Gintatagad nga Takos Giyahan Ngadto ha mga Burabod han mga Tubig han Kinabuhi
Gintatagad nga Takos Giyahan Ngadto ha mga Burabod han mga Tubig han Kinabuhi
‘An Kordero magmamando ha ira ngadto ha mga burabod han mga tubig han kinabuhi.’—PAH. 7:17.
1. Ha Pulong han Dios, ano an tawag ha dinihogan nga mga Kristiano, ngan ano nga responsabilidad an iginhatag ha ira ni Jesus?
AN DINIHOGAN nga mga Kristiano nga nagmamangno han mga panag-iya ni Kristo ha tuna gintatawag ha Pulong han Dios nga “uripon nga masugot ngan buotan [“matinumanon ngan maaramon nga uripon,” NW].” Han gin-usisa ni Kristo ito nga “uripon” han 1918, iya nakita nga matinumanon nga nagtatagana hira hin espirituwal nga “pagkaon ha igo nga panahon.” Salit an Agaron nga hi Jesus nalipay ha pagtoka ha ira han ngatanan nga iya panag-iya. (Basaha an Mateo 24:45-47.) Hini nga paagi, antes makakarawat hin langitnon nga panurundon, an mga dinihogan nagsiserbi ha iba nga magsiringba ni Jehova dinhi ha tuna.
2. Isaysay kon ano an mga panag-iya ni Jesus.
2 An agaron may-ada awtoridad ha iya mga panag-iya, ngan magagamit niya ito ha paagi nga iya karuyag. Upod han mga panag-iya ni Jesu-Kristo, an nahitrono nga Hadi ni Jehova, an ngatanan nga butang dinhi ha tuna nga may kalabotan ha Ginhadian. Kaupod hito an “daku nga panon” nga nakita ni apostol Juan ha bisyon. Ini an iya paghulagway ha ira: “Kitaa, an kadam-an nga mga tawo [“daku nga panon,” NW], nga waray tawo nga sadang makaihap, tikang ha tagsa-tagsa nga nasud ngan ha ngatanan nga mga panon, ngan mga katawohan ngan mga yinaknan, nga nagkakatukdaw ha atubangan han hadianon nga lingkuranan, ngan han Kordero, ngan nanmamanapton hin mga magbusag nga panapton nga higlawig, ngan may-ada mga palwa dida ha ira mga kamot.”—Pah. 7:9.
3, 4. Kay ano nga masisiring nga daku hinduro an pribilehiyo han daku nga panon?
3 An mga membro hiton daku nga panon kaupod ha mga gin-unabi ni Jesus nga iya ‘iba nga mga karnero.’ (Juan 10:16) Naglalaom hira nga mabuhi ha waray kataposan ha paraiso nga tuna. Nasarig hira nga gigiyahan hira ni Jesus ngadto ha “mga burabod ha mga tubig han kinabuhi” ngan “an Dios magpapahid han ngatanan nga luha tikang ha ira mga mata.” Tungod hito, ira ‘pinanmunakan an ira mga higlawig nga panapton, ngan ginpabusag ito ha dugo han Kordero.’ (Pah. 7:14, 17) Nagpapakita hira hin pagtoo ha halad ni Jesus, salit ‘busag an ira higlawig nga panapton’ ha paniplatan han Dios. Pariho kan Abraham, iginpapahayag hira nga matadong sugad nga mga sangkay han Dios.
4 Dugang pa, tungod kay gintatagad han Dios nga matadong an nagtitikadamu nga daku nga panon han iba nga mga karnero, makakalaom hira nga maluwas ha kabungkagan hini nga sistema durante han daku nga kagol-anan. (Jak. 2:23-26) Mahimo hira magin duok kan Jehova, ngan sugad nga grupo may-ada hira makalilipay nga paglaom nga maluwas ha Armagedon. (Jak. 4:8; Pah. 7:15) Diri hira naglulugaring kondi kinaburut-on nga nag-aalagad ilarom han paggiya han langitnon nga Hadi ngan han iya dinihogan nga kabugtoan dinhi ha tuna.
5. Paonan-o ginsusuportahan han daku nga panon an dinihogan nga kabugtoan ni Kristo?
5 An mga dinihogan nakaeksperyensya na ngan padayon nga makakaeksperyensya hin duro nga pagkontra tikang ha kalibotan ni Satanas. Bisan pa hito, makakasarig hira ha bulig han ira mga kaupod tikang ha daku nga panon. Samtang nagtitikaguti na yana an mga dinihogan, an daku nga panon nadudugangan hin ginatos ka yukot kada tuig. An mga dinihogan diri personal nga makakagmangno ha tagsa han haros 100,000 nga kongregasyon ha bug-os nga kalibotan. Salit, an usa nga bulig nga ira nakakarawat tikang ha iba nga mga karnero amo an pag-alagad han kwalipikado nga kalalakin-an tikang ha daku nga panon sugad nga mga tigurang ha kongregasyon. Nabulig hira ha pagmangno ha minilyon nga Kristiano nga igintapod yana ha “matinumanon ngan maaramon nga uripon.”
6. Ano an igintagna mahitungod han suporta nga nakakarawat han mga dinihogan tikang ha ira kaupod nga iba nga mga karnero?
6 Igintagna ni propeta Isaias an kinaburut-on nga suporta nga nakakarawat han mga dinihogan tikang ha ira kaupod nga iba nga mga karnero. Hiya nagsurat: “Ha sugad hini nasiring hi Jehova: An buhat [“diri-binabayaran nga mga trabahador,” NW] han Ehipto, ngan an ibaraligya han Etiopia, ngan han mga Sabeahanon, mga tawo nga higtaas an tindog, makanhi ha imo, ngan hira maiimo; hira maglalanat ha imo.” (Isa. 45:14) An mga Kristiano yana nga may-ada tunan-on nga paglaom simboliko nga ‘naglalanat,’ o naglalakat ha luyo han dinihogan nga uripon nga klase ngan han Nagmamando nga Lawas hito ngan nasunod ha ira pagpanguna. Sugad nga “diri-binabayaran nga mga trabahador,” kinaburut-on ngan bug-os-kasingkasing nga ginagamit han iba nga mga karnero an ira kusog ngan katigayonan ha pagsuporta han bug-os-kalibotan nga pagsangyaw nga igintoka ni Kristo ha iya dinihogan nga mga sumurunod dinhi ha tuna.—Buh. 1:8; Pah. 12:17.
7. Para ha ano ginbabansay an daku nga panon?
7 Samtang ginsusuportahan han mga membro han daku nga panon an ira dinihogan nga kabugtoan, ginbabansay hira basi magin pundasyon han bag-o nga sosiedad nga maeksister katapos han Armagedon. Kinahanglan magin marig-on ito nga pundasyon, ngan an mga membro hito kinahanglan magin disidido ngan may kapas ha pagsunod ha giya han Agaron. An tagsa nga Kristiano gintatagan hin higayon ha pagpakita nga magigin may pulos hiya ha Hadi nga hi Kristo Jesus. Pinaagi han pagpakita hin pagtoo ngan pagkamaunungon yana, iya pinamamatud-an nga andam hiya sumugot kon an Hadi maghatag na ha iya hin mga instruksyon ha bag-o nga kalibotan.
Pinamamatud-an han Daku nga Panon an Ira Pagtoo
8, 9. Paonan-o pinamamatud-an han daku nga panon an ira pagtoo?
8 An iba nga mga karnero nga kaupod han kongregasyon han mga dinihogan nagpapamatuod han ira pagtoo ha magkalain-lain nga paagi. Siyahan, ira ginsusuportahan an mga dinihogan ha pagpasamwak han maopay nga sumat han Ginhadian han Dios. (Mat. 24:14; 28:19, 20) Ikaduha, kinaburut-on nga nagpapasakop hira ha pagpanguna han Nagmamando nga Lawas.—Heb. 13:17; basaha an Sakarias 8:23.
9 Ikatulo, ginsusuportahan han daku nga panon an ira dinihogan nga kabugtoan pinaagi ha pagkinabuhi uyon ha matadong nga mga prinsipyo ni Jehova. Nangangalimbasog hira ha pagkultibar han “gugma, kalipay, pakigdait, pagkamailob, pagkamalolooyon, pagkamaopay, pagkamatinooron, pagkaaghop, paggahum ha kalugaringon.” (Gal. 5:22, 23) Yana, damu an diri nagpapakita han sugad nga mga kalidad; lugod, nabatasan na nira an “mga buhat han unod.” Kondi, an daku nga panon determinado nga likyan an ‘pakighilawas, kahugawan, kalaw-ayan, pagsingba ha mga dios-dios, diwata, pagkaaway, pagsuhay, pangabugho, kasina, paglaris, pagbulag, pagkakabig, kaawa, paghubog, aringasa, ngan mga bagay nga sugad-sugad hini.’—Gal. 5:19-21.
10. Ano an determinasyon han daku nga panon?
10 Tungod kay diri kita hingpit, bangin makuri an pagpakita han mga bunga han espiritu, paglikay ha mga buhat han unod, ngan pag-ato ha pag-ipit han kalibotan ni Satanas. Bisan pa hito, determinado kita nga diri pabay-an nga magluya an aton pagtoo o an aton gugma kan Jehova tungod han kahulop nga resulta han aton mga kaluyahan, temporaryo nga kapakyasan, o limitasyon ha panlawas. Maaram kita nga tutumanon ni Jehova an iya saad—luluwason niya an daku nga panon tikang ha daku nga kagol-anan.
11. Ano nga mga taktika an ginagamit ni Satanas basi paluyahon an pagtoo han mga Kristiano?
11 Bisan pa hito, pirme kita nagbabantay tungod kay maaram kita nga an aton tinuod nga kaaway amo an Yawa, ngan diri hiya basta la nasurender. (Basaha an 1 Pedro 5:8.) Ginagamit niya an mga apostata ngan an iba pa basi kombinsihon kita nga buwa an mga katutdoan nga aton ginsusunod. Kondi kasagaran nga napapakyas ito nga taktika. Ha pariho nga paagi, bisan kon an pagtimaraot usahay nakakaulang ha pagsangyaw, agsob nga napaparig-on lugod hito an pagtoo han mga gintitimaraot. Salit, mas agsob gamiton ni Satanas an paagi nga ha iya hunahuna mas maglalampos ha pagpaluya ha aton pagtoo. Iya ginsasalingabot an pag-abat hin kahulop. An mga Kristiano ha siyahan nga siglo ginpahamangnoan mahitungod hini nga peligro han ginsidngan hira: “Pamurubuuton niyo adton [hi Kristo] nag-antos hin sugad nga mga pagtamay han mga magpakasasala kontra ha iya.” Kay ano? Basi “diri kamo magkabubutlaw, ngan diri manluya ha iyo mga kalag.”—Heb. 12:3.
12. Paonan-o napaparig-on han sagdon han Biblia an mga nahuhulop?
12 Inabat ka na ba nga baga hin diri ka na makakailob? May mga panahon ba nga naabat ka nga baga hin pirme ka na la napapakyas? Kon sugad hito an imo inaabat, ayaw tuguti hi Satanas nga salingabuton ito basi maulang an imo pag-alagad kan Jehova. An maduruto nga pag-aram ha Biblia, sinsero nga pag-ampo, pagtambong pirme ha mga katirok, ngan pakig-upod ha mga igkasi-Kristiano magpaparig-on ngan mabulig ha imo nga diri ‘manluya ha imo kalag.’ Nagsaad hi Jehova nga iya pakukusgon utro adton nag-aalagad ha iya, ngan makakasarig kita hito. (Basaha an Isaias 40:30, 31.) Isentro an imo panhunahuna ha mga buruhaton para ha Ginhadian. Likayi an diri importante nga mga buruhaton nga nakakaubos han panahon, ngan magin sagipo ha pagbulig ha iba. Pinaagi hito mapaparig-on ka nga makailob bisan pa han kahulop.—Gal. 6:1, 2.
Tikang ha Kagol-anan Ngadto ha Bag-o nga Kalibotan
13. Ano nga buruhaton an naghuhulat ha mga maluluwas ha Armagedon?
13 Katapos han Armagedon, damu hinduro nga binanhaw nga diri-magtadong an kinahanglan tutdoan han mga paagi ni Jehova. (Buh. 24:15) Kinahanglan mahibaro hira mahitungod han halad lukat ni Jesus; labot pa, kinahanglan tutdoan hira nga magpakita hin pagtoo hito nga halad basi makarawat an mga kapulsanan hito. Kinahanglan bayaan nira an sayop nga mga katutdoan ha relihiyon ngan an paagi han pagkinabuhi nira hadto. Kinahanglan mahibaro hira ha pagsul-ot han bag-o nga personalidad nga nagpapakilala han tinuod nga mga Kristiano. (Efe. 4:22-24; Kol. 3:9, 10) Damu an magigin buruhaton han iba nga mga karnero nga maluluwas ha Armagedon. Makalilipay gud an pag-alagad kan Jehova nga waray na pag-ipit ngan ulang han maraot nga kalibotan yana!
14, 15. Ihulagway kon ano an mahimo pag-iristoryahan han mga maluluwas ha daku nga kagol-anan ngan han binanhaw nga magtadong.
14 Damu liwat an hibabaroan han magtinumanon nga surugoon ni Jehova nga namatay antes han ministeryo ni Jesus ha tuna kon banhawon na hira. Mahibabaro hira kon hin-o an iginsaad nga Mesias, nga ira ginpinamulat kondi waray gud nira makita. Han buhi pa hira, ira na iginpakita nga andam hira magpatutdo kan Jehova. Handurawa la an kalipay ngan dungog ha pagbulig ha ira—pananglitan, ha pagsaysay kan Daniel han katumanan han mga tagna nga iya iginsurat kondi waray niya masabti!—Dan. 12:8, 9.
15 Syempre, bisan kon damu an hibabaroan han mga binanhaw tikang ha aton, damu liwat an aton igpapakiana ha ira. Maisusumat nira ha aton an detalye han mga hitabo nga gin-unabi ha Biblia kondi waray igsaysay hin detalyado. Hunahunaa an kalipay ha paghibaro han mga detalye mahitungod kan Jesus tikang ha iya patod nga hi Juan nga Parabaptis! Sigurado nga an aton hibabaroan tikang hiton magtinumanon nga saksi mabulig ha aton nga masabtan an Pulong han Dios hin labaw pa gud kay han aton nasasabtan yana. An magtinumanon nga surugoon ni Jehova nga nagkamatay na—upod na adton kaapi ha daku nga panon nga namatay ha panahon han kataposan—makakakarawat hin “mamaopay pa nga pagkabanhaw.” Nagtikang hira pag-alagad kan Jehova ha kalibotan nga ginmamandoan ni Satanas. Malilipay gud hira nga magpadayon ha pag-alagad ha mas maopay nga kahimtang ha bag-o nga kalibotan!—Heb. 11:35; 1 Juan 5:19.
16. Sumala ha tagna, ano an mahitatabo durante han Adlaw han Paghukom?
16 Durante han Adlaw han Paghukom, may-ada aabrihan nga mga basahon. Upod han Biblia, magigin basihan ito ha paghukom han ngatanan nga buhi kon takos ba hira kumarawat hin kinabuhi nga waray kataposan. (Basaha an Pahayag 20:12, 13.) Ha ikatarapos han Adlaw han Paghukom, an kada tagsa nagkaada na igo nga higayon ha pagpakita kon diin hiya nadapig ha isyu han pagkasoberano ha uniberso. Masuporta ba hiya ha Ginhadian han Dios ngan magpapagiya ha Kordero ngadto ha “mga burabod ha mga tubig han kinabuhi”? O makontra hiya ngan magdudumiri ha pagpasakop hito nga Ginhadian? (Pah. 7:17; Isa. 65:20) Hito nga panahon, an ngatanan dinhi ha tuna nagkaada na higayon nga personal nga magdesisyon nga diri apektado han napanunod nga sala o han maraot nga palibot. Waray na makakagkwestyon kon husto ba an ultimo nga paghukom ni Jehova. An magraot la an bubungkagon ha kadayonan.—Pah. 20:14, 15.
17, 18. Ano an malipayon nga ginpapamulat han dinihogan nga mga Kristiano ngan han iba nga mga karnero ha Adlaw han Paghukom?
17 An dinihogan nga mga Kristiano yana nga gintatagad nga takos kumarawat han Ginhadian malipayon nga nagpapamulat nga magmando durante han Adlaw han Paghukom. Daku gud ito nga pribilehiyo para ha ira! Ito mismo nga paglaom an nagpapagios ha ira nga sundon an sagdon ni Pedro ha ira kabugtoan ha siyahan nga siglo: “Panalinguhaon gud niyo an pagparig-on han pagtawaga ngan pagpilia ha iyo: kay kon pagbuhaton niyo ini nga mga butang, diri gud kamo manhihipakdol: kay hini nga pagkaagi ighahatag gud ha iyo an bug-os nga pagsulod ngadto ha ginhadian nga waray kataposan han aton Ginoo ngan Manluluwas nga hi Jesu-Kristo.”—2 Ped. 1:10, 11.
18 An iba nga mga karnero nalilipay para ha ira dinihogan nga kabugtoan. Determinado hira ha pagsuporta ha ira. Sugad nga mga sangkay han Dios yana, napapagios hira nga buhaton an ira bug-os nga mahihimo ha pag-alagad ha iya. Durante han Adlaw han Paghukom, malilipay gud hira nga bug-os-kasingkasing nga suportahan an mga kahikayan han Dios samtang ginigiyahan hira ni Jesus ngadto ha mga burabod han mga tubig han kinabuhi. Ha kataposan, tatagdon na gud hira nga takos magin tunan-on nga mga surugoon ni Jehova ha kadayonan!—Roma 8:20, 21; Pah. 21:1-7.
Nahinunumdoman Mo Ba?
• Ano an nahiuupod ha mga panag-iya ni Jesus?
• Paonan-o ginsusuportahan han daku nga panon an ira dinihogan nga kabugtoan?
• Ano an mga pribilehiyo ngan paglaom han daku nga panon?
• Ano an imo panhunahuna mahitungod ha Adlaw han Paghukom?
[Mga Pakiana]
[Retrato ha pahina 25]
Ginbunakan han daku nga panon an ira higlawig nga panapton ngan ginpabusag ito ha dugo han Kordero
[Retrato ha pahina 27]
Ano an karuyag mo hibaroan tikang ha binanhaw nga magtinumanon?