Malipay ha Imo Pag-asawa
Malipay ha Imo Pag-asawa
“Pinaagi han kinaadman an usa nga balay gintukod; ngan pinaagi han sarabotan ini ginparig-on.”—PROB. 24:3.
1. Ano an nasantop han Dios nga nagpapakita han iya kinaadman may kalabotan ha siyahan nga lalaki?
AN ATON makinaadmananon nga Amay ha langit maaram kon ano an maopay para ha aton. Pananglitan, nasantop niya nga basi matuman an iya katuyoan, “diri maopay nga an lalaki mag-uusahan la” ha hardin han Eden. Usa han importante nga bahin hito nga katuyoan amo an pagpanganak han mga mag-asawa ngan ‘pun-on an tuna.’—Gen. 1:28; 2:18.
2. Ano an ginhikay ni Jehova para ha kaopayan han katawohan?
2 “Ako maghihimo hin iya kabulig,” sugad nga iya kapadis, siring ni Jehova. Salit ginpakaturog han Dios an siyahan nga lalaki, ngan ginkuha ha iya hingpit nga lawas an usa nga gusok ngan ginhimo ito nga babaye. Han gindara ni Jehova inin hingpit nga babaye nga hi Eva, kan Adan, hiya nagsiring: “Ini yana tul-an han akon mga tul-an, ngan unod han akon unod: hiya pagngangaranan nga Babaye, kay hiya kinuha tikang ha lalaki.” Hi Eva kapadis gud ni Adan. An tagsa ha ira may-ada naiiba nga mga kinaiya ngan kalidad, kondi pariho hira hingpit ngan ginhimo ha dagway han Dios. Hito nga paagi ginhikay ni Jehova an siyahan nga pag-asawa. Kinarawat dayon nira Adan ngan Eva ini nga kahikayan han Dios nga makakabulig ha ira.—Gen. 1:27; 2:21-23.
3. Ano an opinyon han damu nga tawo ha regalo nga pag-asawa, ngan ano nga mga pakiana an nabangon?
3 Makasurubo, kalyap yana an rebelyoso nga disposisyon. An mga problema nga nahihimo hito diri tikang ha Dios. Gintatamay han damu nga tawo an regalo han Dios nga pag-asawa. Para ha ira diri na ito uso ngan nagigin hinungdan han kasubo ngan problema. Damu nga mag-asawa an nagbubulag. Bangin waray ipaabat ha mga anak an tinuod nga gugma ngan bangin gamiton hira para ha kalugaringon nga bentaha han ira mga kag-anak. Damu nga kag-anak an diri nagpapaubos, bisan kon magriresulta ito hin kamurayawan ngan pagkaurosa. (2 Tim. 3:3) Paonan-o, kon sugad, matitipigan an kalipay ha pag-asawa dinhi hinin peligroso nga panahon? Ano an naibubulig han pagpasakop ha giya ni Jehova basi mapugngan an pagbulag han mag-asawa? Ano an mahibabaroan naton ha mga susbaranan yana nga nagtitipig han kalipay ha ira pag-asawa?
Magpasakop ha Giya ni Jehova
4. (a) Ano an iginsagdon ni Pablo mahitungod han pag-asawa? (b) Paonan-o ginsusunod han masinugtanon nga mga Kristiano an sagdon ni Pablo?
4 Hi apostol Pablo nagsagdon ha mga balo nga kon karuyag nira mag-asawa utro, kinahanglan nga “ha Ginoo la.” (1 Kor. 7:39) Diri tapáng hini an mga Kristiano nga sakop hadto han Judaismo. An Balaud han Dios ha Israel matin-aw nga nagsugo nga ‘diri hira makig-asawa’ hin tikang ha pagano nga mga nasud. Iginpatin-aw pa ni Jehova kon kay ano nga peligroso an pagtalapas hini nga sugo. “Kay [an diri-Israelita] magpapahirayo han imo anak nga lalaki tikang ha pagsunod ha akon, nga hira mag-alagad hin lain nga mga dios-dios: busa nga an kasina ni Jehova maglalaga patok ha iyo, ngan hiya maggunaw ha imo ha kadagmitan.” (Deut. 7:3, 4) Ano an ginlalaoman ni Jehova ha iya mga surugoon yana may kalabotan ha pagpili hin maarasawa? Matin-aw, sadang hiya magpili hin maarasawa “ha Ginoo la,” usa nga dedikado ngan bawtismado nga Saksi. Maaramon an pagpasakop ha giya ni Jehova may kalabotan hini.
5. Ano an pagtagad ni Jehova ngan han inasaw-an nga mga Kristiano ha mga saad ha pag-asawa?
5 Sagrado an pagtagad han Dios ha mga saad ha pag-asawa. May kalabotan ha siyahan nga mag-asawa, an Anak han Dios nga hi Jesus, nagsiring: “An gintig-ob han Dios, diri pagbulagon han tawo.” (Mat. 19:6) An salmista nagpapahinumdom ha aton han pagkaseryoso han pagsaad: “Paghatag ngadto ha Dios hin halad ha pagpasalamat; ngan bayad han imo mga saad ngadto ha Gihitaasi.” (Sal. 50:14) Bisan kon an ginkakasal posible nga makaeksperyensya hin duro nga kalipay ha ira pag-asawa, seryoso ngan nag-uupod hin responsabilidad an ira mga saad.—Deut. 23:21.
6. Ano an mahibabaroan naton ha susbaranan ni Jepte?
6 Tagda an ginbuhat ni Jepte nga hukom ha Israel han ika-12 ka siglo A.K.P. Nagsaad hiya kan Jehova: “Kon ha pagkatinuod imo itubyan an mga anak ni Amon ha akon kamot, dida hito mahinanabo, nga bisan ano nga gumawas tikang ha mga ganghaan han akon balay pagsugat ha akon, kon umuli na ako ha malinawon tikang ha mga anak ni Amon, ini makakan Jehova, ngan akon ini ihahalad para ha usa ka halad nga sinunog.” Han an iya daraga, an iya bugtong nga anak an tinapo han pag-uli niya ha Mispa, nagruhaduha ba hiya ha pagtuman han iya saad? Waray. Hiya nagsiring: “Binungat ko an akon baba ngadto kan Jehova, ngan diri ako makakabakwi.” (Huk. 11:30, 31, 35) Gintuman ni Jepte an iya saad kan Jehova, bisan kon mangahulogan ito nga mawawad-an hiya hin tulin ngan manurunod. Magkaiba an saad ni Jepte ngan an mga saad ha kasal, kondi an iya pagtuman hito maopay nga susbaranan para ha Kristiano nga mag-asawa may kalabotan ha ira mga saad.
Paonan-o Maglalampos an Pag-asawa?
7. Ano nga mga pagpahiuyon an kinahanglan himoon han bag-o la nga mag-asawa?
7 Damu nga mag-asawa an malipayon nga gindudumdom an panahon nga mag-uyab pa la hira. Makalilipay gud makilala an ira maarasawa! Kon mas agsob nga magkaupod hira, nagigin mas duok hira. Kondi, kon nag-asawa man hira tungod kay higugmaon nira an usa kag usa o ginbut-an la hira, importante gud an paghimo hin mga pagpahiuyon. Usa nga bana an nagsiring: “Han bag-o la kami nga mag-asawa, nagin problema namon an pagtagad ha opinyon han kada tagsa. Nakurian kami nga ibutang ha husto nga lugar an amon relasyon ha amon kasangkayan ngan mga paryente.” Usa pa nga bana hin 30 ka tuig na an nakasantop han bag-o pa la hiya nga inasaw-an nga basi magin timbang, kinahanglan hunahunaon liwat niya an iya asawa. Antes kumarawat hin imbitasyon o obligasyon, nakikigsabot hiya ha iya asawa ngan katapos, nagdidesisyon nga gintatagad an kaopayan nira nga duha. Ha sugad nga sitwasyon, nakakabulig an pagin matinagaron.—Prob. 13:10.
8, 9. (a) Kay ano nga importante an maopay nga komunikasyon? (b) Ha ano nga mga kahimtang makakabulig an pagpauyon-uyon, ngan kay ano nga sadang buhaton ito?
8 Usahay gintitig-ob han pag-asawa an duha nga magkaiba an kultura. Labi nga nagkikinahanglan ini hin abrido nga komunikasyon. Iba-iba an paagi han pagkomunikar. Mas makikilala mo an imo padis kon oobserbahan mo an iya paagi han pakiistorya ha iya mga paryente. Usahay, nahibabaroan an aada ha hunahuna han tawo diri ha iya ginsisiring kondi kon paonan-o niya ito ginsisiring. Ngan posible nga damu an mahibabaroan ha mga gios la. (Prob. 16:24; Kol. 4:6) Importante an hilarom nga pagsabot basi magin malipayon.—Basaha an Proberbios 24:3.
9 May kalabotan ha pagpili hin hilangkagan ngan pagpahalibway, damu an nakakaobserba nga importante an pagin mapauyon-uyon. Antes mag-asawa, an imo padis bangin may panahon ha isport o iba pa nga pagpahalibway. Angay ba yana maghimo hin pagpahiuyon? (1 Tim. 4:8) Mahimo liwat tagdon ini nga pakiana may kalabotan ha paghatag hin panahon ha mga paryente. Syempre, an mag-asawa kinahanglan may-ada panahon ha espirituwal ngan iba pa nga buruhaton.—Mat. 6:33.
10. Paonan-o an pagin matinagaron nakakabulig ha maopay nga relasyon han mga kag-anak ngan inasaw-an nga mga anak?
10 Kon nag-aasawa an lalaki, nabaya hiya ha iya mga kag-anak, sugad man an babaye. (Basaha an Genesis 2:24.) Bisan pa hito, kinahanglan pa gihapon nira sundon an sugo han Dios nga tahuron an amay ngan iroy. Salit bisan kon mag-asawa na, maggagahin hira hin panahon nga makaupod an ira mga kag-anak ngan kapamilya. Usa nga bana nga 25 ka tuig na nga inasaw-an an nagsiring: “Usahay, makuri an pagturutimbang kon paonan-o tatagdon an mga karuyag ngan panginahanglan han imo padis ngan han iya pamilya. Ha pagsulbad hito, nakabulig gud ha akon an Genesis 2:24. Takos han pagkamaunungon ngan pagmangno an mga kapamilya, kondi nasabtan ko tikang hini nga bersikulo nga an pagkamaunungon ha akon asawa an sadang ko unahon.” Tungod hito, tatahuron han matinagaron nga Kristiano nga mga kag-anak an ira inasaw-an nga mga anak nga may-ada na kalugaringon nga pamilya, nga an bana an may katungod ha paggiya hito.
11, 12. Kay ano nga importante ha mag-asawa an panpamilya nga pag-aram ngan an pag-ampo?
11 Importante an maopay nga rutina han panpamilya nga pag-aram. Pinamamatud-an ito han damu nga Kristiano nga pamilya. Bangin makuri an pag-establisar o pagpadayon hito nga pag-aram. Usa nga ulo han pamilya an nagsiring: “Kon maibabalik ngan mababag-o la namon an naglabay, sisiguruhon namon nga sundon an maopay nga rutina han panpamilya nga pag-aram tikang han nag-asawa kami.” Nagsiring pa hiya: “Makaruruyag gud nga regalo nga makita an kalipay han akon asawa kon nadadasig hiya han kamatuoran han Biblia nga hinbabaroan namon ha amon pag-aram.”
12 Makakabulig liwat an pag-ampo nga magkaupod. (Roma 12:12) Kon an mag-asawa nagkakauyon ha pagsingba kan Jehova, an ira duok nga relasyon ha Dios makakaparig-on han bugkos han ira pag-asawa. (Jak. 4:8) Usa nga Kristiano nga bana an nagsiring: “An pangaro dayon hin pasaylo ha mga sayop ngan pag-unabi hito kon magkaupod nga nag-aampo, usa nga paagi ha pagpakita hin sinsero nga kasubo ha bisan gutiay la nga butang nga nakapasina ha iya.”—Efe. 6:18.
Magin Matinagaron Sugad nga Mag-asawa
13. Ano an iginsagdon ni Pablo may kalabotan ha duok nga relasyon ha pag-asawa?
13 Kinahanglan likyan han inasaw-an nga mga Kristiano an mga buhat nga nakakadaot ha relasyon han mag-asawa, sugad hadton kalyap ha kalibotan nga mahilig ha pakighilawas. Mahitungod hini, hi Pablo nagsagdon: “Kinahanglan tumanon han lalaki an iya katungdanan hin pagkabana, ngan tumanon liwat han babaye an iya katungdanan hin pagkaasawa. Diri magburuot an asawa han iya kalugaringon nga lawas, kondi an bana; diri liwat magburuot an bana han iya kalugaringon nga lawas, kondi an asawa.” Katapos, hi Pablo matin-aw nga nagsagdon: “Tumana niyo an katungdanan hin kamag-asawa, gawas la kon daan niyo ginsabotan nga duha nga diri anay kamo magtutuman.” Kay ano? “Basi magamit an iyo panahon hin pag-ampo; kondi katapos, pagtuman na liwat kamo basi diri kamo masulay ni Satanas tungod han kakulang niyo hin pagpugong han iyo kalugaringon.” (1 Kor. 7:3-5, Maopay nga Sumat nga Biblia) Ha pag-unabi han pag-ampo, ipinapakita ni Pablo an mga prayoridad han Kristiano. Kondi iginpatin-aw liwat niya nga an inasaw-an nga Kristiano sadang magin matinagaron ha pisikal ngan emosyonal nga panginahanglan han iya padis.
14. Paonan-o an mga prinsipyo ha Kasuratan naaplikar may kalabotan ha duok nga relasyon ha pag-asawa?
14 Kinahanglan diri mag-alang an mag-asawa ha usa kag usa ngan sadang masantop nira nga an kakulang hin pagtagad hinin duok nga relasyon mahimo magresulta hin mga problema. (Basaha an Filipos 2:3, 4; itanding an Mateo 7:12.) Ini an nahitatabo ha mag-asawa kon an usa ha ira diri-Saksi. Bisan kon may-ada diri-pagsinabtanay, mapapauswag han Kristiano an kahimtang pinaagi han maopay nga paggawi, pagkabuotan, ngan pagbinuligay. (Basaha an 1 Pedro 3:1, 2.) An gugma kan Jehova ngan ha imo padis, upod an pagin matinagaron, mabulig hini nga bahin han pag-asawa.
15. Ano an naibubulig han pagtahod ha malipayon nga pag-asawa?
15 Ha iba liwat nga bahin, tatahuron han buotan nga bana an iya asawa. Pananglitan, magigin makonsiderasyon hiya ha iya mga pagbati, bisan ha gudtiay nga butang. Usa nga bana ha sulod hin 47 ka tuig na an nagsiring: “Ginpapangalimbasogan ko pa gihapon nga mahibaro may kalabotan hini.” Ginsasagdonan an Kristiano nga mga asawa nga magkaada hilarom nga pagtahod ha ira bana. (Efe. 5:33) Diri nagpapakita hin pagtahod an pagpakaraot ha ira bana ngan an pagsumat han ira mga sayop ha iba. An Proberbios 14:1 nagpapahinumdom ha aton: “An tagsa nga babaye nga makinaadmananon nagtutukod han iya balay; kondi an lurong naggagabot hini pinaagi han iya kalugaringon nga mga kamot.”
Ayaw Pagpadaog ha Yawa
16. Paonan-o maiaaplikar han mag-asawa an Efeso 4:26, 27?
16 “Kasina, kondi ayaw pakasala; diri katunoran han adlaw an iyo kasina; diri niyo tagan hin lugar an Yawa.” (Efe. 4:26, 27) Kon iaplikar, mabulig ini ha aton nga masulbad o malikyan an diri-pagkauyon han mag-asawa. “Waray gud ako nahinunumdoman nga diri-pagkauyon namon nga mag-asawa nga waray namon pag-istoryahi bisan kon abotan kami hin pipira ka oras ha pagsulbad hito,” siring han usa nga asawa. Han bag-o la hira nga mag-asawa, nagsabot hira nga susulbaron gud nira an diri-pagsinabtanay hito mismo nga adlaw. “Anoman an problema, nagdesisyon kami nga magpasaylo ngan kalimtan ito ngan malipayon nga tikangan an tagsa nga adlaw.” Hito nga paagi waray nira ‘hatagi hin lugar an Yawa.’
17. Bisan kon an mag-asawa baga hin diri magkabagay, ano an mahimo makabulig?
17 Kondi kumusta man kon nakaasawa ka hin diri mo kabagay? Bangin an iyo relasyon diri sugad karomantiko ha relasyon han iba nga mag-asawa. Kondi, mabulig ha imo an paghinumdom han pagtagad han Maglalarang ha bugkos han pag-asawa. Hi Pablo nagsagdon ha mga Kristiano: “Pagpakabantuganon han ngatanan an pag-asawa, ngan an higdaan diri paghugawan; kay an mga makihihilawason ngan an mga paralibog paghuhukman han Dios.” (Heb. 13:4) Ngan diri sadang igbalewaray ini: “An tinulotulo nga lubid diri mauutod ha hinanali.” (Ekles. 4:12) Kon an mag-asawa nagtatagad gud ha pagbaraan han ngaran ni Jehova, mas nagigin duok hira ha usa kag usa ngan ha Dios. Kinahanglan mangalimbasog hira nga magmalampuson an ira pag-asawa, tungod kay magigin kadayawan ini ni Jehova, an Nagpatikang han pag-asawa.—1 Ped. 3:11.
18. Ano an masisiguro mo may kalabotan ha pag-asawa?
18 Makakasiguro ka nga posible gud magmalipayon an mga Kristiano ha pag-asawa. Nagkikinahanglan ito hin pangalimbasog ngan pagpakita hin Kristiano nga mga kalidad, nga usa hito amo an pagin matinagaron. Ha mga kongregasyon han mga Saksi ni Jehova ha bug-os nga kalibotan yana, damu hinduro nga mag-asawa an nagpapamatuod nga mahihimo ito.
Ano an Imo Baton?
• Kay ano nga posible an malipayon nga pag-asawa?
• Ano an makakabulig basi maglampos an pag-asawa?
• Ano nga mga kalidad an kinahanglan makultibar han mag-asawa?
[Mga Pakiana]
[Retrato ha pahina 9]
Nagsasabot hin maopay an mag-asawa antes kumarawat hin imbitasyon o obligasyon
[Retrato ha pahina 10]
Pangalimbasog nga masulbad an diri-pagsinabtanay hito mismo nga adlaw, ‘diri tinatagan hin lugar an Yawa’