Magin Makatadunganon, Magin Timbang
Magin Makatadunganon, Magin Timbang
“Padayon nga pahinumdoma hira nga . . . magin makatadunganon.”—TITO 3:1, 2, NW.
1, 2. Ano an ginsisiring han Kasuratan mahitungod han pagkamakatadunganon, ngan kay ano nga husto an pagbuhat hito?
HI Jehova, an aton mahigugmaon nga Amay ha langit, waray tubtoban an kinaadman. Sugad nga iya mga linarang, nasarig kita han iya giya ha aton pagkinabuhi. (Sal. 48:14) An disipulo nga hi Jakobo nagsiring nga “an kinaadman nga tikang ha kahitas-an, siyahan putli, makigdaiton, matalunoy [“makatadunganon,” NW], mapuanguron, puno ha kalooy ngan mag-opay nga bunga, waray pagruhaduha, waray hin kasalingkapaw.”—Jak. 3:17.
2 “Ipahayag niyo an iyo kaaghop [“pagkamakatadunganon,” NW] ha ngatanan nga mga tawo,” nagsagdon hi apostol Pablo. a (Fil. 4:5) Hi Jesu-Kristo an Ginoo ngan Ulo han Kristiano nga kongregasyon. (Efe. 5:23) Importante gud nga an tagsa ha aton magin makatadunganon, nasugot ha giya ni Kristo ngan magin matinagaron ngan timbang ha aton pagtratar ha igkasi-tawo!
3, 4. (a) Paghatag hin ehemplo han mag-opay nga resulta kon masugot kita. (b) Ano an aton paghihisgotan?
3 Magpapahimulos kita kon kinaburut-on nga masugot kita ha timbang nga paagi. Pananglitan: Han mahibaroan ha Britanya nga may-ada plano ha pag-atake an mga terorista, kadam-an nga pasahero ha eruplano an nagkooperar gud ha mga surundon. Waray na hira magdara hin mga butang nga itinutugot hadto kondi diri na puydi yana, basi masiguro nga talwas ha peligro an ngatanan. Kon nagmamaneho kita, usahay kinahanglan hatagan naton hin lugar an iba nga drayber, basi malikyan an aksidente.
4 Damu ha aton an kinukurian ha pagpasakop. Salit, may kalabotan hini, aton paghisgotan kon paonan-o makakabulig ha aton an husto nga motibo, husto nga pagtagad ha awtoridad, ngan pagin timbang.
Kay Ano nga Magin Mapinasakupon?
5. Ilarom han Mosaiko nga Balaud, ano an sadang magpagios ha uripon nga diri bumaya ha iya agaron?
5 Pinabubug-atan han usa nga ehemplo ha panahon antes han mga Kristiano an husto nga motibo han pagpasakop. Ilarom han Mosaiko nga Balaud, an mga Hebreohanon nga nagin uripon kinahanglan hatagan hin kagawasan katapos han pito ka tuig nga pagserbisyo o ha tuig han Jubileo, hain man hito an mahiuna. Kondi mahimo hiya magpabilin nga uripon kon ito an iya karuyag. (Basaha an Eksodo 21:5, 6.) Ano an magpapagios ha iya? Gugma an magpapagios ha iya nga magpabilin nga uripon, ilarom han awtoridad han iya matinagaron nga agaron.
6. Ano an nahihimo han gugma ha aton pag-alagad kan Jehova ngan pagtratar ha iba?
6 Ha pariho nga paagi, an aton gugma kan Jehova nagpapagios ha aton nga igdedikar ha iya an aton kinabuhi ngan magbuhat uyon ha aton dedikasyon. (Roma 14:7, 8) “Amo ini an gugma ha Dios, nga pagtumanon ta an iya mga sugo; ngan an iya mga sugo diri magbug-at,” nagsurat hi apostol Juan. (1 Juan 5:3) Ini nga gugma diri kay interesado la ha kalugaringon nga kaopayan. (1 Kor. 13:4, 5) Ha aton pagtratar ha igkasi-tawo, an gugma ha ira nagpapagios ha aton nga unahon an ira kaopayan antes an aton. Imbes nga hunahunaon la an aton kalugaringon, gintatagad naton an kaopayan han iba.—Fil. 2:2, 3.
7. Ano an naibubulig ha aton ministeryo han pagin matinagaron naton?
7 An aton mga pulong ngan buhat diri sadang makapakdol ha iba. (Efe. 4:29) Oo, an gugma magpapagios ha aton nga likyan an pagbuhat hin bisan ano nga mahimo makaulang ha mga tawo nga iba-iba an kahimtang ngan kultura nga magin magsiringba ni Jehova. Agsob nga nagkikinahanglan ini han aton pagin matinagaron. Pananglitan, an mga misyonera nga hiara na mag-make-up o magsul-ot hin stockings diri nagamit hito ha mga lugar diin bangin maghunahuna an mga tawo nga imoral hira ngan makapakdol ha iba.—1 Kor. 10:31-33.
8. Paonan-o an gugma ha Dios makakabulig ha aton nga gumawi sugad hin “guroguti”?
8 An gugma naton kan Jehova nabulig ha aton nga diri magpahitaas. Katapos maglantugi an mga disipulo kon hin-o ha ira an pinakabantogan, ginpatindog ni Jesus an usa nga bata ha butnga nira. Hiya nagsaysay: “Kon hin-o an kumarawat hini nga bata ha akon ngaran, nakarawat ha akon: ngan kon hin-o an kumarawat ha akon, nakarawat han nagpakanhi ha akon; kay an guroguti ha iyo ngatanan, ini amo an daku.” (Luk. 9:48; Mar. 9:36) Bangin makurian an tagsa ha aton nga gumawi sugad hin “guroguti.” Tungod han napanunod nga pagkadiri-hingpit ngan tendensya ha pagpahitaas, bangin mangalimbasog kita nga magin bantogan, kondi an pagpaubos mabulig ha aton nga diri buhaton ito.—Roma 12:10.
9. Basi magin mapinasakupon, ano an kinahanglan kilalahon naton?
9 Basi magin mapinasakupon, kinahanglan kilalahon naton an awtoridad hadton ginpili han Dios. Gintatahod han ngatanan nga tinuod nga Kristiano an importante nga prinsipyo han pagkaulo. Iginpatin-aw ini ni apostol Pablo ha mga taga-Korinto: “Buot ko nga iyo hibaroan, nga an ulo han ngatanan nga mga tawo amo hi Kristo; ngan an ulo han babaye amo an lalaki; ngan an ulo ni Kristo amo an Dios.”—1 Kor. 11:3.
10. Ano an ipinapakita han aton pagpasakop ha awtoridad ni Jehova?
10 An pagpasakop ha awtoridad han Dios nagpapakita nga nasarig ngan natapod kita ha iya sugad nga aton mahigugmaon nga Amay. Maaram hiya han ngatanan nga nahitatabo ngan babalosan kita niya. Mabulig ito ha aton kon diri kita gintatahod han iba o kon nasisina ngan diri napupugngan an ira kasinahon ha aton. Hi Pablo nagsagdon: “Kon sadang mahimo, sugad han nahitutungod ha iyo, makigmurayaw kamo ha ngatanan nga mga tawo.” Ginpabug-atan niya ito pinaagi hini nga sugo: ‘Diri kamo bumulos, mga hinigugma, kondi tagi niyo hin lugar an kasina han Dios; kay nahisurat na: Akon an pagbulos; ako an mabayad, siring ni Jehova.’—Roma 12:18, 19.
11. Paonan-o naton maipapakita nga nagpapasakop kita ha pagkaulo ni Kristo?
11 Kinahanglan tahuron liwat naton adton gintagan han Dios hin awtoridad ha sulod han Kristiano nga kongregasyon. Iginhuhulagway han Pahayag kapitulo 1 nga ginkakaptan ni Kristo Jesus ha iya too nga kamot an “mga bitoon” han kongregasyon. (Pah. 1:16, 20) Ha kabug-osan, ini nga “mga bitoon” nagsisimbolo ha pinili nga mga tigurang o paramangno ha mga kongregasyon. Nagpapasakop hira ha pagpanguna ni Kristo ngan nagsusubad han iya maloloy-on nga pagmangno ha panon. An ngatanan ha kongregasyon nagpapasakop ha kahikayan ni Jesus ha paghatag hin espirituwal nga pagkaon ha husto nga panahon pinaagi han “matinumanon ngan maaramon nga uripon.” (Mat. 24:45-47, NW) Yana, an aton pagin disidido ha pag-aram ngan pag-aplikar hini nga impormasyon nagpapakita nga nagpapasakop kita ha pagkaulo ni Kristo, nga nakakadugang han kamurayawan ngan pagkaurosa.—Roma 14:13, 19.
Magpasakop—Tubtob Diin?
12. Kay ano nga may-ada limitasyon an pagin mapinasakupon?
12 An pagpasakop diri nangangahulogan nga ikukompromiso naton an aton pagtoo o diosnon nga mga prinsipyo. Han gindid-an an siyahan nga mga Kristiano han mga lider han relihiyon ha panutdo ha ngaran ni Jesus, ano an ira ginbuhat? Hi Pedro ngan an iba nga apostol waray kahadlok nga nagsiring: “Kinahanglan sugton namon an Dios sugad nga magmarando imbes nga an mga tawo.” (Buh. 4:18-20; 5:28, 29, NW) Salit yana, kon ginpupugngan kita han mga awtoridad han gobyerno ha pagsangyaw han maopay nga sumat, diri kita naundang, kondi mahimo naton bag-ohon an aton mga paagi basi mataktika nga malamposan an sitwasyon. Kon igindidiri an pagsangyaw ha balay-balay, mahimo kita gumamit hin iba nga paagi basi makaistorya an mga tawo ngan makapadayon ha pagtuman han sugo ha aton han Dios. Sugad man, kon igindidiri han gobyerno an aton mga katirok, maaramon nga nagkakatirok kita ha gudtiay nga grupo.—Roma 13:1; Heb. 10:24, 25.
13. Ano an ginsiring ni Jesus mahitungod han pagpasakop ha mga may awtoridad?
13 Iginpatin-aw ni Jesus ha iya Sermon ha Bukid nga kinahanglan magpasakop ha awtoridad: “Kon may-ada tawo nga karuyag makigkalipungan ha imo, ngan kuhaon an imo panapton, ipabaya ha iya man an imo kurigmos. Ngan bisan hin-o an maglugos [magpirit] ha imo paglakat hin usa ka milya, upod ha iya hin duha.” (Mat. 5:40, 41) b Tungod han aton pagtagad ngan hingyap nga buligan an iba, ginbubuhat naton an labaw pa han ira ginhahangyo ha aton.—1 Kor. 13:5; Tito 3:1, 2.
14. Kay ano nga diri gud kita nagkukompromiso ha apostasya?
14 Bisan kon karuyag naton magpasakop, diri gud kita sadang magkompromiso ha mga apostata. Ginkikinahanglan an aton determinado ngan marig-on nga disposisyon may kalabotan hini basi matipigan an kaputli han kamatuoran ngan an pagkaurosa han kongregasyon. May kalabotan ha palso nga “kabugtoan,” hi Pablo nagsurat: “Ha ira waray kami tugot hin pagpasakop, bisan ha usa ka oras; basi nga an kamatuoran han maopay nga sumat magpadayon ha iyo.” (Gal. 2:4, 5) Usahay kon nahitatabo an apostasya, an maunungon nga mga Kristiano nagpapabilin nga marig-on ha kon ano an husto.
An mga Paramangno Kinahanglan Magin Makatadunganon
15. Ha ano nga paagi nagpapakita hin pagkamakatadunganon an mga tigurang kon naghihisgot hira?
15 Usa han mga kwalipikasyon ha ginpipili sugad nga paramangno amo an pagin makatadunganon. Hi Pablo nagsurat: “An paramangno kon sugad kinahanglan nga . . . makatadunganon.” (1 Tim. 3:2, 3, NW) Importante ini labi na kon naghihisgot hira hin mga butang may kalabotan ha kongregasyon. Antes maghimo hin desisyon, an tagsa ha ira may kagawasan nga igpahayag hin matin-aw an iya opinyon, kondi diri kinahanglan nga buhaton ito han tagsa nga tigurang. Durante han paghisgot, an opinyon han usa mahimo magbag-o samtang nababatian niya an naaplikar nga mga prinsipyo ha Kasuratan nga gin-uunabi han iba. Imbes nga kumontra ngan ipirit an iya kalugaringon nga opinyon, an hamtong nga tigurang nagtatagad ha opinyon han iba. Ha tinikangan han paghisgot, bangin iba-iba an ira opinyon, kondi an pagpamalandong ngan pag-ampo nabulig nga magkaurosa an mapainubsanon ngan makatadunganon nga mga tigurang.—1 Kor. 1:10; basaha an Efeso 4:1-3.
16. Ano an sadang pangalimbasogan han mga tigurang?
16 Ha ngatanan nga buruhaton, an Kristiano nga tigurang sadang mangalimbasog ha pagsuporta han teokratiko nga kahikayan. An pagin makatadunganon sadang makita bisan ha iya pagmangno ha panon; nabulig ito ha iya nga magin matinagaron ngan buotan ha ira. Hi Pedro nagsurat: “Pasabsaba niyo an panon han Dios nga aada ha iyo, pagbantayan niyo, diri nga sugad hin linugos [napipiritan], kondi ha iyo kalugaringon nga kaburut-on, . . . diri tungod ha mahugaw nga salapi, kondi ha maandamon nga painoino.”—1 Ped. 5:2.
17. Paonan-o magpapakita hin pagin matinagaron ha iba an ngatanan ha kongregasyon?
17 An mga edaran na nga membro han kongregasyon nagpapasalamat gud ha mapulsanon nga bulig han mga batan-on ngan ha may-dignidad nga pagtratar ha ira. Gintatahod liwat han mga batan-on an mga edaran nga damu ka tuig na an eksperyensya ha pag-alagad kan Jehova. (1 Tim. 5:1, 2) Namimiling an mga tigurang hin kwalipikado nga kalalakin-an nga ira matataporan hin mga responsabilidad, ngan ginbabansay hira ha pagmangno ha panon han Dios. (2 Tim. 2:1, 2) Sadang pabilhan han tagsa nga Kristiano an giniyahan nga sagdon ni Pablo: “Magtuman ngan magpasakop kamo ha iyo mga magmarando: kay nagmamangno hira tungod ha iyo mga kalag, sugad nga hira an maghahatag hin kahusayan; basi nga pagbuhaton ini nira ha kalipayan; ngan diri ha kasakitan: kay ini mawawaray kapulsanan ha iyo.”—Heb. 13:17.
Magin Mapinasakupon Sugad nga Membro han Pamilya
18. Kay ano nga sadang magin mapinasakupon ngan makatadunganon ha sulod han pamilya?
18 An mga membro han pamilya kinahanglan liwat magin mapinasakupon ngan makatadunganon. (Basaha an Kolosas 3:18-21.) Iginsasaysay han Biblia an mga responsabilidad han tagsa nga membro han pamilya. An amay amo an ulo han iya asawa ngan an siyahan nga responsable ha pagtutdo ha mga anak. Sadang tahuron han asawa an awtoridad han iya bana, ngan an mga anak sadang magin masinugtanon—paggawi nga nakakalipay gud ha Ginoo. Makakabulig an tagsa nga membro han pamilya ha pagkaurosa ngan kamurayawan han panimalay pinaagi han pagin makatadunganon ngan mapinasakupon ha timbang nga paagi. May-ada pipira nga ehemplo ha Biblia nga nagpapatin-aw hito nga punto.
19, 20. (a) Isaysay an pagkaiba han ginbuhat ni Eli ngan ni Jehova may kalabotan ha pagpasakop ngan pagkamakatadunganon. (b) Ano nga mga leksyon an mahibabaroan han mga kag-anak tikang hini nga mga ehemplo?
19 Han bata pa hi Samuel, hi Eli an hitaas nga saserdote ha Israel. Kondi, an iya mga anak nga hira Opni ngan Pinees waray pulos ngan “waray hira kilala kan Jehova.” Hi Eli nakabati hin magraot nga sumat mahitungod ha ira, upod na an ira pakighilawas ha kababayin-an nga nagsiserbi ha ganghaan han tolda nga katirokan. Ano an iya ginbuhat? Ginsidngan hira ni Eli nga kon nakasala hira kan Jehova, waray mag-aampo para ha ira. Kondi waray niya sawaya ngan disiplinaha hira. Salit an iya mga anak nagpadayon ha ira maraot nga buhat. Ha kataposan, nagdesisyon hi Jehova nga takos hira han sirot nga kamatayon. Han mahibaro hi Eli nga patay na hira, hiya liwat namatay. Makasurubo gud nga resulta! Sayop gud an pagkonsinter ni Eli ha ira magraot nga buhat—tungod kay iya gintugotan hira nga magpadayon.—1 Sam. 2:12-17, 22-25, 34, 35; 4:17, 18.
20 Kabaliktaran ha ginbuhat ni Eli, tagda an pagtratar han Dios ha iya mga anghel. Nakita ni propeta Mikaya ha bisyon nga hi Jehova nakigkatirok ha Iya mga anghel. Nagpakiana Hiya kon hin-o ha ira an makakalimbong kan Hadi Ahab han Israel basi mapukan iton maraot nga hadi. Namati hi Jehova ha mga suhestyon han iya espirituhanon nga mga anak. Katapos usa nga anghel an nagsiring nga hiya an magbubuhat hito. Ginpakianhan hiya ni Jehova kon paonan-o. Tungod kay natagbaw, ginsugo Niya an anghel nga buhaton ito. (1 Hadi 22:19-23) Tikang hini nga asoy, diri ba sadang mahibaro hin leksyon mahitungod ha pagpasakop an mga membro han pamilya dinhi ha tuna? Sadang tagdon han Kristiano nga bana ngan amay an mga ideya ngan suhestyon han iya asawa ngan mga anak. Ha luyo nga bahin, kon an asawa ngan mga anak magpapahayag han ira opinyon o suhestyon, kinahanglan tahuron nira an desisyon han ulo han pamilya tungod kay hiya an ginhatagan hin awtoridad uyon ha Kasuratan.
21. Ano an paghihisgotan ha masunod nga artikulo?
21 Nagpapasalamat gud kita ha mahigugmaon ngan maaramon nga mga pahinumdom ni Jehova nga magin mapinasakupon! (Sal. 119:99) Paghihisgotan ha masunod nga artikulo kon paonan-o makakabulig han kalipay ha pag-asawa an pagin mapinasakupon ha timbang nga paagi.
[Mga footnote]
a Gumamit hi apostol Pablo hin pulong nga makuri ihubad ha usa la ka pulong. Usa nga reperensya an nasiring: “Nahiuupod [ha pagkamakatadunganon] an pagkadisidido nga diri ipirit an mga katungod han usa ngan an pagpakita hin pagtagad ngan pagkabuotan ha iba.” Salit ito nga pulong nangangahulogan hin pagin matinagaron ngan makatadunganon, diri nag-iinsister nga istrikto nga sundon an balaud o diri iginpipirit an katungod han usa.
b Basaha an artikulo nga “Kon Ginpipirit Ka ha Pagserbisyo,” ha An Barantayan han Pebrero 15, 2005, pahina 23-6.
Ano an Imo Baton?
• Ano an mag-opay nga resulta han pagin makatadunganon ngan timbang?
• Paonan-o nagpapakita hin pagpasakop ngan pagkamakatadunganon an mga paramangno?
• Kay ano nga an mga membro han pamilya kinahanglan magin mapinasakupon ngan makatadunganon?
[Mga Pakiana]
[Retrato ha pahina 4]
Ginsusubad han mga tigurang an maloloy-on nga pagtratar ni Jesus ha panon
[Retrato ha pahina 6]
Kon naghihisgot an mga tigurang, an pagpamalandong, pag-ampo ngan pagkamakatadunganon nakakabulig han pagkaurosa