Nahimo Nira nga Mas May Katuyoan an Ira Kinabuhi—Mahihimo Mo ba Liwat Ito?

HI Marc, usa nga bugto ha Canada, nagtrabaho ha kompanya nga naghihimo hin komplikado nga mga garamiton nga ginagamit han mga ahensya para ha kawanangan. Nagtrabaho hiya hin part-time ngan nag-alagad sugad nga regular payunir. Katapos, gintanyagan hiya han iya superbisor hin promosyon—bug-os panahon nga trabaho nga daku an sweldo. Ano an iya ginbuhat?

Hi Amy, usa nga bugto ha Pilipinas, nag-alagad sugad nga regular payunir samtang naeskwela. Han makagradwar hiya, gintanyagan hiya hin trabaho nga nagkikinahanglan hin daku nga panahon kondi daku an sweldo. Ano an iya ginpili?

Magkaiba an desisyon ni Marc ngan ni Amy, ngan an resulta han ira desisyon nagpapakita han kinaadman han sagdon ha mga Kristiano ha kadaan nga Korinto. Hi apostol Pablo nagsurat: “An mga nagamit ha kalibotan, sugad ha waray panggagamit hin labi hini.”—1 Kor. 7:29-31.

Gamita an Kalibotan Kondi Diri hin “Labi”

Antes naton hibaroan an nahitabo kan Marc ngan kan Amy, aton paghisgotan hin madaliay an kahulogan han pulong nga “kalibotan” (o, koʹsmos ha Griego) nga gin-gamit ni Pablo ha iya surat ha mga taga-Korinto. Hito nga teksto, an koʹsmos nagtutudlok ha sistema han kalibotan diin kita nagkikinabuhi—an bug-os nga sosiedad han tawo—upod na an panginahanglan ha adlaw-adlaw, sugad han balay, pagkaon, ngan panapton. Basi magkaada hito, an kadam-an ha aton kinahanglan magtrabaho. Oo, waray kita mahihimo kondi gamiton an kalibotan ha  pagtuman han aton Kasuratanhon nga obligasyon ha pagsuporta ha aton kalugaringon ngan ha aton pamilya. (1 Tim. 5:8) Pero maaram liwat kita nga “an kalibotan nawawara.” (1 Juan 2:17) Salit, ginagamit naton ito tubtob nga kinahanglanon, kondi diri “hin labi.”—1 Kor. 7:31.

Tungod kay napagios an damu nga kabugtoan nga limitahan an paggamit han kalibotan, ginturutimbang nira utro an ira kahimtang, gin-ibanan an panahon nga ginagamit ha trabaho, ngan ginpasimple an ira pagkinabuhi. Katapos buhaton ito, inabat dayon nira nga nagin mas may katuyoan an ira kinabuhi tungod kay mas may-ada na hira panahon ha ira pamilya ngan ha pag-alagad kan Jehova. Dugang pa, tungod han ira simple nga kinabuhi, mas nadepende hira kan Jehova kay ha kalibotan. Mahihimo mo ba liwat nga pasimplihon an imo kinabuhi basi mas magkaada hin panahon para ha Ginhadian han Dios?—Mat. 6:19-24, 33.

“Nagin Mas Duok Kami Kan Jehova Kay ha Kakan-o Pa Man”

Ginsunod ni Marc, nga gin-unabi kanina, an sagdon han Biblia nga diri gamiton hin bug-os an kalibotan. Waray niya karawata an hitaas nga promosyon nga igintanyag ha iya. Paglabay hin pipira ka adlaw, gintanyagan hiya han iya superbisor hin mas daku nga sweldo basi madani hiya nga karawaton ito. “Usa adto nga pagsari,” siring ni Marc, “kondi waray ko gihapon ito karawata.” Iya iginsaysay kon kay ano: “Karuyag namon ni Paula, an akon asawa, nga gamiton an amon kinabuhi ha pag-alagad kan Jehova tubtob ha amon mahihimo. Salit, nagdesisyon kami nga pasimplihon an amon pagkinabuhi. Nag-ampo kami kan Jehova para han kinaadman ha pagkab-ot han amon tumong ngan nag-eskedyol kami hin petsa kon san-o kami magtitikang ha paghatag hin dugang nga panahon ha pag-alagad ha Iya.”

Hi Paula nagsiring: “Nagtrabaho ako hin tulo ka adlaw ha usa ka semana sugad nga sekretarya ha ospital ngan may-ada igo nga sweldo. Nag-regular payunir liwat ako. Kondi, pariho kan Marc, karuyag ko liwat nga mag-alagad kan Jehova ha lugar nga mas daku an panginahanglan hin parasamwak han Ginhadian. Pero, han iginhatag ko an akon resignasyon, nagsiring an akon superbisor nga kwalipikado ako ha nabakante pa la nga posisyon han ehekutibo nga sekretarya. Ito an gihitaasi an sweldo nga posisyon han mga sekretarya, kondi waray mabag-o an akon desisyon. Han iginsumat ko ha akon superbisor an hinungdan han diri ko pag-aplay hito, ginkumendasyonan ako niya tungod han akon pagtoo.”

Waray pag-iha katapos hito, igintoka hira Marc ngan Paula sugad nga espesyal payunir ha gutiay nga kongregasyon ha hirayo nga bahin han Canada. Ano an nagin resulta han ira pagbalhin? Hi Marc nagsiring: “Katapos ko bayaan an maopay nga trabaho nga akon ginbuhat hin haros katunga han akon kinabuhi, nahadlok ako, kondi ginbendisyonan ni Jehova an amon ministeryo. Malipayon gud kami tungod ha pagbulig ha iba nga mag-alagad ha Dios. Nakabulig liwat ha amon pag-asawa an bug-os panahon nga pag-alagad. Kasagaran han amon gin-iistoryahan mga butang nga importante gud—espirituwal nga mga topiko. Nagin mas duok kami kan Jehova kay ha kakan-o pa man.” (Buh. 20:35) Hi Paula nagdugang: “Kon binabayaan mo an imo trabaho ngan an kahimyang han nahiaraan nga balay, kinahanglan sumarig ka hin bug-os kan Jehova. Ginbuhat namon ito ngan Iya kami ginbendisyonan.  Ginpaabat ha amon han kabugtoan ha kongregasyon nga hinigugma ngan kinahanglanon kami nira. Yana, an akon kusog nga gin-gamit ko hadto ha akon trabaho, ginagamit ko na ha pagbulig ha mga tawo nga makilala an Dios. Malipayon gud ako hini nga toka.”

‘Riko Kondi Diri Malipayon’

Hi Amy, nga gin-unabi kanina, nagpili hin iba nga pagkinabuhi. Ginkarawat niya an maopay hinduro nga trabaho. Hiya nagsiring: “Han siyahan nga tuig, aktibo pa ako ha ministeryo kondi naobserbahan ko nga hinay-hinay nga nabalhin an akon atensyon tikang ha pag-alagad kan Jehova ngadto ha pagkab-ot hin mas hitaas nga katungdanan. Ginkarawat ko an nakakadani nga tanyag ha pagpauswag han akon propesyon ngan nangalimbasog gud nga madangat an mas hitaas nga posisyon. Samtang nagtitikadaku an akon responsabilidad ha trabaho, nagtitikaguti an akon panahon ha ministeryo. Inabot an panahon, inundang na ako ha pagsangyaw.”

Kon nahinunumdoman ni Amy adto nga panahon, hiya nakakasiring: “Ha pinansyal, riko ako. Pirme ako nagbibiyahe ngan gintatahod tungod han akon hitaas nga posisyon. Kondi, diri ako malipayon. Bisan kon may-ada ako kwarta, damu an akon problema. Naghunahuna ako kon ano an sayop. Katapos, nasantop ko nga tungod ha pagtinguha hin propesyon hini nga kalibotan, hirani na ako ‘mahisimang ha pagtoo.’ Sugad nga resulta, pariho gud han ginsiring han Pulong han Dios, nag-antos ako hin ‘damu nga kasakitan.’”—1 Tim. 6:10.

Ano an ginbuhat ni Amy? Hiya nagsiring: “Naghangyo ako ha mga tigurang nga buligan ako nga mahibalik an akon relasyon ha Dios ngan tinambong utro ha mga katirok. Usa ka beses samtang nagkakanta, nakatangis ako. Nahinumdoman ko an akon daku nga kalipay durante han lima ka tuig nga nakigbahin ako ha pagsangyaw sugad nga payunir, bisan kon pobre ako ha materyal hadto nga panahon. Nasantop ko nga kinahanglan umundang ako ha pagkarag han akon panahon ha pangalimbasog nga magriko ngan unahon an Ginhadian. Ginkarawat ko an hamubo nga posisyon, nga nangangahulogan hin kawara han katunga han akon sweldo, ngan nakigbahin utro ha pagsangyaw.” Hiya nagsiring: “Nalipay ako ha pagpayunir ha sulod hin pipira ka tuig. Yana, padayon nga inaabat ko an katagbaw nga waray ko gud maeksperyensyahi han gin-gamit ko an kadak-an han akon panahon ha pagtrabaho para ha kalibotan.”

Mahimo mo ba bag-ohon an imo kahimtang ngan pasimplihon an imo pagkinabuhi? Kon gamiton mo an panahon ha pagpauswag han Ginhadian, magigin mas may katuyoan liwat an imo kinabuhi.—Prob. 10:22.

[Blurb ha pahina 19]

Mahimo mo ba bag-ohon an imo kahimtang ngan pasimplihon an imo pagkinabuhi?

[Kahon/Retrato ha pahina 19]

“Naruyagan Ko Na Gud Ito!”

Hi David, usa nga tigurang ha Estados Unidos, naruyag nga magpayunir pariho han iya asawa ngan mga anak. Nahimo niya ito pinaagi ha pagtrabaho hin part-time ha kompanya nga iya gintatrabahoan. Nagin mas may katuyoan ba an iya kinabuhi tungod hito? Paglabay hin pipira ka bulan, nagsurat hiya ha usa nga sangkay: “Waray na mas makapatagbaw pa kay ha bug-os nga pakigbahin ha pag-alagad kan Jehova upod han imo pamilya. Kahuna ko gud nga mag-iiha anay antes ako mahiara ha pagpayunir, kondi naruyagan ko na gud ito! Makarepresko ito hinduro.”

[Retrato ha pahina 18]

Hira Marc ngan Paula samtang nagsasangyaw