Ika-123 nga Gradwasyon ha Gilead

An mga Naggradwar ha Gilead Ginsagda nga “Magtikang ha Pag-ukab”

HAN Sabado, Septyembre 8, 2007, may-ada 6,352 tikang ha 41 nga nasud nga tinambong ha gradwasyon han ika-123 nga klase han Watchtower Bible School of Gilead. Han alas-10 ha aga, gin-abiabi hira ni Anthony Morris, an tsirman han programa ngan membro han Nagmamando nga Lawas. Katapos hin halipot nga introduksyon, iya iginpakilala an siyahan nga mamumulong, hi Gary Breaux, membro han Komite han Sanga ha Estados Unidos.

Ginpasarig ni Bugto Breaux an mga estudyante nga anoman an ira pisikal nga hitsura, maanyag ha pagkita ni Jehova adton nagbubuhat han Iya kaburut-on. (Jer. 13:11) Iya ginsagda an mga nagradwar nga tipigan ito nga kaanyag. Sunod, ginpabug-atan ni Gerrit Lösch, membro han Nagmamando nga Lawas, nga husto an paglaom hin balos kon nag-aalagad kita kan Jehova. (Heb. 11:6) Kondi, an sadang magin motibo naton amo an may pagsakripisyo nga gugma.

Sunod, ginsagda hira ni William Samuelson, paramangno han Theocratic Schools Department, nga magpabilin ha dungganon nga toka ha pagpasamwak han nagmamando nga Hadi ngan ha pagpakita han ira pagkamaunungon pinaagi han ira maopay nga paggawi. a Gindasig hira ni Sam Roberson, kabulig nga paramangno han Theocratic Schools Department, nga pirme kitaon an mag-opay nga kalidad han iba. Hito nga paagi, mas ‘hihigugmaon nira an kabugtoan.’—1 Ped. 2:17.

Katapos hiton makapaaghat nga mga pahayag, gin-interbyu han instruktor han Gilead nga hi Mark Noumair an pipira nga nagradwar ngan nagsumat hira han ira mga eksperyensya ha pagsangyaw durante han ira pag-eskwela ha Gilead. Matin-aw nga nakita han mga tinambong an ira gugma ha ministeryo ngan an ira hingyap ha pagbulig ha iba. Katapos, hi Kent Fischer, tikang ha Bethel Office ha Patterson, nag-interbyu hin mga membro han Komite han Sanga ha tulo nga nasud nga may-ada mga misyonero. Ginpasarig hinin susbaranan nga kabugtoan an mga tinambong—damu ha ira an mga kag-anak han nagradwar—nga an bag-o nga mga misyonero gin-aataman hin maopay ha ira mga toka. Sunod, gin-interbyu ni Izak Marais han Translation Services Department, an pipira nga mag-iha na nga misyonero, nga pinaagi han ira mga eksperyensya nahanduraw han mga nagradwar an kalipay nga ira maieksperyensyahan.

An pinakaimportante nga diskurso ha programa nga may tema, “Katapos han Ngatanan nga Iyo Hinbatian—Ano an Iyo Bubuhaton?” iginpahayag ni Geoffrey Jackson, membro han Nagmamando nga Lawas nga nagmisyonero ha South Pacific hin haros 25 ka tuig. Ginpabug-atan niya an ikatarapos nga bahin han Sermon ha Bukid. Hito nga sermon, nag-istorya hi Jesus mahitungod hin duha nga lalaki nga nagtukod hin  balay, an usa maaramon ngan an usa lurong. Iginpatin-aw ni Bugto Jackson nga an duha nga balay bangin gintukod ha pariho nga lugar. Kondi, an lurong nagtukod dida ha baras, samtang an maaramon nag-ukab tubtob nga nakakita hiya hin pundasyon nga bato ngan dida hito hiya nagtukod. Han binagyo hin makusog, an balay nga gintukod ha bato waray maguba kondi an gintukod ha baras narumpag.—Mat. 7:24-27; Luk. 6:48.

Iginsaysay ni Jesus nga adton namati la ha iya kondi waray magbuhat han iya igintutdo pariho han lurong. Samtang adton namati ngan nagbuhat han iya ginsiring pariho han maaramon. Ginsidngan ni Bugto Jackson an mga nagradwar, “Kon iyo bubuhaton ha iyo toka an iyo hinbaroan pinaagi han pag-aram ha Biblia, magigin pariho kamo ha maaramon nga tawo.” Salit ha pangataposan, iya ginsagda hira nga “magtikang ha pag-ukab” ha ira mga toka.

Ha kataposan, kinarawat han mga nagradwar an ira diploma ngan toka, ngan naghatag hi Bugto Morris hin pangataposan nga sagdon. Gin-aghat niya hira nga sundon pirme hi Jesus ngan sumarig gud kan Jehova para han kusog. Dida hito natapos an programa han gradwasyon.

[Footnote]

[Retrato ha pahina 31]

ESTADISTIKA HAN KLASE

Kadamu han nasud nga ginrepresentaran: 10

Kadamu han nasud nga gintokahan: 24

Kadamu han estudyante: 56

Aberids nga edad: 33.5

Aberids nga tuig ha kamatuoran: 17.9

Aberids nga mga tuig ha bug-os-panahon nga ministeryo: 13.8

[Retrato ha pahina 32]

Ika-123 nga Naggradwar nga Klase han Watchtower Bible School of Gilead

Ha lista ha ubos, an mga rumbay may numero tikang ha unahan tipaluyo, ngan an mga ngaran iginlista tikang ha wala tipatoo ha kada rumbay.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T.(7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.