Namamati hi Jehova ha Aton Pangaro hin Bulig
Namamati hi Jehova ha Aton Pangaro hin Bulig
“An mga mata ni Jehova ngadto ha mga magtadong, ngan binubuka niya iton iya talinga ngadto ha ira singgit [ha pangaro hin bulig].”—SAL. 34:15.
1, 2. (a) Ano an inaabat han kadam-an yana? (b) Kay ano nga diri kita nahipapausa hini?
NAG-AANTOS ka ba hin kasakitan? Kon amo, diri ka nag-uusahan. Minilyon an nangangalimbasog nga malamposan an adlaw-adlaw nga kakurian ha pagkinabuhi hinin maraot nga sistema. Para ha iba, baga hin diri ito maiilob. Inaabat gud nira an inabat ni salmista David, nga nagsurat: “Kinakapoy na gud ako ngan nahirugmok na; masakit an akon kasingkasing ngan nag-aaraba ako hin kamaul-ol. Makusog an pagputok han akon kasingkasing, nawara na an akon kusog, ngan nawad-an na hin kapawa an akon mga mata.”—Sal. 38:8, 10, Maopay nga Sumat nga Biblia.
2 Sugad nga mga Kristiano, diri kita nahipapausa ha kasakitan han kinabuhi. Maaram kita nga an “mga kasakitan” bahin han igintagna nga tigaman han presensya ni Jesus. (Mar. 13:8; Mat. 24:3) An orihinal nga pulong nga iginhubad nga “mga kasakitan” nagtutudlok ha duro nga kaul-ol kon nanganganak. Husto gud ito nga paghulagway han duro nga pag-antos han mga tawo hinin “magpakalilisang” nga panahon nga makuri gud pakibagayan!—2 Tim. 3:1.
Nasasabtan ni Jehova an Aton Kasakitan
3. An katawohan han Dios maaram gud han ano?
3 An katawohan ni Jehova maaram gud nga apektado liwat hira hini nga kasakitan, ngan posible gud nga magtikakuri pa ini. Labot la han naieksperyensyahan han katawohan ha kabug-osan, kinahanglan liwat naton atohan an “kaaway nga amo an Yawa,” nga determinado ha pagdaot han aton pagtoo. (1 Ped. 5:8) Maaabat gud naton an inabat ni David: “An pagyubit nakaruba han akon kasingkasing; ngan puno ako hin kabug-atan: Ngan namiling ako hin pira dida nga mga tawo nga sadang malooy, kondi waray bisan usa; ngan hin parapanliaw, kondi waray ako makaagi”!—Sal. 69:20.
4. Ano an nakakaliaw ha aton kon nag-aantos kita hin kasakitan?
4 Karuyag ba sidngon ni David nga waray na hiya paglaom? Diri. Tigamni an iya dugang nga ginsiring: “Hi Jehova nabati han makinurion, ngan diri nagtatamay han mga bilanggo.” (Sal. 69:33) Usahay inaabat naton nga sugad hin priso kita nga bihag han kasakitan o kakurian. An iba baga hin diri gud nakakasabot han aton kahimtang. Kondi pariho kan David, maliliaw kita nga bug-os nga nasasabtan ni Jehova an aton kasakitan.—Sal. 34:15.
5. Ha ano sinarig hi Hadi Salomon?
5 Ginpabug-atan ini han anak ni David nga hi Salomon han iginpahinungod an templo ha Jerusalem. (Basaha an 2 Kronikas 6:29-31.) Nanginyupo hiya kan Jehova nga pamatian an pag-ampo han tagsa nga tangkod-an-kasingkasing nga nadaop ha Iya may kalabotan han “iya kalugaringon nga sirot ngan iya kalugaringon nga kabidoan.” Ano an reaksyon han Dios ha mga pag-ampo han nagsasakit? Iginpahayag ni Salomon an iya pagsarig nga an Dios diri la mamamati han ira pag-ampo kondi mabulig liwat ha ira. Kay ano? Tungod kay maaram gud hiya kon ano an aada ha “kasingkasing han mga anak han mga tawo.”
6. Paonan-o naton malalamposan an kabaraka, ngan kay ano nga posible ito?
6 Mahimo liwat kita mag-ampo kan Jehova may kalabotan ha ‘aton kalugaringon nga sirot ngan kabidoan,’ ngan ha aton kasakitan. Sadang kita maliaw nga nasasabtan niya an aton kasakitan ngan nagtatagad hiya ha aton. Ginpamatud-an ini ni apostol Pedro, hiya nagsiring: “Ibutang niyo ha iya an ngatanan niyo nga pangarit, kay hiya nagmamangno ha iyo.” (1 Ped. 5:7) Interesado hi Jehova kon ano an nahitatabo ha aton. An mahigugmaon nga pagmangno ni Jehova ginpabug-atan ni Jesus: “Diri ba iginbaligya an duha nga tamsihay hin usa nga guti [nga sinselyo]? Ngan waray usa ha ira, nga nahuhulog ha tuna, nga waray hibaroi han iyo Amay. Kondi an mga buhok han iyo ulo naisip na ngatanan. Busa, diri kamo mahadlok; maromahal pa kamo han damu nga mga katamsihan.”—Mat. 10:29-31.
Sarig ha Bulig ni Jehova
7. Sigurado kita han ano nga bulig?
7 Sigurado gud kita nga hi Jehova disidido ngan makakabulig ha aton kon naatubang kita hin kasakitan. “An Dios amo an aton arayopan ngan an aton kusog, an parabulig gud ha panahon han kakurian.” (Sal. 34:15-18; 46:1) Paonan-o nabulig an Dios? Tagda an ginsiring ha 1 Korinto 10:13: “An Dios matinumanon, nga diri matugot nga pagsulayon kamo labaw ha iyo kasadangan; kondi upod ha pagsulay mahatag liwat hiya hin katigayonan ha paglikay, basi nga kamo makahimo ha pag-antos.” Mahimo ni Jehova wad-on an aton kakurian, o hatagan kita hin ginkikinahanglan nga kusog basi makailob. Anoman an kahimtang, ginbubuligan kita.
8. Paonan-o kita magpapahimulos han bulig han Dios?
8 Paonan-o kita magpapahimulos hito nga bulig? Tigamni kon ano an iginsagdon ha aton: “Ibutang niyo ha iya an ngatanan niyo nga pangarit.” Nangangahulogan ini nga ha simboliko nga paagi, iginhahatag naton kan Jehova an ngatanan nga kabaraka ngan problema. Nangangalimbasog kita nga diri na mabaraka ngan padayon nga nasarig ha iya ha paghatag han aton mga panginahanglan. (Mat. 6:25-32) Ito nga pagsarig nagkikinahanglan hin pagpaubos—diri nasarig ha aton kalugaringon nga kusog o kinaadman. Pinaagi han aton pagpaubos “ilarom han makagagahum nga kamot han Dios,” kinikilala naton an aton ubos nga kahimtang. (Basaha an 1 Pedro 5:6.) Sugad nga resulta, nabulig ini ha aton nga malamposan an anoman nga igintutugot han Dios nga mahitabo. Hingyap naton nga masulbad dayon an mga problema, kondi nasarig kita nga maaram gud hi Jehova kon san-o ngan paonan-o hiya magios para ha aton.—Sal. 54:7; Isa. 41:10.
9. Ano nga “dinara” an kinahanglan ihatag ni David kan Jehova?
9 Hinumdumi an ginsiring ni David nga nakarekord ha Salmo 55:22: “Ibutang an imo dinara ha bawbaw ni Jehova, ngan ikaw iya bubuligan; diri gud hiya makakailob nga pagkikiwahon an matadong.” Han iginsurat niya ito, duro an iya kasakit. (Sal. 55:4) Posible nga iginsurat ini han an iya anak nga hi Absalon nagplano ha pag-agaw han iya pagkahadi. Binulig hito nga pagkunsabo an iya pinakamasasarigan nga magsaragdon nga hi Ahitopel. Salit, kinahanglan pumalagiw hi David ha Jerusalem. (2 Sam. 15:12-14) Bisan hiton makuri nga kahimtang, padayon nga tinapod hiya ha Dios, ngan ginbuligan gud hiya.
10. Ano an kinahanglan naton buhaton kon nag-aantos hin kasakitan?
10 Pariho kan David, importante nga mag-ampo kita kan Jehova may kalabotan ha anoman nga kasakitan nga aton gin-aantos. Tagdon naton an igin-aghat ha aton ni apostol Pablo. (Basaha an Filipos 4:6, 7.) Ano an magigin resulta hiton sinsero nga pag-ampo? “An kamurayawan han Dios, nga labaw ha ngatanan nga hibabroan, magbabantay ha [aton] mga kasingkasing ngan ha [aton] mga hunahuna kan Kristo Jesus.”
11. Paonan-o an “kamurayawan han Dios” nagpapanalipod han aton kasingkasing ngan hunahuna?
11 Mababag-o ba an imo kahimtang pinaagi han pag-ampo? Posible. Kondi, sadang karawaton naton nga diri ngatanan nga aton igin-aampo pirme ginbabaton ni Jehova ha paagi nga aton karuyag. Bisan pa hito, an pag-ampo nabulig ha aton nga matipigan an pagin timbang, basi diri kita madaog han aton kasakitan. “An kamurayawan han Dios” magpaparig-on ha aton kon nabubug-atan kita. Pariho hin kasundalohan nga nagpapanalipod han syudad kontra ha mabangis nga pag-atake, “an kamurayawan han Dios” magpapanalipod ha aton kasingkasing ngan hunahuna. Mabulig liwat ito ha aton nga malamposan an aton pagruhaduha, kahadlok, ngan pagin negatibo ngan magpupugong ha aton nga gumios hin paturotigda ngan diri maaramon.—Sal. 145:18.
12. Paghatag hin ehemplo kon paonan-o an usa magkakaada hin kamurayaw ha hunahuna.
12 Paonan-o kita magkakaada kamurayaw ha hunahuna samtang nag-aantos hin kasakitan? Tagda an usa nga ehemplo nga may kaparihoan han aton kahimtang. Mapintas an manidyer han usa nga empleyado. Kondi, nagkaada hiya higayon nga isumat an iya pagbati ha tag-iya han kompanya, nga buotan ngan makatadunganon. Ginpasarig han tag-iya an empleyado nga nasasabtan niya an kahimtang ngan nagsiring nga paiiwason na an manidyer. Ano an inabat han empleyado? Tungod kay natoo hiya hito nga pasarig ngan maaram han mahitatabo, magpaparig-on ito han iya determinasyon nga magpadayon, bisan kon mag-antos la anay han makuri nga kahimtang. Ha pariho nga paagi, maaram kita nga nasasabtan ni Jehova an aton kahimtang, ngan nagpapasarig hiya ha aton nga diri mag-iiha ‘an punoan hini nga kalibotan tatabugon ngadto ha gowa.’ (Juan 12:31) Nakakaliaw gud ito!
13. Labot ha pag-ampo, ano pa an kinahanglan naton buhaton?
13 Kon sugad, igo na ba nga isumat naton kan Jehova an aton mga problema pinaagi ha pag-ampo? Diri. May-ada pa sadang buhaton. Kinahanglan gumios kita uyon ha aton mga pag-ampo. Han hi Hadi Saul nagsugo hin kalalakin-an basi patayon hi David, hiya nag-ampo: “Bawia ako tikang ha akon mga kaaway, O Dios ko: Bayawa ako tikang ha ira nga natindog kontra ha akon. Bawia ako tikang ha mga magburuhat han karat-an, ngan luwasa ako tikang ha mga tawo nga inuhaw hin dugo.” (Sal. 59:1, 2) Labot ha pag-ampo, namati liwat hiya ha iya asawa ngan pinalagiw. (1 Sam. 19:11, 12) Ha pariho nga paagi, mahimo kita mag-ampo para hin praktikal nga kinaadman basi makabulig ha aton nga maatubang ngan posible nga mapagaan an aton kasakitan.—Jak. 1:5.
Kon Paonan-o Kita Magkakaada Kusog nga Makailob
14. Ano an makakabulig ha aton nga makailob kon nag-aantos hin kasakitan?
14 Bangin diri dayon mawara an aton kasakitan. Bangin magpadayon pa ngani ito hin pipira ka panahon. Kon ito an kahimtang, ano an mabulig ha aton nga makailob? Siyahan, hinumdumi nga kon padayon kita nga matinumanon nga nag-aalagad kan Jehova bisan pa han kakurian, nagpapamatuod ini han aton gugma ha iya. (Buh. 14:22) Tigamni an akusasyon ni Satanas may kalabotan kan Job: “Nahadlok ba hi Job han Dios ha waray la pamurulaton? Waray ba nimo himoi hiya ha palibot hin alad, ngan ha palibot han iya balay, ngan ha palibot han ngatanan nga iya, ha kada ligid? Imo ginbendisyonan an buhat han iya mga kamot, ngan an iya manggad ginpadamu dida ha tuna. Kondi bikyawa an imo kamot yana, ngan kamkama an ngatanan nga iya, ngan hiya magtatampalas ha imo ngada ha imo nawong”! (Job 1:9-11) Tungod han integridad ni Job, pinamatud-an niya nga buwa gud ito nga akusasyon. Pinaagi han aton pag-ilob ha kasakitan, may-ada liwat kita higayon nga pamatud-an nga buwaon hi Satanas. Sugad nga resulta, an aton pagpailob magpaparig-on han aton paglaom ngan pagsarig.—Jak. 1:4.
15. Ano nga mga susbaranan an makakaparig-on ha aton?
15 Ikaduha, tigamni nga “ini nga mga pag-antos natutuman man ha iyo mga kabugtoan nga aada ha kalibotan.” (1 Ped. 5:9) Oo, “waray pagsulay nga maabot ha iyo nga diri sadang maantos han tawo.” (1 Kor. 10:13) Hito nga paagi, nagkakaada ka kusog ngan kaisog pinaagi ha pagpamalandong ha mga susbaranan han iba imbes nga hunahunaon la an imo kakurian. (1 Tes. 1:5-7; Heb. 12:1) Hunahunaa an susbaranan han imo mga kakilala nga matinumanon nga nagpailob bisan kon nag-aantos hin duro nga kasakitan. Nagsaliksik ka na ba hin iginpublikar nga mga eksperyensya nga paropariho han nahitatabo ha imo? Posible nga magparig-on gud ito ha imo.
16. Paonan-o kita ginpaparig-on han Dios kon naatubang kita hin mga kagol-anan?
16 Ikatulo, hinumdumi nga hi Jehova an “Amay han ngatanan nga pagkalooy ngan Dios han ngatanan nga paglipay; nga hiya an naglilipay ha aton ha ngatanan nga aton mga kagol-anan, basi nga sadang man kita makapaglipay ha ngatanan nga aada ha bisan ano nga kagol-anan, pinaagi han paglipay nga iginlipay ha aton han Dios.” (2 Kor. 1:3, 4) Sugad hin sapit naton an Dios nga nagdadasig ngan nagpaparig-on ha aton, diri la ha aton mga kagol-anan yana kondi “ha ngatanan nga aton mga kagol-anan.” Nakakabulig ini ha aton nga liawon an iba nga “aada ha bisan ano nga kagol-anan.” Naeksperyensyahan mismo ni Pablo nga tinuod ini.—2 Kor. 4:8, 9; 11:23-27.
17. Paonan-o kita mabubuligan han Biblia ha paglampos han kasakitan?
17 Ikaupat, may-ada kita Pulong han Dios, an Biblia, nga “may kapulsanan man ha pagtututdoan, ha pagbadlong, ha pagsaway, ha panutdoan nga ha katadongan: basi nga an tawo han Dios mahingpit, ngan maandam tungod ha ngatanan nga maopay nga buhat.” (2 Tim. 3:16, 17) Diri la ito nabulig ha aton nga “mahingpit” ngan “maandam tungod ha ngatanan nga maopay nga buhat.” Nabulig liwat ito ha aton nga malamposan an kasakitan. An orihinal nga pulong nga iginhubad nga bug-os nga “maandam” literal nga nangangahulogan nga “nasangkapan.” Ginagamit ini nga pulong ha kadaan nga panahon mahitungod ha usa nga barko nga nasasangkapan han ngatanan nga kinahanglanon ha pagbiyahe o hin makina nga may-ada kapas ha paghimo han bisan ano nga puydi mahimo hito. Sugad man, iginhahatag ni Jehova pinaagi han iya Pulong an ngatanan nga aton ginkikinahanglan basi malamposan an anoman nga bangin mahitabo ha aton. Salit, makakasiring kita, “Kon igintugot ito han Dios, malalamposan ko ito pinaagi han Iya bulig.”
Katalwasan ha Ngatanan nga Aton Kasakitan
18. Ano an aton sadang hunahunaon basi mabuligan kita nga makailob nga matinumanon?
18 Ikalima, hunahunaa pirme nga diri na maiha, wawad-on ni Jehova an ngatanan nga kasakitan han katawohan. (Sal. 34:19; 37:9-11; 2 Ped. 2:9) Kon matuman na ito, an pagtalwas ha aton han Dios diri la nangangahulogan hin katalwasan ha kasakitan yana kondi higayon liwat nga magkaada kinabuhi nga waray kataposan, ha langit man kaupod ni Jesus o ha paraiso nga tuna.
19. Ha ano nga paagi mahihimo an matinumanon nga pagpailob?
19 Antes umabot ito, padayon kita nga naatubang hin makuri nga mga kahimtang hinin maraot nga sistema. Ginhahandom gud naton an panahon nga mawara na ini! (Sal. 55:6-8) Hinumdoman naton nga an aton matinumanon nga pag-ilob nagpapamatuod nga buwaon an Yawa. Hinaot magmarig-on kita pinaagi ha bulig han pag-ampo ngan han aton Kristiano nga kabugtoan, naghuhunahuna nga nakakaeksperyensya liwat hira hin pariho nga pagsari. Padayon nga magin maabtik ngan bug-os nga nasangkapan ha paggamit hin maopay han Pulong han Dios. Ayaw tuguti nga magluya an imo pagsarig ha mahigugmaon nga pagmangno nga igintatagana han “Dios han ngatanan nga paglipay.” Hinumdumi nga “an mga mata ni Jehova ngadto ha mga magtadong, ngan binubuka niya iton iya talinga ngadto ha ira singgit” ha pangaro hin bulig.—Sal. 34:15.
Ano an Imo Baton?
• Ano an inabat ni David ha iya kasakitan?
• Ano nga pagsarig an iginpahayag ni Hadi Salomon?
• Ano an makakabulig ha aton nga malamposan an igintutugot ni Jehova nga mahitabo?
[Mga Pakiana]
[Retrato ha pahina 13]
Sinarig hi Salomon nga bubuligan ni Jehova an Iya nagsasakit nga katawohan
[Retrato ha pahina 15]
Iginhatag ni David an iya dinara kan Jehova pinaagi ha pag-ampo ngan ginios uyon hito