An Pulong ni Jehova Buhi

Importante nga mga Punto Tikang ha Libro han Mateo

AN SIYAHAN nga nagsurat hin makapainteres nga asoy han kinabuhi ngan ministeryo ni Jesus amo hi Mateo—duok nga sangkay ni Jesus ngan parasukot hin buhis hadto. An Ebanghelyo han Mateo, nga orihinal nga iginsurat ha Hebreo ngan ha urhi ha Griego, natapos han mga 41 K.P. ngan nagkakaw-ing han Hebreo nga Kasuratan ngan han Kristiano Griego nga Kasuratan.

Inin makapaaghat ngan mapulsanon nga Ebanghelyo, nga matin-aw nga iginsurat labi na para ha mga Judio, naghuhulagway kan Jesus sugad nga an iginsaad nga Mesias, an Anak han Dios. Mapaparig-on an aton pagtoo ha matuod nga Dios, ha Iya Anak, ngan ha Iya mga saad pinaagi han pagpamati hin maopay ha mensahe hito.—Heb. 4:12.

“AN GINHADIAN HAN LANGIT TIKAHIRANI NA”

(Mat. 1:1–20:34)

Ginpabug-atan ni Mateo an tema han Ginhadian ngan an katutdoan ni Jesus, bisan kon nangangahulogan ito hin pagsaysay han panhitabo nga diri uyon ha pagkasunod-sunod. Pananglitan, an Sermon ha Bukid iginsaysay ha siyahan nga bahin han libro, bisan kon iginpahayag ito ni Jesus han sobra usa ka tuig na hiya nga nagtikang ha iya ministeryo.

Durante han ministeryo ni Jesus ha Galilea, nagbuhat hiya hin mga milagro, naghatag hin instruksyon ha 12 nga apostol may kalabotan ha ministeryo, nagkondenar ha mga Pariseo, ngan nagsumat hin mga ilustrasyon mahitungod han Ginhadian. Katapos, binaya hiya ha Galilea ngan kinadto “ha mga pag-ultan han Judea ha unhan han Jordan.” (Mat. 19:1) Samtang tipakadto, nagsiring hi Jesus ha iya mga disipulo: ‘Tisaka kita ha Jerusalem, ngan an Anak han tawo paghuhukman ha kamatayon. Ha ikatulo ka adlaw hiya mababanhaw.’—Mat. 20:18, 19.

Mga Baton ha mga Pakiana Mahitungod ha Kasuratan:

3:16—Ha ano nga paagi nga an “mga langit nabuksan” han ginbawtismohan hi Jesus? Baga hin nagpapasabot ini nga nahinumdoman ni Jesus an iya pag-eksister ha langit antes hiya magin tawo.

5:21, 22—An pagpahayag ba hin kasina mas seryoso kay ha hilom nga pagtipig hito? Nagpahamangno hi Jesus nga an tawo nga nagtitipig hin kapungot ha iya bugto nakakasala hin seryoso. Kondi, mas seryoso an pagpahayag hin kapungot pinaagi hin maraot hinduro nga pulong han pagtamay nga tungod hito may baratunon an usa ha mas hitaas nga korte kay ha lokal nga korte han hustisya.

5:48—Posible gud ba kita magin ‘hingpit, sugad nga an aton Amay nga aadto ha langit hingpit’? Oo, ha relatibo nga paagi. Mahitungod han gugma an ginhihisgotan dinhi ni Jesus ngan ginsumatan niya an mamarati nga subaron an Dios ngan magin hingpit, o bug-os, ha ira gugma. (Mat. 5:43-47) Paonan-o? Pinaagi ha pagpakita hito bisan ha ira mga kaaway.

7:16—Ano nga “mga bunga” an pangirilal-an han tinuod nga relihiyon? Ini nga mga bunga diri la nag-uupod han aton paggawi. Nag-uupod liwat ito han aton mga gintotoohan—an mga katutdoan nga aton ginsusunod.

10:34-38—An mensahe ba han Kasuratan an hinungdan han pagkabahin-bahin han pamilya? Diri gud. Lugod, an hinungdan hito amo an gintotoohan han diri-Saksi nga mga kapamilya. Bangin ira kontrahon o diri karawaton an Kristianidad nga nagigin hinungdan han pagkabahin-bahin han pamilya.—Luk. 12:51-53.

11:2-6—Kon maaram na nga daan hi Juan nga hi Jesus an Mesias tungod kay iya hinbatian an tingog han pag-uyon han Dios, kay ano nga nagpakiana pa hiya kon hi Jesus “an [Usa nga] Tiarabot”? Bangin nagpakiana hiya basi  makompirma niya ito mismo kan Jesus. Gawas pa hito, karuyag niya hibaroan kon may-ada pa “iba” nga maabot nga may-ada gahum han Ginhadian ngan magtutuman han ngatanan nga ginlalaoman han mga Judio. An baton ni Jesus nagpasabot nga waray na masunod ha iya.

19:28—Ano an ginrirepresentaran han “napulo kag duha nga [tribo] ni Israel” nga paghuhukman? Diri hira nagrirepresentar han 12 nga tribo han espirituwal nga Israel. (Gal. 6:16; Pah. 7:4-8) An kaistorya ni Jesus nga mga apostol magigin bahin han espirituwal nga Israel, diri magigin hukom han mga membro hito. Naghimo hiya hin kauyonan ha ira para ha ginhadian, ngan magigin usa hira nga “ginhadian ngan mga saserdote” ngadto ha Dios. (Luk. 22:28-30; Pah. 5:10) An mga membro han espirituwal nga Israel “maghuhukom ha kalibotan.” (1 Kor. 6:2) Salit, an “napulo kag duha nga [tribo] ni Israel,” nga ginhuhukman han nalingkod ha mga trono ha langit, matin-aw nga nagrirepresentar han kalibotan han katawohan nga diri bahin hiton hadianon ngan saserdotehanon nga klase, sugad han iginhuhulagway han 12 nga tribo ha Adlaw han Pagbayad han mga Sala.—Leb., kap. 16.

Mga Leksyon Para ha Aton:

4:1-10. Ini nga asoy nagtututdo ha aton nga tinuod hi Satanas ngan diri la maraot nga kinaiya. Iya ginagamit “an kairiphon han unod ngan an kairiphon han mga mata, ngan an paghambog han kinabuhi” ha pagsulay ha aton. Bisan pa hito, an pag-aplikar han prinsipyo ha Kasuratan mabulig ha aton nga magpabilin nga matinumanon ha Dios.—1 Juan 2:16.

5:1–7:29. Magin mahunahunaon ha imo espirituwal nga panginahanglan. Makigmurayaw. Isalikway an paghunahuna hin imoral. Tumana an imo saad. Kon nag-aampo, hatagi hin prayoridad an espirituwal nga butang kay ha materyal nga panginahanglan. Magin bahandianon ha Dios. Pamilnga siyahan an Ginhadian ngan an Iya katadongan. Ayaw paghukom. Buhata an kaburut-on han Dios. Praktikal gud an mga leksyon ha Sermon ha Bukid!

9:37, 38. Sadang kita magbuhat uyon ha aton hangyo ha Agaron nga “magsugo hin mga magbabari ha iya babrion,” ngan madasigon nga makigbahin ha panhimo hin disipulo.—Mat. 28:19, 20.

10:32, 33. Diri gud kita mahadlok nga isumat an aton pagtoo.

13:51, 52. Tungod han aton pakasabot han kamatuoran han Ginhadian, responsabilidad naton nga tutdoan an iba ngan ipaangbit ini nga bahandi ha ira.

14:12, 13, 23. An panahon ha pag-usahan importante para ha mapulsanon nga pamalandong.—Mar. 6:46; Luk. 6:12.

17:20. Kinahanglan nga may pagtoo kita basi malamposan an sugad bukid nga mga problema nga nakakaulang ha aton espirituwal nga pag-uswag ngan maatubang an mga kakurian. Diri kita sadang magpasibaya ha pagpauswag ngan pagparig-on han aton pagtoo kan Jehova ngan ha Iya mga saad.—Mar. 11:23; Luk. 17:6.

18:1-4; 20:20-28. Tungod ha pagkadiri-hingpit han tawo ngan ha relihiyon nga gintikangan nga nagpapabili han katungdanan, nagin sobra kainteresado an mga disipulo ni Jesus mahitungod han kabantogan. Sadang naton kultibaron an pagkamapainubsanon pinaagi ha paglikay han hilig ha pakasala ngan pagtipig han husto nga pagtagad ha mga pribilehiyo ngan responsabilidad.

“AN ANAK HAN TAWO IGTUTUBYAN”

(Mat. 21:1–28:20)

Hi Jesus ‘sinakay ha usa nga asno’ han iya pagkadto ha Jerusalem han Nisan 9, 33 K.P. (Mat. 21:5) Kinabuwasan, kinadto hiya ha templo ngan ginlimpyohan ito. Han Nisan 11, nagtutdo hiya ha templo, nagkondenar ha mga eskriba ngan Pariseo, ngan katapos hito naghatag ha iya mga disipulo han “tigaman han [iya] pagkanhi, ngan ha kataposan han kalibotan.” (Mat. 24:3) Kinabuwasan, nagsiring hiya ha ira: “Maaram kamo nga katapos hin duha ka adlaw, maabot an pesach, ngan an Anak han tawo igtutubyan basi igraysang.”—Mat. 26:1, 2.

Nisan 14 na. Katapos tikangan ni Jesus an Memoryal han iya tiarabot nga kamatayon, gintraydoran hiya, gin-aresto, ginbista, ngan iginraysang. Ha ikatulo ka adlaw, ginbanhaw hiya. Antes sumaka ha langit an ginbanhaw nga hi Jesus, nagsugo hiya ha iya mga sumurunod: “Busa, lakat  kamo, ngan manhimo kamo hin mga tinon-an ha ngatanan nga mga nasud.”—Mat. 28:19.

Mga Baton ha mga Pakiana Mahitungod ha Kasuratan:

22:3, 4, 9—Kakan-o iginhatag an tulo nga imbitasyon ha panagtawo han kasal? Iginhatag an siyahan nga imbitasyon ha pagtirok han nobya nga klase han hi Jesus ngan an iya mga sumurunod nagtikang magsangyaw han 29 K.P., ngan nagpadayon ito tubtob han 33 K.P. An ikaduha nga imbitasyon nagtikang han iginbubo an baraan nga espiritu han Pentekostes 33 K.P. tubtob han 36 K.P. Ito nga duha nga imbitasyon para la ha mga Judio, nakombirte nga Judio, ngan Samaritano. Kondi, an ikatulo nga imbitasyon iginhatag ha mga tawo ha kadalanan ha gawas han syudad, karuyag sidngon, ha waray sirkumsisyon nga mga Hentil, tikang han 36 K.P. han nakombirte an Romano nga sundalo nga opisyal nga hi Cornelio ngan nagpapadayon ito ha aton panahon yana.

23:15—Kay ano nga an nakombirte han mga Pariseo ‘ginhimo nga doble nga anak han impyerno [Griego, Gehenna a]’ kay han mga Pariseo mismo? An iba nga nakombirte han mga Pariseo bangin magpakasasala hinduro hadto. Kondi, tungod kay nakombirte hira han tinotoohan han mga Pariseo, nagin mas maraot pa hira, posible nga labaw pa kay ha ginkondenar nga ira mga magturutdo. Salit, mas takos hira ha Gehenna kay ha Judio nga mga Pariseo.

27:3-5—Ano an hinungdan han duro nga kasubo ni Judas? Waray indikasyon nga an duro nga kasubo ni Judas tinuod nga pagbasol. Imbes nga mangaro hin kapasayloan ha Dios, iginsumat niya an iya mga sala ha mga punoan nga saserdote ngan katigurangan. Ha pagbuhat hin “sala nga ngadto ha kamatayon,” natural la nga umabat hi Judas hin pagkasalaan ngan kawaray-paglaom. (1 Juan 5:16) Nasubo hiya hinduro tungod hito.

Mga Leksyon Para ha Aton:

21:28-31. Importante kan Jehova an aton pagbuhat han iya kaburut-on. Pananglitan, sadang kita magin madasigon ha pagsangyaw han Ginhadian ngan paghimo hin mga disipulo.—Mat. 24:14; 28:19, 20.

22:37-39. Husto gud nga ginsumaryo han duha nga gidadakui nga sugo kon ano an ginkikinahanglan han Dios ha mga nagsisingba ha iya!

[Footnote]

[Retrato ha pahina 31]

Madasigon ka ba nga nabulig ha pag-ani?

[Ginkuhaan han Retrato]

© 2003 BiblePlaces.com

[Retrato ha pahina 31]

Ginpapabug-atan ni Mateo an tema han Ginhadian