An Imo ba Panlantaw ha Iba Pariho han Panlantaw ha Ira ni Jehova?

“Waray pagkaaway-away ha lawas . . . an ngatanan nga mga bahin magbinantayay [‘magtagad,’ NW] an usa kag usa.”—1 KOR. 12:25.

1. Ano an imo gin-abat han siyahan nga higayon nga sinulod ka ha espirituwal nga paraiso?

 HAN binulag kita ha maraot nga kalibotan ngan nagtikang makig-upod ha katawohan ni Jehova, sigurado nga nalipay kita ha mapaso nga gugma ngan pagtagad nga aton gin-abat kaupod ha ira. Kaiba gud ito ha bastos, mapungtanon, ngan makiawayon nga katawohan nga ginmamandoan ni Satanas! Sinulod kita ha espirituwal nga paraiso nga puno hin kamurayawan ngan pagkaurosa.—Isa. 48:17, 18; 60:18; 65:25.

2. (a) Ano an mahimo makaapekto han aton panlantaw ha iba? (b) Ano an bangin kinahanglan naton buhaton?

² Kondi ha paglabay han panahon, tungod han aton pagkadiri-hingpit bangin magkaada kita sayop nga panlantaw ha aton kabugtoan. An aton pagkadiri-hingpit bangin magin hinungdan nga padakuon naton an mga kasaypanan han aton kabugtoan imbes nga kitaon an ngatanan han ira mag-opay nga kalidad. Ha laktod, hinngangalimtan naton nga kitaon hira sugad han pagkita ni Jehova ha ira. Kon mahitabo ini ha aton, panahon na nga usisahon an aton panlantaw ngan ipahiuyon ito ha matin-aw nga panlantaw ni Jehova.—Eks. 33:13.

Kon Ano an Panlantaw ni Jehova ha Aton Kabugtoan

3. Ha ano iginpariho han Biblia an Kristiano nga kongregasyon?

³ Sugad han nakarekord ha 1 Korinto 12:2-26, iginpariho ni apostol Pablo an kongregasyon han dinihogan nga mga Kristiano ha lawas nga “damu an mga bahin.” Sugad la nga magkalain-lain an mga bahin han lawas, magkalain-lain  gud liwat an personalidad ngan abilidad han mga membro han kongregasyon. Bisan pa hito, kinakarawat ni Jehova ini nga pagkaiba-iba. Iya ginhihigugma ngan gin-aapresyar an tagsa nga membro. Salit hi Pablo nagsagdon liwat ha aton nga an mga membro han kongregasyon sadang magkaada hin pariho nga pagtagad ha usa kag usa. Bangin makuri ini buhaton tungod kay an personalidad han iba kaiba kay han aton.

4. Kay ano nga bangin kinahanglan naton bag-ohon an aton panlantaw ha aton kabugtoan?

⁴ Bangin magkaada pa ngani kita tendensya nga pagkinitaon an mga kaluyahan han aton kabugtoan. Kon ito an aton ginbubuhat, sugad hin nagtitinutok kita ha usa la nga bahin han retrato. Kondi mas haluag an nakikita ni Jehova tungod kay iya ginkikita an kabug-osan hito. Bangin magtinutok kita ha mga kinaiya nga diri naton naruruyagan, kondi ginkikita ni Jehova an bug-os nga pagkatawo, upod na an ngatanan han iya mag-opay nga kalidad. Kon mas nangangalimbasog kita nga subaron hi Jehova, mas makakabulig kita ha pagpauswag han gugma ngan pagkaurosa ha kongregasyon.—Efe. 4:1-3; 5:1, 2.

5. Kay ano nga diri husto nga hukman an iba?

⁵ Maaram gud hi Jesus nga an diri-hingpit nga mga tawo may tendensya nga hukman an iba. Nagsagdon hiya: “Diri kamo maghukom, basi diri kamo paghukman.” (Mat. 7:1) Ha orihinal nga yinaknan, hi Jesus waray magsiring: “Diri kamo maghukom,” sugad han mababasa ha Samar-Leyte nga Biblia. Lugod, nagsiring hiya: “Ayaw na kamo paghukom,” tungod kay maaram hiya nga nabatasan na han damu han iya mamarati an paghukom ha iba. Posible ba nga kita liwat sugad na hito? Kon may-ada kita hito nga tendensya, kinahanglan mangalimbasog kita nga magbag-o basi diri kita hukman hin maraot. Ha pagkamatuod, hin-o kita para maghukom ha usa nga gintagan ni Jehova hin responsabilidad ha kongregasyon o sumiring nga diri hiya angay magin membro han kongregasyon? Bangin may mga kaluyahan an usa nga bugto, kondi kon padayon nga kinakarawat hiya ni Jehova, husto ba nga isalikway naton hiya? (Juan 6:44) Natoo gud ba kita nga ginigiyahan ni Jehova an iya organisasyon ngan magios hiya ha iya itinanda nga panahon kon ginkikinahanglan an mga pagbag-o?—Basaha an Roma 14:1-4.

6. Ano an panlantaw ni Jehova ha iya mga surugoon?

⁶ An usa nga urusahon kan Jehova amo an iya kapas nga makita an potensyal han tagsa nga Kristiano kon magin hingpit na hira ha bag-o nga kalibotan. Maaram liwat hiya kon ano na an ira nahimo nga pag-uswag ha espirituwal. Salit diri niya ginkikinita an tagsa nga kaluyahan. Ha Salmo 103:12 aton mababasa: “Sugad nga hirayo an sinirangan han katundan, sugad hin kahirayo an pagpahimulag ha aton han aton mga pagsupak.” Mapasalamaton gud kita hito!—Sal. 130:3.

7. Ano an aton hibabaroan ha panlantaw ni Jehova kan David?

⁷ Mababasa naton ha Kasuratan nga hi Jehova may-ada urusahon gud nga abilidad nga isentro an iya pagkita ha mag-opay nga kalidad han usa nga tawo. Gintawag ni Jehova hi David nga “akon surugoon nga hi David, nga nagbantay han akon mga sugo, ngan nga nagsunod ha akon ha bug-os niya nga kasingkasing, ha pagbuhat hadto la nga matadong ha akon mga mata.” (1 Hadi 14:8) Syempre, maaram kita nga hi David nakabuhat  hin mga sayop. Bisan pa hito, ginpili ni Jehova nga isentro an iya pagkita ha mag-opay nga kalidad ni David tungod kay maaram Hiya nga matadong an iya kasingkasing.—1 Kron. 29:17.

Subara hi Jehova ha Imo Pagkita ha Imo Kabugtoan

8, 9. (a) Ha ano nga paagi masusubad naton hi Jehova? (b) Paonan-o naton ini maiilustrar, ngan ano an leksyon hini para ha aton?

⁸ Hi Jehova nakakabasa han mga kasingkasing, kondi kita diri. Ini pa la maopay na nga hinungdan nga diri kita maghukom ha iba. Diri kita maaram han ngatanan nga motibo han iba. Sadang kita mangalimbasog nga subaron hi Jehova pinaagi han diri pagkinita ha mga kaluyahan han tawo kay mawawara man ito ha kaurhian. Diri ba maopay nga tumong nga subaron hi Jehova may kalabotan hini? An pagbuhat hini makakabulig gud ha aton nga magkaada mamurayawon nga relasyon ha aton kabugtoan.—Efe. 4:23, 24.

⁹ Ha pag-ilustrar, handurawa an usa nga balay nga naguguba na—natatangtang na an mga sandayong, guba na an mga bintana, ngan dumog na an mga alkuba tungod han pagtinurui han uran. Bangin hunahunaon han kadam-an nga nakakakita hito nga angay na ito gub-on tungod kay malain ito pagkit-on. Kondi inabot an usa nga tawo nga iba gud an panhunahuna. Iya ginbalewaray an mga guba nga iya nakikita, kondi lugod, iya naobserbahan nga marig-on pa an balay ngan maaayad pa ito. Iya ito ginpalit, gin-ayad an mga guba, ngan gin-opay an hitsura hito. Han maayad na, gindayaw ito han mga nalabay. Mahimo ba kita magsubad hini nga tawo nga nangalimbasog ha pag-ayad han balay? Imbes nga pagkinitaon an mga kaluyahan han aton kabugtoan, mahimo ba naton kitaon an ira mag-opay nga kalidad ngan an ira potensyal nga mag-uswag pa ha espirituwal? Kon bubuhaton naton ito, hihigugmaon naton hira tungod han ira mag-opay nga espirituwal nga kalidad, sugad la nga hinigugma hira ni Jehova.—Basaha an Hebreo 6:10.

10. Paonan-o makakabulig ha aton an sagdon han Filipos 2:3, 4?

¹⁰ May-ada sagdon hi apostol Pablo nga makakabulig ha aton ha pagkaada maopay nga relasyon ha ngatanan nga aton kakongregasyon. Iya ginsagda an mga Kristiano: “Diri kamo magbuhat hin bisan ano tikang ha pagkabahin-bahin o tungod hin padayaw, kondi ha pagpaubos ha hunahuna an tagsa-tagsa mag-isip han iba nga maoroopay pa ha iya ngahaw; diri magmangno an tagsa-tagsa ha iyo ha iya mga kalugaringon nga butang, kondi sugad man ha mga butang han iba.” (Fil. 2:3, 4) An pagkamapainubsanon mabulig ha aton nga magkaada hin husto nga panlantaw ha iba. Kon aton iginpapakita an pagtagad ha iba ngan ginbibiling an ira mag-opay nga kalidad, mabubuligan liwat kita nga kitaon hira sugad han pagkita ha ira ni Jehova.

11. Ano nga mga pagbag-o an nakakaapekto ha iba nga mga kongregasyon?

¹¹ Hinin bag-o la, damu hinduro nga tawo an binalhin ha iba nga lugar tungod han mga pagbag-o nga nahitatabo ha bug-os nga kalibotan. An iba nga mga syudad gin-uukyan na yana hin mga tawo tikang ha damu nga katunaan. An iba nga binalhin ha aton lugar nagin interesado ha kamatuoran han Biblia ngan kaupod na naton yana ha pagsingba kan Jehova. Ini hira ‘nagtikang ha tagsa-tagsa nga nasud ngan ha ngatanan nga panon, katawohan ngan yinaknan.’ (Pah. 7:9) Sugad nga resulta, damu han aton mga kongregasyon an ginkukompwesto hin kabugtoan nga iba-iba an nasyonalidad.

12. Ano nga panlantaw ha usa kag usa an kinahanglan naton tipigan, ngan kay ano nga usahay bangin makuri ini?

¹² Ha aton kongregasyon, bangin kinahanglan nga mas mangalimbasog kita ha pagtipig hin husto nga panlantaw ha usa kag usa. Kinahanglan hinumdoman naton an sagdon ni apostol Pedro nga magpakita hin ‘putli nga paghigugma ha kabugtoan’ ngan ‘maghigugmaay gud ha usa kag usa tikang ha kasingkasing.’ (1 Ped. 1:22) Ha kongregasyon nga iba-iba an nasyonalidad han mga membro, bangin makuri an pagkultibar hin tinuod nga gugma ngan pagtagad. An kultura han aton mga igkasi-magsiringba bangin iba gud ha aton kultura, sugad man an ira edukasyon, kahimtang ha pinansyal, ngan rasa. Nakukurian ka ba pagsabot han panhunahuna o mga reaksyon han iba ha ira? Bangin sugad liwat hito an ira inaabat ha imo. Bisan pa hito, kita ngatanan  ginsusugo: “Higugmaon niyo an mga kabugtoan.”—1 Ped. 2:17.

13. Ano nga mga pagbag-o ha aton panhunahuna an bangin kinahanglan himoon naton?

¹³ Bangin kinahanglan naton bag-ohon an aton panhunahuna basi mapahaluag an aton gugma ha ngatanan nga aton kabugtoan. (Basaha an 2 Korinto 6:12, 13.) May mga panahon ba nga nakakasiring kita, “Diri man ha ginpapakaraot ko hiya, pero . . . ” ngan katapos nagsusumat kita hin negatibo nga mga kinaiya nga aton ginhuhunahuna nga komon ha ira rasa? Kon may-ada kita sugad hito nga mga pagbati, kinahanglan wad-on naton an sayop nga panhunahuna nga gintitipigan pa gihapon naton. Mahimo naton pakianhan an aton kalugaringon, ‘Pirme ba ako nangangalimbasog nga makilala an mga tawo nga iba an kultura?’ An sugad nga pag-usisa ha kalugaringon makakabulig ha aton nga magin mas makinarawaton ngan maapresyaron ha aton kabugtoan ha bug-os nga kalibotan.

14, 15. (a) Hin-o an pipira nga susbaranan nga nagbag-o han ira panhunahuna ha iba nga tawo? (b) Paonan-o naton hira masusubad?

¹⁴ Mababasa naton ha Biblia an mag-opay nga susbaranan hadton nagbag-o han ira panhunahuna, ngan an usa ha ira amo hi apostol Pedro. Sugad nga Judio, sigurado nga diri hiya nasulod ha balay han usa nga Hentil. Handurawa an iya gin-abat han ginpakadto hiya ha balay han diri-sinirkumsisyonan nga Hentil nga hi Cornelio! Ginbag-o ni Pedro an iya panhunahuna tungod kay nasantop niya nga kaburut-on han Dios nga an mga tawo tikang ha ngatanan nga nasud magin bahin han Kristiano nga kongregasyon. (Buh. 10:9-35) Hi Saulo, nga ha urhi nagin hi apostol Pablo, kinahanglan liwat magbag-o ngan wad-on an iya sayop nga panhunahuna ha iba. Ginkarawat niya nga duro an iya kapungot ha mga Kristiano salit iya ‘gintimaraot ngan ginhibang an singbahan han Dios.’ Kondi han gintadong hiya han Ginoo nga hi Jesus, naghimo hiya hin dagku nga pagbag-o ngan kinarawat pa ngani hin instruksyon tikang ha mga tawo nga iya hadto gintimaraot.—Gal. 1:13-20.

¹⁵ Sigurado nga mababag-o naton an aton disposisyon pinaagi ha bulig han espiritu ni Jehova. Kon maobserbahan naton nga may-ada pa kita nahibibilin nga sayop nga panhunahuna ha iba, mangalimbasog kita nga wad-on ito ngan ‘magbantay ha pagkaurosa han espiritu ha gapos han kamurayawan.’ (Efe. 4:3-6) Gin-aaghat kita han Biblia nga ‘magsul-ot hin gugma, nga amo an higot han pagkahingpit.’—Kol. 3:14.

Pagsubad kan Jehova ha Aton Ministeryo

16. Ano an kaburut-on han Dios mahitungod ha katawohan?

¹⁶ Hi apostol Pablo nagsurat: “Ha Dios waray pinilian ha mga tawo.” (Roma 2:11) Katuyoan ni Jehova nga an mga tawo ha ngatanan nga nasud magkaurosa ha pagsingba ha iya. (Basaha an 1 Timoteo 2:3, 4.) Basi matuman ito, iya gin-organisa  an pagpasamwak han ‘maopay nga sumat ngadto ha ngatanan nga nasud, panon, yinaknan ngan katawohan.’ (Pah. 14:6) Hi Jesus nagsiring: “An urumhanan amo an kalibotan.” (Mat. 13:38) Ano an kahulogan hito para ha imo ngan ha imo mga kapamilya?

17. Paonan-o naton mabubuligan an ngatanan nga klase hin tawo?

¹⁷ Diri an ngatanan makakakadto ha higrayo nga bahin han kalibotan basi isangyaw an mensahe han Ginhadian. Kondi, mahimo naton dad-on ini nga mensahe ha mga tawo tikang ha magkalain-lain nga lugar nga nag-uukoy ha aton teritoryo. Alerto ba kita ha mga higayon nga magpamatuod ha ngatanan nga klase hin tawo, diri la ha mga tawo nga pirme naton nasasangyawan? Kay ano nga diri magin determinado nga sangyawan adton waray pa masangyawi hin maopay?—Roma 15:20, 21.

18. Ano nga pagtagad an iginpakita ni Jesus ha mga tawo?

¹⁸ Inabat gud hi Jesus nga kinahanglan buligan an ngatanan. Waray hiya magsangyaw ha usa la nga lugar. Usa nga asoy ha Biblia an nagsusumat nga “naglibot [hiya] ha ngatanan nga kaburubungtohan ngan mga baryo.” Ngan katapos, “han pakakita niya han kadam-an, hiya nalooy ha ira” ngan nagpahayag han panginahanglan nga buligan hira.—Mat. 9:35-37.

19, 20. Ano an pipira nga paagi nga masusubad naton an pagtagad ni Jehova ngan ni Jesus ha ngatanan nga klase han katawohan?

¹⁹ Ano an pipira nga paagi nga maipapakita naton an pariho nga disposisyon? An iba nangangalimbasog nga magsangyaw ha mga lugar ha ira teritoryo nga diri agsob makobrehan. Bangin upod hini an komersyal nga mga lugar, parke, o paradahan. An iba nag-aaram hin iba nga yinaknan basi makasangyaw ha etniko nga mga grupo nga nag-uukoy na yana ha ira lugar o ha mga tawo nga diri agsob masangyawan han naglabay. An pag-aram kon paonan-o kukumustahon ito nga mga tawo ha ira kalugaringon nga yinaknan magpapakita nga interesado ka gud ha ira kaopayan. Kon tungod han aton kahimtang diri kita makakahimo pag-aram hin lain nga yinaknan, puydi ba naton dasigon adton nagbubuhat hito? Sigurado nga diri naton karuyag nga magin negatibo o kwestyunon an motibo han iba nga nangangalimbasog ha pagsangyaw ha mga tawo tikang ha iba nga nasud. Birilhon ha Dios an ngatanan nga kinabuhi, ngan karuyag naton subaron an iya panlantaw.—Kol. 3:10, 11.

²⁰ An pagsubad ha panlantaw han Dios ha mga tawo nangangahulogan liwat hin pagsangyaw ha ngatanan, anoman an ira kahimtang. Bangin an iba waray urukyan, mahugaw, o imoral an pagkinabuhi. Kon may-ada mga tawo nga diri maopay an pagtratar ha aton, diri ito sadang magin hinungdan nga magkaada kita negatibo nga opinyon ha ira nasyonalidad o rasa ha kabug-osan. Maraot an pagtratar han iba kan Pablo, kondi waray ito makapaundang ha iya ha pagsangyaw ha mga tawo nga pariho ha ira an gintikangan. (Buh. 14:5-7, 19-22) Naglaom hiya nga aapresyaron han iba an iya pagsangyaw ngan kakarawaton ito.

21. Paonan-o mabulig ha imo an pagsubad han panlantaw ni Jehova ha iba nga tawo?

²¹ Matin-aw na gud ha aton yana nga ha pakig-upod ha aton mga kakongregasyon, ha aton kabugtoan ha bug-os nga kalibotan, ngan ha mga tawo ha kanataran, ginkikinahanglan naton an husto nga panlantaw—an panlantaw ni Jehova. Kon mas ginsusubad naton an panlantaw ni Jehova, mas makakabulig kita ha pagpauswag han kamurayawan ngan pagkaurosa. Ngan magigin mas kwalipikado kita ha pagbulig ha iba nga higugmaon hi Jehova, an Dios nga diri nagpapasulabi kondi nagpapakita hin mahigugmaon nga pagtagad ha ngatanan, “kay hira ngatanan mga buhat han iya mga kamot.”—Job 34:19.

Mababaton Mo Ba?

• Ano nga panlantaw ha aton kabugtoan an sadang naton pangalimbasogan nga likyan?

• Paonan-o naton masusubad hi Jehova ha aton panlantaw ha aton kabugtoan?

• Ano nga mga leksyon an imo hinbaroan mahitungod ha aton panhunahuna ha aton kabugtoan ha bug-os nga kalibotan?

• Ha aton ministeryo, paonan-o naton masusubad an panlantaw ni Jehova ha mga tawo?

[Mga Pakiana]

[Retrato ha pahina 26]

Paonan-o mo makikilala an mga tawo nga iba an kultura?

[Retrato ha pahina 28]

Ha ano nga mga paagi maisasangyaw mo an maopay nga sumat ha mas damu nga tawo?