Padayon nga Bantayi an Ministeryo nga Kinarawat Mo ha Ginoo

‘Bantayi an ministeryo nga kinarawat mo ha Ginoo, nga tumanon mo ito.’—KOL. 4:17.

1, 2. Ano an responsabilidad han mga Kristiano ha katawohan?

 MAY-ADA kita importante gud nga responsabilidad ha mga tawo ha aton komunidad. An ira mga desisyon yana mangangahulogan hin kinabuhi o kamatayon durante han “daku nga kagol-anan.” (Pah. 7:14) An giniyahan nga nagsurat han libro han Proberbios nagsiring: “Luwasa hira nga gindara ngadto ha kamatayon, ngan adton hirani na pamatayon kitaa nga imo mahawiran.” Makatirigamnan gud ito nga mga pulong! Kon diri naton pahamangnoan an mga tawo han ira pipilion, magkakaada kita baratunon tungod han ira kamatayon. Ha pagkamatuod, ito nga bersikulo nagpapadayon: “Kon sumiring ka: Kitaa, diri kami maaram hini; diri ba hiya nga nagtitimbang han mga kasingkasing nagpapainoino hini? Ngan hiya nga nagbabantay han imo kalag, diri ba hiya maaram hini? Ngan diri ba hiya maghahatag ha tagsa ka tawo sumala han iya binuhatan?” Matin-aw, an mga surugoon ni Jehova diri makakasiring nga hira ‘diri maaram’ han peligro nga inaatubang han mga tawo.—Prob. 24:11, 12.

² Pinabibilhan gud ni Jehova an kinabuhi. Iya ginsasagda an iya mga surugoon nga mangalimbasog gud tubtob ha ira mahihimo ha pagbulig ha mas damu pa nga tawo basi maluwas. Salit, an tagsa nga ministro han Dios kinahanglan magpasamwak han nagluluwas-kinabuhi nga mensahe tikang ha Biblia. An aton buruhaton pariho han parabantay nga nagpapahamangno kon nakikita niya an tiarabot nga peligro. Diri naton karuyag nga sukton ha aton an dugo hadton namimeligro nga mamatay. (Esek. 33:1-7) Salit, importante gud nga magpadayon kita ha ‘pagwali han pulong’!—Basaha an 2 Timoteo 4:1, 2, 5.

3. Ano nga mga topiko an paghihisgotan dinhi ngan ha masunod nga duha nga artikulo?

³ Dinhi hini nga artikulo mahibabaroan mo kon paonan-o malalamposan an mga ulang ha imo nagluluwas-kinabuhi nga ministeryo ngan kon paonan-o mo mabubuligan an mas damu nga tawo. Uusisahon han masunod nga artikulo kon paonan-o mo makukultibar an maopay nga paagi han pagtutdo han importante nga mga kamatuoran. An ikatulo nga aradman nga artikulo magsasaysay han pipira nga makapadasig nga resulta nga naieksperyensyahan han mga parasamwak han Ginhadian ha bug-os nga kalibotan. Kondi, antes naton paghisgotan ini, maopay nga aton repasuhon an pipira nga hinungdan kon kay ano nga peligroso hinduro an aton panahon.

Kon Kay Ano nga Damu an Waray Paglaom

4, 5. Ano an naieksperyensyahan han katawohan, ngan ano an reaksyon han damu?

⁴ Ipinapakita han mga panhitabo ha tuna nga nagkikinabuhi na kita ha “kataposan han kalibotan” ngan hirani na gud ito. Naieksperyensyahan han katawohan an mga panhitabo ngan kahimtang nga ginsiring ni Jesus ngan han iya mga disipulo nga magtitigaman han “kataposan nga mga adlaw.” An “mga kasakitan,” upod na an mga girra, kakulang hin pagkaon, linog, ngan iba pa nga kalamidad, nagpapasakit ha katawohan. Nahitatabo ha bisan diin an karaotan, kahakog, ngan mga disposisyon nga nakontra ha Dios. Bisan an mga tawo nga nangangalimbasog ha pagkinabuhi uyon ha mga prinsipyo han Biblia, nauyon nga ini an “magpakalilisang nga mga panahon” nga  makuri pakibagayan.—Mat. 24:3, 6-8, 12; 2 Tim. 3:1-5.

⁵ Kondi, an kadam-an han katawohan diri maaram han tinuod nga kahulogan han mga panhitabo ha kalibotan. Salit, damu an nababaraka para ha ira katalwasan ngan han ira pamilya. An kamatay han ira mga hinigugma o iba nga trahedya nagpapasakit ha damu nga tawo. Tungod kay waray husto nga kahibaro kon kay ano nga nahitatabo ini ngan kon ano an solusyon, waray gud hira paglaom.—Efe. 2:12.

6. Kay ano nga an ‘Babilonya nga Daku’ diri nakakabulig ha iya mga sumurunod?

⁶ An ‘Babilonya nga Daku,’ an imperyo han palso nga relihiyon ha kalibotan, naghahatag hin gutiay la nga pagliaw ha mga tawo. Lugod, pinaagi han “alaksiw han iya pagpakighilawas,” ginwuwurok hito an damu nga tawo kon paonan-o hira magkakaada relasyon ha Dios. Dugang pa, pinaagi han pagbuhat sugad hin puta, an palso nga relihiyon nagsusulsol ngan nagkukontrol han “kahadian ha tuna,” ginagamit an palso nga mga doktrina ngan espiritismo basi an kadam-an sumugot ha ira pan-gobyernohan. Hito nga paagi, an palso nga relihiyon diri la nagkakaada gahum ngan impluwensya, kondi ha pariho nga panahon iginsasalikway hito an kamatuoran han Dios.—Pah. 17:1, 2, 5; 18:23.

7. Ano an mahitatabo ha kadam-an, kondi paonan-o mabubuligan an iba?

⁷ Hi Jesus nagtutdo nga an kadam-an naglalakat dida ha haluag nga dalan nga tipakadto ha kabungkagan. (Mat. 7:13, 14) An iba aada hiton haluag nga dalan tungod kay tinuyo nga ira iginsasalikway an igintututdo han Biblia, kondi damu an aada hito tungod kay nalilimbongan, o nagpapabilin hira ha kasisidman tungod kay waray hira tutdui kon ano gud an ginkikinahanglan ni Jehova. Bangin magbag-o an iba ha ira paagi han pagkinabuhi kon ipatin-aw ha ira an mga rason tikang ha Kasuratan nga buhaton ito. Kondi adton nagpapabilin ha Babilonya nga Daku ngan padayon nga nagsasalikway han mga prinsipyo han Biblia, diri maluluwas ha “daku nga kagol-anan.”—Pah. 7:14.

Padayon nga Magsangyaw nga ‘Waray Ukoy’

8, 9. Ano an reaksyon han siyahan-siglo nga mga Kristiano han nakaeksperyensya hira hin pagkontra, ngan kay ano?

⁸ Hi Jesus nagsiring nga an iya mga disipulo magsasangyaw han maopay nga sumat han Ginhadian ngan maghihimo hin mga disipulo. (Mat. 28:19, 20) Tungod hito, gintatagad pirme han tinuod nga mga Kristiano an pakigbahin ha pagsangyaw sugad nga pagpakita hin pagkamaunungon ngan pagtoo ha Dios. Salit, an siyahan nga mga sumurunod ni Jesus nagpadayon ha pagsangyaw bisan kon ginkontra hira. Sinarig hira kan Jehova para han kusog, ngan nag-inampo nga buligan hira nga makapadayon ha ‘pagyakan han iya pulong ha waray kahadlok.’ Tungod hito, gintagan hira ni Jehova han baraan nga espiritu, ngan waray kahadlok nga nagyakan hira han pulong han Dios.—Buh. 4:18, 29, 31.

 ⁹ Han an pagkontra nagin madarahog, nagluya ba an mga sumurunod ni Jesus ha ira determinasyon ha pagsangyaw han maopay nga sumat? Waray gud. Tungod kay nasina an Judio nga mga lider han relihiyon ha pagsangyaw han mga apostol, ira gindakop hira, gintarhog, ngan ginkastigo. Bisan pa hito, an mga apostol ‘waray ukoy ha panutdo, ngan pagwali, nga hi Jesus amo an Kristo.’ Nasabtan nira hin matin-aw nga kinahanglan nira “sugton an Dios [imbes nga] an mga tawo.”—Buh. 5:28, 29, 40-42.

10. Ano nga mga problema an naieksperyensyahan han mga Kristiano yana, kondi ano an mahimo magin resulta han ira maopay nga paggawi?

¹⁰ Kadam-an han mga surugoon han Dios yana diri nag-aantos hin pagkastigo o kapriso tungod han ira pagsangyaw. Kondi, an ngatanan nga tinuod nga Kristiano nakakaeksperyensya hin magkalain-lain nga pagsari ngan kakurian. Pananglitan, tungod han imo nabansay ha Biblia nga konsensya, an imo paggawi bangin naiiba ha kadam-an. An imo mga katrabaho, kaeskwela, o kaaramyaw bangin maghunahuna nga naiiba ka tungod kay basado ha Biblia an imo mga desisyon. Bisan pa hito, an ira diri maopay nga reaksyon diri sadang magpaluya ha imo. An kalibotan aada ha espirituwal nga kasisidman, kondi an mga Kristiano kinahanglan sumanag sugad nga “mga kalamrag.” (Fil. 2:15) Makikita ngan dadayawon han iba nga sinsero nga nag-oobserba an imo mag-opay nga buhat ngan sugad nga resulta maghihimaya ito kan Jehova.—Basaha an Mateo 5:16.

11. (a) Ano an reaksyon han iba ha pagsangyaw nga buruhaton? (b) Ano nga klase hin pagkontra an naeksperyensyahan ni Pablo, ngan ano an iya reaksyon hito?

¹¹ Kinahanglan gud nga magmaisugon kita basi makagpadayon ha pagsangyaw han mensahe han Ginhadian. An iba nga tawo, bisan mga paryente, bangin magtamay ha imo o ha iba nga paagi magsari ha pagpaluya ha imo. (Mat. 10:36) Hi apostol Pablo ginkastigo hin pipira ka beses tungod kay matinumanon nga ginbuhat niya an iya ministeryo. Tigamni an iya reaksyon ha sugad nga pagkontra: “Kami nag-antos ngan mga ginpakaalohan na, nangahas gud kami ha aton Dios ha pagyakan ha iyo han maopay nga sumat han Dios ha daku nga [pangalimbasog].” (1 Tes. 2:2) Oo, nagmaisugon gud hi Pablo basi makagpadayon ha pagsangyaw han maopay nga sumat katapos hiya dakpon, huboan, balbagon, ngan prisuhon. (Buh. 16:19-24) Ano an nakahatag ha iya hin kaisog basi makagpadayon? An iya daku nga hingyap ha pagtuman han sugo han Dios nga pagsangyaw.—1 Kor. 9:16.

12, 13. Ano nga mga kakurian an naieksperyensyahan han iba, ngan paonan-o nira nalamposan ito?

¹² Makuri liwat an pagpabilin nga madasigon ha mga teritoryo nga agsob nga waray tawo an mga balay o damu an diri interesado ha mensahe han Ginhadian. Ano an aton mahihimo ha sugad nga kahimtang? Bangin kinahanglan magkaada kita hin dugang nga kaisog ha pakiistorya ha mga tawo ha diri-pormal nga paagi. Bangin kinahanglan liwat bag-ohon an aton eskedyol o agsob nga magsangyaw ha mga lugar nga damu an aton makakaistorya.—Itanding an Juan 4:7-15; Buh. 16:13; 17:17.

¹³ An iba nga kakurian nga kinahanglan ilubon han damu amo an pagtikalagas ngan maluya nga panlawas, nga bangin makaulang han ira pagsangyaw. Kon ito an imo kahimtang, ayaw panluya. Maaram gud hi Jehova han imo limitasyon ngan inaapresyar niya an imo nahihimo. (Basaha an 2 Korinto 8:12.) Anoman nga klase hin kakurian an bangin maeksperyensyahan mo—pagkontra, kawaray interes, o sakit—buhata an ngatanan nga imo mahihimo uyon ha imo kahimtang ha pagpaangbit han maopay nga sumat ha iba.—Prob. 3:27; itanding an Markos 12:41-44.

Padayon nga ‘Bantayi an Imo Ministeryo’

14. Ano nga susbaranan an ipinakita ni apostol Pablo ha mga igkasi-Kristiano, ngan ano an iya iginsagdon?

¹⁴ Maduruto hi apostol Pablo ha iya ministeryo, ngan gindasig niya an iya igkasi-tumuroo nga buhaton liwat ito. (Buh. 20:20, 21; 1 Kor. 11:1) An usa nga gindasig gud ni Pablo amo an Kristiano nga hi Arkipo han siyahan nga siglo. Hiya nagsurat ha mga taga-Kolosas: ‘Sidnga niyo hi Arkipo: Bantayi an ministeryo nga kinarawat mo ha Ginoo, nga tumanon mo ito.’ (Kol. 4:17) Diri kita maaram kon hin-o hi Arkipo o kon ano an iya kahimtang, kondi matin-aw nga kinarawat niya an ministeryo. Kon dedikado ka nga Kristiano, kinarawat  mo liwat ito. Nagpapadayon ka ba ha pagbantay han imo ministeryo basi matuman ito?

15. Ano an nahiuupod ha Kristiano nga dedikasyon, ngan ano nga mga pakiana an nabangon?

¹⁵ Antes kita magpabawtismo, aton igindedikar an aton kinabuhi kan Jehova pinaagi han kinasingkasing nga pag-ampo. Nangangahulogan ini nga determinado kita nga buhaton an iya kaburut-on. Salit sadang pakianhan naton an aton kalugaringon yana, ‘An pagbuhat ba han kaburut-on han Dios amo gud an pinakaimportante ha akon kinabuhi?’ Bangin may-ada kita magkalain-lain nga responsabilidad nga ginlalaoman ni Jehova ha aton—sugad han pagsuporta ha aton pamilya. (1 Tim. 5:8) Kondi paonan-o naton ginagamit an aton nahisasalin nga panahon ngan kusog? Ano an aton prayoridad?—Basaha an 2 Korinto 5:14, 15.

16, 17. Ano nga mga posibilidad an mahimo tagdon han batan-on nga mga Kristiano o hadton gutiay la an responsabilidad?

¹⁶ Batan-on ka ba nga dedikado nga Kristiano nga nakatapos pa la o hirani na matapos ha pag-eskwela? Posible nga waray ka pa mabug-at nga responsabilidad ha pamilya. Salit, ano an ginpaplano mo nga buhaton? Ano nga mga desisyon an makakabulig gud ha imo ha pagtuman han imo saad ha pagbuhat han kaburut-on ni Jehova? Damu an nag-organisa han ira mga buruhaton basi makagpayunir, ngan nakaeksperyensya hira hin daku nga kalipay ngan katagbaw.—Sal. 110:3; Ekles. 12:1.

¹⁷ Bangin may-ada ka bug-os-panahon nga trabaho kondi gutiay la an responsabilidad gawas ha pagsuporta ha imo kalugaringon. Sigurado nga nalilipay ka ha pakigbahin ha mga buruhaton ha kongregasyon tubtob ha igintutugot han imo eskedyol. Karuyag mo ba magin mas malipayon pa? Naghunahuna ka ba nga pauswagon pa an imo pakigbahin ha ministeryo? (Sal. 34:8; Prob. 10:22) Ha iba nga teritoryo, daku pa an kinahanglan buhaton basi makaabot ha ngatanan an naghahatag-kinabuhi nga mensahe han kamatuoran. Puydi ka ba maghimo hin mga pagbag-o, sugad han pag-alagad ha lugar nga nagkikinahanglan hin mas damu nga parasamwak han Ginhadian?—Basaha an 1 Timoteo 6:6-8.

18. Ano nga mga pagbag-o an ginhimo han mag-asawa, ngan ano an mga resulta?

¹⁸ Tagda an ginbuhat nira Kevin ngan Elena ha Estados Unidos. a Sugad han kasagaran nga ginbubuhat han mga batan-on nga bag-o la nga kasal ha ira lugar, nahunahuna nira nga kinahanglan pumalit hira hin balay. Hira nga duha bug-os-panahon nga nagtatrabaho ngan makakagpadayon ha himyang nga pagkinabuhi. Kondi, tungod han ira eskedyol ha trabaho ngan ha  balay, gutiay na la an ira panahon ha pagsangyaw. Nasantop nira nga ginagamit nira an kadak-an han ira panahon ngan kusog para ha ira mga panag-iya. Kondi, han nakita nira an simple nga pagkinabuhi han malipayon nga payunir nga mag-asawa, nagdesisyon hira Kevin ngan Elena nga bag-ohon an ira prayoridad. Katapos maghangyo kan Jehova nga buligan hira, ira iginbaligya an ira balay ngan binalhin ha usa nga apartment. Gin-ibanan ni Elena an oras ha iya pagtrabaho ngan nagpayunir. Tungod kay nadasig hi Kevin han naeksperyensyahan han iya asawa, binayaan niya an iya trabaho ngan nagpayunir. Paglabay hin pipira ka panahon, binalhin hira ha usa nga nasud ha Amerika del Sur basi mag-alagad ha lugar nga daku an panginahanglan hin magsarangyaw han Ginhadian. “Malipayon kami pirme nga mag-asawa,” siring ni Kevin, “pero kon nangangalimbasog kami ha pagpauswag han amon pag-alagad ha Dios, mas malipayon gud kami ngan mas tagbaw.”—Basaha an Mateo 6:19-22.

19, 20. Kay ano nga an pagsangyaw han maopay nga sumat amo an pinakaimportante nga buruhaton yana?

¹⁹ An pagsangyaw han maopay nga sumat amo an pinakaimportante nga buruhaton ha tuna yana. (Pah. 14:6, 7) Nakakabulig ito ha pagbaraan han ngaran ni Jehova. (Mat. 6:9) Nag-uuswag an pagkinabuhi han damu ka yukot nga nakarawat han mensahe han Biblia kada tuig, ngan mahimo ini magresulta ha ira kaluwasan. Kondi, ‘paonan-o hira makakabati kon waray magwawali?’ nagpakiana hi apostol Pablo. (Roma 10:14, 15) Paonan-o gud ba? Kay ano nga diri magin determinado ha pagbuhat han ngatanan nga imo mahihimo ha pagtuman han imo ministeryo?

²⁰ Usa pa nga paagi nga makakabulig ka ha mga tawo nga masabtan an pagkaimportante hinin magpakalilisang nga panahon ngan han mga resulta han ira desisyon amo an pagpauswag han imo abilidad ha pagtutdo. Paghihisgotan ha masunod nga artikulo kon paonan-o mo mahihimo ini.

[Footnote]

Ano an Imo Baton?

• Ano an responsabilidad han mga Kristiano ha katawohan?

• Paonan-o naton malalamposan an mga ulang ha aton pagsangyaw?

• Paonan-o naton matutuman an ministeryo nga kinarawat naton?

[Mga Pakiana]

[Retrato ha pahina 5]

Ginkikinahanglan an kaisog ha pagsangyaw kon naatubang hin pagkontra

[Retrato ha pahina 7]

Ano an imo bubuhaton kon nagsasangyaw ka ha mga teritoryo nga agsob nga waray tawo an mga balay?