Ibutang Pirme hi Jehova ha Imo Atubangan
Ibutang Pirme hi Jehova ha Imo Atubangan
“Hi Jehova iginbutang ko [pirme] ha atubangan ko.”—SAL. 16:8.
1. Ano an mahimo mapahimulsan naton tikang ha mga asoy han Biblia?
IGINREKORD ha sinurat nga Pulong ni Jehova an iya mag-opay gud nga pakig-upod ha katawohan. Gin-uunabi hito an damu nga tawo nga nagkaada bahin ha pagtuman han iya katuyoan. Syempre, an ira mga pulong ngan buhat diri kay mga istorya la nga iginrekord ha Biblia basi makalipay ha aton. Lugod, makakabulig ito ha aton nga magin mas duok ha Dios.—Jak. 4:8.
2, 3. Ano an iginpapasabot han Salmo 16:8?
2 Damu an mahibabaroan naton ha mga eksperyensya han bantogan nga tawohan ha Biblia—hira Abraham, Sara, Moises, Rut, David, Ester, apostol Pablo, ngan iba pa. Kondi, makakapahimulos liwat kita ha asoy han mga tawohan nga diri bantogan. An pamalandong hito makakabulig ha aton nga subaron an ginbuhat han salmista: “Hi Jehova iginbutang ko [pirme] ha atubangan ko. Tungod kay aadi hiya ha akon too nga kamot, diri ako hitatalindas.” (Sal. 16:8) Ano an iginpapasabot hini?
3 Kasagaran nga ha too nga kamot kinakaptan han sundalo an iya espada, salit diri ito napuproteksyonan han taming nga kinakaptan han iya wala. Kondi, napapanalipdan hiya kon may-ada sangkay nga nakikig-away hirani ha iya too. Kon aton hunahunaon pirme hi Jehova ngan buhaton an iya kaburut-on, pananalipdan kita niya. Salit aton paghisgotan kon paonan-o magpaparig-on ha aton pagtoo an mga asoy han Biblia basi aton ‘ibutang pirme hi Jehova ha aton atubangan.’
Ginbabaton ni Jehova an Aton mga Pag-ampo
4. Paghatag hin ehemplo ha Kasuratan nga nagpapakita nga ginbabaton han Dios an mga pag-ampo.
4 Kon aton ibutang pirme hi Jehova ha aton atubangan, babatunon niya an aton mga pag-ampo. (Sal. 65:2; 66:19) Pinamamatud-an ini ha aton han eksperyensya han pinakaedaran nga surugoon ni Abraham, nga posible nga hi Elieser. Ginpakadto hiya ni Abraham ha Mesopotamia basi mamiling hin mahadlukon-ha-Dios nga maarasawa ni Isaak. Hi Elieser nag-ampo para han giya han Dios ngan inabat niya ito han an iya mga kamelyo ginpainom ni Rebeka. Tungod kay sinsero nga nag-ampo hiya, nabilngan niya an nagin hinigugma nga asawa ni Isaak. (Gen. 24:12-14, 67) Oo, espesyal an toka han surugoon ni Abraham. Kondi, diri ba liwat kita sadang sumarig nga ginbabaton ni Jehova an aton mga pag-ampo?
5. Kay ano nga makakasiring kita nga epektibo bisan an halipot ngan hilom nga pag-ampo kan Jehova?
5 Usahay, bangin kinahanglan mag-ampo kita hin halipot para han bulig han Dios. Makausa, naobserbahan ni Hadi Artaherhes han Persia nga masurub-on an iya paratagay nga hi Nehemia. “Ano an imo pangangaroon?” nagpakiana an hadi. “Nag-ampo [dayon hi Nehemia] ha Dios han langit.” Halipot la ito nga iya hilom nga pag-ampo. Kondi, ginbaton ito han Dios, kay ginbuligan hiya han hadi ha pagtukod utro han mga pader han Jerusalem. (Basaha an Nehemia 2:1-8.) Oo, epektibo bisan an halipot ngan hilom nga pag-ampo.
6, 7. (a) May kalabotan ha pag-ampo, ano nga susbaranan an ipinakita ni Epapras? (b) Kay ano nga sadang ig-ampo naton an iba?
6 Ginsasagda kita nga ‘ig-ampo an usa kag usa,’ bisan kon diri naton nakakarawat dayon an baton hito. (Jak. 5:16) Hi Epapras, nga “matinumanon nga ministro ni Kristo,” sinsero nga nag-ampo para ha iya igkasi-tumuroo. Han nagsurat hi Pablo tikang ha Roma, hiya nagsiring: “Hi Epapras, nga taga didto ha iyo [ha Kolosas], nga uripon ni Kristo Jesus, nangungumusta ha iyo, nga ha gihapon naniguro gud tungod ha iyo ha iya mga pag-ampo, basi nga maghingpit kamo ngan mabug-os an iyo pagsarig ha ngatanan nga kaburut-on han Dios. Kay nakakatestigo ako tungod ha iya, nga nagbuhat gud hiya tungod ha iyo, ngan tungod ha mga aadto ha Laodisea, ngan ha mga aadto ha Hierapolis.”—Kol. 1:7; 4:12, 13.
7 An Kolosas, Laodisea, ngan Hierapolis, mga syudad ha usa nga distrito ha Asia Minor. An mga Kristiano ha Hierapolis naukoy upod han mga magsiringba han diosa nga hi Sibele, adton ha Laodisea napapalibotan han materyalistiko nga mga tawo, ngan an mga taga-Kolosas namimeligro ha pilosopiya. (Kol. 2:8) Diri urusahon nga hi Epapras, nga taga-Kolosas, ‘naniguro gud ha pag-ampo’ para ha mga tumuroo hito nga syudad! Waray isaysay ha Biblia kon paonan-o ginbaton an iya mga pag-ampo, kondi waray hiya umundang ha pag-ampo para ha mga igkasi-tumuroo; sugad man kita. Bisan kon diri kita “malabot ha mga butang han iba,” bangin maaram kita nga an usa nga kapamilya o sangkay nakakaeksperyensya hin makuri nga pagsari han pagtoo. (1 Ped. 4:15) Angayan gud an pag-ampo hin hilom para ha iya! Nabuligan hi Pablo han mga pag-ampo han iba, ngan daku liwat an maibubulig han aton mga pag-ampo.—2 Kor. 1:10, 11.
8. (a) Kay ano nga masisiring naton nga ginpabilhan han katigurangan ha Efeso an pagkaimportante han pag-ampo? (b) Paonan-o naton sadang tagdon an pag-ampo?
8 Ha pagkita han mga tawo, mainampoon ba kita? Han nakigkita hi Pablo ha katigurangan ha Efeso, “hiya linuhod, ngan nag-ampo upod ha ira ngatanan.” Katapos, “hira ngatanan nanook hinduro, ngan kinaptan hi Pablo ha liog, ngan hadkan hiya. Ngan nagmasakit hira hin labi tungod han pulong, nga iya ginyakan, nga diri na hira makakita han iya bayhon.” (Buh. 20:36-38) Diri kita maaram kon hin-o adto nga katigurangan, kondi matin-aw nga ginpabilhan nira an pagkaimportante han pag-ampo. Sadang gud naton pabilhan an pribilehiyo han pag-ampo ha Dios ngan ‘magbayaw han putli nga mga kamot,’ nasarig nga babatunon kita han aton langitnon nga Amay.—1 Tim. 2:8.
Sugta hin Bug-os an Dios
9, 10. (a) Ano nga susbaranan an ipinakita han mga anak nga babaye ni Selopehad? (b) An pagin masinugtanon han mga anak ni Selopehad mahimo magkaada ano nga epekto ha solo nga Kristiano may kalabotan ha pag-asawa?
9 An paghunahuna pirme kan Jehova mabulig ha aton nga sugton hiya, ngan makarawat kita hin mga bendisyon sugad nga resulta. (Deut. 28:13; 1 Sam. 15:22) Nagkikinahanglan ini hin pagin andam naton ha pagsugot. Tagda an disposisyon han lima nga anak nga babaye ni Selopehad nga nagkinabuhi ha panahon ni Moises. Kustomre han mga Israelita nga an mga anak nga lalaki an nakarawat han panurundon tikang ha ira amay. Namatay hi Selopehad nga waray anak nga lalaki, ngan nagsugo hi Jehova nga inin lima nga babaye amo an makarawat han ngatanan nga panurundon—ha usa nga kondisyon. Kinahanglan mag-asawa hira ha mga anak nga lalaki ni Manases basi an ira panurundon magpabilin hito mismo nga tribo.—Num. 27:1-8; 36:6-8.
10 Natoo an mga anak ni Selopehad nga maopay an magigin resulta kon sugton nira an Dios. “Sugad han iginsugo ni Jehova kan Moises, amo man an ginbuhat han mga anak nga babaye ni Selopehad,” siring han Biblia. Salit, ‘hira Maala, Tirsa, Hogla, Milka, ngan Noa, an mga anak nga babaye ni Selopehad, an naasawa han mga anak nga lalaki han kabugtoan nga lalaki han ira amay. Naasawa hira han panimalay han mga anak nga lalaki ni Manases, nga anak nga lalaki ni Jose; ngan an ira panurundon nahibilin ha tulin han panimalay han ira amay.’ (Num. 36:10-12) Ginbuhat hinin masinugtanon nga kababayin-an an iginsugo ni Jehova. (Jos. 17:3, 4) An hamtong nga solo nga mga Kristiano natoo liwat nga maopay an magigin resulta kon susugton nira an Dios nga mag-asawa ha “Ginoo la.”—1 Kor. 7:39.
11, 12. Paonan-o ipinakita ni Kaleb nga nasarig hiya ha Dios?
11 Sugad han Israelita nga hi Kaleb, kinahanglan bug-os nga sugton naton hi Jehova. (Deut. 1:36) Katapos talwason an Israel tikang ha Ehipto han ika-16 ka siglo A.K.P., ginsugo ni Moises an 12 nga lalaki basi mag-espiya ha Kanaan, kondi 2 la—hira Kaleb ngan Josue—an nagsagda ha katawohan nga sumarig hin bug-os ha Dios ngan sumulod ngadto. (Num. 14:6-9) Paglabay hin 40 ka tuig, buhi pa gihapon hira Josue ngan Kaleb ngan bug-os nga nasunod kan Jehova, ngan gin-gamit han Dios hi Josue nga manguna ha mga Israelita ngadto ha Tuna nga Iginsaad. Kondi, an napulo nga waray pagtoo nga espiya namatay durante han 40 ka tuig nga paglakaton han mga Israelita ha kamingawan.—Num. 14:31-34.
12 Hi Kaleb, nga usa han mga edaran ha Israel nga waray mamatay ha kamingawan, dinaop kan Josue ngan nagsiring: “Ako ha hingpit nagsunod kan Jehova nga akon Dios.” (Basaha an Josue 14:6-9.) An 85-anyos nga hi Kaleb naghangyo nga ihatag ha iya an bungturon nga rehiyon nga iginsaad han Dios ha iya, bisan kon gin-uukyan ito han mga kaaway ha ira dagku nga kinuta nga syudad.—Jos. 14:10-15.
13. Bisan pa han mga pagsari, ano an kinahanglan buhaton naton basi makarawat an mga bendisyon han Dios?
13 Pariho ha matinumanon ngan masinugtanon nga hi Kaleb, bibendisyonan liwat kita kon ‘hingpit nga sundon naton hi Jehova.’ Kon umatubang kita hin makuri nga mga problema, bubuligan kita kon ‘hingpit nga sundon naton hi Jehova.’ Kondi an pagbuhat hito ha bug-os nga kinabuhi, sugad han ginbuhat ni Kaleb, mahimo magin makuri. Bisan kon ginsunod ni Hadi Salomon hi Jehova han nagtikang hiya ha pagmando, naimpluwensyahan hiya han iya mga asawa nga magsingba ha palso nga mga dios han lagas na hiya, ngan ‘waray hiya magsunod hin hingpit kan Jehova sugad kan David nga iya amay.’ (1 Hadi 11:4-6) Anoman nga pagsari an aton atubangon, hinaot sugton naton pirme hin bug-os an Dios ngan padayon nga hunahunaon hiya.
Sarig Pirme kan Jehova
14, 15. Ha mga eksperyensya ni Noemi, ano an hinbaroan mo mahitungod han panginahanglan nga sumarig ha Dios?
14 Kinahanglan sumarig kita ha Dios labi na kon nasusubo kita hinduro tungod kay an aton tidaraon baga hin waray na paglaom. Tagda an lagas nga hi Noemi, nga nabalo ngan namatyan hin duha nga anak nga lalaki. Han binalik hiya ha Juda tikang ha Moab, hiya masurub-on nga nagsiring: “Ayaw ako pagtawaga nga Noemi [nangangahulogan, “Akon Nalilipayan”], tawaga ako nga Mara [nangangahulogan, “Mapait”]; kay an Makagarahum nagbutang ha akon ha daku nga kapaitan. Linakat ako nga punô, ngan hi Jehova nagdara ha akon nganhi ha kalugaringon nga waray sulod; kay ano nga tawagon ako niyo nga Noemi, nga kinikita niyo nga hi Jehova nagpamatuod patok ha akon, ngan an Makagarahum nagsakit ha akon?”—Rut 1:20, 21.
15 Bisan kon duro an kasubo ni Noemi, masasabtan naton ha pagbasa hin maopay ha libro han Rut nga padayon nga sinarig hiya kan Jehova. Ngan nabag-o gud an iya kahimtang! An balo nga umagad ni Noemi nga hi Rut naasawa ni Boas ngan nanganak hira hin lalaki. Hi Noemi an nagmangno ha bata ngan an asoy nasiring: “An kababayin-an nga iya . . . hirani naghatag han ngaran hini, nga nasiring: May-ada usa ka anak nga lalaki nga natawo kan Noemi, ngan ira tinawag an iya ngaran hin Obed; hiya an amay ni Jesse, an amay ni David.” (Rut 4:14-17) Kon banhawon na hi Noemi, hibabaroan niya nga hi Rut, nga babanhawon liwat, nagin kaapoy-apoyan ni Jesus, an Mesias. (Mat. 1:5, 6, 16) Pariho kan Noemi, diri kita makakasiguro kon ano an dadangatan han diri maopay nga kahimtang yana. Salit, sarig kita pirme ha Dios, sugad la han sagdon ha aton ha Proberbios 3:5, 6: “Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot. Ha ngatanan mo nga dalan kilalaha hiya, ngan hiya magtututdo han imo mga agianan.”
Sarig ha Baraan nga Espiritu
16. Paonan-o ginbuligan han baraan nga espiritu han Dios an katigurangan ha kadaan nga Israel?
16 Kon aton ibutang pirme hi Jehova ha aton atubangan, gigiyahan kita niya pinaagi han iya baraan nga espiritu. (Gal. 5:16-18) An espiritu han Dios nakada ha 70 nga katigurangan nga ginpili basi bumulig kan Moises ha ‘pagdara han pinas-an han katawohan’ han Israel. Hira Eldad ngan Medad la an gin-unabi, pero an baraan nga espiritu binulig ha ira ngatanan ha pagbuhat han ira toka. (Num. 11:13-29) Waray ruhaduha nga may-kapas hira, mahadlukon ha Dios, masasarigan, ngan tangkod pariho han kalalakin-an nga ginhisgotan kanina. (Eks. 18:21) Ito nga mga kalidad ipinapakita liwat han mga tigurang yana.
17. Ano an naibulig han baraan nga espiritu ni Jehova ha pagtukod han tabernakulo?
17 An baraan nga espiritu ni Jehova nakabulig gud ha pagtukod han tabernakulo ha kamingawan. Ginpili ni Jehova hi Besalel sugad nga nangunguna nga panday ngan magturukod han tabernakulo, ngan nagsaad nga ‘pupun-on hiya han espiritu han Dios, kinaadman, sarabotan, hibaro, ngan ngatanan nga paagi han buhat.’ (Eks. 31:3-5) An kalalakin-an nga may “makinaadmananon nga kasingkasing” nagtrabaho upod ni Besalel ngan han iya kabulig nga hi Aholiab ha pagtuman hiton makaruruyag nga toka. Dugang pa, an espiritu ni Jehova nagpagios ha mga tawo nga disidido maghatag hin donasyon. (Eks. 31:6; 35:5, 30-34) Ito mismo nga espiritu an nagpapagios ha mga surugoon han Dios yana nga buhaton an ngatanan nga ira mahihimo nga unahon an Ginhadian. (Mat. 6:33) Bangin may-ada kita mga talento, kondi kinahanglan mag-ampo kita para han baraan nga espiritu ngan magpagiya hito basi matuman an buruhaton nga iginhatag ni Jehova ha iya katawohan yana.—Luk. 11:13.
Magkaada Pirme Hilarom nga Pagtahod kan Jehova han Kasundalohan
18, 19. (a) An baraan nga espiritu han Dios nabulig ha aton nga makultibar an ano nga kalidad? (b) Ano an imo hinbaroan ha mga susbaranan nira Simeon ngan Ana?
18 An baraan nga espiritu nabulig ha aton nga makultibar an hilarom nga pagtahod kan Jehova basi ibutang naton pirme hiya ha aton atubangan. An katawohan han Dios hadto ginsidngan: “Hi Jehova han kasundalohan takos han iyo hilarom nga pagtahod sugad nga baraan.” (Isa. 8:13, Byington) Duha han matinalahuron nga lagas ha Jerusalem han siyahan nga siglo amo hira Simeon ngan Ana. (Basaha an Lukas 2:25-38.) Natoo hi Simeon ha mga tagna mahitungod han Mesias ngan “naghuhulat han kalipayan ni Israel.” Ginpagios han Dios an baraan nga espiritu dida kan Simeon ngan ginpasarig hiya nga makikita pa niya an Mesias. Ngan ito gud an nahitabo. Usa ka adlaw han tuig 2 A.K.P., gindara hi Jesus ha templo nira Maria ngan Jose, an iroy ngan pinakaamay han bata. Tungod kay ginpagios han baraan nga espiritu, nagtagna hi Simeon mahitungod han Mesias ngan han kabidoan ni Maria, nga nasubo han iginraysang hi Jesus ha pasakitan nga kahoy. Kondi, handurawa an duro nga kalipay ni Simeon han ginkugos niya “an Kristo” ni Jehova! Maopay gud nga susbaranan han hilarom nga pagtahod an ipinakita ni Simeon para ha mga surugoon han Dios yana!
19 An matinalahuron nga 84-anyos nga balo nga hi Ana “waray bumulag ha templo.” Nag-alagad hiya kan Jehova ha adlaw ngan gab-i upod an “mga pagpuasa ngan pag-inampo.” Nakadto liwat hi Ana han gindara ha templo an minasus-an nga hi Jesus. Mapasalamaton gud hiya han nakita niya an magigin Mesias! Salit, hiya ‘nagdayaw ha Dios, ngan nakighimangraw mahitungod han bata ha ngatanan nga naghihinulat han pagtubos han Jerusalem.’ Napagios gud hi Ana nga ipaangbit an maopay nga sumat ha iba! Pariho kan Simeon ngan Ana, malipayon gud an kalagasan yana nga bisan kon lagas na hira, nakakag-alagad pa hira kan Jehova sugad nga iya mga Saksi.
20. Anoman an aton edad, ano an kinahanglan buhaton naton, ngan kay ano?
20 Anoman an aton edad, kinahanglan ibutang naton pirme hi Jehova ha aton atubangan. Kon buhaton naton ito, bibendisyonan niya an aton mapainubsanon nga pangalimbasog ha pagsumat ha iba mahitungod han iya pagkahadi ngan urusahon nga mga buhat. (Sal. 71:17, 18; 145:10-13) Kondi, basi mapasidunggan naton hi Jehova, kinahanglan ipakita naton an mga kalidad nga nagpapalipay ha iya. Ano an mahibabaroan naton mahitungod hito nga mga kalidad pinaagi han padayon nga pag-usisa ha mga asoy han Biblia?
Ano an Imo Baton?
• Kay ano nga makakasiring kita nga ginbabaton ni Jehova an mga pag-ampo?
• Kay ano nga sadang sugton naton hin bug-os an Dios?
• Bisan kon nasusubo kita hinduro, kay ano nga sadang kita sumarig pirme kan Jehova?
• Paonan-o an baraan nga espiritu han Dios nabulig ha iya katawohan?
[Mga Pakiana]
[Retrato ha pahina 4]
Ginbaton ni Jehova an pag-ampo ni Nehemia
[Retrato ha pahina 5]
Kon hunahunaon naton an mga bendisyon nga nakarawat ni Noemi, mabulig ito ha aton nga sumarig kan Jehova