An Bag-o nga Aradman nga Edisyon han An Barantayan

INI nga magasin nga ginbabasa mo yana amo an siyahan nga gowa han aradman nga edisyon han An Barantayan. Karuyag namon isaysay an pipira nga bahin han bag-o nga pormat hini.

An aradman nga edisyon iginpupublikar para ha mga Saksi ni Jehova ngan ha mga estudyante han Biblia nga nag-uuswag hin maopay. Igpupublikar ito hin makausa kada bulan ngan magkakaada upat o lima nga aradman nga artikulo. An eskedyol ha pag-aram hini nga mga artikulo makikita ha kobre han magasin. Diri pariho ha panpubliko nga edisyon han An Barantayan, an aradman nga edisyon diri magkakaada hin magkalain-lain nga kobre para ha tagsa nga gowa, tungod kay diri ito itatanyag ha kanataran.

Ha pahina 2 han magasin, makikita mo an mapulsanon nga halipot nga sumaryo han katuyoan han tagsa nga aradman nga artikulo o serye ngan an ulohan han iba pa nga artikulo. Mabubuligan hini an mga nagdudumara han Pag-aram ha Barantayan samtang nag-aandam hira para ha mapulsanon nga paghisgot ha mga artikulo ha katirok han kongregasyon.

Maoobserbahan mo nga an aradman nga mga artikulo yana mas halipot kay han hadto. Salit, mas damu nga panahon an magagamit ha paghisgot han ginpapabug-atan nga mga teksto durante han Pag-aram ha Barantayan. Malipayon nga gindadasig ka namon nga basahon an ngatanan nga ginamit nga teksto kada semana. An iba nga teksto may instruksyon nga “basaha” ngan sadang ito basahon ngan hisgotan durante han Pag-aram ha Barantayan. Samtang an iba mahimo basahon liwat kon may-ada pa panahon. Ha iba nga artikulo, makikita mo an mga teksto nga may instruksyon nga “itanding.” Tungod kay an sugad nga mga teksto diri direkta nga may kalabotan ha nangunguna nga mga punto ha parapo, kasagaran nga diri ito babasahon ha katirok han kongregasyon. Kondi, ito nga mga teksto may-ada gihapon makapainteres nga dugang nga impormasyon, o bangin diri direkta nga nasuporta ito ha mga punto nga ginhihisgotan. Gin-aaghat ka namon nga basahon ito samtang nag-aandam ka para ha Pag-aram ha Barantayan. Bangin magamit mo ito ha imo mga komento.

An tinuig nga report diri na makikita ha An Barantayan. Tikang ha 2008, makikita ito ha suplemento ha An Aton Ministeryo ha Ginhadian sugad man ha Yearbook. Kondi, sugad han gin-unabi na, an aradman nga edisyon mag-uupod hin iba nga mga artikulo. Bisan kon damu hini an diri paghihisgotan ha katirok han kongregasyon, gin-aaghat ka nga basahon ito hin maopay. Espirituwal nga pagkaon liwat ito tikang ha “matinumanon ngan maaramon nga uripon.”—Mat. 24:45-47, NW.

An aradman ngan an panpubliko nga edisyon han An Barantayan diri magkaiba nga mga magasin. Ito nga duha pariho An Barantayan Nagsasamwak han Ginhadian ni Jehova. Ha pahina 2 may-ada ito magkapariho nga parapo nga nagsasaysay han katuyoan han An Barantayan. Ito nga duha ig-uupod ha tinuig nga tomo. Ngan an impormasyon tikang hito nga duha makikita ha “Nahinunumdoman Mo Ba?” nga bahin, nga igpupublikar ha aradman nga edisyon.

Tikang han 1879, ha mga panahon han girra, kakurian ha pinansyal, ngan pagtimaraot, An Barantayan matinumanon nga nagpapasamwak han mga kamatuoran mahitungod han Ginhadian han Dios. Nag-aampo kami nga tungod han bendisyon ni Jehova, magpapadayon ito ha pagpasamwak pinaagi han bag-o nga pormat hito. Ngan nag-aampo kami nga hi Jehova magbibendisyon ha imo nga magbarasa, samtang ginagamit mo hin maopay an bag-o nga aradman nga edisyon han An Barantayan.