Mahibaro Tikang ha mga Sayop han mga Israelita

MAARAM an mga Israelita han ginlalaoman ni Jehova ha ira ha pagsulod nira ha Tuna nga Iginsaad. Pinaagi kan Moises, an Dios nagsugo: “Iyo panhiginon an ngatanan nga umurukoy han tuna tikang ha iyo atubangan, ngan gunawon an ngatanan nira nga ladawan nga bato, ngan gunawon an ira hinurma nga mga ladawan, ngan bungkagon an ngatanan nira nga higtaas nga lugar.”—Num. 33:52.

An mga Israelita kinahanglan diri maghimo hin pormal nga pakigsabot ha mga umurukoy han tuna ngan diri makig-asawa ha ira. (Deut. 7:2, 3) Oo, an pinili nga katawohan han Dios ginpahamangnoan: “Magmatngon ka, nga diri ka magbuhat hin kauyonan han mga umurukoy ha tuna nga imo kakadtoan, kay bangin mahimo nga bitik ha butnga mo.” (Eks. 34:12) Kondi, gintalapas han mga Israelita an Dios ngan nahilit-ag hira. Ano an hinungdan han ira pagtalapas? Ano nga nagpapahamangno nga leksyon an mahibabaroan naton tikang hini?—1 Kor. 10:11.

Tikang ha Pakig-upod Ngadto ha Idolatriya

Basi matag-iya han mga Israelita an Tuna nga Iginsaad, kinahanglan mapirde nira an mga umurukoy hito. Kondi, waray nira sunda hin bug-os an sugo han Dios. Waray nira paiwasa an mga kaaway. (Huk. 1:1–2:10) Lugod, tungod han ira pakig-upod pirme ha mga umurukoy han tuna han inukoy hira ha butnga han “pito nga nasud,” nagkasarangkay hira. (Deut. 7:1) Ano an epekto hini ha mga Israelita? An Biblia nasiring: “Ira kinuha an ira mga anak nga kababayin-an nga ira mga asawa, ngan ihinatag an ira kalugaringon nga mga anak nga kababayin-an ngadto ha ira mga anak nga kalalakin-an, ngan nag-alagad ha ira mga dios-dios. Ngan an mga anak ni Israel nagbuhat hadton maraot ha atubangan han mga mata ni Jehova, ngan nalimot kan Jehova nga ira Dios, ngan nag-alagad han mga Baal ngan han mga Astarot.” (Huk. 3:5-7) Tungod kay an mga Israelita nakig-upod ha mga umurukoy han tuna, nagresulta ito ha pakig-asawa ngan idolatriya. Han  nakig-asawa hira, nag-alang na hira ha pagpaiwas ha mga pagano. Nahugawan an tinuod nga pagsingba, ngan nagsingba hira ha palso nga mga dios.

Han nagin sangkay han mga Israelita an mga umurukoy ha Tuna nga Iginsaad, mas nameligro an ira espirituwalidad kay han mga kaaway pa nira hira. Tagda an usa pa nga paagi nga bangin nakadaot han ira pagtoo.

Tikang ha Pag-uma Ngadto ha Pagsingba kan Baal

Han sinulod an mga Israelita ha Tuna nga Iginsaad, waray na hira magbarobalhin ngan damu an nagin parauma. An paagi han ira pag-uma posible nga pariho han paagi han mga Kanaanita. Kondi, matin-aw nga diri la kay ginsubad nira an paagi han pag-uma han mga umurukoy didto. Tungod han ira pakig-upod ha mga tawo didto, nadani liwat hira nga karawaton an mga gintotoohan han mga tawo may kalabotan ha pag-uma.

Nagsisingba an mga Kanaanita ha damu nga Baal—an mga dios nga gintotoohan nga maghahatag hin pagkamabungahon ha tuna. Labot ha pagkultibar han tuna ngan pag-ani han produkto hito, inabot an panahon nga an mga Israelita nakigbahin na ha pagsingba ha mga dios han mga Kanaanita sugad nga naghahatag hin kahuraan. Hito nga paagi, damu ha Israel an nagsisingba kuno kan Jehova, kondi ha pagkamatuod nakikigbahin hira ha apostasya.

Marig-on nga Pahamangno Para ha Aton Yana

Posible nga waray intensyon an mga Israelita nga mahidabi ha pagsingba kan Baal ngan ha pakigbahin ha karaotan hito han makaupod nira ha siyahan nga higayon an mga tawo ha Tuna nga Iginsaad. Kondi, ito an nagin resulta han ira pakig-upod ha ira. Diri ba posible nga ito liwat an mahitabo ha aton kon makig-upod kita ha mga makisangkayon kondi diri pariho ha aton an pagtoo, suruklan ha moral, ngan prinsipyo? Syempre, diri malilikyan an pakig-upod ha mga diri-tumuroo ha aton trabaho, eskwelahan, o bisan ha sulod han panimalay mismo. Kondi, an eksperyensya han mga Israelita nagpapahamangno ha aton nga an sugad nga mga kaupod nagriresulta hin problema. Iginsasaysay han Biblia inin diri maninigaran nga kamatuoran: “An magraot nga mga kaupod nakakadunot ha mga mag-opay nga batasan.”—1 Kor. 15:33.

Yana, naatubang kita hin damu nga pagsari nga pariho han naeksperyensyahan han mga Israelita. Damu an idolo han mga tawo yana. Upod na hito an kwarta, mga artista, bantogan ha isport, politiko, lider han relihiyon, ngan kapamilya pa ngani. Posible nga ito an magin prayoridad naton ha kinabuhi. Makakadaot ha aton relasyon kan Jehova an duok nga pakigsangkay ha diri nahigugma ha Iya.

An sayop nga pakighilawas amo an nangunguna nga bahin han pagsingba kan Baal nga nagdani ngan nagsulay han damu nga Israelita. Nadadani pa gihapon han sugad nga lit-ag an pipira nga katawohan han Dios. Pananglitan, an pribado nga pagkita hin pornograpiya ha Internet ha balay bangin mag-aghat ha mausisa o diri-mabinantayon nga tawo nga kitaon an mga butang nga magdadaot han iya limpyo nga konsensya. Makasurubo gud kon masulay an usa nga Kristiano ha pornograpiya ha Internet!

Bulahan Adton Nagtitipig han Iya mga Pahinumdom

Personal nga desisyon han usa kon hi Jehova susugton o diri ha pagpili hin kasangkayan. (Deut. 30:19, 20) Salit, kinahanglan pakianhan naton an aton kalugaringon: ‘Hin-o an akon mga kaupod kon nagpapahalibway ako? Ano an ira mga prinsipyo ngan pamatasan? Nag-aalagad ba hira kan Jehova? Magigin mas maopay ba ako nga Kristiano kon makikig-upod ako ha ira?’

An salmista nagkanta: “Bulahan adton mga hingpit ha dalan, ngan naglalakat ha balaud ni Jehova. Bulahan adton mga nagtitipig han iya mga pagpamatuod [“pahinumdom,” NW], nga namimiling ha iya ha bug-os nga kasingkasing.” (Sal. 119:1, 2) Oo, “bulahan an tagsa-tagsa nga nahadlok kan Jehova, nga naglalakat ha iya mga agian.” (Sal. 128:1) May kalabotan ha aton pagpili hin mga kaupod, hinaot nga mahibaro kita tikang ha mga sayop han mga Israelita ngan bug-os nga sugton hi Jehova.—Prob. 13:20.

[Retrato ha pahina 26]

An pakig-upod ha mga diri nahigugma kan Jehova mahimo mag-aghat ha aton ha idolatriya