Pauswaga an Imo Paagi han Pagtutdo
Pauswaga an Imo Paagi han Pagtutdo
“Magwali ka han pulong, . . . magbadlong ka, magsaway ka, maglaygay ka, upod an hilawig nga pagpailob ngan panutdo.”—2 TIM. 4:2.
1. Ano an iginsugo ni Jesus ha iya mga disipulo, ngan ano nga susbaranan an iya ipinakita?
BISAN pa han urusahon nga panambal nga ginbuhat ni Jesus durante han iya ministeryo ha tuna, kilala hiya, diri sugad nga paratambal o parabuhat hin milagro, kondi sugad nga magturutdo. (Mar. 12:19; 13:1) Prayoridad niya an pagpasamwak han maopay nga sumat han Ginhadian han Dios, ngan ito liwat an prayoridad han iya mga sumurunod yana. Ginsusugo hira nga igpadayon an paghimo hin mga disipulo pinaagi ha pagtutdo ha mga tawo nga tumanon an ngatanan nga iginsugo ni Jesus.—Mat. 28:19, 20.
2. Ano an kinahanglan naton buhaton basi matuman an sugo ha aton nga magsangyaw?
2 Basi matuman naton an sugo nga maghimo hin mga disipulo, nangangalimbasog kita pirme ha pagpauswag han aton abilidad ha pagtutdo. Ginpabug-atan ni apostol Pablo an pagkaimportante hini nga abilidad han nagsurat hiya ha iya kaupod ha pagsangyaw nga hi Timoteo. Hiya nagsiring: “Magmatngon ka ha imo kalugaringon, ngan ha imo pagtutdo. Padayon hini nga mga bagay; kay kon amo ini an imo pagbuhaton maluwas ka ngan an imo mamarati.” (1 Tim. 4:16) An klase hin pagtutdo nga ginhuhunahuna ni Pablo diri kay pagpaangbit la han kahibaro. Ginbabantad han epektibo nga ministro an kasingkasing han mga tawo ngan gin-aaghat hira nga bag-ohon an ira kinabuhi. Salit, paonan-o naton mapapauswag an paagi han pagtutdo kon iginpipresentar ha iba an maopay nga sumat han Ginhadian han Dios?—2 Tim. 4:2.
Pagpauswag han Paagi han Pagtutdo
3, 4. (a) Paonan-o naton mapapauswag an paagi han pagtutdo? (b) Ha ano nga paagi nabulig ha aton an Teokratiko nga Eskwelahan ha Ministeryo nga magin epektibo nga magturutdo?
3 Basi epektibo nga maitutdo an kamatuoran han Dios, kinahanglan kita mag-aram, magbansay, ngan mag-obserba. Kinahanglan tagdon naton inin tulo nga bahin basi magin epektibo nga magturutdo han maopay nga sumat. Masasabtan la naton hin husto an topiko kon mag-aram kita upod an pag-ampo. (Basaha an Salmo 119:27, 34.) An pag-obserba ha epektibo nga mga ministro samtang nagtututdo hira mabulig ha aton nga hibaroan an ira mga paagi ngan subaron hira. Ngan an pangalimbasog pirme ha pag-aplikar han aton hinbabaroan mabulig ha aton nga mapauswag an aton mga abilidad.—Luk. 6:40; 1 Tim. 4:13-15.
4 Hi Jehova an aton Gihitaasi nga Instruktor. Pinaagi han iya nakikita nga organisasyon, nagtatagana hiya ha iya mga surugoon dinhi ha tuna hin giya kon paonan-o nira tutumanon an sugo nga pagsangyaw. (Isa. 30:20, 21) Tungod hini, an tagsa nga kongregasyon nagdudumara hin sinemana nga Teokratiko nga Eskwelahan ha Ministeryo nga gindisenyo ha pagbulig ha ngatanan nga estudyante nga magin epektibo nga parasamwak han Ginhadian han Dios. An nangunguna nga aradman nga libro hini nga eskwelahan amo an Biblia. Nagsusumat ito ha aton kon ano an igtututdo. Dugang pa, ipinapakita hito kon ano nga paagi han pagtutdo an epektibo ngan angayan. An Teokratiko nga Eskwelahan ha Ministeryo nagpapahinumdom pirme ha aton nga magigin mas maopay kita nga magturutdo kon iginbabasar naton ha Pulong han Dios an aton igintututdo, epektibo nga ginagamit an mga pakiana, simple an paagi han pagtutdo, ngan nagpapakita hin sinsero nga pagtagad ha iba. Aton usisahon an tagsa hini nga punto. Katapos, aton paghihisgotan kon paonan-o mababantad an kasingkasing han estudyante.
Igbasar ha Pulong han Diosan Imo Igintututdo
5. Ha ano sadang igbasar an aton igintututdo, ngan kay ano?
5 Iginbasar ni Jesus, an pinakabantogan ha ngatanan nga magturutdo, an iya mga katutdoan ha Kasuratan. (Mat. 21:13; Juan 6:45; 8:17) Nagyakan hiya, diri pinaagi han iya ngaran, kondi ha ngaran han Usa nga nagsugo ha iya. (Juan 7:16-18) Ito an susbaranan nga aton ginsusunod. Salit, an aton ginsisiring ha pagsangyaw o ha pag-aram ha Biblia sadang nakasentro ha awtoridad han Pulong han Dios. (2 Tim. 3:16, 17) Bisan kon maopay hinduro an aton pangatadongan, diri gud ito makakatupong ha pagkaepektibo ngan ha gahum han giniyahan nga Kasuratan. An Biblia may-ada awtoridad. Anoman nga punto an karuyag naton nga masabtan han estudyante, an gimaopayi nga paagi amo an pagpabasa ha iya kon ano an ginsisiring han Kasuratan mahitungod hito.—Basaha an Hebreo 4:12.
6. Paonan-o masisiguro han magturutdo nga nasasabtan gud han estudyante an impormasyon nga ginhihisgotan?
6 Syempre, diri ito nangangahulogan nga diri na mag-aandam ha pag-aram ha Biblia an magturutdo. Lugod, sadang hunahunaon niya hin abanse kon ano nga mga teksto an iya babasahon o han estudyante durante han pag-aram. Kasagaran, maopay nga basahon an mga teksto nga nasuporta ha aton tinotoohan. Kinahanglan liwat nga aton buligan an estudyante nga masabtan an tagsa nga teksto nga iya ginbabasa.—1 Kor. 14:8, 9.
Gamit hin Epektibo nga mga Pakiana
7. Kay ano nga epektibo nga paagi han pagtutdo an paggamit hin mga pakiana?
7 An maopay nga paggamit hin mga pakiana nagpapagios han hunahuna ngan nabulig ha magturutdo nga mabantad an kasingkasing han estudyante. Salit, imbes nga isaysay ha iya an mga teksto, hangyoa hiya nga isaysay ito ha imo. Usahay bangin kinahanglan an dugang nga pakiana o sunod-sunod nga pakiana pa ngani basi mabuligan hiya nga makasabot. Kon nagamit ka hin mga pakiana ha pagtutdo ha iya, binubuligan mo hiya nga masabtan diri la an mga pangatadongan han konklusyon kondi makombinse mismo hito.—Mat. 17:24-26; Luk. 10:36, 37.
8. Paonan-o naton mahibabaroan kon ano an aada ha kasingkasing han estudyante?
8 An paagi han pag-aram ha aton mga publikasyon amo an pakiana ngan baton. Sigurado, kadam-an han imo gindudumarahan hin pag-aram makakabaton dayon ha inimprinta nga mga pakiana kon gagamiton an impormasyon ha mga parapo. Bisan pa hito, an masinabuton nga magturutdo diri matatagbaw han husto la nga mga baton. Pananglitan, bangin maisaysay hin husto han estudyante an ginsisiring han Biblia mahitungod han pornikasyon. (1 Kor. 6:18) Kondi, an paggamit hin mataktika nga punto-de-bista nga mga pakiana mahimo magpakita kon ano gud an ginhuhunahuna niya ha iya hinbabaroan. Hito nga paagi, an magturutdo mahimo magpakiana: “Kay ano nga ginkukondenar han Biblia an pakighilawas ha diri asawa? Ano an imo opinyon mahitungod hini nga pagdirî han Dios? Ha imo hunahuna, may kapulsanan ba an pagsugot ha mga prinsipyo han Dios ha moral?” An iya baton ha sugad nga mga pakiana magpapahayag kon ano an aada ha iya kasingkasing.—Basaha an Mateo 16:13-17.
Isaysay ha Simple nga Paagi
9. Ano an sadang naton hinumdoman kon iginsasaysay an Kasuratanhon nga impormasyon?
9 Masayon masabtan an kadam-an nga kamatuoran ha Pulong han Dios. Kondi, bangin nawuwurok an gindudumarahan naton hin pag-aram tungod han mga doktrina han palso nga relihiyon. Sugad nga magturutdo, sadang isaysay naton an Biblia ha paagi nga masayon masabtan. An epektibo nga magturutdo nagsasaysay han impormasyon ha simple, matin-aw, ngan husto nga paagi. Kon aton susundon ini nga giya, maisasaysay naton an kamatuoran ha paagi nga mas masayon masabtan. Ayaw iupod an diri kinahanglanon nga mga detalye. Diri kinahanglan nga magkomento kita ha tagsa nga bahin han teksto nga aton ginbabasa. Isentro la ha kon ano an kinahanglan basi maipatin-aw an punto nga ginhihisgotan. Hinay-hinay nga masasabtan han estudyante an mas higlarom nga kamatuoran ha Kasuratan samtang nag-uuswag an iya pagsabot.—Heb. 5:13, 14.
10. Ha ano nakadepende kon mationan-o kadamu an sadang paghisgotan durante han pag-aram ha Biblia?
10 Mationan-o kahilaba an sadang paghisgotan ha usa ka pag-aram? Nagkikinahanglan ini hin husto nga pagturutimbang. Magkaiba an abilidad ngan kahimtang han estudyante ngan han nagtututdo, kondi hinumdoman naton pirme nga an aton katuyoan amo an pagbulig ha aton estudyante nga magkaada hin marig-on nga pagtoo. Salit gintatagan naton hiya hin igo nga panahon ha pagbasa, pagsabot, ngan pagkarawat han kamatuoran nga igintututdo han Pulong han Dios. Diri kita naghihisgot hin mas damu nga impormasyon kay ha masasabtan niya. Ha pariho nga panahon, iginpapadayon naton an pag-aram depende ha iya maaakos. Kon nasasabtan na niya an usa nga punto, nagpapadayon kita ha sunod.—Kol. 2:6, 7.
11. Ano nga leksyon mahitungod ha pagtutdo an mahibabaroan naton tikang kan apostol Pablo?
11 Hi apostol Pablo nagsangyaw ha simple nga paagi ha mga bag-ohan. Bisan kon hitaas an iya edukasyon, waray hiya gumamit hin higlarom nga pulong. (Basaha an 1 Korinto 2:1, 2.) An pagin masayon masabtan han kamatuoran ha Kasuratan nakakadani ngan nakakatagbaw ha sinsero nga mga tawo. Diri kinahanglan nga hitaas an edukasyon han usa basi masabtan ito.—Mat. 11:25; Buh. 4:13; 1 Kor. 1:26, 27.
Buligi an mga Estudyante nga Pabilhan an Ira Hinbabaroan
12, 13. Ano an mahimo makaaghat ha estudyante nga gumios uyon ha iya hinbabaroan? Isaysay.
12 Basi magin epektibo, an aton paagi han pagtutdo kinahanglan makabantad ha kasingkasing han estudyante. Kinahanglan masabtan niya kon paonan-o naaplikar ha iya an impormasyon, kon kay ano nga mapulsanon ito ha iya, ngan kon paonan-o mag-uuswag an iya kinabuhi kon susundon niya an giya han Kasuratan.—Isa. 48:17, 18.
13 Pananglitan, bangin ginhihisgotan naton an Hebreo 10:24, 25 nga nag-aaghat ha mga Kristiano nga magkatirok kaupod han igkasi-tumuroo para ha pagdinasigay tikang ha Kasuratan ngan mahigugmaon nga pagtarotarampo. Kon an estudyante diri pa natambong ha mga katirok han kongregasyon, mahimo naton isaysay hin halipot kon paonan-o ito gindudumara ngan kon ano an paghihisgotan. Mahimo naton unabihon nga an mga katirok bahin han aton pagsingba ngan ipakita nga nagpapahimulos kita hito mismo. Katapos, mahimo naton hiya imbitaron nga tumambong. Kon nagios hiya uyon ha sugo han Kasuratan, kinahanglan nga tungod ito han iya hingyap nga sundon hi Jehova, diri tungod kay karuyag niya mapalipay an nagdudumara ha iya hin pag-aram.—Gal. 6:4, 5.
14, 15. (a) Ano an mahibabaroan han estudyante mahitungod kan Jehova? (b) Paonan-o magpapahimulos an estudyante ha paghibaro han personalidad han Dios?
14 An nangunguna nga kapulsanan nga nakakarawat han mga estudyante ha pag-aram ngan pag-aplikar han mga prinsipyo ha Biblia amo an ira pagkilala ngan paghigugma kan Jehova sugad nga persona. (Isa. 42:8) Diri la Hiya mahigugmaon nga Amay, Maglalarang ngan Tag-iya han uniberso, kondi iginpapahayag liwat niya an iya personalidad ngan abilidad ha mga nahigugma ngan nag-aalagad ha iya. (Basaha an Eksodo 34:6, 7.) Han hirani na giyahan ni Moises an mga Israelita tikang ha pagkabihag ha Ehipto, nagpakilala hi Jehova nga nasiring: “Ako magigin sugad ha bisan ano nga karuyag ko magin sugad.” (Eks. 3:13-15, NW) Ipinapakita hini nga hi Jehova magigin bisan ano nga ginkikinahanglan han kahimtang basi matuman an iya mga katuyoan para ha iya pinili nga katawohan. Tungod hito, nakilala nira hi Jehova sugad nga Manluluwas, Girriro, Paratagana, ngan Paratuman han mga saad ngan nabulig ha ira ha iba nga paagi.—Eks. 15:2, 3; 16:2-5; Jos. 23:14.
15 An aton mga estudyante bangin diri makaeksperyensya hin milagroso nga giya tikang kan Jehova sugad han naeksperyensyahan ni Moises. Bisan pa hito, samtang nagtutubo an ira pagtoo ngan apresasyon ha ira hinbabaroan ngan inaaplikar ito, sigurado nga masasabtan nira an panginahanglan nga sumarig kan Jehova para ha kaisog, kinaadman, ngan giya. Samtang ginbubuhat nira ito, makikilala liwat nira hi Jehova sugad nga maaramon ngan masasarigan nga Magsaragdon, Parapanalipod, ngan mahinatagon nga Paratagana han ngatanan nga ira panginahanglan.—Sal. 55:22; 63:7; Prob. 3:5, 6.
Ipakita an Mahigugmaon nga Pagtagad
16. Kay ano nga an abilidad diri amo an pinakaimportante ha aton pagin epektibo sugad nga magturutdo?
16 Kon inaabat mo nga diri ka maopay magtutdo, ayaw kahulop. Hi Jehova ngan hi Jesus an nanginginano ha programa han pagtutdo nga ginbubuhat yana ha bug-os nga kalibotan. (Buh. 1:7, 8; Pah. 14:6) Bibendisyonan nira an aton mga pangalimbasog basi nga an aton ginsisiring magkaada maopay nga epekto ha tawo nga matadong an kasingkasing. (Juan 6:44) Mapupun-an han sinsero nga gugma han magturutdo ha iya estudyante an anoman nga kakulang hin abilidad. Ipinakita ni apostol Pablo nga nasabtan niya an pagkaimportante han paghigugma ha mga gintututdoan.—Basaha an 1 Tesalonika 2:7, 8.
17. Paonan-o naton maipapakita an sinsero nga pagtagad ha tagsa nga estudyante ha Biblia?
17 Ha sugad man nga paagi, maipapakita naton an sinsero nga pagtagad ha tagsa nga estudyante ha Biblia pinaagi han pagkaada panahon ha pagkilala ha iya. Samtang ginhihisgotan naton ha iya an Kasuratanhon nga mga prinsipyo, posible nga hibabaroan naton an iya kahimtang. Bangin maobserbahan naton nga nagkikinabuhi na hiya uyon ha pipira nga punto nga hinbabaroan niya tikang ha Biblia. Ha iba nga bahin, bangin kinahanglan nga magbag-o pa hiya. Pinaagi ha pagbulig ha iya nga masabtan kon paonan-o naaplikar ha iya an impormasyon nga ginhihisgotan durante han pag-aram ha Biblia, mahigugmaon nga mabubuligan naton hiya nga magin tinuod nga disipulo ni Kristo.
18. Kay ano nga importante an pag-ampo upod ngan para han tagsa nga estudyante ha Biblia?
18 Labaw ha ngatanan, mahimo kita mag-ampo upod ngan para han aton estudyante. Sadang magin matin-aw ha iya nga karuyag naton nga buligan hiya nga mas makilala pa an Maglalarang, mas magin duok ha Iya, ngan magpahimulos han Iya giya. (Basaha an Salmo 25:4, 5.) Kon nag-aampo kita nga buligan ni Jehova an mga pangalimbasog han estudyante ha pag-aplikar han iya hinbabaroan, masasabtan niya an pagkaimportante han pagin ‘magburuhat han pulong.’ (Jak. 1:22) Ngan samtang nababatian niya an aton sinsero nga mga pag-ampo, mahibabaro liwat hiya ha pag-ampo. Makalilipay gud an pagbulig ha mga estudyante nga parig-unon an ira relasyon kan Jehova!
19. Ano an paghihisgotan ha masunod nga artikulo?
19 Nadadasig kita nga sobra unom ngan tunga ka milyon nga Saksi ha bug-os nga kalibotan an okupado ha pagpauswag han ira paagi ha pagtutdo nga tumong an pagbulig ha mga tawo nga tangkod an kasingkasing nga tumanon an ngatanan nga iginsugo ni Jesus. Ano an mga resulta han aton pagsangyaw? An baton hini nga pakiana paghihisgotan ha masunod nga artikulo.
Nahinunumdoman Mo Ba?
• Kay ano nga kinahanglan pauswagon han mga Kristiano an paagi han pagtutdo?
• Ano nga mga paagi an magagamit naton basi magin mas epektibo an aton pagtutdo?
• Ano an magpupuno ha anoman nga kakulang naton hin abilidad ha pagtutdo?
[Mga Pakiana]
[Retrato ha pahina 9]
Nakikigbahin ka ba ha Teokratiko nga Eskwelahan ha Ministeryo?
[Retrato ha pahina 10]
Kay ano nga importante nga aghaton an imo estudyante nga basahon an Biblia?
[Retrato ha pahina 12]
Pag-ampo upod ngan para han imo estudyante