Kon an mga Kristiano Ginsisisig Sugad hin Trigo

ANTES mamatay hi Jesus, nagpahamangno hiya ha iya mga disipulo: “Kitaa, aadi hi Satanas nangangaro hin pagkapot ha iyo basi hiya magsisig ha iyo sugad han trigo.” (Luk. 22:31) Ano an iya karuyag sidngon?

Han panahon ni Jesus, an pag-ani han trigo nagkikinahanglan hin daku nga panahon ngan pangalimbasog. Siyahan, gin-gagarab han mag-arani an mga uhay hito ha hagna. Katapos, ira ito iginlalambos ha matig-a nga kahoy o ha bawbaw hito iginpapadanas ha mga hayop an paragos basi magiok ito. Hini nga paagi, natatangtang an lugas ha uhay ngan napapanitan. Sunod, igin-iitsa tipaigbaw han mga parauma an nagiok na. Nahuhulog an mga lugas ha giriokan, samtang iginpapalid han hangin an mga upa. Ha kataposan, ginsisisig hin maopay an mga lugas basi makuha an anoman nga diri lugas.

Uyon ha ginsiring ni Jesus, padayon nga gin-atake ni Satanas an iya mga disipulo hadto, ngan gin-aatake kita niya yana. (Efe. 6:11) Oo, diri ngatanan nga kakurian nga aton inaatubang direkta nga nagtitikang kan Satanas. (Ekles. 9:11) Kondi, disidido hiya ha paggamit han bisan ano nga paagi basi mabungkag an aton integridad. Pananglitan, mahimo kita niya sulayon nga magin materyalistiko, magpili hin nakakadaot nga kaliawan, o magbuhat hin imoral. Mahimo liwat niya gamiton an mga kaeskwela o katrabaho ngan an diri-Saksi nga mga paryente ha pag-ipit ha aton nga kab-uton an ngatanan nga igintatanyag hini nga kalibotan pinaagi han pag-eskwela ngan mga karera. Dugang pa, mahimo niya gamiton an direkta nga pagtimaraot basi mabungkag an aton pagkamaunungon ha Dios. Syempre, damu pa nga paagi an ginagamit ni Satanas ha pagsisig ha aton, siring pa.

Paonan-o kita makakaato hinin gamhanan nga kaaway? Diri naton ito mahihimo ha aton kalugaringon nga kusog. Mas makusog hi Satanas ha aton; kondi, maaram kita nga mas makusog gud hi Jehova ha iya. Kon bug-os nga nasarig kita kan Jehova, sinsero nga nag-aampo para ha kinaadman ngan kaisog basi makailob, ngan nasarig gud ha Iya giya, paririg-unon kita Niya basi maatohan an mga pag-atake ni Satanas.—Sal. 25:4, 5.

Kon naatubang hin pagsari, kinahanglan may-ada kita abilidad ha “pagkilala han maopay ngan han maraot” ngan makakabulig ito ha aton nga diri malimbongan han mga paagi ni Satanas. (Heb. 5:13, 14) Mabubuligan kita ni Jehova nga makultibar ito nga kalidad. Katapos, kinahanglan padayon nga buhaton naton an husto, anoman an mahitabo. Kon ginsusunod naton an giya ni Jehova, mabulig gud Hiya ha aton maisugon nga determinasyon ha pagbuhat han husto.—Efe. 6:10.

Mahimo nga sisigon kita ni Satanas sugad hin trigo. Kondi pinaagi han kusog ni Jehova, makakaato kita kontra ha iya nga may marig-on nga pagtoo. (1 Ped. 5:9) Oo, an Pulong ni Jehova nagpapasarig ha aton: “Tigia niyo an Yawa, ngan mapalagiw hiya ha iyo.”—Jak. 4:7.