohan an iya bayaw ha usa nga distrito nga kombensyon ha California, E.U.A. Hi Joyce nagsiring: “Nakatangis ako tungod ha kalipay. Malipayon hinduro ako nga waray gud ako umundang ha pagsangyaw ha iya!”
16 Bangin mag-alang ka pag-istorya ha mga paryente mahitungod han kamatuoran han Biblia tungod han ira kahimtang. Kondi, hi Joyce waray gud mag-alang pagsangyaw ha iya bayaw. Kon mag-alang kita, paonan-o naton mahibabaroan kon ano an aada ha kasingkasing han usa nga tawo? Bangin sinsero nga nagbibiling hiya han kamatuoran. Salit, ayaw pag-alang ha paghatag ha iya hin higayon nga mabilngan ito.—Basaha an Proberbios 3:27.
Epektibo nga Bulig ha Pag-aram ha Biblia
17, 18. (a) Ano an ipinapakita han mga report tikang ha bug-os nga kalibotan mahitungod han kapulsanan han libro nga Ano Gud ba an Igintututdo han Biblia? (b) Ano an imo makapadasig nga eksperyensya ha paggamit hini nga libro?
17 Ipinapakita han mga report tikang ha mga nasud ha bug-os nga kalibotan nga damu nga tangkod-an-kasingkasing an nakarawat han libro nga bulig ha pag-aram nga Ano Gud ba an Igintututdo han Biblia? Hi Penni, usa nga payunir ha Estados Unidos, nakagtikang hin pipira nga pag-aram nga ginagamit ini nga libro. Duha ha ira an edaran na nga debotado nga membro han ira relihiyon. Waray ideya hi Penni kon ano an ira magigin reaksyon ha Kasuratanhon nga mga kamatuoran nga iginsasaysay ha Igintututdo han Biblia. Bisan pa hito, hiya nagsurat, “Tungod han matin-aw, lohikal, ngan halipot nga pagsaysay han impormasyon, waray pagriwa o pagruhaduha nga kinarawat dayon nira nga an ira hinbabaroan amo an kamatuoran.”
18 Hi Pat, usa nga magwarali ha Britanya, nagdumara hin pag-aram ha Biblia ha babaye nga binaya ha usa nga nasud ha Asia. Ito nga babaye napiritan pagbaya ha iya nasud han an iya bana ngan anak nga kalalakin-an gindara han mga rebelde nga sundalo, ngan waray na niya hira hikit-i utro. Gintarhog hiya nga papatayon, ginsunog an ira balay, ngan sunod-sunod nga ginlugos han damu nga lalaki. Tungod hini ngatanan, inabat niya nga waray na hinungdan nga mabuhi pa hiya, salit damu ka beses nga nagplano hiya pag-unay. Kondi, tungod han pag-aram ha Biblia, nagkaada hiya hin paglaom. “An simple nga pagsaysay ngan mga ilustrasyon ha Igintututdo han Biblia nakabantad gud ha iya,” nagsurat hi Pat. Madagmit nga nag-uswag hiya, nagin kwalipikado nga diri-bawtismado nga magwarali, ngan naghingyap hiya nga magpabawtismo ha sunod nga asembleya. Makalilipay gud an pagbulig ha mga sinsero nga makasabot ngan magpabili han paglaom nga igintatanyag han Kasuratan!
“Diri Kita Manluya ha Pagbuhat han Maopay”
19. Kay ano nga gin-aapura gud an pagsangyaw?
19 Ha paglabay han tagsa nga adlaw, labaw nga nagigin apurado an sugo ha aton nga magsangyaw ngan maghimo hin mga disipulo. Kada tuig, yinukot han naruruyag mahibaro mahitungod ha Dios an nakarawat han aton iginsasangyaw. Kondi, “an daku nga adlaw ni Jehova hirani na,” nangangahulogan nga adton nagpapabilin ha espirituwal nga kasisidman “hirani na pamatayon.”—Sep. 1:14; Prob. 24:11.
20. An kada tagsa ha aton sadang magin determinado nga buhaton an ano?
20 Mabubuligan pa gihapon naton hira. Kondi basi mahimo naton ito, kinahanglan magsubad kita ha siyahan-siglo nga mga Kristiano nga ‘waray ukoy ha panutdo ngan pagwali’ han maopay nga sumat mahitungod han Kristo, hi Jesus. (Buh. 5:42) Sunda an ira susbaranan pinaagi han pagin mapinadayunon bisan pa han kakurian, pagpauswag han imo paagi han pagtutdo, ngan pagsangyaw ha ngatanan nga waray ginpapasulabi! “Diri kita manluya ha pagbuhat han maopay,” kay kon magpadayon kita, mag-aani kita hin hura nga bendisyon han pagin inuyonan han Dios.—2 Tim. 4:2; basaha an Galasia 6:9.
[Footnote]
a Ginbag-o an iba nga ngaran.
Ano an Imo Baton?
• Hin-o an nakarawat han maopay nga sumat?
• Kay ano nga sadang likyan naton an paghukom nga daan ha aton ginsasangyawan?
• Ano an mga resulta han paggamit han libro nga Ano Gud ba an Igintututdo han Biblia?
[Mga Pakiana]
[Retrato ha pahina 13]
Yinukot nga tangkod-an-kasingkasing an nakarawat han maopay nga sumat
[Retrato ha pahina 15]
Ano an aton mahibabaroan tikang ha mga pagbag-o ni apostol Pablo?
[Retrato ha pahina 16]
An mga parasamwak han maopay nga sumat diri naghuhukom nga daan ha mga tawo