Gintatagad nga Takos Kumarawat han Ginhadian

“Amo ini an matuod nga tigaman han matadong nga paghukom han Dios; basi nga maihap [‘tagdon,’ NW] kamo nga mga takos ha ginhadian han Dios.”—2 TES. 1:5.

1, 2. Ano an katuyoan han Dios may kalabotan ha paghukom, ngan hin-o an maghuhukom?

 HAN mga 50 K.P., hi apostol Pablo kinadto ha Atenas. Tungod kay nasina hiya ha kalyap nga idolatriya nga iya nakita didto, napagios hiya ha paghatag hin maopay gud nga pahayag. Gintapos niya ito pinaagi hin kapahayagan nga posible gud nga nakadani han interes han mga pagano nga namamati ha iya. Hiya nagsiring: ‘[Yana] gintutugon han Dios an ngatanan nga tawo ha bisan diin nga magbasol. Kay hiya nagtigaman hin usa nga adlaw nga iya [gintuyo] nga hukman an kalibotan uyon ha katadongan pinaagi han iya gintungdan, nga nagparig-on ha ngatanan tungod han pagkabanhaw niya, tikang ha mga minatay.’—Buh. 17:30, 31.

² Importante gud nga pamalandungon naton nga an Dios nagtanda hin adlaw ha paghukom ha katawohan! Ipapadapat ito han usa nga waray ngarani ni Pablo ha iya pahayag ha Atenas kondi maaram kita nga hiya amo an binanhaw nga hi Jesu-Kristo. An iya paghukom mangangahulogan hin kamatayon o kinabuhi.

3. Kay ano nga naghimo hi Jehova hin kauyonan kan Abraham, ngan hin-o an may-ada importante nga bahin ha katumanan hito?

³ Ito nga Adlaw han Paghukom magigin 1,000 ka tuig. Ha ngaran ni Jehova, hi Jesus maghuhukom sugad nga Hadi han Ginhadian han Dios, kondi diri hiya mag-uusahan. Hi Jehova nagpili hin iba pa basi magmando kaupod ni Jesus ngan maghukom durante hito nga milenyo. (Itanding an Lukas 22:29, 30.) Haros 4,000 ka tuig na an naglabay, iginpahayag ni Jehova an basihan hito nga Adlaw han Paghukom han naghimo hiya hin kauyonan ha iya matinumanon nga surugoon nga hi Abraham. (Basaha an Genesis 22:17, 18.) Ito nga kauyonan matin-aw nga nagtikang han 1943 A.K.P. Syempre, waray masabti hin bug-os ni Abraham kon ano an magigin kahulogan hito para ha katawohan. Kondi yana, nasasabtan naton nga sumala hito nga kauyonan, an binhi ni Abraham may-ada importante nga bahin ha katumanan han katuyoan han Dios ha paghukom ha katawohan.

4, 5. (a) Hin-o an siyahan nga bahin han binhi ni Abraham, ngan ano an iya ginsiring mahitungod ha Ginhadian? (b) Kakan-o iginhatag an paglaom nga magin bahin han Ginhadian?

⁴ An siyahan nga bahin han binhi ni Abraham amo hi Jesus, nga gindihogan han baraan nga espiritu han 29 K.P. ngan nagin an iginsaad nga Mesias, o Kristo. (Gal. 3:16) Han sumunod nga tulo ngan tunga ka tuig,  iginsangyaw ni Jesus an maopay nga sumat han Ginhadian ha mga Judio. Katapos maaresto hi Juan nga Parabaptis, iginpahibaro ni Jesus nga an iba makakalaom nga magin membro hito nga Ginhadian han hiya nagsiring: “Tikang ha mga adlaw ni Juan nga Parabaptis ngada niyan, an ginhadian han mga langit amo an tumong nga ginpapangalimbasogan han mga tawo, ngan ginsasalingabot ito hadton padayon nga nangangalimbasog.”—Mat. 11:12, NW.

⁵ Makapainteres nga antes gud unabihon ni Jesus adton ‘magsasalingabot’ han Ginhadian ha langit, hiya nagsiring: “Matuod, ako nasiring ha iyo, nga waray natawo ha mga kababayin-an nga darodaku kan Juan nga Parabaptis; kondi an gigugutiayi ha ginhadian han langit darodaku pa ha iya.” (Mat. 11:11) Kay ano? Tungod kay an paglaom nga magin bahin han Ginhadian waray pa ihatag hin bug-os ha magtinumanon tubtob nga iginbubo an baraan nga espiritu han Pentekostes 33 K.P. Hito nga panahon, patay na hi Juan nga Parabaptis.—Buh. 2:1-4.

Iginpahayag nga Matadong an Binhi hi Abraham

6, 7. (a) Ha ano nga paagi magigin “sugad han mga bitoon ha mga langit” an binhi ni Abraham? (b) Ano nga bendisyon an nakarawat ni Abraham, ngan ano nga pariho nga bendisyon an nakakarawat han iya binhi?

⁶ Ginsumatan hi Abraham nga an iya espirituwal nga binhi magdadamu ngan magigin “sugad han mga bitoon ha mga langit” ngan baras ha baybayon. (Gen. 13:16; 22:17) Karuyag sidngon, ha panahon ni Abraham imposible hibaroan han mga tawo kon pira kadamu an magkukompwesto hini nga binhi. Kondi, iginpahayag an eksakto nga kadamu hito pag-abot han panahon. Labot kan Jesus, 144,000 hira.—Pah. 7:4; 14:1.

⁷ Mahitungod han pagtoo ni Abraham, an Pulong han Dios nasiring: ‘Hi Abraham nagtoo kan Jehova; ngan gin-ihap niya ini nga katadongan ha iya.’ (Gen. 15:5, 6) Oo, waray tawo nga bug-os nga matadong. (Jak. 3:2) Bisan pa hito, gintagad ni Jehova hi Abraham sugad hin matadong ngan gintawag pa ngani hiya nga Iya sangkay tungod han iya makatirigamnan nga pagtoo. (Isa. 41:8) Iginpahayag liwat nga matadong adton nagkukompwesto han espirituwal nga binhi ni Abraham nga makakaupod ni Jesus, ngan naghahatag ini ha ira hin mas damu nga bendisyon kay han nakarawat ni Abraham.

8. Ano nga mga bendisyon an nakakarawat han mga membro han binhi ni Abraham?

⁸ An dinihogan nga mga Kristiano iginpahayag nga matadong tungod kay natoo hira han halad lukat ni Jesus. (Roma 3:24, 28) Ha paniplatan ni Jehova, ginpasaylo na hira han ira sala ngan mahimo na dihogan han baraan nga espiritu basi magin espirituwal nga mga anak han Dios, an kabugtoan ni Jesu-Kristo. (Juan 1:12, 13) Nahingada hira ha bag-o nga kauyonan ngan nagkompwesto han bag-o nga nasud, ‘an Israel han Dios.’ (Gal. 6:16; Luk. 22:20) Daku gud ito nga pribilehiyo! Sugad nga resulta hini nga ginbuhat han Dios para ha ira, an mga dinihogan diri naglalaom nga mabuhi ha waray kataposan ha tuna. Ira iginsakripisyo ito nga paglaom tungod han diri maisaysay nga kalipay han pagin kaupod ni Jesus durante han Adlaw han Paghukom ngan pagmando kaupod niya ha langit.—Basaha an Roma 8:17.

9, 10. (a) Kakan-o siyahan nga gindihogan han baraan nga espiritu an mga Kristiano, ngan ano an pagbubuhaton nira? (b) Ano nga bulig an nakarawat han mga dinihogan?

 ⁹ Han Pentekostes 33 K.P., usa ka grupo han magtinumanon an nakapribilehiyo nga magin mga magmarando upod ni Jesus durante han Adlaw han Paghukom. Mga 120 nga disipulo ni Jesus an ginbawtismohan pinaagi han baraan nga espiritu ngan hira an nagin siyahan nga dinihogan nga mga Kristiano. Kondi para ha ira, tinikangan pa la ito. Tikang hito nga panahon, kinahanglan ipakita nira an ira pagkamaunungon kan Jehova bisan pa han ngatanan nga pagsari ni Satanas ha ira. Kinahanglan magin matinumanon hira tubtob ha kamatayon basi makarawat nira an korona han kinabuhi ha langit.—Pah. 2:10.

¹⁰ Tungod hini, iginhatag ni Jehova ha mga dinihogan an sagdon ngan pagparig-on nga ira ginkinahanglan pinaagi han iya Pulong ngan han Kristiano nga kongregasyon. Pananglitan, hi apostol Pablo nagsurat ha mga dinihogan ha Tesalonika: “An amon pag-ataman, pagpaalagad, pagpasarig, ngan pagtestigo ha tagsa-tagsa ha iyo, sugad hin usa nga amay ha iya kalugaringon nga mga anak, basi nga manggawi kamo ha kaangayan han Dios nga amo an nagtatawag ha iyo ngadto ha iya ginhadian ngan kahimayaan.”—1 Tes. 2:11, 12.

11. Ano nga sinurat nga rekord an ginhimo ni Jehova para ha mga membro han ‘Israel han Dios’?

¹¹ Sobra unom ka dekada katapos pilion an siyahan nga mga membro han kongregasyon han dinihogan nga mga Kristiano, nahunahuna ni Jehova nga angayan an pagkaada permanente nga rekord han ministeryo ni Jesus ha tuna ngan han Iya mga pakig-upod ngan sagdon ha mga dinihogan han siyahan nga siglo. Tungod hito, igindugang ni Jehova an Kristiano Griego nga Kasuratan ha nahisurat na nga giniyahan nga Hebreo nga Kasuratan. Iginsurat an Hebreo nga Kasuratan labi na para ha nasud han Israel durante han panahon nga may-ada pa hira espesyal nga relasyon ha Dios. Samtang an Kristiano Griego nga Kasuratan iginsurat labi na para ha ‘Israel han Dios,’ an mga dinihogan sugad nga kabugtoan ni Kristo ngan espirituwal nga mga anak han Dios. Syempre, diri iginpapasabot hito nga an mga diri-Israelita gutiay la an mapapahimulsan ha pag-aram ha Hebreo nga Kasuratan. Sugad man, an mga Kristiano nga diri dinihogan han baraan nga espiritu hura nga nagpapahimulos han pag-aram ngan pagkinabuhi uyon ha sagdon nga aada ha Kristiano Griego nga Kasuratan.—Basaha an 2 Timoteo 3:15-17.

12. Ano an iginpahinumdom ni Pablo ha mga dinihogan?

¹² An mga Kristiano han siyahan nga siglo iginpahayag nga matadong ngan gindihogan han baraan nga espiritu basi makarawat nira an panurundon ha langit. An ira pagin dinihogan waray magpahitaas ha ira nga magin mga hadi han ira mga igkasi-dinihogan. Matin-aw nga nahingalimot hito an siyahan nga mga Kristiano ngan nagtikang hira paghingyap han diri takos nga pagkaprominente ha ira kabugtoan ha kongregasyon. Tungod hito, hi Pablo nagpakiana: “Mga [busog] na kamo, mga manggaranon na kamo, nagmando na kamo nga diri kami upod niyo: Oo, ngan tinguha ko gud nga magmando na kamo, basi nga magmando man kami upod ha iyo.” (1 Kor. 4:8) Salit, ginpahinumdom ni Pablo an mga dinihogan ha iya panahon: “Diri nga kami maghahadi ha iyo pagtoo, kondi mga kabulig kami ha iyo kalipayan.”—2 Kor. 1:24.

Pagkompleto han Igintagna nga Kadamu

13. Paonan-o nagpadayon an pagpili ha mga dinihogan katapos han 33 K.P.?

¹³ Diri ngatanan han 144,000 nga dinihogan, ginpili han siyahan nga siglo. An pagpili ha ira nagpadayon tubtob ha panahon han mga apostol ngan pipira na la an ginpili katapos hito. Kondi, nagpadayon pa gihapon ito han sumunod nga mga siglo tubtob ha aton panahon yana. (Mat. 28:20) Madagmit nga nagpadayon an mga hitabo han magmando na hi Jesus han 1914.

14, 15. Ano an nahitatabo ha aton panahon may kalabotan ha pagpili hin mga dinihogan?

¹⁴ Siyahan, ginlimpyohan ni Jesus an langit han ngatanan nga nakontra ha pagmando han Dios. (Basaha an Pahayag 12:10, 12.) Katapos,  iya gintirok an nabibilin pa nga magigin membro han gobyerno han iya Ginhadian basi makompleto an 144,000. Ha kabutngaan han dekada han 1930, ito nga pagtirok matin-aw nga hirani na matapos ngan damu hadton nakarawat han mensahe an waray maghingyap nga kumadto ha langit. An espiritu waray magpamatuod nga mga anak hira han Dios. (Itanding an Roma 8:16.) Kondi, ira nasantop nga hira kaupod han ‘iba nga mga karnero’ nga may paglaom nga mabuhi hin waray kataposan ha paraiso ha tuna. (Juan 10:16) Salit katapos han 1935, nagin sentro han pagsangyaw an pagtirok han “daku nga panon” nga nakita ni Juan ha bisyon, ngan maluluwas ha “daku nga kagol-anan.”—Pah. 7:9, 10, 14; NW.

¹⁵ Kondi, paglabay han mga tuig tikang han dekada han 1930, may-ada pipira nga ginpili para ha langitnon nga paglaom. Kay ano? Ha pipira nga kahimtang, posible nga hira an iginsaliwan ha mga ginpili na nga nagin diri matinumanon. (Itanding an Pahayag 3:16.) Gin-unabi pa ngani ni Pablo an mga kilala niya nga binaya ha kamatuoran. (Fil. 3:17-19) Hin-o an pipilion ni Jehova sugad nga mga kasaliwan? Syempre, iya na ito desisyon. Ngan makatadunganon la nga an iya pipilion, diri adton bag-o la nga nakombirte, kondi mga tawo nga—pariho ha mga disipulo nga kaistorya ni Jesus han gintikangan niya an pagsaurog han Memoryal—napamatud-an na nga maunungon. a—Luk. 22:28.

16. May kalabotan ha mga dinihogan, ha ano kita nagpapasalamat, ngan may pagsarig nga makakalaom kita ha ano?

¹⁶ Kondi, baga hin diri ngatanan nga ginpili para ha langitnon nga paglaom tikang han dekada han 1930 mga kasaliwan hadton nagpakasala. Hi Jehova nagpapasarig gud nga may-ada kita makakaupod nga mga dinihogan durante han kataposan nga mga adlaw hini nga sistema tubtob ha kabungkag han ‘Babilonya nga Daku.’ b (Pah. 17:5) Ngan makakasarig kita nga ha itinanda nga panahon ni Jehova makukompleto an eksakto nga membro han 144,000 ngan hira ngatanan magmamando ha gobyerno han Dios. Makakalaom liwat kita ha tagna han Biblia nga magpapabilin nga matinumanon an padayon nga nagtitikadamu nga daku nga panon. Diri mag-iiha, ‘magkakagowa hira tikang ha daku nga kagol-anan’ nga ipapadapat ha kalibotan ni Satanas ngan malipayon nga magpapadayon hira ngadto ha bag-o nga kalibotan han Dios.

Haros Kompleto Na an Langitnon nga Gobyerno han Dios!

17. Sumala ha 1 Tesalonika 4:15-17 ngan Pahayag 6:9-11, ano an nahitabo ha mga dinihogan nga namatay nga matinumanon?

¹⁷ Tikang han 33 K.P., napuplo ka yukot nga dinihogan an nagpakita hin marig-on nga pagtoo ngan nagpailob nga matinumanon tubtob ha kamatayon. Gintagad hira nga takos kumarawat  han Ginhadian—matin-aw nga nagtikang han siyahan nga mga adlaw han presensya ni Kristo—ngan han ira langitnon nga balos.—Basaha an 1 Tesalonika 4:15-17; Pahayag 6:9-11.

18. (a) An mga dinihogan nga aanhi pa ha tuna makakasarig han ano? (b) Ano an pagtagad han iba nga mga karnero ha ira dinihogan nga kabugtoan?

¹⁸ An mga dinihogan nga aanhi pa ha tuna bug-os nga nasarig nga kon magpapabilin hira nga matinumanon, diri mag-iiha makakarawat nira an balos han ira pagkamatinumanon. Kon pinamamalandong han minilyon nga iba nga karnero an pagtoo han ira dinihogan nga kabugtoan, nauyon hira ha ginsiring ni Pablo mahitungod ha mga dinihogan ha Tesalonika: “Kami ngahaw naghihimaya ha iyo ha mga singbahan han Dios tungod ha iyo pag-ilob ngan pagtoo ha ngatanan nga mga pagtimaraot niyo, ngan mga kakurian nga iyo gin-aantos; nga amo ini an matuod nga tigaman han matadong nga paghukom han Dios; basi nga maihap [‘tagdon,’NW] kamo nga mga takos ha ginhadian han Dios, nga tungod hini nag-aantos kamo.” (2 Tes. 1:3-5) Kon mamatay na an ultimo nga membro han dinihogan dinhi ha tuna, makukompleto na an langitnon nga gobyerno han Dios. Daku gud ito nga hinungdan han kalipay—ha langit ngan ha tuna!

[Mga footnote]

Maisasaysay Mo Ba?

• Ano an iginpahayag han Dios kan Abraham nga may kalabotan ha Adlaw han Paghukom?

• Kay ano nga hi Abraham iginpahayag nga matadong?

• Para hadton binhi ni Abraham, ano an magigin resulta han ira pagin iginpahayag nga matadong?

• An ngatanan nga Kristiano nasarig ha ano?

[Mga Pakiana]

[Retrato ha pahina 20]

Gin-aghat ni Jesus an iya mga sumurunod nga mangalimbasog para ha Ginhadian

[Retrato ha pahina 21]

Han Pentekostes 33 K.P., nagtikang hi Jehova ha pagpili han ikaduha nga bahin han binhi ni Abraham

[Retrato ha pahina 23]

An iba nga mga karnero nagpapasalamat gud nga kaupod nira an mga dinihogan durante han kataposan nga mga adlaw