Maglakat ha Dalan ni Jehova
Maglakat ha Dalan ni Jehova
“[“Malipayon,” NW] an tagsa-tagsa nga nahadlok kan Jehova, nga naglalakat ha iya mga agian.”—SAL. 128:1.
1, 2. Kay ano nga makakasiguro kita nga posible magin tinuod nga malipayon?
KALIPAY—an ngatanan naruruyag hito. Kondi sigurado nga mauyon ka nga an pangalimbasog nga magin malipayon diri nangangahulogan nga tinuod kita nga malipayon.
2 Kondi, posible nga magin tinuod nga malipayon. “[“Malipayon,” NW] an tagsa-tagsa nga nahadlok kan Jehova, nga naglalakat ha iya mga agian,” siring han Salmo 128:1. Magigin malipayon kita kon aton sisingbahon an Dios ngan maglalakat ha iya dalan pinaagi ha pagbuhat han iya kaburut-on. Ano an mahimo magin epekto hini ha aton paggawi ngan pagkatawo?
Magin Masasarigan
3. Ano an pinakaimportante nga paagi han pagpakita naton ha Dios nga masasarigan kita niya?
3 Masasarigan adton nahahadlok kan Jehova, sugad la ha iya nga masasarigan. Gintuman ni Jehova an ngatanan nga iya iginsaad ha kadaan nga Israel. (1 Hadi 8:56) An aton dedikasyon ha Dios amo an pinakaimportante nga saad naton, ngan an agsob nga pag-ampo mabulig ha aton nga matuman ito. Makakag-ampo kita sugad kan salmista David: ‘Ikaw, O Dios, namati han akon mga saad. Magkakanta ako hin pagdayaw ha imo ngaran ha waray kataposan, nga matuman ko ha ikinaadlaw an akon mga saad.’ (Sal. 61:5, 8; Ekles. 5:4-6) Basi magin sangkay han Dios, kinahanglan magin masasarigan kita.—Sal. 15:1, 4.
4. Paonan-o gintuman ni Jepte ngan han iya anak an iya saad kan Jehova?
4 Ha panahon han mga Hukom han Israel, nagsaad hi Jepte nga kon itugot ni Jehova nga mapirde niya an mga Amonitanhon, ihahatag niya sugad nga “halad nga sinunog” an siyahan nga matapo ha iya tikang ha pakig-away. An tinapo ha iya amo an iya daraga—an iya bugtong nga anak. Tungod ha pagtoo kan Jehova, gintuman ni Jepte ngan han iya anak an iya saad. Bisan kon ginpapabilhan gud ha Israel an pag-asawa ngan pagpanganak, kinaburut-on nga nagpabilin nga solo an anak ni Jepte ngan nagpahimulos han pribilehiyo han sagrado nga pag-alagad ha santuaryo ni Jehova.—Huk. 11:28-40.
5. Ha ano nga paagi pinamatud-an ni Hana nga masasarigan hiya?
5 Masasarigan an mahadlukon ha Dios nga hi Hana nga asawa han Lebihanon nga hi Elkana. Naukoy hira ha bungturon nga rehiyon han Epraim kalungon nira hi Penina, an ikaduha nga asawa han iya bana. Damu an anak ni Penina ngan gintatamay niya an baw-as nga hi Hana labi na kon napakadto an pamilya ha tabernakulo. Ha usa nga higayon, nagsaad hi Hana nga kon mag-anak hiya hin lalaki, ihahatag niya ito kan Jehova. Waray pag-iha nagburod hiya, nanganak ngan ginngaranan hin Samuel. Katapos lutason, iginhalad hiya ni Hana kan Jehova didto ha Shiloh ngan iginhatag hiya “ha ngatanan nga adlaw han iya kinabuhi.” (1 Sam. 1:11) Gintuman gud ni Hana an iya saad bisan kon diri hiya maaram nga ha urhi magkakaanak pa hiya.—1 Sam. 2:20, 21.
6. Paonan-o ipinakita ni Tikiko an iya pagin masasarigan?
6 An Kristiano nga hi Tikiko ha siyahan nga siglo masasarigan ngan “matinumanon nga ministro.” (Kol. 4:7) Kaupod hiya ni apostol Pablo tikang ha Gresya ngadto ha Masedonia, Asia Minor, ngan bangin tubtob ha Jerusalem. (Buh. 20:2-4) Posible nga hiya “an bugto” nga binulig kan Tito nga maghikay han regalo para ha pobre nga mga igkasi-tumuroo ha Judea. (2 Kor. 8:18, 19; 12:18) Han siyahan nga kapriso ni Pablo ha Roma, iginpadara niya ha masasarigan nga representante nga hi Tikiko an mga surat ngadto ha igkasi-tumuroo ha Efeso ngan Kolosas. (Efe. 6:21, 22; Kol. 4:8, 9) Durante han iya ikaduha nga kapriso ha Roma, ginsugo niya hi Tikiko ngadto ha Efeso. (2 Tim. 4:12) Kon masasarigan kita, makarawat liwat kita hin mga bendisyon ha pag-alagad kan Jehova.
7, 8. Kay ano nga makakasiring kita nga hira David ngan Jonatan tinuod nga magsangkay?
7 Naglalaom an Dios nga masasarigan kita nga sangkay. (Prob. 17:17) An anak ni Hadi Saul nga hi Jonatan nagin sangkay ni David. Han hinbatian niya nga ginpatay ni David hi Goliat, “an kalag ni Jonatan nahakaw-it ha kalag ni David, ngan hi Jonatan nahigugma ha iya sugad nga iya kalugaringon nga kalag.” (1 Sam. 18:1, 3) Ginpahamangnoan pa ngani niya hi David han gin-iparatay hiya ni Saul. Han pinalagiw hi David, nakigkita hi Jonatan ha iya ngan nakigsabot ha iya. Harapit na hiya patayon ni Saul tungod kay nakiistorya hiya kan David, kondi an magsangkay nagkita utro ngan ginparig-on pa an ira pagkamagsangkay. (1 Sam. 20:24-41) Ha ira ultimo nga pagkita, ginparig-on ni Jonatan hi David nga sumarig “dida ha Dios.”—1 Sam. 23:16-18.
8 Namatay hi Jonatan ha pakig-away ha mga Pilisteohanon. (1 Sam. 31:6) Tungod hito, masurub-on nga nagkanta hi David: “Naguguol ako para ha imo, Jonatan nga akon bugto: nagmakalilipay ka hinduro para ha akon. An imo gugma ha akon urusahon, darodaku kay han gugma han kababayin-an.” (2 Sam. 1:26) Matin-aw nga hira David ngan Jonatan tinuod nga magsangkay.
Magin “Mapainubsanon” Pirme
9. Paonan-o ipinapakita han Hukom kapitulo 9 an pagkaimportante han pagpaubos?
9 Basi magin sangkay han Dios, kinahanglan magin “mapainubsanon” kita. (1 Ped. 3:8; Sal. 138:6) An pagkaimportante han pagpaubos iginsasaysay ha Hukom kapitulo 9. Hi Jotam nga anak ni Gideon, nagsiring: “An kakahoyan ginawas ha usa nga panahon pagdihog hin usa nga hadi ha pagmando ha ira.” Gin-unabi an kahoy nga olibo, igera, ngan an balagon. Nagsisimbolo ito han takos nga mga indibiduwal nga waray magtinguha hin pagmando ha ira mga igkasi-Israelita. Kondi an sapinit—nga magagamit la sugad nga sungo—nagsisimbolo ha pagkahadi han mapahitas-on nga hi Abimelek, an parapamatay nga karuyag magkontrol ha iba. Bisan kon hiya ‘nagpakaprinsipe ha Israel ha tulo ka tuig,’ namatay hiya hin diri napapanahon. (Huk. 9:8-15, 22, 50-54) Mas maopay gud nga magin mapainubsanon!
10. Ano an imo hinbaroan ha kapakyas ni Herodes ha ‘paghatag hin himaya ha Dios’?
10 Han siyahan nga siglo K.P., nagkaada kasamok butnga han mapahitas-on nga hi Hadi Herodes Agripa han Judea ngan han mga taga-Tiro ngan Sidon nga nakikigmurayaw ha iya. Han hi Herodes nagpahayag ha publiko ha usa nga okasyon, hira nagsinggit: “Tingog han usa nga dios; ngan diri han usa nga tawo”! Tungod kay waray isalikway ni Herodes ito nga pagdayaw, hinampak hiya han anghel ni Jehova salit namatay hiya ha makangingirhat nga paagi ‘kay waray hiya maghatag hin himaya ha Dios.’ (Buh. 12:20-23) Ano man kon maopay kita magpahayag o magtutdo han kamatuoran han Biblia? Sadang kita magpasalamat ha Dios para ha igintutugot niya ha aton nga buhaton.—1 Kor. 4:6, 7; Jak. 4:6.
Magin Maisugon Ngan Marig-on
11, 12. Paonan-o ipinapakita han eksperyensya ni Enok nga tinatagan ni Jehova an iya mga surugoon hin kaisog ngan kusog?
11 Kon mapainubsanon nga naglalakat kita ha dalan ni Jehova, tatagan kita niya hin kaisog ngan kusog. (Deut. 31:6-8, 23) Hi Enok, nga ikapito ha katulinan tikang kan Adan, maisugon nga naglakat upod han Dios pinaagi ha pagkinabuhi hin matadong ha butnga han magraot nga tawo ha iya henerasyon. (Gen. 5:21-24) Ginparig-on ni Jehova hi Enok ha pagpahayag hin gamhanan nga mensahe ha ira tungod han ira mga pulong ngan buhat nga diri nakakalipay ha Dios. (Basaha an Judas 14, 15.) Maisugon ka ba ha pagpahayag han mga paghukom han Dios?
12 Iginpadapat ni Jehova an paghukom ha katawohan nga waray-kahadlok ha iya pinaagi han bug-os-kalibotan nga Delubyo ha panahon ni Noe. Kondi, an tagna ni Enok nagpaparig-on ha aton tungod kay an mga tawo nga waray-kahadlok ha Dios hirani na bungkagon han Iya baraan nga kasundalohan. (Pah. 16:14-16; 19:11-16) Sugad nga baton ha aton mga pag-ampo, hi Jehova naghahatag ha aton hin kaisog ha pagpahayag han iya mensahe, may kalabotan man ito ha iya mga paghukom o bendisyon ilarom han pagmando han Ginhadian.
13. Kay ano nga makakasiguro kita nga an Dios makakahatag hin kaisog ngan kusog nga ginkikinahanglan naton basi malamposan an nakakaguol nga mga problema?
13 Ginkikinahanglan naton an hatag han Dios nga kaisog ngan kusog basi malamposan an nakakaguol nga mga problema. Han nag-asawa hi Esaw hin duha nga babaye nga Hitihanon, “hira amo an kapaitan ha pamurubuot [han iya mga kag-anak] hi Isaak ngan hi Rebeka.” Nagreklamo pa ngani hi Rebeka: “Ginugol-an ako hinin akon kinabuhi tungod han mga anak nga babaye ni Het, kon [an aton anak nga] hi Jakob mangasawa ha mga anak nga babaye ni Het, sugad hini, ha mga anak nga babaye han tuna, ano an kaopayan han akon kinabuhi?” (Gen. 26:34, 35; 27:46) Salit, ginpalakat ni Isaak hi Jakob basi magbiling hin asawa ha mga magsiringba ni Jehova. Bisan kon diri mababag-o nira Isaak ngan Rebeka an ginbuhat ni Esaw, gintagan hira han Dios hin kinaadman, kaisog, ngan kusog basi magpabilin nga matinumanon ha Iya. Kon mag-ampo kita para han ginkikinahanglan nga bulig, bubuligan liwat kita ni Jehova.—Sal. 118:5.
14. Paonan-o ipinakita han Israelita nga daragita an kaisog?
14 Paglabay hin mga siglo, usa nga Israelita nga daragita nga ginbihag han mga tulisan an nagin surugoon ha balay han Siryahanon nga kumander ha militar nga hi Naaman nga sanlahon. Tungod kay hinbatian han daragita an mahitungod han mga milagro han Dios pinaagi kan propeta Eliseo, maisugon nga nagsiring hiya ha asawa ni Naaman: ‘Kon an akon ginoo kumadto ha Israel, an manaragna ni Jehova magtatambal ha iya sanla.’ Kinadto hi Naaman ha Israel, ngan milagroso nga natambal hiya. (2 Hadi 5:1-3) Maopay gud nga susbaranan ito nga daragita para ha mga batan-on yana nga nasarig kan Jehova para han kaisog ha pagsangyaw ha mga magturutdo, kaeskwela, ngan ha iba!
15. Ano an maisugon nga ginbuhat ni Obadia nga tinaporan ha balay ni Ahab?
15 An hatag han Dios nga kaisog nabulig ha aton ha pag-ilob han pagtimaraot. Tagda an tinaporan ha balay ni Hadi Ahab nga hi Obadia, nga nagkinabuhi ha panahon ni propeta Elias. Han nagsugo hi Rayna Jesebel nga pamatayon an mga propeta han Dios, igintago ni Obadia an 100 ha ira ha ‘tinagkalim-an ha usa nga lungib.’ (1 Hadi 18:13; 19:18) Maisugon nga bubuligan mo ba an gintitimaraot nga mga igkasi-Kristiano, sugad han pagbulig ni Obadia ha mga propeta ni Jehova?
16, 17. Ano an reaksyon nira Aristarko ngan Gayo ha pagtimaraot?
16 Kon gintitimaraot kita, makakasarig kita nga mabulig ha aton hi Jehova. (Roma 8:35-39) Ha teatro ha Efeso, an igkasi-magburuhat ni Pablo nga hira Aristarko ngan Gayo gin-atake han yinukot nga magsamok nga tawo. An platero nga hi Demetrio amo an nag-aghat han kasamok. Hiya ngan an iya mga igkasi-platero parahimo hin plata nga altar han diosa nga hi Artemis, ngan nameligro an ira negosyo tungod kay damu nga taga-Efeso an binaya ha pagsingba ha mga idolo han masangyawan hira ni Pablo. Gindanas nira hira Aristarko ngan Gayo ngadto ha teatro ngan nagsininggit: “Daku nga Diana [Artemis] han mga Efesohanon”! Kahuna nira Aristarko ngan Gayo nga mamamatay na hira, kondi ginsaway han magmarando han syudad an mga tawo.—Buh. 19:23-41.
17 Kon nakaeksperyensya ka hin sugad hito, mangangalimbasog ka ba nga likyan ito? Waray kita mababasa nga nahulop hi Aristarko o hi Gayo. Tungod kay taga-Tesalonika hi Aristarko, maaram hiya nga an pagpasamwak han maopay nga sumat mahimo magresulta hin pagtimaraot. Antes hito, nagkaada hin kasamok han nagsangyaw hi Pablo didto. (Buh. 17:5; 20:4) Tungod kay ginsugot nira Aristarko ngan Gayo hi Jehova, gintagan hira hin kusog ngan kaisog basi makailob ha pagtimaraot.
Magmangno ha Kaopayan han Iba
18. Paonan-o ipinakita nira Priska ngan Akila nga ‘nagmamangno’ hira ha kaopayan han iba?
18 Gintitimaraot man kita o diri, sadang kita magin matinagaron ha mga igkasi-Kristiano. Hira Priska ngan Akila ‘nagmangno’ ha kaopayan han iba. (Basaha an Filipos 2:4.) Ito nga susbaranan nga mag-asawa bangin nag-andam hin mauukyan ni Pablo ha Efeso, diin an platero nga hi Demetrio nag-aghat han kasamok nga gin-unabi na. Tungod hito, bangin napagios hira Akila ngan Priska nga ‘an ira liog igbutang’ ha peligro para kan Pablo. (Roma 16:3, 4; 2 Kor. 1:8) Yana, tungod han aton pagtagad ha aton kabugtoan nga gintitimaraot, nagigin ‘maaramon kita sugad han mga halas.’ (Mat. 10:16-18) Maaramon nga nagpapadayon kita ha aton buruhaton ngan diri nagtatraydor ha ira pinaagi ha pagsumat han ira mga ngaran o iba nga impormasyon ha mga nagtitimaraot.
19. Ano an mag-opay nga ginbuhat ni Dorkas para ha iba?
19 Magkalain-lain nga paagi an pagmangno ha kaopayan han iba. An iba nga Kristiano kulang hin kinahanglanon nga butang, ngan bangin maihatag naton ito. (Efe. 4:28; Jak. 2:14-17) Ha kongregasyon han Jope ha siyahan nga siglo, may-ada didto mahinatagon nga babaye nga hi Dorkas. (Basaha an Buhat 9:36-42.) “Puno [hiya] hin mag-opay nga mga buhat, ngan han panlimos” sugad han paghimo hin bado para ha pobre nga mga balo. Nasubo gud an mga balo han mamatay hiya han 36 K.P. Pinaagi kan Pedro ginbanhaw han Dios hi Dorkas, ngan posible gud nga samtang buhi pa hiya dinhi ha tuna, malipayon nga nagsangyaw hiya han maopay nga sumat ngan nagbuhat hin birilhon nga butang para ha iba. Malipayon gud kita nga kaupod naton yana an sugad kamahinatagon nga Kristiano nga kababayin-an!
20, 21. (a) Ano an kalabotan han pagparig-on ha pagpakita hin pagtagad ha iba? (b) Ano an imo mahihimo basi magin makaparig-on?
20 Ipinapakita naton an pagtagad ha iba pinaagi han pagparig-on ha ira. (Roma 1:11, 12) An igkasi-magburuhat ni Pablo nga hi Silas makaparig-on gud. Han 49 K.P., katapos masulbad an isyu han pagturi, an nagmamando nga lawas ha Jerusalem nagsugo hin mga representante nga magdadara han surat ha mga Kristiano ha iba-iba nga lugar. Gindara ito nira Silas, Judas, Bernabe, ngan Pablo ngadto ha Antiokia. Didto, gin-aghat nira Silas ngan Judas an kabugtoan pinaagi ‘hin damu nga pamulong, ngan ginparig-on hira.’—Buh. 15:32.
21 Ha urhi, ginpriso hira Pablo ngan Silas ha Filipos, kondi tungod han linog, nasangyawan nira ngan nagin tumuroo an bantay ha prisohan ngan an iya pamilya. Antes bumaya hito nga syudad, ginparig-on nira Silas ngan Pablo an kabugtoan. (Buh. 16:12, 40) Ha pagsubad ha ira, pangalimbasugi nga parig-unon an iba pinaagi han imo mga komento, pahayag, ngan maduruto nga pagsangyaw. Ngan kon may-ada ka makaparig-on nga “mga pulong,” ayaw pag-alang, “igyakan” ito.—Buh. 13:15.
Padayon nga Maglakat ha Dalan ni Jehova
22, 23. Paonan-o kita magpapahimulos ha mga asoy han Biblia?
22 Sadang gud kita magpasalamat ha totoo-ha-kinabuhi nga mga asoy nga iginrekord ha Pulong ni Jehova, an “Dios han ngatanan nga pagparig-on”! (2 Kor. 1:3, Byington) Basi magpahimulos kita tikang hini nga mga eksperyensya, kinahanglan sundon naton an mga leksyon han Biblia ngan magpagiya han baraan nga espiritu han Dios.—Gal. 5:22-25.
23 An pamalandong ha mga asoy han Biblia mabulig ha aton nga ipakita an mga kalidad nga nagpapalipay ha Dios. Magpaparig-on ito han aton relasyon kan Jehova, nga naghahatag ha aton “hin kinaadman, ngan hin hibaro, ngan hin kahimongaya.” (Ekles. 2:26) Sugad nga resulta, mapapalipay naton an Dios. (Prob. 27:11) Hinaot magin determinado kita nga buhaton ito pinaagi han padayon nga paglakat ha dalan ni Jehova.
Ano an Imo Baton?
• Paonan-o mo ipapakita nga masasarigan ka?
• Kay ano nga sadang kita magin “mapainubsanon”?
• Paonan-o an mga asoy han Biblia nabulig ha aton nga magin maisugon?
• Ha ano nga mga paagi makakagmangno kita ha kaopayan han iba?
[Mga Pakiana]
[Retrato ha pahina 8]
Gintuman han masasarigan nga hi Jepte ngan han iya anak an iya saad, bisan kon makuri an pagbuhat hito
[Retrato ha pahina 10]
Mga bata, ano an iyo hinbaroan tikang ha Israelita nga daragita?
[Retrato ha pahina 11]
Paonan-o iginhatag ni Dorkas an panginahanglan han mga igkasi-Kristiano?